سارة وعبدالله حكاية حب ماتت قبل ان تبدأ..للكآتبة "الريم شيخة الحريم"×كــاملهـ×

[هنوف الروح]

شخصيات القصه..

سارة...عبدالله...خليفة...

الامارات...دبي العين..





ساره فتاه مرحه تحب الحياه وحنونه ..عاطفيه جدا ورومنسيه ..يعني باختصار الدنيا ورديه عندها ...في يوم من الايام كانت جالسه في غرفتها ..ما عندها شي تسويه ..كانت فتره اجازة .. وهي مخلصه دوام..طالعت بطرف عينها غرفتهاوقالت انها لازم ترتبها .. وقبل ما تبداالترتيب لمحت اللاب توب مالها ..قالت في نفسها اتصفح النت وعقب ارتب الغرفه ..اعذار عشان تتهرب من تنظيف وترتيب الغرفه...

ودشت ساره النت ..وتمت تتصفح المواقع بدون هدف معين..وفتحت محرك البحث المشهور( قوقل) ..وكتبت فيه منتديات اماراتيه ..وطبعا طلعت عندها نتائج البحث بعشرات المواقع الاماراتيه ..لكن ساره اكتفت بأول موقع فقط..

تصفحت المنتدى عجبتها بعض المواضيع وقررت تسجل فيه...

ساره ما كانت تدري انه هذا المنتدى بيغير حياتها الورديه ..وبيقلب موازين ومفاهيم الامور عندها 180 درجه..

سبحان الله الواحد ما يعرف شو مخبي له القدر...


المهم سجلت ساره في المنتدى ..وشاركت باول موضوع لها في المنتدى وهو عباره عن الترحيب المعتاد بالاعضاءا لجدد ..لكن ساره غير ..بما انها مرحه وحبوبه ..فأسلوبها في كتابه الموضوع بعد كان غير ...اسلوب مرح وحلو وبسيط ..الكل رحب فيها ..ووصلت عدد صفحات الترحيب الى 3 صفحات ما بين ترحيب وما بين رد من ساره على اللي رحبوا فيها... ومن بينهم ..عبدالله..


عبدالله وقتها كان مشرف مشاركاته عدت ال 9000 مشاركة

مشرف نشيط ومميز ..

ومع ها الشي ما لفت نظر ساره....تمت ساره تشارك وتشارك ..ولان اسلوبها كان حلو وحبوب فالكل حبها ..ومن طبعها ساره انها ما كانت تتدخل في المشاحنات اللي تصير في المنتدى بين بعض الاعضاء...وهذا الشي الحلو فيها ..

ومره من المرات كانت في الاستراحه او الفرفشه مثل ما يسمونها ..وكان عبدالله متواجد ..وما كان احد غيرهم هم الاثنين في المنتدى في الفتره هذه ..فكانوا يشاركون في الالعاب مع بعض ويردون على بعض في المواضيع ..ولفتت ساره نظر عبدالله اكثر واكثر ...وساره حبت اسلوب عبدالله ..وصار بينهم نوع من التفاهم الصامت ,.

المهم مرت الايام وساره وعبدالله على نفس المستوى من العلاقه ..بس في المنتدى..

مره عبدالله شاف ان ساره مظهره ايميلها في المنتدي تحت اسمها...وفكر في نفسه اضيفها ..اذا قبلت كان بها والا عادي الامر بالنسبه له ...

المهم دشت ساره النت ..اللي ما يعرفه عبدالله الين يومكم هذا ان ساره ما حطت ايميلها الا عشان عبدالله يضيفها ..وهي كانت متاكده 100% انه بيضيفها ..لانها حست بالاعجاب اللي بينهم ..

واول ما فتحت المسنجر لقت ايميله جدامها ما صدقت عمرها وما خاب ظنها ..قبلته عندها ..

ودار بينهم الحوار التالي ::::


عبدالله ::

سلاااام عليكم

ساره ::

عليكم السلام والرحمه..منو معاي؟؟!!

عبدالله:::

انا ...عبدالله من منتدى ..... شفت ايميلج ظاهر قلت اضيفج عندي ..

ساره:::

اهااا

عبدالله::

اذا ما تبين عادي احذفيني والسموحه منج ..

ساره :::

لا عادي ...شخبارك...

عبدالله ::

الحمد الله بخير وبنعمه وانتي ؟؟

...............


ودار الحوار بينهم على ها الاساس ..واستانست ساره واااايد وكانت الدنيا على قولتهم مش سايعاها من الفرحه..

من الجهه الثانيه عبدالله بعد كان وووايد مستانس ..ساره مو من البنات اللي يمدحن نفسهن ..حبوبه وعلى طبيعتها ..عجبه اسلوبها اكثر وبساطتها في الكلام ...حب خفه دمها واااايد..

ومرت الايام والشهور بينهم كانوا يتواعدون على المسنجر ..ويتمون يسولفون الين وقت صلاه الصبح ..ويتفقون على موعد يديد ..

ساره وعبدالله شكلوا ثنائي حلو في المنتدى ..عبدالله بما انه مشرف وله مكانته في المنتدى والكل مسويله الف حساب بسبب مواضيعه ومشاراكاته المتميزه ..وساره بسبب اسلوبها الرائع وخفه دمها ..وكانت تتجرا على عبدالله في المنتدى وتتدلع عليه ..


كانت تعرف انه ما يروم يقول شي ..تعرف انها تموون عنده..وهو عارف ها الشي وعاجبه وساكت ..لو حد ثاني والله ما كان سكت له...بس هذه ساره ...

هو ما كان يعرف الشعور اللي يحس فيه تجاهها ..هو اعجاب او ..حب..اكثر من مره في المسنجر كان يتبادل هو وياها المسجات كتابه ...

ومرات ينغز عليها بالرمسه يقول انه عنده رسائل وسائط وااايد حلوه بس
طويله وما فيه يكتبها ..

يعني افهمي يا ساره ابي رقم موبايلج..

ساره مب غبيه كانت تفهم قصد عبدالله ..بس كانت خايفه ,,,كان ودها تعطيه رقمها اليوم قبل باجر ،، بس كانت خايفه ..

واكثر من مره لمح لها عبدالله بها الشي .. بس هي تصده بطريقه لطيفه ..ومره ما قدرت تتحمل ..كثر الحاحه عليها
قالت له ::

::: انت اعطيني رقمك وانا بتصل فيك اذا قدرت..

عبدالله ما كذب خبر ..على طووول كتب رقمه وارسله لها ...



مر اليوم الااول والثاني والثالث ما اتصلت ساره...

تقابلوا على المسنجر..

عبدالله::

ساره انتي مو مجبوره ترمسيني ..لكن اذا ما تبين تتصلين ليش خليتيني اعطيج الرقم..؟؟؟

ساره::

عبدالله انت تعرف اني ودي اسمع صوتك وودي ارمسك بس انا.. انا خايفه الصراحه..

عبدالله:::

افا والله يا ساره خايفه مني انا ..من عبدالله ..من عبووود....افا والله ما كنت اعرف اني فكرتج سيئه عني ..

ساره:::

لا لا لا عبودي انا مب خايفه منك انت ..

عبدالله ::

عيل اذا مب خايفه مني خايفه من شووو...

ساره :::

.................

عبدالله :::

سارووووه ارمسي لا تسكتين ...اذا لي خاطر عندج خبريني شو فيج وانا بتفهم..

ساره :::

عبدالله انا ..انا الصراحه ..خايفه ..خايفه انك تاخذ عني فكره غلط..وتقول انا راعيه شباب وارمس غيرك وايديين ..لان هذه فكره الشباب عن البنات اللي يرمسونهم..صح او لا..

عبدالله::

افا يا ساره ..وانتي ظنج فيني الحين جذيه ..يعني انا ما عرفتج عدل ..وما اعرف منو ساره..
انا اعرف الاشخاص من اسلوبهم في الكلام معي ..وانا اعرف انج مب راعيه سوالف يا ساره ..

ساره::

والله..؟؟

عبدالله،:::

ساره صدقيني لو اني اعرف انج راعيه حركات و شباب جان ما تميت وياج الين الحين ..وانا اصلا ما احب البنات اللي يلعبن ..وانا ريال واعرف افرق بين البنت اللي تلعب والبنت الشريفه عدل..

ساره :::

.......

عبدالله::

خلاص ساره خلاص مب لازم اذا انتي خايفه نتم اصدقاء على المسنجر احسن ..اوكيه لا تضايقين عمرج...

.................................................. ............................

[هنوف الروح]

تمت ساره صاخه وما تكتب اي رد لعبدالله ..

عبدالله ما عجبه هذا الاسلوب ..وتضايج وااايد ، وتم يرسل لها ::


عبدالله::

سااااره...ساااره..ردي علي...

ساره ::
................


اللي ما يعرفه عبدالله ان ساره كانت يالسه تكتب مسج له ...

عصب عبدالله من تجاهل ساره له عصب من صدق ..وتم هو الثاني ساكت ..وما يكتب شي ..وفجأة سمع رنه المسج

في موبايله ..ما اهتم ..مع ان الموبايل كان عداله ..

ويوم طال السكوت بينهم ...عبدالله ما رام يتحمل سكوت ساره ...

عبدالله::

ساااارووووه وياراسج لاااا تميين سااكته ..خلاااااص عنبوه ما تبين خلااااص قلت لج ما بغصبج على شي ..بس ردي على..

(( لايمكن ايصال الرساله ل.. الغلا كله ..)) <<هذا الرد اللي وصله من المسنجر..

اكتشف عبدالله ان ساره قطعت الاتصال ..عصب عبدالله وانقهر ليش تسوي فيني جذيه سارووه..

ومن عصبيته سحب واير الكمبيوتر من دون ما يسوي ....شت داون... ومسك موبايله عسب يدق لربيعه خليفه عشان يظهرون برع..ويوم حصل المسج فتحه يقراه ..

الرقم كان غريب بس كان حلو وسهل ينحفظ....

((( ودي اوصلك رساله من << الروووح>>...تحمل لك اللي ما نطق به لساااني...

واللي خفا بالقلب ما اقدر به ابوح..

لكن ترى يظهر بعيني <<حنااااني>> ...)))


تم عبدالله مبقق عيووونه ..وهو يقرى المسج ..وتم يعيد ويعيد المسج ويقراه ويقراه..تم يقول بخاطره اهي والا لااا!!!

اتصل عبدالله على طوووول وما كذب خبر ..

وتم الموبايل يدق ويدق ويدق ..و...فجاه رد الشخص الثاني..

عبدالله ::

الووه..

ساره::::

....

عبدالله بصووت هادي.. وغاوي ..

الوووه ..س..ســ.. سااره..

ساره ::

هلا ..بصوت نا عم وهادي....

ذاااب عبدالله يوم سمع صوتها ..وطار من الفرحه..وتم يناقز مثل اليهال...ورد صوته الهادي ..

عبدالله ::

اخيييرا الشيخه ساره ..هلا والله هلا وغلا..

سااره::

بصووت خجول::

لااااه وشو دراااك اني ساااره...

عبدالله :::

وشو دراني ؟؟منو غير ساره له ها الصوت الناعم...


ساااره استحت وصار ويهها مثل الطماطه..اول مرة حد يرمسها بها الصوت وبهذه النبره ..ومارامت ترد..

عبدالله:::

الوووه..سارونه ساره فديتج ردي انا ما صدقت على الله ادقين...فديت ساروتي انا..


ساره فكرت في نفسها لااااه زودها فديتج و فديتج اشوفه زودها ..لااازم اوقفه عند حده ..مع ان في خاطرها انه يكمل وما يسكت..بس لا ..

ساره ::

عبدالله لو سمحت ما في داعي لمثل ها الرمسه...

عبدالله وهو يقلدها بطريقه ما قدرت ساره معاها الا انها تبتسم في خاطرها ..ويا راسه يقلد بعد..

عبدالله::

ساره يله عاااد لا تسوين عمرج رسميه انا عبدالله عبوووود ..

ساره :::

عبدالله بلييز لا تم تقول ها الرمسه الله يخليك ترى استحي والله...

عبدالله ::

يالله ترى كنت اكتبها لج بالمسنجر شو بعد تستحين ...

ساره ::

بالمسنجر غير والصج غير ..عبدالله بليييز الله يخلييك ارمس عادي او تراني..

عبدالله:::

انزين انزين ..بسم الله تهدد بعد ..انزين الشيخة ساره انا اسف سمو الشيخه ..ما قصدنا والله ..و..اخبارها الشيخه..


ضحكت ساره غصب عنها من عبدالله دمه خفيف واسلوبه احلى من حتى من كانوا في المسنجر..

عبدالله ::

فدييييت ها الضحكه والله ...اوه اسف اسف نسيت سمو الشيخه ما بنتفدى..


وتم الحوار على ها الاساس بين ساره وعبدالله ...وتموا يرمسون تقريبا ساعه ونص وكل واحد يحكي كل اللي عنده عن الثاني وشو كان يتوقع انه يكون..وعن المنتدى والاعضاء والمشرفين ..باختصار ما خلوا حد ما قرضوا فيه...

المهم بعد ما صكر عبدالله عن ساره...تمت ساره اطالع سقف الغرفه وهي سرحانه..

معقوله انا سويت ها الشي معقوله انا رمست عبدالله..وفجأه حست بخوف وتم قلبها يدق بسرعه ..انا ليش سويت جيي ..شو لو كان غير اللي يظهره لي ..شو لو كان يقص علي..انا شو سويت ..ليش تسرعت ..

عقب تمت تقول بخاطرها لامستحيل عبدالله يسوي ها الشي..

وما قدرت ترقد الليل الا في وقت متاخر..

[هنوف الروح]

تمت ساااره طووول الليل تفكر وتفكر ..انا من صجي الحين عطيته رقميه ..انا ؟؟ انا ساره اللي دايما كنت استغرب شو هو الشي اللي يخلي البنت تكون غبيه لدرجه انها تعطي شاب غريب عنها رقمها ..وتورط عمرها وياه..

معقولة اني احبه ....بس اذا انا احبه كيف اعرف انه يحبني ؟؟ ..

تمت ساره تتذكر الحوار اللي دار بينهم ...وقالت لا بس هو غير اكيد غييير...ورقدت ساره من التعب والتفكيير..


اي غير يا ساره واي بطيخ ..ترى كل الشباب نفس بعض...


المهم ..

عبدالله من جهته كان مستانس وااايد بالمكالمه ..حتى ما رد على ربيعه خليفه اللي تم يدق ويدق عسب يرمسه....تم يتذكر كلام ساره وصوووتها ...يالله شو صوتها يذبح ..ناااعم ..ورقيق..حتى عبدالله حس ان ساره بعدها 17 سنه مب اكثر مثل ما قالت ..

اوه ..نسينا نخبركم ان ساره عمرها 25 وعبدالله 27 ...

تم عبدالله يذكر رمستها ...ويبتسم في خاطره يوم تذكر تعليقاتها على بعض العضوات اللي بالمنتدى ..كان يعرف انها ما تداني كمن عضوه بالمنتدى ..يدري من سوالفها بالمسنجر ..يوم سمعها شخصيا منها تم ينقع من الضحك وهي ترمسه عنهن ..وكيف مقهوره منهن ومن اسلوبهن في الرد والمزح مع الكل..

يا ترى بتكوني غير يا ساره ..شو الشي المختلف فيج عن باجي البنات ؟؟ تمت ها الاسئله ادور في راس عبدالله..

عبدالله مب ياهل ..وساره مب اول بنت يرمسها ..

ترى له سوالفه مع البنات ..من كل الانواع ...وما كان يطول مع اي وحده منهن اكثر عن شهر..ويدور وحده غيرها..او بالاصح عشان نكون صادقين ..البنات يتعرفن عليه..


عبدالله له اسلوب عجيب في جذب الناس له ..يعني يتعرف عليك ويبين انك كل شي ومحور اهتمامه ..لكن ما يقرب اكثر الا اذا انت قربت اول..

عبدالله غير انه مشرف بالمنتدى ..وها الشي اللي اهو ما خذنه هوايه ..كان يشتغل في القياده العامه في ابو ظبي..وله شغله الخاص خارج الدوام ..يعني انسان طموح ويحب يرتقي بعمره..

يا ترى يا ساره انتي غير؟؟

ردت الفكره في راس عبدالله مرة ثانيه ....تم عبدالله يتذكر البنات اللي تعرف عليهن...وكيف كل وحده كانت تحاول تستغله ....اللي تباه يشتريلها موبايل والله تباه يسلفها ....بس على منو على عبدالله ..

(( اوكيه يا ساره بنعطيج فرصه تثبتين جدارتج ..وتفوزين بقب عبدالله )) تم عبدالله يفكر في خاطره ويضحك وهو يقول حشى مب قلب ...

ورن موبايله مره ثانيه ..وها المره رد عليه..


عبدالله::::

الوووووووووووووه خيييير يا الحشره شو عندك دااقلي ها الوقت ...


خلييفه:::

ويا ها الراااس يا السبال ..انا اللغلطان دقيت ..يالله اجلب ويهك وشوف منو يسال عنك مره ثانيه...

عبدالله ::
وهو ناقع من الضحك...

افاااا افااااا يا بو سلطان ...خشمك ...انت الخيير والبركه ..عنبوه الواحد ما يسولف ويا ربعه..حشى ...

خلييفه:::

تسولف ويا ها الراس ..ما عليه بس انا قلبي طيب ..اسامح بسرعه....خشمك...

عبدالله :::

انزين شو تبى الحين ..مب جنه الساعه 2 ونص الليل الحين والا انا غلطان ..

خليفه :::

ويا راسك انا دقيت اتطمن على ربيعي رفيق دربي اللي مشاركني ازماتي وافراحي و....

عبدالله :::
اخلص جم تبي...

خليفه :::

افاااا افااا والله ....لااااا ما توقعتها منك...لكن مقبوله بما انك ربيعي ...فديت خشمك عبووود سلفني 6000 درهم الحين محتاجها والله ..عبووود فديتك والله يا الشيخ ...

عبدالله::

خيييبه 6000 مره وحد انزين قول 600 بنبلعها ..قول 1000 ويا راسك حق شو تبا 6000 شو عندك ....

خلييفه :::

والله يا عبووود طحت لك على وحده غرشوبه ..تعق الطير من السما ...بس لازم اخق شويه جدامها ..ابا اوديها برج العرب ...عبوود انت ربيعي وانا ربيعك ونحن ربع صح..


نقع عبدالله من اسولب ربيعه ..بس خليفه يموون عند عبدالله وما عنده مانع يسلفه اللي يباه ...

عبدالله::

اوكيه ولا يهمك يا خليفه يا ربيعي .ترانا ربع ..يعني انا ربيعك وانت ربيعي ..ويا راسك ...وشو بتعشيها في برج العرب ...ويا راسك انا ربيعك وما عزمتني هناك ..ومن وين عرفتها ويا ها الراس..وشو وافقت انها تظهر وياك..

خليفه ::

ما عليك ربيعك هب هين ...ترى لنا اسلوبنا الخاص مع الغراشيب..والا الباجي طبهن عنك يا ريال...

تم عبدالله يضحك ..وقال له اوكيه ابجر يصير خير..

خليفه:::

يا ريااال شوو باااجر انا اباهن الحين ..يا لله عبووود فدييت خشمك انا ...

عبدالله وهو يتأفف ..انزييين ويا ها الرااس وين نتقابل ..

المهم تقابلوا الشباب وسلف عبدالله 6000 حق خليفه... وتم يضحك وهو راد البيت ..والله انت ما تيووز عن سوالفك يا خليفه ..برج العرب مره وحده... يا خي تبي تكشخ اكشخ على قد راتبك ...



وصل عبدالله البيت ...الساعه 3 ونص الصبح..وتم يطالع الساعه ..ويفكر بساره..

فديتها اكيد راقده الحين ..يا ترى كيف هو شكلها ..خاطري والله اشوفها ...يا ترى بترضى انها تظهر ويايه..

لا لا ما بنستعجل الامور ..كل شي بوقته حلوو..

فديتها ما احلى صوتها وما انعمه .... تم عبووود يطالع رقمها ..ويقووول شو اخزن اسمها ..شووو ..

وتم يفكر ما يبى اسم ملفت لان خليفه دايم يتعبث بموبايله...بس ما حصل اسم ..


اخر شي سماها ...الاهل ... ما يعرف ليش اختار ها الاسم ..بس خطر في باله ..لو حد شافه ما بيرد يتحراه اهل عبدالله..

وخصوصا خليفه الحشره....


وحط راسه ورقد ...وراه دوام الصبح الريال ....


وثاني يوم ....


نشت ساره من الرقاد الساعه 1 ونص الظهر ..وهي مب عارفه هي وين ..تمت اطالع سقف الغرفه وتقول انا وين ..وجم الساعه الحين ..

تعرفون مثل ها اللحظات يوم الواحد يفقد الذاكره ثواني لين ما يتذكر المكان اللي هو فيه....

وفجأه رن الموبايل ..رنه مسج..

مدت ساره يدها بكسل وبطلت المسج ولقت اربع مسجات ...

المسج الاول الساعه 7:15 الصبح ::

(( صباح الخير يا عمري ..
احبك انا من بدري... احبك وانت ما تدري)))


المسج الثاني الساعه 8:30 الصبح

(( يالله فديتج الين الحين رااقده ..بسج رقاد ..عبووود يداوم وانتي راااقده...قومي شا ركيني ..))


المسج الثالث الساعه 11:00 الصبح

((ساروه ويا ها الرااااس بسج رقاااد يا الدبه ...لو ما كنت في الدوام كنت بحشرج من الصبح..ردي على الفقير المسكين عبووود ...)))

المسج الرابعه 1:30الظهر

(( لنا الله ....))


نقعت ساره من الضحك يوم قرت المسجات...فدييته والله اربع مسجات ...ساره ما انتبهت للمسج .لانها مسويه رنه المسج رنه وحده بس...

وتمت تتفداه في خاطرها ...وتقوول خليه شويه ..احرقصه وعقب برد عليه ...

.
.

[هنوف الروح]

نشت ساره من شبريتها ..وتمت في خاطرها تقول ..حليله عبدالله والله ظلمته في تفكيري ..اكيد هو غير ..اكيد ..

وسارت ساره عشان تغير ملابسها وتغسل..

تدرون شو مشكله ساره بالضبط ..ساره من النوع اللي بسرعه تصدق الناس وتوثق فيهم ...يعني كل الناس عندها طيبين الين يثبتون العكس...

عمرها ما اسات الظن في حد ..دومها تعتقد ان كل الناس مثل بعض ..وان الاشرار بس في الرسوم المتحركه...

ويوم شافت مسجات عبدالله ..على طول حز في خاطرها الافكار اللي فكرت فيها قبل ما ترقد..وكيف ان عبدالله ممكن يستغلها او شي من ها القبيل..

المهم

عبدالله من جهته كان في سيارته ..ويتسمع امارات اف ام ..على برنامج دوار الساعه 2 ونص مع عبدالله<<<< مووول ما سوينا دعااايه *_*

كان يحب ها البرنامج واايد ويحبها بعد لان اسم المذيع مثل اسمه عبدالله ...

عبدالله كان فيه شويه غرور ..هو يقول انه ثقه بالنفس ..لكنه غرور...

عبدالله كان يفكر ويقول ..معقوله ها الدبه لين الحين راقده..والا ما تبي ترد على مسجاتي شو سالفتها ..خلص الدوام وبعدها ما ردت عليه ..

الساعه الحين تقريبا 3 مو معقوله راقده الين الحين ..

ادق اشوفها ..لا لا ما بدق ما فيني ..ليش هي ما اتدق...وتم ضايج ....

شويه رن موبايله ..وظهر عنده اسم

الاهل ..
يتصل بك..


استانس عبدالله وااايد ..ورد بسرعه ..

عبدالله ::

هلا والله وهلا وغلا ..

ساره ::بصوت هادي وناعم وخجول::

هلا عبداله شحالك ...

عبدالله ::
بخيير دامني سمعت ها الصووت الغاوي ..

ساره :::

عبووود ويا راسك يووز عن حركاتك..

عبدالله :::

المشكله ما ارووم ما اقدر والله مو بيدي ...خل عنج يا الدبه تبين تنسيني السالفه هاااا..

ساره وهي تذكر في راسها اي سالفه:::

اي سالفه عبدالله ..

عبدالله ::::

اي سالفه ..عيل يا دبه في حد يرقد الين الساعه 3 الظهر ..

ساره :::

هههههههههههههههه والله ما رقدت الين ثلاث الظهر ..انا نشيت الساعه 1 ونص وشفت مسجاتك ..عقب قمت وسبحت و..

عبدالله :::

سبحتي ..اااااخ يا لقهر ليتني عندج...

ساره وهي معصبه ومنصدمه ::

عبوووود ويا راسك شو ها الرمسه ..ترى والله ازعل صج والله ...

عبدالله وهو يقول في خاطره اووووه نسيت هذه ساره غير عن الباقين ..

اوه يالله عاااد اسولف وياااج ساره لا تميين معصبه ...هاتي راسج بحبه ...

وتموووا يسولفون الين وصل عبدالله البيت ..وصكر عنها ..


ساره عقب ما صكرت ..

سارت صوب المنظره اللي بالغرفه وتمت اطالع ويهها ..كا ن احمر مثل الطماطه ..لانها اتذكرت رمسه عبدالله ..

ماااصخ ..قالت ساره في خاطرها ..ما يستحي ...وتمت اطالع ويهها ..وغطت ويهها بايدينها ..وهي تبتسم ..ويا راااسه كيف يتجرا ...هو ما يدري ان صوته بس عذاااب ..

تمت ساره تفكر فيه طول الوقت ..وطالعت الساعه وكانت قريب الساعه 4 ونص وقالت اكيد راقد وراه دوام ...

وفكرت تسوي فيه حركه وتغصص عليه ..


عبدالله كان راااقد في سابع نومه ومتلحف والمكيف يضرب عليه والغرف بارده والجو هااادي وكل شي تمام ..وفجاه رن موبايله نقز عبدالله من شبريته وهو يسب ويلعن منو ها الحشره اللي متصل الحين ..

ومد يده سحب موبايله وبعين مغمضه وعين مفتوحه قرى الاسم (( الاهل))..

غريبه ليش الحين متصله نحن متفقين عقب المغرب ..خاف عبدالله ورد على ساره..


عبدالله ::بصوت كله رقاااد

الووووه هلا ساره

ساااره ::

عبدالله ياله قوووم صلاااااه ...

عبدالله تم ساكت ومب فاهم السالفه ..


عبدالله ::

هااا ..شووووو

سااره ::وفيها ضحكه من خاطرها وميوده عمرها بالغصب..

عبوووود اقووولك قوووول يله صلااااه العصر بطوفك ...


عبدالله ::غمض عيونه ..بشوو اكفخها هاااي الحين..


سااارووووه ويا راسج الساعه الحين خمس الا ربع والعصر ياذن الساعه 3 ونص واعتقد انا داش البيت الساعه 3 وشويه لاني كنت اسولف مع حضرتج وما اعتقد اني بسمع الاذان وبرقد ويا ها الراااس ...

ساااره وهي تضحك من خاطرهااا ...

سوووري والله بس حبيت اغصص عليك عشااان مره ثانيه ما تقول اللي قلته ...

عبدالله ابتسم ابتساامه خبيثه ..وقال في خاطره لااااه انا براويج الحين...


عبدالله بصووت هادي وكله رجوله ..


تبين تادبيني والا تبيني اسمعج اياها مره ثانيه ..فديتج ...

ساره قفط ويهها وما عرفت شو ترد وصار ويهها طماطه ...

عبدالله :::

الوووه ساره فديتج انا اشتقتي لصوتي هاااا ....احبج اموووت فيييج ...

ساااره بسرعه وبدون تفكيير :::

عبدالله يله باااي باااي

وصكرت ..


نقع عبدالله من الضحك عليها ..وقال في خاطره على منويا ساره انا عبدالله ..وتم يطالع الساااعه ..الحين الساعه 5 شو اسوي اكمل رقاد والا شوووو..
تم يفكر وبدون ما يحس غط في نومه....



ساره من الجهه الثانيه ...منسدحه في شبريتها ومغطيه ويهها بالمخده مالتها ..ومب رايمه تتحرك ..وتقول في نفسها انا غبيه غلبني ..ما تصورت رده بيكون جيي ..امبييه انا مع منو طحت ..شكله خبير في سوالف البنات ..اول ما طرت ها الفكره على راسها نقزت ساره من مكانها ..

اكيد له خبره مع البنات ..والا كيف بيكون جري معها بها الطريقه ..

وتذكرت رمسته اول ما طلب رقمها ..

(( انا اعرف افرق بين البنت الشريفه والبنت اللي تبي تلعب ))

يااااالله كيف انا غبية ...

[هنوف الروح]

تمت سارة تفكر وتفكر وعقلها مشغول بفكرة ان عبدالله كان يعرف غيرها من البنات ...

شويه سمعت امها تناديها ..وسارت عند امها تشوف شو تبي منها ...


(( يا عمري انا فديتك انا يا ليتك هنا وياااي..)) هذه الاغنية اللي كان خليفة يسمعها وهو مستانس من سالفه امس مع الغرشوبه اللي ظهر وياها على قولته .. تم خليفه يفكر شو يسوي الساعه الحين 7 ونص شو يسوي ادق حق عبووود حبيبي رفيج الدرب..

وما كذب خبر واتصل على عبدالله كان مخزن اسمه في موبايله ((الشيخ عبدالله )) ويضحك كل ما شاف اسمه ويقص على الناس ويقولهم الشخ عبدالله شخصيا متصل علي .طبعا اللي يعرفونه يدرون انه يخرط عليهم لكن اللي ما يعرفونه حليلهم يصدقون مسوين له سالفه..

في ها الوقت عبدالله كان يالس يشرب شاي مع امه في الصاله..ورن موبايله وكان حاط موبايله فوق التلفزيون واخته الصغيرة يالسه اطالع سبيس تون وهو يسولف مع امه ..عبدالله يموووت في حمده اخته الصغيرة ويسميها بنته عمرها 10 سنين وملقوفه ولسانها طويل..بس يحبها ..لما رن موبايل عبدالله نقزت حمده ترد عليه وصرخ عليها عبدالله اونه معصب حمدووه ان رديتي ذبحتج ..طبعا حمده سوتله طاااف وردت على الموبايل و امهم تضحك عليهم ..

حمده بصوت طفولي حلو::

ااااااالوووو منووو انت ..

خليفه نقع من الضحك وهو يعرف حمده وسوالفها ::

حمدووه ويا راااسج كم مره اقولج لا تردين على الموبايل يوم انا اتصل على عبووود ..هااا كم مره ..

حمده::

وانت ليش ما تقول انك بتتصل وكيف اعرف انا شوقالولك عني ساااحره شرااتك اعرف كل شي..

خليفه وهو اونه معصب :::
حمدووه عييب لا ترمسين بها الاسلوب ويا ها الراس ..انتي ما تعرفين ان اذا تميتي جيي ما بخذج ولا بتزوجج وبتمين عله على قلب امج ..

حمده ::

اصلا اصلا انا ميتين واااحد يباني ..وواولهم انت اوكيه بعدين عبووود قال لي ردي على خليفه الحشرة وقوليله اني مب هني ...اممممممممممممممم<<< حمده ظهرت لسانها حق خليفه اونه الحين شايفها..


هني نقز عبدالله ومط الموبايل من حمده وامهم تضحك عليهم وتقول بخاطرها اصلا كلكم يهال من خليفه وعبدالله وحمده ...وقامت وشلت استكانات الشاي وزقرت حمده اللي يالسه تضارب مع عبدالله على الموبايل..

عبدالله وحمده يالسين يضاربون على الموبايل وعبدالله يضحك لانه رفع ايده وحط الموبايل على السبيكر وحمده تنقز تحاول انها توصل للموبايل ..بس ويين يا حمده قصيره وحليلها ..
خليفه يصرخ على عبدالله::

عبوووود خلاااااص انا حشره انا توصي اختك حمدووه علي ..هين شوف منو بياخذها حمده سير دورلها معرس غيري ..ولااااه بعد تقول لي ميتين واااحد يباااهاا غيري ..وواابووي انا لو عندي جان يلدتها بالعقال اللي في راسي..

عبدالله وهو يضحك عليهم ::

اصلا انتوا الاثنين تناسبون بعض ..حمدووه ذلفي امي تباج سيري لا اشوتج الحين..

حمده::

والله بعلم ابوي عليكم انتو الاثنين ...يبااااااااااااااااااااااااا ..

وسارت حمده عند امها وابوها ..

خليفه ::

الحين ويا راسك انا تسوي فيني جذيه انا ربيعك تبا تعطيني ها المتوحشه حمدوووه..

عبدالله :::

خلفووه جب جب انت اصلا تتمنى حمده تقبل فيك ..وان قلت عن بنتي متوحشه اذبحك انت تفهمم او لاااااااع ..

خليفه وهو يضحك ::

حاضر سياده الرائد..انزيين طب عنك حمدوه وسوالفها ..

عبدالله :::

ها خيير هات من الااخر شو سويت امس في سهرتك مع الغرشوبه؟؟

خليفه :::
اسكت يا عبدالله اسكت ..اسمييها غرشوبتن تذبح ...فديت حسها فديت كل شي فيها ...بس فيها عيب واااحد ..

عبدالله :::

لااااه شو فيها بعد ؟؟

خليفه ::
وااايد تتأمر ..يا خي تقول جني اشتغل عند قبايلها..يوم شفتها بتمصخها بالاوامر سويت لها طاااف ورديتها سيارتها و..و.. بس..

عبدالله :::
خلفوووه .. وبس.. على منوه يا خليفه على عبدالله شو سويت قوول وياراااسك...

خليفه ::

والله ياخي انا دافع عليها 3000 يعني لازم شويه بههارات تعرف انت ههههههههههههه بس لا وانا اخوك ما دشت مزاجي زوود صح حلوة وما عليها كلااام .بس وااايد خقاااقه وشايفه نفسها مدري على شووو..

عبدالله ::

يعني ويا ويهك خسرت 3000 على وحده وظهرت خقااقه ..انزيين وين الباجي من الفلوس..

خليفه ::

ترى انا متصل عسب اقولك وين انت عشان اعطيك بيزاتك طال عمرك ...وانت اكيد بتسامحني في الباجي صح لاني ربيعك وانت ربيعي ونحن ربع ..خشمك ..

عبدالله وهو يضضحك ويسوي عمره معصب ::

أسف اسمحلي في البيزات ما اعرف امي او ابوي ...بترد الــ 3000 يعني بتردهم ..

خليفه::

انزييييييين يا بوي حشرتنا ..بردهم اصلا انا ما كنت باخذهم يكون في علمك يعني ...
عبدالله ::

لا تسوي عمرك فقيرن مسكين وانت اكبر لوتي عرفته بحياتي انزييين حركاتك مب علي يا خلوووف..

خليييفه ::
هههههههههههههههههههااااااي اوكيييه يالحبييب متى بتسير المكتب ترى انا ما اعرف وين اولي وين ارووح..

عبدالله ::
نا شويه وبـ ....

سكت عبدالله لان الخط الثاني عنده رن وكانت ساره..

عبدالله بسرعه يقول لخليفه ::
خليفه بدقلك بعد شويه عندي خط..باي

خليفه وهو مستغرب::

عبوود منو على الخط الثا...
ما كمل خليفه جملته لان عبدالله كان محول على الخط الثاني ..
تم خليفه يفكر عبداله شو ياه ما عطاني فرصه اكمل رمستي ؟؟ ومنو على الخط الثاني اللي يخلي عبوود يبند الخط عني بسرعه ..السالفه فيها ان..اوكيه يا عبوود انا اراويك ..
وشخط خليفه على مكتب الخاص بعيدالله ..وكالعاده بيسير بيحشرهم في المكتب وبيـتأمر عليهم هاتولي شاي وقهوه وبيشغل النت على حساب عبدالله ..هذه حاله خليفه من يدش مكتب عبدالله ..الخاص ببيع وصيانه اجهزه الكمبيوتر..


نرجع حق ساره وعبدالله...

عبدالله صكر عن خليفه ورد على ساره ..

عبدالله :::
الوووه ..هلا بها الزين هلااا هلااا بالورد المعطر هلاااا..

ساره ::

عبدالله اشحالك ..

عبدالله :::
افااا الحين انا اقولج ها الرمسه وانتي تردين عليه(( عبدالله اشحالك))...انا زعلاااان ..
ساره وهي تضحك::
عبودي تعرف اني استحي من ها الرمسه عااد انت كيفك يمكن متعود عليها بس انا لا بعدني...
عبدالله فهم كلام ساره وقال لها ::

متعود عليها ؟؟شو قصدج اني كنت اقولها حق غيرج من قبل او شوو ؟؟

ساره :::
عبدالله بسألك ..ولا تزعل مني انت كنت.. اقصد من قبل ما ..تعرفني..كنت..

عبدالله وهو يقطع رمستها ::

ساره عرفت قصدج ..حبيبتي سمعي انا قلت لج من قبل انا مب ياهل ..انا ريال ولي تجاربي مع بعض البنات ..ما بقص عليج وبقولج انج انتي اول وحده عرفتها ...لا..عرفت قبل كم بنيه ..لكن اللي انا اكيد منه ..انج انتي غير عن كل وحد عرفتها..وكيفج تبين تصدقيني والا لا انتي حره..

تمت ساره صاخه ما تعرف شو تقول...رمسته ازعجتها وريحتها في نفس الوقت ..يعني هي اكيد كانت تعرف انها مب اول وحده في حياته ..وريحتها لانه قال انها غير عن باجي البنات ..ويا راسك عبدالله كم وحده عرفت قبلي..

ساره سرحانه في افكارها ..وعبدالله ينتظرمنها رد ..ويوم شافها طولت عليه ..قال لها ..
عبدالله::
ساره ..فديتج انا ..صدقيني انتي غير ..ومع الايام بثبت لج اني غير..فديتج..

ساره بصوت نستحي ::
فديتك عبدالله ..

عبدالله طار من مكانه يوم سمعها تقول ها الكلمه ..ما صدق عمره..

عبدالله ::
فدييت روحج انا ..صدقيني يا ساره انتي غير غير ..وما عرف شو يقول من الفرحه ..
ساره وهي تضحك عليه..
خلااااص عبووود ترى والله استحي ..انزين انت ما سرت المكتب اليوم والا شو سالفتك ما بتسير..

عبدالله :::
غيرتي الموضوع كالعاده ...انزين بطوفها لج ها المره ..لا غناتي انا بسير بتلبس وبسير ..شو رايج اتسيرين معاي ..
هههههههههههه

ساره::

هههههههههه تنكت وين انت وين انا ..على فكره بنسير باجر العين عن خوالي ..ملجت بنت خالي باجر ..انت معزوم ..

عبدالله::

معزوم لاااه عسب يوم يشوفوني اخوانج وابوج ما يقصرون فيني ضرب انت منوه وشو يابك عندنا ..ومنو تعرف هني هاااا...

عبدالله تم يمثل على ساره وهي تضحك عليه وتتخيل شو بيسون اخوانها لو شافوه فيى الملجه ..

عبدالله::
وبعدين بقولهم لاااااا لاااااا تجتلوني انا احب بنتكم احب ساااااااااااااااااارااااااااااه ...
ساااره تمت تضحك على عبدالله وهويسوي حركاته ..

ساره ::

لااااه بتقولهم جييه عسب يدفنوني انا وانت بيوم واااحد ...لا شكراا لاا اتييينا خلاص ..خلك في بوظبي..


شويه عبدالله حس بحد يركض بسرعه من وراه وقبل ما يلتفت نطت حمده وتعلقت في ظهره وهي تضحك ..عبدالله ما رام يرمس لان حمده متعلقه من رقبته وشابكه ايدينها في رقبته ..وساره حست ان في شي صار مو طبيعي وسمعت صوت بنيه صغيره تضحك ..وصوت عبدالله هو مثل المخنوق ..حمدوووه نزلي فكيني ويا راسج يا الدبه بختنق..

حمده::

مااابي يلااا سو نفسك طياااره بسرعه عبيوودي ...
عبدالله::
حمدوووه نزلي برمس س.... الريااال ..هديني بصك عن خليفه وبلعب وياج ..نزلت حمده وهي اطالعه ..

حمده::
انت لين الحين ترمس ها الحشره ..عطني اياه انا بخليه يصك الموبايل..
وحاولت تمط الموبايل من عبدالله..وساره صاخه وتسمع كل شي..بس الظاهر ان عبدالله رفع ايده فوق ووقف عسب ما تمط الموبايل منه ..

عبدالله ::
الوه خليفه بمر المكتب وبنتلاقى هناك اوكيه حبيبي ..
وعض عبدالله لسانه من اللخبطه اللي سواها ...ساره بغت تنقع من الضحك ..وسوت صوتها مثل الريال وردت عليه ..

ساره ::

اوكيه حبيبي نتقابل في المكتب ..احبك ..
وصكت السماعه ...عبدالله التفت حق حمده ومسوي عمره معصب ويوم شاف نظرتها والتعابير اللي ع ويهها ما قدر ايود عمره من الضحك ..كانت حمده متيبسه وهي مبطله حلجها وعيونها واطالع اخوها العود باستغراب ..
حمده::

عبوود تعرف انت شو زقرت خلفووه من شويه ...قلت له حبيبي؟؟ وع اخيييه وع عليكم شو هااا..

عبدالله وهو يضحك::

حمدووه شو بعد عبوود اصغر عيالج انا ..وشو خلفوووه والله لو يسمعج ما بياخذ وبتمين عله على قلبي في البيت
وبعدين ااذا تبين تلعبين ليش ما تستأذنين اول قبل ماتنطين علي شرات السبال وتخرعيني كم مره بعلمج انا هاا..

حمده ما ردت عليه وسارت تركض عسب تخبر امها باللي صاار..


عبدالله تم يطالعها وهو يقول في خاطره خلني اشرد عن اتيي الوالده وما نخلص ..الله يستر شو بتقول حمدووه حقها ..

وسار عبدالله غرفته يبدل عسب يسير المكتب ..ما يدري ان خليفه مسوي عمايله في المكتب وحاشر البقعه عليهم ..
.................................................. ..........................................

[هنوف الروح]

سا ره تمت تضحك وهي تذكرعبدالله وشو حالته..اكيد هذه اخته الصغيرة وااايد يرمس عنها ..وبدون ما تدري حست بشويه غيره منها وبعدين تمت تقول حق عمرها ( عن الغباء هذه اخته شو بعد تغارين))..وبدون ما تحس حست بأيد تمسكها من كتفها ..نقزت ساره من مكانها وشهقت وهي تقول :::

ساره:::

بسم الله الرحمن الرحيم شو بلااااج انتي متى بتعلمين الذوق وبدقين الباب مثل الاوادم...

علياء:::

اونه طاع هذه انا دقيت الباب لاااا وبعد بغيت اكسره من كثر ما دقيت وانتي ولا على الخاطر الدنيا ورديه عندج....آآآآآه يا حظه ...

دق قلب ساره وهي تقول لاختها علياء:::

شو قصدج يا حظه شو ها الرمسه الماصخه..

عليااء::

شدراني عنج انتي اللي سرحانه جنج تفكرين بحبيب القلب ..هاااا سااروونه ليكون تحبين من وراي ..

ساره::

عليااء..عن السخافه شو ها الرمسه ..اصلاا انا عندي سالفه يالسه ارمسج..انا زعلانه منج اصلاااا والاشو نسيتي ..

علياء::

لاااا فديتج لا تزعلين مني والله ما لي خاطر احضر الملجه ما لي خلق والله ..انتي تدرين شو السالفه ومنو بيحضر من دبي ما لي خلق اشوف حرمه خالج والله مالي خلق..

سااره:::
هههههههههههه ما عليج منها يا غبيه انا وانتي بنغطي على الكل حتى العروس نفسها بنغطي علي عليها اذا طقمنا وكشخنا ..شو راايج..

علياء ترفع حواجبها علامه الخبث وتبتسم ابتسامه على صوب وحطت ايديها تحت ذقنها وتسوي عمرها تفكر::

اوكيييه علييهم ..والله لنخليهم ينطشون العروس ونكون نحن نجمات الملجة.. يالله ساره فيني رقصه قومي نرقص ..
وبدون ما تنتظر رد ساره نطتت على الاستيريو وشغلت اول سي دي موجود ..وكانت اغنية ميحد اليديدة..طير الحمامي..

وارتبشت ساره واختها علياءوهزوا هز ..ساره ترقص بدلع وعلياء مسويه عمرها ريال اونها تــيــول ...وشويه انفتح الباب وتيبست ساره وعلياء ..وعند الباب كان اخوهم حمد واااقف...

من ناحيه ثانيه كان عبدالله ساير المكتب وهو مشغل اغنية (( احاول )) لنوال وفاضل واااايد يعشق هذه الاغنية ..

وصل عبدالله المكتب وحصل سياره خليفه مبركنه في الباركن ماله ..تم يضحك وهو موصي عمال المكتب ان الباركن ماله محد يبركن فيه غير عبدالله لكن خليفه ماشي مسوي لهم طاااف ويبركن مكان عبدالله ..المهم بركن عبدالله ونزل ..

واول ما فتح الباب سمع خليفه يصرخ::

رشيييييييييييييييد وينك تعال شو ها البي ام والرينج سبورت انا بشتريهم اول ما استلم الراتب نهايه ها الشهر..

رشييد::

ان شاء الله مستر عبدالله ..الله يرزقك ويعطينا منشان نشتري سياره كورلااا منشان حرمه ..

عبدالله يسمعهم ويضحك عليهم مسكين رشيد متحمل خليفه وخريط خليفه ..

عبدالله بصووت عال:::

السلااااااااام عليكم ...

نقز خليفه وهو يقول ::

بسم الله الرحمن الرحيم ..يا خي هود وانت داش المكتب ..زين الحين خرعت الريال ..رشيد سير اشرب ماي بويه..

رشيد تم يطالع خليفه وقام يكمل شغله لانه في زبون دش المحل ..
خلييفه:::

طاع هذا من صجه والله سوالي طاف ...ما علينا ...هلا هلا هلا هلا الشيخ عبدالله خشمك..

وتوايهوا الشباب ...عبدالله تم يطالع خليفة ويقوله ::

انت ما تيوز من حركاتك هذه معطل الريال عن شغله وتخرط عليه اونك بتشتري رنج وبي ام يوم ينزل الراتب ..حسيت السقف بيطيح علينا يا خي..

خليفه::

ههههههههههههههاااااااي عادي يا خي شو المشكله خلنا نحلم ..حتى الاحلام ممنوعه...

عبدالله :::

لا هب ممنوعه احلم على كيفك ..بس احلم على قدك ..لا تخرط على الناس..ماعلينا شو اخبارك..

خليفه :::

انا بخير طال عمرك ..تعااااال لا تنسيني السالفه ..كيف تتجرا وتصك التيلفون فويهي...

عبدالله:::
الله اكبر يا خلفووووه انا صكيت السماعه فويهك ما قلت لك عندي خط و...

خليفه يقاطعه :::
هييه قلت لي عندي خط وتوني برد عليك حولت على الخط الثاني ..ليش...عمرك ما سويتها ..منو كان على الخط الثاني هااااا عشان تصك السماعه فويهي الوسيم..

عبدالله وهو يضحك::

هههههههههههه لااااا ابدن بس كانو الاهل متصلين وماحبيت اخليهم ملطوعين على الخط ..بس ها كل ما في الموضوع..

وسوى عبدالله نفسه يراجع الاوراق والفواتير..وخليفه يطالعه وهو رافع حاجبه ويحك لحيته ..

خليفه :::

عبووود طالعني وقول ان اللي اتصلوا كانوا اهلك..
عبدالله هو يقول في خاطره ..يا الحشره عن الاحراج انت ما لك غير حمدووه تأدبك..

عبدالله:::
والله العظيم ان اللي اتصلو هم الاهل..هااا ارتحت ..يعني منو بيكون يا حسره ..

خليفه ::
اممممممممم انزين بنطوفها لك يا عبوود ها المره ..المهم شو رايك نسير السينما عقب ما تصك المحل ..في فلم وااايد حلو لبراد بيت نازل ..

عبدالله::

اوكييه نسير نغير جو..مافي مانع...

خليفه:::

طبعا انت بتعزمني غصبا عني صح يا النسيب...

ضحك عبدالله وهو يطالع خليفه...

انزييين ويا راسك ابتلشنا فيك انت بنعطيك بنتنا بعد الله يعينها ..

خليفة ::
الله يعيني انا وانت الصادق..

ضحك عبدالله وخليفه وتموا يسولفون ويراجعون الااوراق والفواتير مع بعض..

منن الناحيه الثانية..

ساره وعلياء يبسوا في مكانهم يوم سعموا صوت اخوهم حمد عند الباب ..

حمد ::

شو هاا المنكر بعد شو استوالكن يالسات تترقصن والاستيريو صوته عالي ..تبني ايلدكن الحين باللي في راسي ..

حمد هو الاخ الاكبر لساره وعلياء ..عمره32 مدين ومايحب الاغاني والدلع..

ساره::

لا ابد يا حمد والله كنا..كنا...
حمد ::

شو بعد كنا وكنا ..كم مره قلت لكم ما تسمعون اغاني ..ولا بعد يالسات تترقصن وااابوي عليكن انا ,,وين الوالده عنكن ..
علياااء::

لا يا حمد نحن كنا ندرب على الرقصه اللي بنرقصها في ملجه خدوي بنت خالوه و..
قرصتعها ساره على ايدها يعني اسكتي..

حمد::

لااااه والله حلو والله وبعد بترقصن في الملجه..والله ان سمعت انكن رقصت لا احش اريولكن حش ..ماعندنا بنات يترقصن انتن تفهمن الرمسه او لاااا...

شويه ودخلت امهم وهي تسالهم::

شو ها الحشره بلاااك يا ولدي يا حمد محتشر على خواتك ..
حمد::
محتشر عليهن من مصاختهن اونهن يبن يرقصن في ملجه خدوي والله ان رقصوا لا احش اريولهن حش..

ساره وعلياء انخشن ورا امهمن وهن خايفات من حمد لانه كان محرج ..

ام ساره ::

ما عليه يا ولدي ما فيه حد غريب وبعدين انا بكون وياهن والملجه في بيت خالهن يعني محد غريب ومو من كثر المعازيم ..خل البنات يستانسن شويه فديتهن..

ساره وعلياء ارتاحن من سمعن كلام امهن وطالعوا حمد..

حمد ::

بس يا اميه مايستوي حراااام الاغاني حرااام والمفروض انج ما تشجعينهم على ها الشي ..

ام ساره ::

يا ولدي خل خواتك يستانسن واعليه ما يسيرن مكان حاكرينهم في البيت وما يسيرن ولا يردن مكان..بعدين ان بكون وياهن لا تخاف ..

سكت حمد وماحب يجادل امه لانه يدري انه ما بيطلع بنتيجه ..وهو يعرف ان امه مدلعه البنات وااايد لانهم بنتين والباقي خمس رياييل..

حمد..
خلاص يا الوالده .بس ما له داعي اغاني شغلوا اناشيد والا دقوا طيران ..
ساره وعلياء اول ما سمعوا رمسه اخوهم العود بغوا ينقعون من الضحك ..اونه اناشيد ومنو بيرقص على الااناشيد..

ام ساره ::
ولا يهمك يا ولدي انا برمس اخوي بنشوف شو بيسوي ترتيب للملجه ..بعد ما نروم نفرض عليهم شي ما يبونه..

حمد تم يطالع خواته والتفت لساره ويودها من جتفها وهو يقول لها :::

هاالرقص الماصخ ودريه عنج عييب بعدج بنيه ها المياعه ماابا اشوفها والدلع الماصخ انزيين..

ساااره:::

ان شاااءا لله حمد ..

وسار صوب علياء اللي انخشت ورا امها ::
وانتي بنيه والا رياال يالسه تيولين ويا راسج ..ان شفتج ترقصين مره ثانيه ببقص شعرج ..

علياء لا اراديا حطت ايدها على راسها ::
ان.. ان شاءالله حمد ..

وسار حمد ..

ام ساره ::

دواكن انتوا ما تدرون ان اخوكم حممد ما يحب ها السوالف ..وبسكن رقص وانزلن سلمن على حرمه اخوكن تحت صار لها نص ساعه ..

وظهرت ام سارة ..وتنفست سارة وعلياء ..وطالعوا بعض ..وتموا يضحكون ويحمدون ربهم انهم نفذوا من خوهم والا عادي يمنعهم من السيره ..
وبسرعه نزلوا تحت يسلمون على حرمه اخوهم العود..
.................................................. ............................................

[هنوف الروح]

((اوكيه حبيبي))

تمت هذه الكلمة ترن في عقل حمده اخت عبدالله ..حمده يالسه عند ريول امها وهي تعقص شعرها البني الطوييل والناعم
تمت تفكر في خاطرها وتقول الحين في ريال يقول حق ريعه حبيبي ...وع شو ها بعد ..وقررت تسأل امها ..

حمده:::

ماماه

ام عبدالله ::

امممم حمده نعم حبيبتي شو عندج..

ام عبدالله مشغوله بشعر بنتها ويالسه تعقص الحرمه وتتفاجا بسوال بنتها الغريب..

حمده :::
ماماه الحين مب المفروض الريال يقول حق الحرمه حبيبتي صح ..ما يستوي الريال يقول للريال حبيبي صح ما ماه ..

بهتت ام عبدالله ويرت شعر بنتها بدون قصد ولفت وييها صوبها .وصرخت حمده من الويع ..

اااااااااااااااااااخ ماماه عورتيني شويه شويه شعري مشعتيه من مكانه ..

ام عبدالله ::
حمدووه مسودت الويه شو ها الرمسه بعد شو حبيبي وحبيبتي من وين تييبين ها الكلام ومنو علمج اياه هاااا...

حمده ::
شو من وين اصلا معروف وعادي انا اشوف في التلفزيون ان الريال يقول للحرمه حبيبتي صح والا لا..
ام عبدالله ::
وانتي منو مخرب عقلج غير ها التلفزيون ..وشو تبين من ها الاسئلة ..

حمده لفت بكل جسمها حق امها وقالت لها ::
ماماه اتصدقين اني سمعت عبووود يقول حق خلفوه حبيبي ..والله ماماه انا سمعته ..وع وع عليهم شو حبيبي ..اصلا الريال ما يقول للريال حبيبي صح ماماه ..

ضحكت ام عبدالله من بنتها وردت عدلت يلست بنتها وكملت تمشط شعرها ..

ام عبدالله :::
وانتي شو يعورج خليه يقول لربيعه حبيبي ..ما فيها شي ..ما تسمعين ابوج مرات يزقرج يقولج حبيبتي حمده ويزقر اخوج علي حبيبي ..ما فيها شي ..عادي

حمده وبصوت كله خبث ومكر يهال::

آآآآهاااا يعني باباه يقولج انتي بعد حبيبتي هااا صااااادوووه ..هههههههههههههههه

وتمت حمده تضحك لان امها حاولت تضربها ..ويلست مره ثانيه ..لانها تقريبا اقتنعت ..وتمت اطالع سبيس تون وامها تكمل تمشيط شعرها ...
ام عبدالله تمت فخاطرها تقول من صدقها حمده عمره عبدالله ما قال حق خليفه حبيبي ..يا ترى شو في راسك يا عبدالله ..انا لازم اشوف لي صرفه ..عبدالله كبر ولازم يعرس ..شو بلاها بنت خاله مريم بنت حلوة ومؤدبة ومن زينه البنات..
وتمت فكره زواج عبدالله تتخمر في راس امه ..وقالت في نفسها يوم يرد برمسه في الموضوع ..اخاف تلوي عليه وحده من ها البنات اللي ما نعرف اصلهم وتخليه يزوجها ...
خافت ام عبدالله من هذه الفكره وعزمت ترمس ولدها اول ما يوصل...


جدام سينما المارينا كان عبدالله وخليفه ظاهرين من الصاله ..وكانت زحمه شباب وبنات والكل مرتبش ومتأثر بالفلم ..وخليفه عينه ما هدت ..كله يطالع يمين ويسار ويطالع البنات ..عبدالله يطالعه ويقوله ::

عبدالله:::

خلفوه ارحم عيونك يا بووي مب زين عليك

خليفه::

عبوود طالع ها البنتين اللي هناك ..بالذمة هاييله مواطنات ..

عبدالله تم يطالع صوب البنات ويقول في خاطره ما نعرف المواطنه من الوافده الكل قام يلبس شيله وعبايه ووالكل قام يرمس اماراتي ..

عبدالله //

والله ما اعرف يا خليفه ..بس ما اعتقد في مواطنه الحين بتكون في السينما ..طالع الساعه قربت ادش على الثتين ..لا لا ما اعتقد ..

خليفه :::
وليش لا في واايد بنات قامن يحضرن افلام ويسهرن ..اووووه طبهن عنك يا ريال وخلنا نروح الصراحه فيني رقااااد وتعبان ...

عبدالله يله انزين انا من متى اقولك يله وانت هب طايع ...

خليفه طالع عبدالله ::
وانت بلااااك قاعد لي من الصبح يله ويله منو يترياك في البيت عسب مستعيل وحالتك لله تبي ترد البيت ..

عبدالله ::
الحين مب انت تبا ترد وتعبان ..طالع اعيونك شقايل حمر ...يله قول انا بوصلك وبرد البيت انا بعد ميهود وما فيني على حشره الوالد من الصبح ..تدري باجر الجمعة الصلاه ...

خليفه :::
انزين يله وصلني الشقه ..وانت سير بيتكم عن يهزبونك ..وسلم لي على حمده هههههههه

عبدالله //
يا مسود الويه تباني اسلم على اختي وجدامي بعد تقولها انزين انت اتقدم اول واخطبها وعقب يصير خير ...

وضحكوا الشباب وهو رادين خليفه على شقته لانه من دبي ويشتغل في ابو ظبي ..
وعبدالله راد البيت ..وهو خايف تكون ساره رقدت لانها طرشتله مسج تقوله انها تعبانه وتبي ترقد اذا بيتأخر في السينما ..

اول ما نزل خليفه جدام العماره سلم على ربيعه ..وعبدالله تحرك واتصل على ساره ...

ساره كانت شبه راقده وحاطه الموبايل حذالها ..ورن موبايلها ...
ساره ردت بصوت مبحوح لانها كانت راقده ...

ساره ::
الووه

عبدالله سمع صوتها من هني حس بحراره في كل جسمه وقلبه تم يدق ..
هلا حبيبتي راااقده فديتج ..سوري يا عيوني طولت عليج بس خليفه كان وياي وطولنا تعرفين خليفه وطبعه ..

ساره ::
لا حبيبي عادي فديتك

وسكت عبدالله ..تمت ساره تترياه يرد ..

ساره ::
الووه عبدالله ...

عبدالله ::
عيونه ..عيون عبدالله ...حياة عبدالله ..عمر عبدالله..

ساره استحت وحست قلبها يدق..

ساره :::
عبدالله بس عاااد شوو بلااااك ..شو كان الفلم حلو؟

عبدالله ::
هييه حلو ..المهم ما اشتقت لي ..وما وحشج صوتي ..
ساره ::
اكيد اشتقت لك حبيبي ..

عبدالله :::
فديييييييييييييييييييتج فديييييييييييت اللي اشتاق لي والله ..

ساره::

ههههههههه عبدالله مب جنك متأخر على البيت ..شوف الساعه كم الحين..

عبدالله ::
لا تغيرين الموضوع فديتج ...اقول ساره ..

ساره :::
عيونها ..

عبدالله /::
فديت عيونج انا ... احبج..
ساره ::
استحت وصار ويهها احمر وتمت صاخه ..

عبدالله::
اقولج احبج يا حياتي ...

ساره ::
وانا بعد ..

عبدالله ::
انتي بعد شو ؟؟

ساره ::
اووه عبدالله بس عاااد انت تعرف ..

عبدالله ::
لا ما اعرف خبريني..

ساره ::
احبك ....

صرخ عبدالله من الفرح ..وضحكت عليه ساره من حركاته ..
وتموا يسولفون الين الصبح وبالغصب اقتنع عبدالله انه يرقد ويخلي ساره ترقد ..

تمت ساره اطالع السقف وهي تفكر في حبيبها عبدالله ..يا ترى شو النهايه يا عبدالله...
.................................................. .................................................. .

[هنوف الروح]

في بيت عبدالله ...

حمده كانت تمشي على اطراف اصابعها فوق الرخام اللي في ممر البيت وهي لابسه بيجامتها الوردية وسايرة صوب غرفه عبدالله تبي توعيه من الرقاد لان ابوها طلب منها ها لشي ..وطبعا هذه حمده ما بتوعي اخوها الا تغصص فيه وفكرت انها تسحب اللحاف عنه وترش عليه شويه ماي عسب اطير الرقاد من عينه ..تمت تبتسم وتضحك في خاطرها من اللي من رده فعل اخوها العود والله ليسفرها ..ومدت ايدها عند مقبض الباب وتك تك ..الباب كان مقفول ..حمده يالها احباااط ..وانقهرت ..وفكرت شو تسوي لازم تغصص في عبوود ..وما لقت جدامها غير انها ادق الباب ..وتمت ادق بقوة وتصارخ عبدالله ..عبووووووووووود قوووم ابوي يقولك يله بيسر المسيد الصلاه بطوفك ...

حمده كانت تلعب في ازرار بيجامتها وسانده ظهرها على الباب وادق الباب وبريولها وظهرها وتصارخ عشان عبدالله يبطل الباب ..وفجأة الباب اتبطل ولان حمده مستندة على الباب طاحت على ظهرها داخل الغرفة وشهقت حمده من الخوف وشافت عبدالله واااقف فوق راسها ويطالعها وهو معصب ..وحاولت تشرد لكن عبدالله يرها من عقصتها وقال لها وهو معصب ::

حمدووووه يا سخيفه يا ادفش من خلق ربي بها الكون ..في حد يدق الباب ويصارخ على الاوادم ها الشكل..

حمده وهي تقول في خاطرها احممد ربك انا كنت برش بالماي ::

اااااااااي عبووود شعري هدني ترى والله أعلم ابوي ..ماماه ..باباااااه تعال شوووف عبوود شو يسوي فيني ..

ابو عبدالله سمع زعيج حمده وعبدالله وهو يالس يشرب قهوه مع ام عبدالله ..هز راسه وقال حق ام عبدالله ::

والله انا احس ان في البيت مب حمده بس الياهل الا عبدالله اخس عنها ..شو بلاه على اخته ..

ام عبدالله :::

ماعليك ترى حمده بعد هب هينه ماشاء الله عليها ..بنتي وانا اعرفها ..

وزاد الصوت من فوق صوت حمده تصارخ وتصيح وعبدالله معصب ويصارخ عليها ,.,,وشويه الا حمده نازله ركض من الدرج وطاحت في حضن ابوها ..وهي مسويه عمرها تصيح..وعبدالله وراها وهو لابس وزار وفانيله بس وشعره ملخبط وحالته حاله ..

ويوم شاف ابوه وامه استحى واتذكر هو شو لابس وشو حالته ..
عبدالله :::

صـ ..صباح الخير ابويه صباح الخير الوالده ..

ابو عبدالله ::

صباح الخير ؟؟ اي صباح خير وانت واختك شالين البيت على روسكم ...

عبدالله ::

السموحه يابويه بس ترى بنتك هذه ما فيها مذهب ...عيل في حد يكسر الباب على العرب وهم ورقود اونها توعيني من الرقاد ..

حمده بصوت عالي :::

باباه قااالي اوعيك عسب ما تفوتك الصلاه ..

عبدالله ::
ومنو قالج ان الصلاه بطوفني ويا ها الراس ....

ابوعبدالله::

لا والله حلو ...والله عرفت اربي انا ...قوموا تكافخوا احسن جدامي ..لا حيا ولا حشمية ..

هني عاااد قفط عبدالله وحمده ..

عبدالله ::

السموحه ابويه ..السموحه امايه ..

وقام حب ابوه وامه على راسهم ..وفي نفس الوقت مط شعر اخته حمده ..اللي عضت على لسانها عسب ما تصارخ وتنهزب مره ثانية...

ابو عبدالله ::

عبدالله ابويه سبر بارك الله فيك البس وتعال اتريق ويانا ...

عبدالله ::
ان شاء الله ابويه ..

حمده اونها عاد بريئة وما سوت شي::
باباه انت ما قلت لي اوعي عبوودي صح ..
ابو عبدالله ::

هيه يا بابا قلت لج وعيه مو تكسرين باب غرفته ..

تمت تضحك وحضنت ابوها وتمت اتبوس فيه الين قال بس ..

وام عبدالله تضحك من مكر بنتها حمده ..تعرف ان ابو عبدالله يموووت في حمده ..

في الطابق الثاني ..عبدالله سار يسبح ويتلبس وطالع الساعه وشاف انها توها 9.30 الصبح ..وهو بعد فيه ارقاد ما شبع وسار مدد جسمه على الشبريه ومد ايده وسحب الموبايل من تحت المخده ..وبطل الرسايل وكتب رساله حق حبيبته ساره..

()( صباح الخير يا عمري..صباح الخير يا عسل وسكر..شو فديتج راقده والا نشيتي ..احبج ..(())

وارسلها حق ساره..

..............................

في مكان ثاني من ابوظبي وبالتحديد في شقة خليفه ..خليفه راااااقد في سابع نومه الحبيب ولا حد يحشره مو مثل عبدالله االلي ما يروم يرقد للظهر ...خليفه راقد ويحلم ..وشويه يرن موبايله وينقز خليفه من صوت الموبايل ويمد ايده بكل كسل ويرد على الموبايل بدون ما يشوف منو متصل لانه اصلا مب قادر يبطل عيونه ..

خليفه ::

الووووه منوووه

ام خليفة::

صباح الخير يا ولدي بعدك راقد فديت عمرك ..

خليفه وهو يبتسم ::

هلا والله بها الصوت هلا وغلا بالحلوين شحالج الوالده شحالج يا لغالية عساج بخير ..واااايد اشتقت لج ..افا ما تسألين عن ولدج الفقير ..شبعان او يوعان ..راقد او سهران..و..

ام خليفه :::
بسك بسك بسك خليفه لا تاكلني برمستك ...انت اللي يسمعك يقول خلاااص مسكت كل يوم تتصل ..
وبعدين انت ليش راقد الين الظهر مب جنه اليوم اليمعه ولازم تنش للصلاه..

خليفه طالع الساعه وكانت الساعه 10 الصبح ..اي ظهر يا امي تونا الصبح..

خليفه::
ان شاءالله الوالده اصلا انا كنت مضبط المنبه على الساعه 10 الصبح ...

خليفه لا كان مضبط المنبه ولا هم يحزنون واصلا شكله لو امه ما دقت كان ما بينش الا العصر..

ام خليفه ::

ما شاء الله عليك يا ولدي الله يحفظك ان شاء الله ..يا بوي ما بتينا تري اشتقنالك ونبا نشوفك ..

خليفه ابتسم وهو فعلا اشتاق حق امه وخواتته واخوانه ..وسمع حشرة عند امه وصوت اخته فاطمه تهمس حق امها خبريه اميه خبريه..

خليفه::

شو عندها فطووم محتشره شو تبا..وليش ما تسلم وشو تباج تخبريني..

ام خليفه ::

يا ولدي هذه محتشرة تبي تسير ملجه بنت عائشة..في العين العروس عزمتها وخوانك كلهم مب فاضين حقها ..وانا بسير وياها ..فا شو رايك بتودينا او لا ترها حشرتني ..

خليفه::

خييييبه تبوني اضرب خط للعين عسب ملجه ..انزين لو عرس مو مشكله بس ملجه ..وبعدين ما عندنا بنات يسيرون ملجات حد غريب ..

ام خليفه شافت بنتها لونها تغير من القهر ..وقالت حق ولدها::
منو الغريب يا ولدي هذه عائشة بنت خالتي وبنتها بتملج وتعرف عائشة ماخذه واحد عيناوي وين بتكون الملجه الا في العين ..بعدين انا بسير بعد وانت بتودينا يوم الخميس ..

خليفه استسلم وقال خل اوديهم وافتك من الحشرة ابي ارقد..

خليفه::
ان شاء الله امي ان شاء الله الغالية بس عشان سواد عيونج بنسير دار الزين ..

وضحك خليفه وامه ..وارتاحت فطوم اخت خليفه ...

خليفه ما يدري ان سيرته للعين بتقلب كل الموازين ..وان صداقه العمر مع عبدالله بتنهز من هذه السيره...

يا ترى شو بيصير في العين ...

[jonoon]

يعطيك العافيه

[هنوف الروح]

الغرفة بارده وهادية ...سارة كانت راقدة في امان الله ..وفجأة حست بهز خفيف وصوت رنه موبايلها ..بطلت عيونها وطالعت الساعة كانت تقريبا عشر الصبح..ساره تعودت تخلي الموبايل حذالها يوم ترقد عسب لو اتصل حبيبها عبدالله ترد بسرعه ..شافت موبايلها وكانت رساله ..فتحت الرساله ..وقرتها ..كانت من عبدالله..ابتسمت وتمت اتفداه في خاطرها ....

وبطلت الحافظات الشخصية وفتحت حافظه هي مسوتنها ومخزنتنها باسم (( العمر لحظ ))

== صبحكم الله يا اهل الطيب بالخير ==
==ويسعد ضحاكم والظهر والعشية==
==ناس عزيزة والمعزة لهم غير==
== فيهم صفات الصالحين العلية==
==هذا سلامي يسبق البرق والطير==
==فيه الحروف معطره بالتحية==

ورسلتها لحبيبها عبدالله...ونشت لان امها في اي لحظه ممكن توعيها لانها مصختها وما نشت الين الساعه 10 الصبح..

علياء اخت ساره من جهه ثانية تحاول تقنع امها في الصاله انهم يسيرون الصالون عسب يتعدلون في الملجه ...
مر الاسبوع بسرعه وكل شخص يغني على ليلااااه مثل مايقولون سارة وعلياء يجهزون للملجة وكل يوم من محل لمحل ومن مووول لمووول ..

خليفة من ناحية ثانية يستعد عسب يرد دبي يوم الثلاثاء لان امه طلبت منه ها الشي عشان يودي اخته الصالون ويشتري لهم اغراض للملجه ..وكان يالس مع عبدالله يترجاه عسب يكلم الرائد عشان يعطيه اجازة لمدة يومين ..

خليفة::

عبووود عبدالله يله عاااد رمس الرائد خالد ترى يسمعلك ولك عنده كلمة قوله اني محتاج فعلا للاجازة والله بودي الاهل العين عندنا ملجه بنت بنت خالة الوالدة ..

وتم خليفة مغمض عيونه وهويفكر بنت بنت خالة امي هيييه صح بنت بنت خالتها ..ورد يكمل السالفه لعبدالله وعبدالله يطالعه وهو يبتسم ..

خليفة::

يله عاااد عبووود ذليتني ...انا برمسه وانت اسندني اوكيه ياالنسيب..

[هنوف الروح]

في الملجة الكل كان مرتبش خال ساره كان مسوي خيمة حق الحريم جدام البيت وكان فيه فرقه ودق والكل مستانس ويتريون العروس ادش ..

ام ساره كانت متوترة وخافت على بناتها لان الخيمة بدات تزدحم والحريم كثروا وخافت على بناتها من عيون الحريم وهي تعرف حركات بناتها زيين ..
سارة وعليا تعمدوا انهم يتاخرون عسب اذا دشوا الكل يطالعهم ويمووت قهر وهم ما سواا الحركه هذه الا عشان تغيظ عليا فطوووم ربيعه العروس ..وطبعا فطوووم تستوي اخت خليفه..وطبعا ساره وعليا ما يعرفون ها الشي بس اهم شي عندهم انهم يغيظون البنيه ..حركااات بنااات انتوا تعرفووون..

المهم

كانت الساعه 9030 يوم وصلت سارة وعليا وقالت ساره حق اخوهم سيف::

سوااف فديتك وقف عدال الخيمة لا توقف هني ما تشوف البقعه متروسه رياييل ..وانا متغشية ما اشوف شي اخاف اتفشل واطيح ع ويهي..

سيف وهو يتأفف::
تحركت ساره واختها بدلع ودلال ويأشرون على اللي يعرفونهم من بعيد ويسلمون ..عليا قربت من اختها ساره وهي تبتسم بسكل حلو وطفولي ::

سااااروووه امج شكلها معصبة وااايد وشكلنا بننهزب وبنتصفع...

ساره::

عليا حبيبتي خلاااص نحن فيها خليييج ريلاااااااااكس وكوووول وكل شي بيمشي حسب الخطه ..عيل ماتدري انا بنرقص ذيج الساعه صج بننذبح وبتجتلنا ...ههههههههههههه

وضحكوا مع بعض وهم متوجهين لامهم اللي صدق كانت منحرجة وماتعرف شو بتسوي معاهن ..

السلاام عليج امييه ...قالت ساره وعليا بنفس الوقت ..
عسى بس ما تاخرنا وااايد امييه تعرفين شو الصالونات زحمه ...قالت سارة بكل براءة اونها عااد ما تعرف ان امها معصبه..
ام ساره وهي تعض على ضروسها عسب ما تعلي صوتها ::

وعليكم السلااام سارووه وعليوووه شو هااللبس مسودات الويه ..قالت امهمن وهي معصبه وتقلدهن::ماما فساتينا بعدها ما جهزت يبالها عند المصمم تعديلات ..يا مسودات الويه انا براويكن يوم نوصل البيت ..فشلتوني شفوا بنات العرب كل وحده فيهن فستانها حشيم الا انتن ..

عليا بكل براءه ودلع ::
ماماه لا تعصبين فديت راسج انا كل ولا زعلج انتي ما تبينهن يعرفون ان بناتج ذويقات وراعيات فن ..طاعي كيف الكل يطالعنا شويه بيطلبون توقيعنا ..

ضحكت ساره وعليا وابتسمت امهمن غصبن عنها ..بس لفت ويهها عسب ما يشوفون بناتها ..اصلا هي ما تروم تزعل منهم وهن بناتها الوحيدات..بس الله يستر من عيون الحريم وتمت تقرى على بناتها ..وهن ولا على بالهن ..

شويه قربت منهن ام فطوم عسب تسلم على ام سارة ..

ام خليفة ::
شحالج يا ام حمد عساج بخير يا الطبية ..
ام سارة::
بخير يعلج الخير شخباركم وشخبار دبي دار الحي ..

ام خليفه ::
يسرج الحال يا وخيتي ..ما شاء الله هذيلا بناتج صح..
ام ساره ::
هييه نعم هذه ساره وعليا...تعرفين ما عندي غيرهن الله يخفظهن ان شاء الله..وين بناتج ام طارق..

ام خليفه ::
بناتي اللي ملتهيا بعيالها واللي حامل وما تروم للدرب تعرفين ..ما يبت معاي غير فطوم بنتي الصغيرة تعرفين العروس ربيعتها وااايد ..كاهي هناك ترمس ربيعاتها فديتها ااايد مستانسها لانها حضرت الملجه ..

وتموا يسولفن الحريم مع بعض وساره وعليا مقهورات من هذه الحرمه اللي حشرتهن ويلست وياهن خلها تسير عند بنتها ..
وهني عاد الفرقه شلت اغنية ربشه لعيضة المنهالي واشتلت القاعه بالتصفيق ..وتمت المطربه تنادي حد يرقص ::

المطربة::
يلااا يا جمااعه بدنا حد يرقص ويشعللها هذا عرس يا جماعه شو بكن...يلااا يا شباااب زيدوووا الدق ..
تمت المطربة تشجع البنات والمعازيم ..وهني عاااد ارتبشت سارة وعليا ..واستغلوا فرصه ان امهم ترمس الحرمه وقاموا على طووول للستيج وشكلهم كان رهيب ..وانصدمت ام ساره من حركه بناتهن وتمت ام خليفه اطالعهم وخصوصا ساره عيبتها لانها ترقص بدلع ودلال ...

خليفه يالس يحوط بالسياره في العين لين ما اهله يتصلون فيه وتم في خاطره يفكر في البنية الغاويه اللي شافها ..وقال في خاطره انا ما فيني صبر الين ما نوصل دبي واستفرد في فطوم الحين بتصل اتخبرها عن البنية..ظهر موبايله ودق حق اخته::

فطوم من الحشرة والصدعه مالت الفرقه ما سمعت موبايلها يرن ....

وخليفه انقهر وتم يحاول اكثر من مره ..ومرت الساعات ....وفي الخيمة دشت العروس والكل كان منبهر من جمالها وفستانها ..ومكياجها ..وفطوم طبعا مستانسه لانها صعدت الخيمة وسلمت على العروس وسولفت وياها ..وفي طاولة ام سارة ..قالت ام ساره حق بناتها ..

قومن سلمن على بنت خالكن مب حلوة الكل قام يسلم الا انتوا..يله قوموا سلموا
قامت سارة وعليا يسلمن على بنت خالهن ..وعيون ام خليفه ما خازت عن سارة ..وتقربت ام خليفه من ام ساره وسالتها ::

الا بسألج يا اختي ام احمد بنتج ساره تشتغل والا يالسه في البيت ..

ام ساره ::

لا فديتها تشتغل ..مع انه انا وابوها ما قصرين عليها ابدن لا هي ولا اختها والخير مغرقنا من ساسنا لراسنا ..واخوانها ما شاء الله عليهن ما قصرين بعد ..بس انتي تعرفين بنات ها الايام اونهن يبن يثبتن ذاتهن بالشغل ومن ها الخرابيط..

ام خليفة::

هييه والله يا وخيتي اعرف بتخبريني تراني انا بعد بنفس الحال مع بناتي ...بس ما شاء الله على بناتج العين ما تنظلهن انشاء الله ..جمال ودلال ..ما ادري وين الخطاطيب عنهن ..
ام ساره اتضايقت من الرمسة شو قصدها هذه بعد شو تلمح ..
ام ساره ::
مب كل من دق الباب وافقنا عليه يا ام طارق والا شو رايج ..

ام خليفه ::
هييه والله صدجج يا ام حمد ..الله يرزق البنات ان شاءا لله ..

واستمر الحديث بينهم على مواضيع مختلفه ..وكانت ام خليفه ترد وتعيد في نفس الموضوع حول ساره..وفهمت ام ساره ان بنتها ساره عجبت ام خليفه ...وقالت في خاطرها ليكون تبي تخطب بنتي حق ولدها ...

ام خليفه طلبت من بنتها فطوم انها تتصل على خليفه عسب يمرهن ..وسارت تكمل سوالفها مع ام العروس ..

فطوم ظهرت موبايلها وشافت 12 مكالمه لم يرد عليها من خليفه ..واستغربت شو ياه متصل وطالعت الساعه كانت 11ونص ..وردت اتصلت ..

خليفة كان قريب الخيمة لانه متفق معاهم على الساعه 11 بليل ..ويوم رن موبايله قال اخييييراااا::

تو النااااس ..رد خليفه وهو معصب ..

فطووم ::
بلاااااك خليفه ليش متصل ها الكثر شي صاار ..ز

خليفه ::
شو ما سمعتي الموبايل يرن عنبوه حرقت الموبايل من كثر ما اتصل وانتي طبعا مطنشة ..
فطوم ::
والله ما طنشت اصلا انا توني مظهرة الموبايل ما سمعت اصلاا الخيمة حشرة ما شي ينسمع الا اذا زاعجت ..
خليفه ::
المهم طبي عنج ها السالفه انا جربت من الخيمة يلا ظهري انتي والوالدة لو تأخرتوا برد عنكم دبي وانتوا ردوا بتكسي ..
ضحكت فطووم من اخوها العود::

هييه نت ترووم تخلينا والله لا يذبحك ابوي ....
خليفه ::
هيييه تعااالي فطوووم منو هذه اللي رمستي وياها اول ما وصلتكم الملجه....اللي قالت هذه ملجتنا ونسوي على كيفنا مدري شووو..
فطووم ::

هب عليك يا خليفه وانت يالس تتنصت لرمسه البنات والله لعلم امي ..
خليفه ::
جب ويا ويهج انا ما تنصت صوتكن كان عالي ..انا ما ابا الياهل اللي انتي وياها تتناقرون ابي اعرف اللي لحقتها ودشت وياها الحفله منو ..اختها ؟؟

فطووم ::
هييه اختها ..اوووه خليفه ابا البس عباتي يله امي تأشرلي انت ويين الحين؟؟
خليفه:
انزين انا خمس دقايق بكون عندج بسرعه يله السيايير في كل مكان ...
وصكر خليفه عن فطووم وهو معزم يعرف كل شي عن البنيه المجهولة الهويه اللي دشت خاطره ...

ساره وعليا انهزبوا في السياره هزاااب من امهن وغسلت لهن شراعهن وسيف مستانس ومتشمت ويزيد عليهن..
وهن صاخات ما يرومن يبطلن حلجهن ..لكنهن مستانسات لانهن سون اللي في بالهن ..

ساره ما صدقت انها وصلت غرفتها وعلى طوول دقت حق حيبها عبدالله::

عبدالله كان يطالع التلفزيون في غرفته ::ومتسدح على الشبرية..
ورن موبايله وشاف مكتوب على الشاشة (( الاهل يتصل بك))

ابتسم وقصر على صوت التلفزيون ::

الووو هلا هلا هلا والله بالقمر هلا وغلا يا اغلى حبيبة ..

سارة احمرت خدودها::
هلا حبيبي شو كنت راااقد ..
عبدالله ::
لا فديتج انا ارقد قبل لا اسمع صوت ا اقدر وانتي تعرفين ها الشي..
ساره بدلع::

اممممممممممم وشخبارك بعد

عبدالله ::
والله؟ انا بخيير دامج بخيير ...بخيير دامني سمعت ها الصوت العذب ..

سااره::

فديتك عبدالله ...

عبدالله ::
فديت اللي يتفدى عبدالله والله...سارونه تراني ما نسيت ..

ساره قلبها تم يدق ::

شو ما نسيت حبيبي ..

عبدالله::
اللي قلتي انج بتسوينها حق حبيبج عبدالله..الصورة فديتج ..صورتج..تراااني مشتااااااااااق وامووووت من الشووق ابي اشووف حبيبتي ..
ساره::
عبدالله الصراحه..انا ..ان..
عبدالله::
ادري ادري انح ما تقدرين حسيت انج بترفضين ..وانا حليلني يالس اتريا الصورة واقول في اي وقت بتفجأني حبيبتي بالصورة ويالس اطالع الموبايل ..

عبدالله سوى عمره مسكين وبيبا يكسر خاطر ساره ..

ساره تمت تفكر وعقلها متلخبط..

عبدالله تعرف ...تعرف انا الليله رقصت في الحفله وكنت حط الانظار مثل ما يقولون ..هههههههه

عبدالله ::
امممم والله زين ..
ساره ::
عبدالله ياله عاااد لاا تستوي غلق جييه ...ترا بزعل ..
عبدالله::

ليش تزعلين انا ما سويت شي عشان تزعلين ..
ساره ::
لا ترسني جييه عبووودي ..لا تكون جاف ..
عبدالله ::

يعني يا ساره انا طرشت لج صورتي اكثر من مره وفي كل مكان اكون فيه اتصور واطرش صورتي ..وانتي تبخلين عليه صورة وحده يا ساره ..عنبوه واااايد اللي اطلبه ..

ساره ::
لا مب وااايد بس خلني افكر اوكيه حبيبي ..بعدين ابا اتصور صورة حلوة عسب ما تقول هذه خدعتني وقالت انها حلوة وهي من جنبها على قوله السعوديين...ههههههههههه

عبدالله ::
ههههههههههه...اوكيه حبيبتي ..على راحتج..
ساره ::
اقوول عبدالله اختي ادق الباب ..بتصل بعدين اذا قدرت اوكييه..حياتي

عبدالله ::
انزين حبيبتي لا تطويلن بترياااج ...احبج اموووت عليييج..
ساره::

وانا بعد ..باي باي ..
وصكت ساره وسارت تبطل الباب حق اختها عليا اللي حشرتها تبا ادش الغرفه ...
وتموااا يسولفن عن الحفله وما خلوا حد ما قرضوا فيه الين الساعه 2ونص وعقب سارت عليا ترقد بغرفتها ..
عبدالله كان خلااااص راااسه يدووور بيرقد وبند التلفزيون وتلحف وقال في خاطره يمكن اختها رقدت عندها بالغرفة..
وشويه سمع صوت رنه المسج ..ودق قلبه ساره ..معقوله طرشت صورتها ..وبيد مرتعشه فتح المسج وقرى المكتوب فيه ::

(( عبووود باجر بنسير السينما جهز نفسك والغدا على حسابك ))

وكان المسج من خليفه ..ابتسم عبدالله ..ورد يرقد ..وخمس دقايق سمع رنه المسج مره ثانية ..تافف عبدالله ..خليفه يا الحشره خلااااص دريت انا بدفع الغدا شو اليديد يعني..وبطل المسج ...

وبقق اعيووونه ...ما صدق اللي شااافه ...كانت صوره بنية ..قمر قمر ..كانت الصورة الين نصف جسمها وتم يكبر في الصورة ويسوي زوووم ويدقق في تفاصيل عيونها وشعرها وخدودها .. وشفايفها..وابتسامتها الدلوعه ..كانت سارة ..هذه ساااره ..هذه صورتها وهي متعدله وكاشخه في الصالون ..شعرها ياي على صوووب وشكالها كانت حاطه ايدها على خصرها وفستانها رهييب وشكلها ذويقه في اللبس حماالااات ودلع ..ذااااب عبدالله ..وقرى الرساله اللي حت الصورة ..
شو رايك فيني حلوة والااا ...؟؟؟

الا حلوة يا بعد عمري الا قمر يا ساااارة ..فدييتج وفدييت عيووونج وخشمج وشفايفج ..آآآآآآآه شو ها الجمااال ..
عبدالله تم يطالع الصورة الين خلااااص عيونه غمضت من التعب ..وحضن الموبايل ورقد وهو يحلم في ساااره ..

خليفه في دبي في غرفته ..شكل ساره جمالها ما فارق خياله ..وتمت في خاااطره ها البنيه ما قدر ينساها ابدن ..


يعني عبدالله وخليفه يفكروون في نفس البينه ..يا ترى شو بيصير عقب..

[هنوف الروح]

مثل ما قلنا عبدالله وخليفه تموووا يفكرون في نفس البنيه طول الليل ..عبدالله مب مصدق ان اللي يكلمها من شهور ظهرت بهذا الجمال والدلع ..وخليفه مصمم يعرف منو هذه البنت وشو علاقتها باخته ...

في يوم الجمعة الصبح تقريبا الساعة 10:30 سمع خليفة دقات على باب حجرته وصوت اخته فطوم توعيه من الرقاد ..خليفه لفتره ما عرف شو السالفه او وين اهو ومنو ها البنيه اللي تنادية ..ويوم زاد الدق وصوت اخته وشكلها ملت من الدق على بابه..

فطووم::

خلييفة بسك عاااد قووم تراااك طفرت بي ..هاي ثالث مره اييك الغرفة..ترى والله ازقر لك ماما توعيك ...

خلييفه حس وانتبه انه اليوم جمعه وفي صلاه جمعه وفي نشة من الصبح ...بس كل هذا ما همه اول ما حس نقز بسرعه من شبريته وبطل باب غرفته وتجمدت اخته فطوم من الزيغه تحرته بيصفعها والمسكينه جهزت اعذارهاااا..

فطووم ::
بسم الله ..والله هذه ماماه قالت لي اوعيك ..ما يخصني ..خليفه والله هي قالت لي سيري وعي خليفه من الرقاد ..

طبعا خليفه ما يهمه شو تبا اخته او منو طرشها..سحب ايد اخته ويرها داخل الغرفه وصك الباب وراها ويلسها على طرف الشبريه ويلس عدالها ..وقال بسرعه ::

فطوووم طبي عنج ها السوالف وخبريني منو هذه البنيه اللي كنت تتناقرين انتي وياها جدام الخيمه امسات في الملجة..

فطووم ارتبكت وما عرفت شو السالفه او اي بنيه يقصد..وتمت تفكر وهو يذكرها بالسالفه ..وعقب عرفت انه يقصد عليا اخت ساره ..وتمت في خاطرها تقول وانت شو تبا في عليا..

فطوووم::

هييه هييه عرفت انت تقصد عليا بنت راشد الظاهري..
خليفه ::

مدري هي البنيه اللي انتي وياها تتناقروون عند الخيمه ..

فطووم::

وع بلااااهاا شو تبا فيها من حلاااتها ...
خليفه ::
يا لغبية انا ما ابا منها شي انا ابا اعرف منو اللي لحقتها عقب فتره وسبقوكم للخيمه ..منو اختها خالتها عمتها يدتها منووووو خبرييني ..

فطووم::

وانت شو له تسأل هذه الاسئله كلها ..شو تبا منهن عيب تتخبر عن بنات العرب ..ما تعرف انه ها الشي منقود ..

خليفه ::
فطووم بترمسين والا بعطيج عويهج طرااق اخليج تتصطلبين معاي في الرمسه ..
فطووم خافت وقالت لا تطولينها وهي قصيره خل افتك واخبره باللي يباه ..

هذه اختها العوده..لكن انت ليش تسأل كل هذه الاسلة كلها شو تبا لا يكون تبا تعرس وحده منهن..

هني عاااد ابتسم خليفه ونش من عداال اخته وتم يدوور في الغرفه وطالع اخته فطوم ..وسألها

فطووم هذه البنيه شو تعرفين عنها ..شو طبعها شو اخلاقها ..شكلها بنت ناس وعرب حشام واجاويد ..خبريني عنها..

فطووم بغبااء عن منو بالظبط ساره او عليا,..

فطووم::

عن منو تبا تعرف كل ها الاشياء عليا او ساره ..

خليفه ::

سااره اسمها سااره ..فديت ها الاسم ناعم ورقيق مثلها ..خبرني كل شي عنها ..

فطووم وهي متغيضه من اخوها ..شو يبا هذا الحين ليكون يبا يخطب ساره وابتلش انا مع عليا..بروحي ما ادانيها بعد اختها تاخذ اخوي ..لكن حراام ساره غير عن عليا ..ولو انها تناصر اختها علي بس ساره غير..

فطووم ::
والله الصراحه هي ما عليها كلام ..بس شو تبا فيها والله اذا تبا تعرس عندي لك عرووس تخبل والله خلييفان حبيبي لا تاخذ اخت عليا ...

خليفه::

جب جب جب شو خليفان العب ويااج في السكه انا ..بعدين هذه دشت القلب يا فطووم خلااااص وانا اعرف اييب اخبارها من الوالده ..يله ذلفي برع ابا اسبح وابدل وانزل تحت اسولف مع ماماتي شويه ..
خليفه قال ها الرمسه ومسك اخته من طرف جلابيتها ويرها الين برع الغرفة وصك الباب وراها وما عطاها فرصه ترد ..عليه ..فطووم تغيضت منه وانقهرت وااايد وقاالت انا اراويك ..وركضت تحت عند امها اللي كانت يالسه تتقهوى وتاكل سح ..وتفكر في ملجه امس ..

فطوووم بسرعه يلست عند امها ::
ماماه ماماه..ما دريتي خليفان يبا يعرس ..
ام خليفه وهي منصدمه وشويه ابتسمت وقالت في خاطرها يت من عند الله..
شو فيج بسم الله خرعتيني في حد يسوي جييه يوم يبا يرمس العرب ..بلاااه خليفه ولدي شو من عرس شو تقولين انتي..
فطووم ::

ماماه اقولج خليفه امس لمح ساره اخت عليا الكريهه وعيبته وقال انه يبا يعرف كل شي عنها ..ويمكن يخطبها ..ماماه دخيلج لاتخلينه يا خذها ما اطيق عليا..اخييه ما اتخيل ان خليفه اخوي يا خذ اخت عليا ..

ام خليفه ابتسمت وتمت في خاطرها تقول والله انه عندك ذوق يا ولدي ونظره في البنات ..فديتك دومك تسبقني في الافكار فديتك يا بعد عمري ..فالك طيب جان تباها من باجر اخطبها لك ..

ام خليفه وهي تطالع بنتها الصغيره فطووم وهي تتحرطم على اخوها ::
فطووم بلااااج انتي خبله شووه ..شو ها الرمسه اخت عليا واخت عليا..جان بينج وبين عليا سوالف البنات الماصخه والدلع لا ادخلين الكبار فيها ..وساره بنت ما عليها كلام ..والكل يباها واذ ما خذها اخوج ياخذها غيره ...والصرااحه البنيه ما اتفوت ابدن ..وولدي عنده ذووق ظاهر على امه فديته ..وضحكت ..

وهني نزل خليفه بعد ما سبح وبدل ..وسمع ضحكت امه ..وابتسم وقال خلني افتح السالفه دامها رايقه ومستانسه ..ما يدري ان الامور بتسير حسب ما هو مخطط له ...


وفي ابو ظبي وبالتحديد في غرفه عبدالله ..كان يالس يطالع صورة ساره في الموبايل ومو مصدق عمره ومو مصدق ان ساره اخيرا طرشت صورتها ويبا يتصل فيها لكنه يتريا انه تدخل الساعه 11 لانه متفق مع ساره على هذا الموعد دووم يوم الجمعه لانها تكون من الصبح مع امها واختها وخوانها يعني العيله تجتمع عندهم وهي عقب تخليهم وتصعد غرفتها عسب تسبح وتبدل وتدخن حق الصلاه ودخن غرفتها وكل شي ...تعرفون ساره ودلعها عااد...
واول ما دقت الساعه 11 اتصل عبدالله وقلبه يدق ويدق ..وفي خاطره بس يكلم ساره حبيبته وطول الموبايل وحد رد عليه..وانقطع الخط لانه محد رد عليه .. ورد اتصل مره ثانيه وثالثة ومحد رد عليه ..طالع الساعه كانت 11 وعشر دقايق ..قال في خاطره اكيد بعدها تحت وموبايلها في الغرفه ..بتريا بعد شويه وبرد اتصل عليها ..
في ها الوقت ساره كانت تحت مع امها واختها وحريم اخوانها ..وتبا تسير الغرفه لكن مب عارفه كيف وامها تخزها بعيونها كل ما كانت تبا تنش ..
واخيرا على الساعه تقريبا 12 وربع كل وحده من حريم اخوانا سارت تشوف ريها شو يبا قبل لا يسيرون الصلاه واللي تبا ادخن ريلها قبل لا يسير المسيد وشردت ساره من بينهم وسارت غرفتها ..وصكت باب الغرفه ومسكت موبايلها وشافت 10 مكالمات لم يرد عليها ..ومسج واحد ..
بطلت المسج كان من عبدالله وكاتب فيه::

اتصلت اكثر من مره ..ان شاء الله المانع خير ..انا بسير الصلاه ..وعقب يمكن ما اقدر ارمسج لاني مواعد ربيعي على الغدا .اذا حصلت فرصه بدق لج...على فكره ..انتي ملااااااااااااااااااااااك وانا ذبت لما شفت الصوره وشفت القمر.....احبج موووت

تمت ساره تقرى المسج اكثر عن مره وهي مستانسه ومتحسره انها ما قدرت تكلم حبيبها عبدالله ..اووف منهن حريم الااخوان كيف حشرة وازعاج ..لكن اهم شي انها عيبت عبدالله ..قالت ساره في خاطرها ..قصوره بعد ما يعيبه شكلي والله اني قمر فديتني والله ...وتمت تضحك على عمرها ...وعقب قامت تتتجهز للسبوح....

خليفة كان في سيارته يتسمع ال اف ام ومستانس وهو راد بوظبي وشويه رن موبايله وكان مكتوب عليه الشيخ عبدالله يتصل بك..ابتسم خليفة وهو يشوف الاسم..

خليفة ::
هلا هلا هلا بالشيخ عبدالله هلا والله بالنسيب ..خشمك ..شحالك طال عمرك

عبدالله وهو يضحك ::

هلا والله الشيخ خليفة شحالك ..خشمك ..انا بخير يعلك الخير..اقول الشيخ خليفة مب جنك طولت علينا ..ترى يوعتنا ما تسوى علينا هذه العزيمة لااا وانا اللي بدفع بعد..

خليفة ::

يا خي ذليتنا اقوووول انا اليوم اللي بدفع وعندي لك خبر بمليوووون درهم ..الا قووولك بمليووونيين ...

عبدالله ::

يااريااال شوو عندك شوقتني ..اقووول جم باقي لك عسب توصل ..انا الحين وصلت المارينا اترياااك في السيارة او اسير المطعم وانت تلحقني..

خليفة انا خلاااص دخت ابو ظي ثلث ساعه بكون عندك سير انت وجهز الطاولة واطلب لنا كل ما لذ وطاب ولا تنسي صلصه الربياان تعرف اني امووت فييها ..
عبدالله ::
احلف انت بس ليكون انا الجسون وانا ومدري ..تخسي انا وانت نختار السلطه ونطلب عقب تقول انا ما احب هذا لو طلبت هذا كان احسن ومدري شووو..اعرفك زيين ..ماااشي تعااال ترياااك عند البراااكن وندخل سواا..
خلييفه::

خلاااص اتفقنا اصلا انت ما ترووم تستغنى عني لكن ما تبا تعترف انا ادري ..هههههههههههههههه

عبدالله:
هههههههههههه لاااااا تصدق ما كنت اعرف ..يله يا بوووي فكنا تراني يعت من صدق حشى حد يتغدى الساعة 3 العصر ..
ضحك عبدالله وخليفة ..كانت صداقتهم وااايد روعه ..واكثر من اخواان ..والكل كان يحسدهم على هذه الصداقة ..كانت صداقه اكثر من المتعارف عليه بين الاصدقاء ..كانواا اكثر من اخوان اكثر من الاخوان نفسهم ...صداقتهم مب من الطفولة مثل ما الكل يعتقد اول ما يتعرف عليهم ..لا بالعكس هم تعرفوا على بعض في العمل ..اول ما تعين خليفة ان عبدالله متعين قبله بست اشهر ..لكن خليفة لفت نظر عبدالله بخفة دمه وروحه المرحه وقوه شخصيته لما تطلب المواقف ها الشي ..وخليفه تعمقت معرفته بعبدالله اكثر واكثر من خلال شغلهم مع بعض ..

عبدالله وخليفه ما كانوا يدرون ان هذه الصداقه بتنتهي عقب كل هذه السنوات ..والسبب ..الحب ..


طلع عبدالله وخليفة اللفت وخلبفه مثل عادته عيونه كانت تقز بنات الناس وعبدالله يضحك عليه ..

عبدالله::

خليفه ارحم عيونك مب زين لك ترى اعلم حمده حرمتك...

خليفة تم يضحك ويقول لعبدالله ::

خلني استمتع يا عبوود خلااااص ربيعك بعد ها اليوم ما يقدر يطالع الغراشيب ..

عبدالله ما فهم قصد خليفة وضحك عليه وقال له::

شو ليكون بتصير مطوع ..ترى ما يليق عليك خلفووه انت اكبر لووتي والمطاوعه مب لوااته ...
خليفه ::

لا يا النسيب انا قررت اني ادش القفص الذهبي ..

عبدالله بقق عيوونه لا لا لا مب مصدق::

خلفييه شو استوالك منو اللي بيدش القفص الذهبي انت ؟؟؟؟....هيييه انت صدقت اني بعطيك اختي حمده..

خلييف وهو يضحك على ربيعه عبدالله ::
لااااااااا حمده خلاااااص الحب الجديم ..الحين في حب يديد ..حب عيناوي ..

عبدالله ما فهم ربيعه ويلس على الكرسي في المطعم ويلس جدامه خليفة ووصل النادل وطلبوا الاكل وقاموا عند بوفيه السلطات يختارون وردواا يلسووا يتريوون وجبتهم ويتسلون بالسلطه وعبدالله يطالع خليفة ويفكر باللي قااله ربيعه

عبدالله::
خليفة شو صار خبرني شو من حب عيناوي هذا اللي ترمس عنه..
خليفة ::
ربيعك تصوب بسهم الحب من كيوبيد هني بالظبط..
واشر خليفة على مكان قلبه..
عبدالله ::
خليفة بترمس والا اجلب صحن الصلصه على راسك ..
خليفة ضحك واشر لربيعه عسب يهدا::
لا تجلب الصحن ولا تعصب السالفه وم فيها اني قررت اعرس ..بس ابا اتأكد من كذا شغله وعقب ادش القفص بثقه..
عبدالله::
من صجك خليفة بتعرس نويت العرس ..ترى مهر حمده غاااالي ..هههههههههههههههاااي
خليفة ::
وانا احلم اخذ حمده او حتي رمشه منها..لاااا يا بووي انا على قد حااالي بخذ وحده يناااويه ..ربيعك بيستوي عيناوي ..يا خي من زمان كان لازم اشجع نادي العين الصراااحه نادي رهييب..
خليفه قال كلمته ورفع حواجبه يغايض عبدالله ..
عبدالله::

لاااااه بتشجع العين ويا الرااس ..وتعرف اني وحداوي ..اوكيه ما علينا ..شو السالفه من صجك ..بتعرس ..ما اتتخيلك..

خليفة::
لا تخيلني معرسولابس البشت ...والله يا عبوود لو تظبط السالفه ترى امي داعتلي ..
عبدالله::
اوب اوب اوب لها الدرجه ...ومنو هاي اللي قدرت تييب راسك ..وتخليييك تودر العزوبية وانت مب ندمان ..
خلييفة::
غرشوووبه عيناويه ..شفت...اقصد الاهل شا فوها في الحفله اللي سارو لها في العين وقالوا عنها بنت عرب وناس وتناسبني ..
عبدالله ::
والله شي حلوو ..والله يا خليفه اذا هي مثل ما تقول ..انا انصحك ما اطول السالفه ..يمكن احد يخطبها قبلك وانت تقول ان اهلك شا فوها في الحفل ..يعني في غير اهلك بعد شافوها ..يعني البنيه تلفت النظر ..واذا هي مثل ماتقول اكيد خطابها بيكثرون ..
خليفة ::
هييه والله تصدق الواالده بعد قالت لي نفس الرمسه وتقول خير البر عاجله ..وبعدين هم يقربون لنا من بعيد ..ترى بنت خالت الوالده ما خذه خال البنية ..يعني من الاهل بس من بعيد..

[هنوف الروح]

استانس خليفة من تشجيع ربيعه عبدالله له ...وزاد اصراره على انه ياخذ ساره ..عبدالله كان يشجع ربيعة وهو ما يدري انه ينهي بايده صداقه العمر مع خليفة ..ما يدري انه يخسر الحب ..حب ساره له ...ما يدري انه في هذه اللحظه بالذات ساره كانت يالسه تفكر في مصيرها معاه ..شو نهايه حكايتها معاه وقررت انها اليوم تفاتحه في الموضوع لانه عبدالله شكله مب ناوي يسوي شي ..لازم يكون لها موقف معاه ..

في دبي كانت ام خليفة يالسه تتشاور مع اخو خليفة العود طارق حول موضوع العرس وكيف انها اعجبت بساره وانهم ناس وعرب اجاويد وانها تريد تخطب البنيه لولدها ..طارق قال حق امه وهو يشرب القهوه ::

والله يا الوالده اذا انتي تشوفينها بنت ناس واهلها عرب حشام ما في اي مانع وبالعكس انا اباه خليفه الهرم يعرس ونفتك من حشرته وعيونه اللي ما تخلي بنيه في حالها ..

ام خليفة::
لا فديته ولدي حشيم ما يحب ها السوالف لا تقول عن اخوك جذا مب زين ..

طارق ::
حشيم ..انزين تراج ما تشوفينه يوم نسير اي مكان معاه ..عيونه بتاكل البنات ..لكن ما عليه الهرم انا براويه يبا يعرس ما يخبرني الحين بدق له ..

ودخل ايده في جيب كندورته بيظهر موبايله لكن ام خليفة مسكته وقالت له انها بتكلم عايشة بنت خالتها وبتاخذ رقم ام ساره منها عسب ترمسها في الموضوع اليوم قبل باجر ..تخاف اي حد يسبقها ويخطب ساره قبلها ..
وما كذبت خبر اتصلت في بنت خالتها عايشة وباركت لها على ملجه بنتها ..وتموا الحريم شويه يهذربون عن الحفله ..وفاتحت ام خليفه بنت خالتها في السالفه وقالت لها انها ماتخبر حد الين تعرف رد ام ساره ..وما قصرت عايشة ما خلت من مديح في ساره وقالت سبقتيني كنت اباها حق ولدي محمد اللي كان مسافر ويدرس في امريكا لكن ان شاء الله تتوفقون في السالفه وتمشي على خير..

خذت ام خليفه الرقم وسارت غرفتها ترمس ام ساره لان فطوم نزلت وتمت تسولف ويا اخوها العود شويه ..وبعد عشان تاخذ راحتها في الرمسه..

كانت ام ساره يالسه في الصاله مع حريم عيالها وبناتها ساره وعليا..يسولفون ورن تيلفون البيت وقامت عليا ترد عليه

عليا::
الو نعم
ام خليفه ::

السلام عليكم ورحمه الله ..

عليا ::
وعليكم السلام والرحمه ..

ام خليفه ::

منو معاي عليا او ساره؟

عليا ::

لا انا عليا ..انتي منوه..

ام خليفة ::

انا ام طارق يا بنتي فديتج زقري امج خبريها اني اباها ضروري..

عليا لوت بوزها يوم درت ان هذه ام فطوم وقالت من دون نفس ::

حاضر ان شاء الله..
وحطت السماعه..وسارت تزقر امها ..

ماماه قومي حرممه تباج على التلفون ..

ام ساره ::
منوه يا بنتي ما تخبرتيها ؟؟

عليا ::
هذه ام فطوم الحشرة ..ام طارق ..
ام ساره :
يا الهرمه اللي ما تستحين ع ويهج عيب يا بنتي جم مره اقولج حشمي اللي اكبر عنج ..

وسارت ام ساره ترفع السماعه وهي في قلبها تدعي ان الحرمه ما سمعت رمسه بنتها ..وساره وعليا يضحكون بصوت واطي مع حريم اخوانهم ..

ام ساره::
السلام عليكم والرحمه ..اشحالج يا ام طارق..

ام خليفه ::
وعليكم السلام والرحمه ..اشحالج يا ام حمد عساج بخير ربج الا بخير..

ام ساره ::
بخير والحمد لله ..شخبارج وشخبار الاهل والعيال ودبي ..

ام خليفه ::
بخير يعلج الخير الكل يتخبر عنكم فديتج..
وتموا شويه الحريم يسولفون ويتخبرون عن اخبار بعض ..وفي الطرف الثاني كانت ساره وعليا وحريم اخوانهن يضحكون ويسولفون بصوت عالي..وسمعتهم ام خليفه وهي تبا تفتح الموضوع مع ام ساره ..وحست ام ساره انها تبي تخبرها موضوع عسب جييه قالت لها ..

اقولج ام طارق انا بسير داخل الميلس ارمسج لان الصاله حشره وما اسمعج عدل من حشرت الينات ..

ام خليفة ::
هيه والله زين تسوين لاني اباج في موضوع بعد شويه خاص ..

وسارت ام ساره الميلس وتبعتها ساره بعيونها وقلبها دق من دون ما تعرف السبب ..حست بنغزه في قلبها وسرحت شويه ..ليش امي سارت الميلس ..شو بينها وبين ام فطووم يا ترى ..بس ما قدرت تسرح في افكارها لان ضحكه عليا رجعتها للواقع ..وقالت في خاطرها اكيد يبون يحشون في الحريم ..اعرفهم ها العياييز ما يرتاحون الا يقرضون في الخلق..

في الميلس ..

رفعت ام ساره السماعه ::
الوه هلا ام طارق السموحه منج اختي ترى البنات صدعه يوم يجتمعن وانتي تدرين بها الشي ..
ام خليفة ::
لا عادي ترى عندي نفس الشي يوم يجتمعون بناتي مع حريم اخوانهم ..الا طبيهن عنج اباج في سالفه يا ام ساره ..

انتبهت ام ساره ان ام خليفه ما زقرتها ام حمد مثل عادتها قالت خير شو عندها ..

ام ساره ::
تفضلي يا ام طارق ما يدرج الا لسانج ..
ام خليفة::

الصراحه يا ام ساره ..انتي تعرفين ان ابو طارق متوفي الله يرحمه من سنين ..وخلالي ها العيال اشد فيهم اظهري والحمد لله هو فرح فيهم قبل لا يذكره ربه ..وما تم غير ولدي خليفه وبنتي فطوم الصغيرة..

ام ساره ::
الله يرحمه ان شاء الله ..والبركه في عيالج والخير فيج يا ام طارق..

ام خليفه ::
تسلمين يا ام حمد ...وانا يا وخيتي ما بطول السالفه عليج وهي قصيره ..انا من زمان كنت افكر اخطب لولدي خليفة بس انا اعرف طبع ولدي عدل واعرف اني كل ما برمسه عن وحده بيتم يظهر فيها كل العيوب ..وكنت اخليه على راحته اقول في نفسي ما اريد اغصب عليه عقب يقول امي اللي جبرتني على هذه الحرمه..لكن انا من شفت بنتج ساره امس في الملجه الصراحه ما شاء الله عليها دشت قلبي بسرعه ..وقلت انا هذه اللي ابغيها حق ولدي خليفة وسبحان الله انا يوم رمست خليفه عنها وعنكم رحب بالموضوع وما اعترض مثل كل مره بالعكس حسسني ان هذه البنت اللي يباها وينتظرها ..والله يسلمج يا ام حمد انا الصراحه ابغي اخطب ولدي خليفة حق بنتج ساره ...ونتشرف فيكم عرب والنعم فيكم ..وولدي بعد ما شاء الله عليه ما عليه قصور ريال والنعم فيه يشتغل وعندنا خير والحمد لله ..وما بنظلم بنتكم ويانا واكيد اذا استوى نصيب بنحطها في عيونا ..

ام ساره كانت تسمع وهي تبتسم ..كانت حاسه من امس ان ام خليفه حطت عينها على ساره ..وهي تعرف انهم ناس والنعم فيهم وما عليهم قصور ..بس ما حبت انها تبين حق ام خليفه انها موافقه فقالت لها عقب ما خلصت ام خليفة رمستها ::

والله يا ام طارق انتو ناس والنعم فيكم بس انا لازم اشاور ابو البنيه واخوانها ولازم اشاورها هي بعد ..وان شاء الله خير ..
ام خليفه::
صح كلامج صح ..ان شاء الله نسمع الخبر الطيب منكم واذا حصل نصيب رديلي خبر عسب انييكم ونخطبها رسمي منكم ويونكم الريايل بعد ..

ام ساره::

خير خير ياام حمد كل شي في وقته حلو ..انتي بس عطيني فرصه اسبوع اسبوعين وبرد لج خبر ان شاء الله ..

ام خليفة ::
اسبوعين عاااد يا ام ساره وااايد ..خليهم اسبوع ..والا اقولج على راحتكم ..عشان ما نضغط عليكم وانتي تعرفين رقمي وكل شي ان شاء الله خير ..يله الغاليه ما اطول عليج ..سلمي على اللي عندج واتريا اتصالج ..مع السلامه..

صكت ام ساره عن ام خليفه الخط وهي مستانسه ..وتمت تقول في خاطرها الحمد لله ربي استجاب لدعوتي وان شاء الله خير يا بنتي يا ساره ..يلست تفكر شويه في الميلس وعقب سارت عند بناتها في الصاله ..اول ما دشت طاحت عيونها في عيون بنتها ساره ..وابتسمت لها بحنان وحب ..ساره ردت لامها الابتسامه وهي مب عارف شو السالفه ..

وعدى اليوووم وفي الساعه 12 ونص بالليل اتصل عبدالله لسارة::

ساره بدلع ::
الووه هلا غناتي هلا عيوني هلا ..

عبدالله ذااب من سمع صوتها ::

هلا والله هلا هلا بالورد والعنبر هلا بالعود المبخر هلا ..فديت عيونج انا ..

ساره وهي تضحك بدلع ::

لااااه ها كله حقي ..اممممم يعني افهم من رمستك انك مشتاق لي ..؟؟

عبدالله ::
الا مشتاااق ..الا بمووت من الشوووق والاشووواق لج يا بعد عمري انتي ..تخيلي اني ما اسمع صوتج طول اليوم الين ها الوقت ..

ساره ::
فديتك والله ..سوري بس تدري انت ان يوم الجمعه غير عندنا ..لازم طقوس في بيتنا تستوي ..اخواني وحريمهم والبيت يستوي زحمه وحشرة ..

عبدالله وهو يقاطع ساره بصوت حنون::

فديتج ساره ..اشتقت لج مووووت ..احبج ...

ساره استحت واستوى وييهها احمر ::

عبووودي يله عاااد ...وانا بعد ..
عبدالله::
انتي بعد شوو؟؟

ساره ::

انت تعرف انا شووو..ا حـ بـ كــ ...ههههههههه..

عبدالله :::
فديت اللي يحبني والله ..عطيني بوووسه فديتج ..

ساره وهي اونها معصبه ::

عبوود يووز عن حركاتك ..

عبدالله وهو يضحك ::

ادري ودج تكفخين بالموبايل ..بس مو بايدي والله اسمع ها الصوت العذب وتبيني اتحمل ..انا بالغصب مركز ويااج ..هههههه..

ساره شافت ان عبدالله راايق قالت خلني فاتحه في الموضوع ..

ساره::

حبيبي ..اباااك في سالفه ..بس مدري ..متردده اقولها ..

عبدالله ::
افااا لا تترددين انا حبيبيج ما يردج الا لسانج قولي وتدللي انتي ..امري وانا خدامج ...
ساره ::
فديتك حبيبي محشووم والله ..بس اباك شويه تكون جدي وياااي اوكيه ..
عبدالله حس ان السالفه جديه وقال لها ::

ساره قولي شو عندج ...اسمعج..

ساره::

انا ...انا ابا ...ابا..الصراحه ابا اعرف النهايه...

عبدالله على طوول فهم شو قصد سااره ..وتم ساااكت ..هو بنفسه ما يعرف شو النهااايه ..كم مره حاول يتجنب ها الموضوع ..بس ما يقدر ولما طول سكوت عبدالله ..قالت ساره::

عبدالله انت فاهم شو اقصد ..ابي اعرف النهايه شو ...شو نهايه علاقتنا مع بعض ..عبدالله انا احبك وانت تحبني ..وانا متأكده من ها الشي ..لكن شو النهايه ..خبرني طمني ..عبدالله لا تسكت ارمس..

عبدالله وهو ما يعرف شو يقول حق ساره::
حبيبتي انتي تعرفين اني احبج زين وانا اعرف شو تقصدين ..انا اتمنى اني اكون وياج اليوم قبل باجر لكن....

ساره وهي تقاطعه :::
لكن شوووه؟؟خبرني عبدالله لين متى بنتم جييه ..
عبدالله::

لكن شو اقول حق اهلي اذا ابي اخطبج ..شو اقول لامي يوم تسالني من وين عرفتها ؟؟شو اقوو..

ساره وهي تقاطعه ::

شو تقول حق امك؟؟ ما اعتقد ان ها الامر وااايد معقد لها الدرجه ..عبدالله شو السبب الرئيسي قول الله يخليك ..انت كم مره قلت انك تباني ..اوكيه ليش ما تسوي شي ..لأيش ما تخطبني من اهلي..اذا انت فعلا تحبني ..

عبدالله وهو منفعل::

انا احبج والله اني احبج ..لكن انتي ما تعرفين طبع الوالده والوالد..انا قلت لج انهم يبون يخطبون لي وحده من اهلنا وانا اللي ااجل الموضوع عشانج...

ساره والدموع شويه وبتصب من عيونها::

اوكيه حبيبي انت قول لهم انك ما تباها ..قول لهم انه في خاطرك وحده غير عنها ..ليش ما ادافع عن حبك جدامهم ..

سكت عبدالله وما عرف شو يقووول ..وتم يفكر في بنت خاله اللي امه تبا تخطبها له ..وشو بيقول حق اهله عن ساره ..

ساره نزلت دموعها من عيونها غصبن عنها وحس فيها عبدالله ::

ساره فديتج لا تصيحين عشان خاطري ...دموعج غالية علي..

ساره بصوت متقطع::

عبدالله لو ان دموعي غالية جان ما خليتها تنزل يا عبدالله ..ما كنت اتوقع انك ما تدافع عنك حبنا ..لكن للاسف صدمتني ..

عبدالله::

لا يا ساره انا احبج وانتي تعرفين ها الشي ..لكن ظروفي ما تسمحلي الحين اني افاتح اهلي عن موضوعنا ..عطيني فرصه ادور طريقه افتح الموضوع لهم..

ساره::

عبدالله حنا نعرف بعض من ثمان شهوور ..اعتقد هذه فتره كافيه انك تعرفني وتعرف كل شي عني ..وتعرف كيف تفاتح اهلك بالموضوع ..اذا انت كنت تبا ها الشي..
عبدالله::
لاتظلميني يا ساره ..انتي تعرفين كيف هي عقليه اهلي...لكن ان شاء الله اوعدج اني افاتحهم في موضوعنا..المهم ما تصيحين دموعج غالية عندي..فديتج لا تكدرين مزاجج حبيبتي ..
ساره ::
اوكيه عبدالله ..اوكيه ..مو مشكله ..
عبدالله ::

ساره فديتج والله ما تزعلين انا اعرف انتي بشو تحسين واعرف وضعج زين ..لكن عطيني فرصه ..

ساره ::
عبدالله خلاص ممكن تقفل على الموضوع ..انا تعبانه واحس اني ابا ارقد ..

عبدالله تضايق من كلام ساره ..شو يعني تبي تصك السماعه ..ما حب يترجاها اكثر وهي زعلانه لانه يعرف انه ما في فايده اذا زعلت..

عبدالله::
اوكيه حبيبتي ..انتي ريحي الحين ..وباجر ابا اتصل فيج اوكيه حياتي ..

ساره ::
اوكيه ..مع السلامه ..

وصكت السماعه من دون ما تسمع رد عبدالله..

عبدالله من القهر فر موبايله على الارض وتم يفكر ..هذه مب اول مره تلمح فيها ساره على ها الموضوع ..عبدالله مب عارف شو يسوي ..الين الحين هو يحس انه يحب ساره ..ويحب صوتها وقلبه يدق يوم يعرف انها متصله ..وكل ما يذكر صورتها ..يذوووب فيها ويتم يتفداها ..لكن كل ها الامور ..بعد ما تخليه يفكر انه يقدم على خطوه الزواج منها ..
هو يباها وفي نفس الوقت ما يقدر يتجرأ ويتقدم لها ..شو بيقول حق امه وابوه ..اعرفها من النت ..وهي ترمسني بالموبايل ..او يقول انها اخت ربيعه ...وهو يعرف ان ربعه معدودين ..وبوه وامه مب يهال عسب يضحك عليهم ..

آآآآآآآآآآآآآآآآآآآآآآآآآه يا ساااره ..شو سويتي في عبدالله...عبدالله اللي ما في بنيه قدرت اتييب راسه ..وما ينكر عبدالله انه اكثر من مره يحس بالغيره يوم ترمسه ساره عن الاعضاء اللي يرسلون لها رسايل خاصه ويحاولون اضافتها في المسنجر ..مب هذه كانت بدايتها معاه ..شو دراني اني الاول وما في حد قبلي ..

كان قد ما يقدر يحاول يتجاهل هذه الفكره لكن ما قدر ...ومن التعب رقد عبدالله ..ونش الصبح وهو متنكد وراسه يعوره ..ومقهوور لانه اتصل على ساره وما ردت عليه ..

وما كان متفيج حق خليفه وسوالفه عن البنيه اللي يباها ...خليفه حس ان ربيعه مضايق وما حب يغلس عليه عسب ما اييه بوكس على عينه من عبدالله..

ساره من ناحياتها كانت متضايقه ..وما حبت ترد على عبدالله لانها وااايد كانت متضايقه ..وسارت دوامها وهي بعد مصدعه وعيونها منتفخه من الصياح..
ساره ما تدري ان امها وابوها امس رمسوا عن خليفه وكيف هم مرحبين بالفكره ..وان ابوها متصل على اخوها العود يخبره السالفه ويباه يتخبر عن خليفه اكثر ويسأل عنه ربعه اللي في ابو ظبي ودبي ...

كل هذا والاحداااث تتوالى في قصه سااااره وعبدالله....

[هنوف الروح]

تم عبدالله وساره على ها الحال كل واحد مايبا يرمس الثاني ومر عليهم يومين وما قدرت ساره تتحمل ها الحاله اللي وصلوا لها ..وتمت تقول في خاطرها لها الدرجه مو مهتم لها الدرجه عادي عنده زعلي ..اول ما يرضي حتي اني ارقد وانا مضايقة منه والحين عادي الوضع ولا يتصل ولا يسأل ..شو يباني انا اتصل انا اللي اتكلم ...ساره كانت تفكر وهي منسدحه على شبريتها وقالت خلني اطرش له مسج اعبر له باللي في خاطري ...وبطلت مسجاتها وطرشت له مسج حست انه يوصف حالتها ..

..،، غيبتي طالت ..ولا همك جفاي..،،..وكنت عايش في أمل تسأل علي..،،

..من غلاك أحسبك عايش معاي..،،وانت ماهمك لو طال ازعلي..،،..

..،،أنت مالك ذنب هذا من غباي ...،،ناسيني واحسبك ...تتغلى علي..،،

وطرشت المسج ..وقلبها يتقطع..وشويه دق الباب ودشت ام ساره ..عدلت ساره يسلتها في الشبريه وقامت حق امها وحبتها ع راسها ..ويلست على طرف الشبريه مع امها ..اللي كانت تتخبر عنها وعن احوالها ..وكيف ان ساره متغيرة مستويه ضعيفة وويها متغير لونه...

ام ساره::

يا بنتي شو تبين من ها الريجيم اللي تسوينه ماشاء الله عليج جسمج حلو ومايحتاي ريجيم وهاالخرابيط..حتى ويهج غادي اصفر من قله الاكل ..

ساره حطت راسها في حضن امها بدلع وما ردت عليها...وتمت ام سارة تمسح شعر بنتها بحنان وقالت لها ::
بس انا عندي يا ساره لج خبر بمليون درهم ..

ساره انتبهت لكلام امها وعدلت يلستها وقالت لها ::

مليوون درهم مره وحده ..شو السالفه اميه خبريني؟؟؟

وقالت لها امها وهي تطالعها في عيونها ::

ساره يا بنتي انتي ما شاء الله عليج كبرتي واستويتي عروووس ..والبنت مصيرها تعرس مهما طال الزمن ..ونحن ناس معروفين ولنا مكانتنا بين العرب ...

ساره ما انتبهت شو امها كانت تقول لانها فهمت شو قصد امها ..اكيد في حد متقدم يباها ..وعبدالله ..شو بيكون رد فعله ..شو بتقوله..ساره راسها عورها وهي تفكر ..شو تسوي ..ما تخيل نفسها تكون حق شخص ثاني غير عبدالله ..ساره حبت عبدالله فوق ما يتصور اهوو..أول حب في حياتها ..عاشته واول ريال ترمس وياه ..وتحس وياه ها الاحاسيس الحلوة ..

وما انتبهت الا يوم قالت امها ::

ويا بنتي انتي مب صغيره اللي في سنج الحين عندها ياهل واثنين ..واللي اصغر عنج عرسوا ..

ساره بدون تفكير ::

ماماه انا ما ابا اعرس الحين ..اقولج شي خليه حق عليوه..عليا بتخبل تبا تعرس..
ام ساره تفاجأت من رمسه بنتها ..وعصبت وقالت ::

شو ها الرمسه شو اعطيه حق عليوه ..وشو ما تبين تعرسين انتي الحين استوى عمرج 25 لين متى بتمين جييه..بعدين العرب طلبوج انتي بالاسم..

استغربت ساره وتمت تقول في خاطرها منوه هايلا اللي طلبوها بالاسم ..

ساره::

منوه هم ماماه ؟؟اي عرب اللي طلبوني بالاسم ؟؟

ام ساره ::

يا بنتي هم مب غرب عنا تقريبا من الاهل ..قوم سلطان بن هادف المنصوري..ولدهم يباج وامه رمستني في التلفون ..وانا وشاورت ابوج واخوانج وسألوا عن الريال وظهر ريال ما ينرد الصراحه ريال والنعم فيه ولد ناس وعندهم خير ماشاء الله يعني مب داشين على طمع..

ساره ::
وانتي وابوي اتفقتوا واخواني وانا ما لي رااي ...

ساره كانت منفعله وهي ترمس وما حست بعمرها وصوتها علا وقامت تطالع امها والدموع بتفر من عيونها...

ماماه انا المفروض تسالوني قبل مب انا اللي بعرس ..يعني ابوي واخواني خلااااص رضوا عنه..وانا مالي كلمه في الموضوع ..

ساره كانت منفعله وااايد وامها تفاجأت من رده فعلها ..وسكتتها::

ساره ..يا بنتي انا وبوج واخوانج لو ما شفناه ريال ويستاهلج كنا ما فتحنا الموضوع وياج من الاساس والحرمه مرمستني من فتره وانا كلمت ابوج واخوانج سألوا عنه ولو ما كان ريال زين ما كنا خبرناج عن السالفه اصلاا..ونحن ما بنعقكم على اول واحد ايي ويطلبكم منا ..انتي او عليا ..وبعدين انتي ليش محتشره ..جييه وصوتج علا ..فكري زيين يا ساره الريال ما ينعاب ..الا جان في حد في خاطرج انتي....

من قالت ام ساره هذه الكلمة ..حست ساره ان في حد صب ماااي بارد عليها ...وسكتت ام ساره وهي طالع بنتها ..وما كان ينسمع اي شي في الغرفه من الصمت اللي دار فيها ..وقامت ام ساره وقالت بدون ما تلتفت حق بنتها ::

ساره فكري زيين ..انتي مب اصغيرة ..والريال ما ينعاب ..وانا ابوج قال لي اشاورج ..وهو بيرمسج اليوم ..وان شاء الله يكون عندج عذر مقنع عسب ترفضين الريال غير الرمسه الماصخه اللي قلتيها حقي ...

وظهرت ام ساره من الغرفه وصكت الباب وراها ...وساره بعدها متجمده وما تعرف شو تسوي او شو تقول..ويلست بهدوء على شبريتها ..وهي تفكر ..انا كيف رمست امي بها الصوت والاسلوب ..ها كله عشان عبدالله اللي ما سأل عني ..حتى ما فكر يطرش مسج..يرد علي فيه ..

تنفست ساره وغمضت عيونها وهي تصيح ..وتذكر كلام امها ..
(( الا جان في حد في خاطرج ))

يا ويلي انا شو سويت بعمري ...انا لازم ارمس عبدالله لازم يكون في حل لها الموضوع ..اكيد هو ما بيتخلى عني..وخذت موبايلها واتصلت عليه...

عبدالله كان يالس في الكتب ماله وكان زحمه وعنده زباين وخليفة يالس وياه ويراجع وياه الاوراق ..ورن موبايل عبدالله اللي كان بالصدفه جدام خليفة وشاف خليفة الاسم (( الاهل يتصل بك))

خليفة زقر عبدالله وقال له ::

عبدالله البيت يتصلون فيك..

عبدالله::

خله بعدين برد عليهم اكيد هذه حمده الحشره ما ادري شو تباني اشتريلها من ((تويز ار اص)) ..خلها عقب برد ..

خليفه ما يدري ان عبدالله مخزن رقم بيتهم باسم(( البيت )) ..وعبدالله ما يعرف ان خليفه قال البيت لا ارادي لانه ظهر جدامه الاهل ..وساره ما تدري ان عبدالله يتحرى حمده اللي متصله وعسب جييه ما رد ...وانقهرت ساره ..يعني اطرشله مسج وما يرد وبعد اتصل وما يرد ..وفرت موبايلها وتمت تصييح ..وتصييح...

عقب فتره تقريبا الساعه 11:30 بالليل كان عبدالله وخليفه يصكون المكتب وكل وااحد راسه يحس انه بينقع عليه من الصداع..

خليفه ::

يا اخي انت الصراحه ما تخيل ..تشغلني وياااك الين ها الوقت وما تعزمني على عشاء في مكان محترم ..

عبدالله::

خلفووه ترى صج راسي يعورني ..وما لي خلق اليوم خله يوم ثاني ..

خليفه::

حتى انا راسي يعورني وجسمي احسه مكسر ..وانت الله يعينك على حمده بتاكلك اذا رديت البيت بدون لعبتها..

عبدالله اتذكر ان اخته موصتنه اييبلها لعبه الجاسوسات الثلااث..::
اووهوو يا رياال ليش ما ذكرتني ..انا شو يفكني من حشرتها هذه الحين ..
خليفه وهو يضحك::

تستاهل ..دواااك انت محد يعرفلك غير حمده ...

عبدالله لاااه اكيد رقدت الحين..لا لا منو قال حمده ترقد قبل ما اتحصل اللي تباه ..الله يعيني ..

ضحك خليفه على عبدالله وركبوا السياره..وظهر عبدالله موبايله عسب يرد يتصل في البيت ويتاكد من امه ان حمده رقدت..
وحصل مكالمه لم يرد عليها ومسج ..
وبطل المكالمه ولقى مكتوب ((الاهل )) ..ودق قلبه ...ساره اتصلت وانا ما رديت عليها ..وانتبه عبدالله ان خليفه اتحرى ان ساره هي حمده ..لانه مكتوب الاهل ..وفتح المسج وقراه كان بعد من ساره ..وانقهر يوم شاف المسج ..وتم يطالع موبايله وهو مضايق..
خليفه كان يطالعه وهو مستغرب منه ,,وقال في خاطره عبدالله فيه شي ها الايام مو طبيعي ابدا..

خليفه ::

عبدالله.,,عبدالله ...شو بلاااك يا اخي شو استوى ..ليش تغيرت ملامحك ...خير فيك شي ..

عبدالله وهو يشغل السياره::

لا لاا ما شي بس مصدع...
خليفه::

اتصدق انت متغير ها اليومين ..احس فيك شي مو طبيعي ..عسى ما شر يا خوي..

عبدالله::

لا خليفه ما شي ..بس شويه شغلات في البيت وان شاء الله بتنحل..
خليفه عشان يطري الجو شويه قال ::
هذه محد غيرها حمدوه مسوده الويه انا براويها ...

ابتسم عبدالله حق خليفه وتموا يسولفون ..ووصل عبدالله خليفه الشقه..وسار البيت ..واول ما دش باب الحوش..
ظهرت حمده من جدام باب الفيلا وهي تركض ولابسه بيجامتها وامها وراها ..عبدالله يوم شاف اخته استانس على شكلها شعرها مبطل ويطير وراها وشكل حلو وهي تركض بدون نعال في الحوش وامها تزقرها عسب تتنتظر الين يدش عبدالله البيت ..ونطت حمده وحملها عبدالله ودار فيها في نص الحوش وهو يضحك ...

حمده تمت تحضن اخوها العود وتبوس فيه ..وشالها عبدالله وحطها فوق كتوفه وهي مستانسه ..وقالت له ::

عبوود اشووف ايدك فاضيه وين الجاسوسات الثلاث..

عبدالله تم يفكر شو يقول لها لانه ما بيفتك من حشرتها ..

عبدالله::

تصدقين حبيبتي اني عطيت خليفه البيزات يسير يشتريلج الجاسوسات الثلاث ..وتصدقين انه رد المكتب متاخر ولا وبعد ناسي انه يشتري لج جاسوساتج..

حمده حست باحباط ..وقالت ::

وليش عطيته خليفة ..تعرف انه ما يعرف شي...ما عليه انا براويه عطيني انا برمسه وبهزبه..
وامها تقول لها عيب يا بنتي شو يتصل في الريال الحين ما يستوي..

وعبدالله ما صدق ان حمده صدقت الرمسه وقاال::

لا يا الوالده بعده ما رقد ..بعدين انا اكدت عليه انه يشتريلها الجاسوسات كيف ينسى ...صبري حمده انا بتصل عليه الحين ..
واتصل عبدالله بخليفة اللي كان توه ظاهر من الحمام ولابس وزار وفانيلا حليله ويالس يتمشط..ويوم شاف رقم عبدالله رد عليه ::

هلا الشيخ عبدالله مب تونـ...
خليفه ما كمل رمسته لانه سمع صوت ياااهل تزاعج في الخط ..

انت ليش تنسى جاسوساتي كيف تنساهن ..مب قالك عبدالله تشتري الجاسوسات ..ليش تنسى والا انت تعمتد تنسى والله لا اعلم عليك ابوي..

خليفه فهم السالفه كلها وعرف ان عبدالله عق المشكله على راسه ..وقال في خاطره اوكيه عبدالله انا اراويك ..

خليفه ::
حمدوووه ويا راااسج انا ما نسيت انا اعرف انج تبين جاموساتج ...

وهني صرخت حمده::

جااااسووووسااااات مب جامووساااااات يا خلفووووه..

وسمع خليفه ضحك عبدالله من الجهه الثانيه::

اوكيه جاسوسات ..حمدوه ترى اخوج يستعبط وما عطاني بيزات الجاسوسات ..وانا رياال فقير ما عندي بيزات واخوج غني وعنده كل الخير ..وانا قلت له عطني فلوس وما طاع وانا لو عندي كنت بشتريلج يا حمده ..

عبدالله سمع رمسه خليفه اللوتي وسحب الموبايل من اخته ::

اوكيه يا للوتي العود انت ما عندك فلوس وفقير اوكيه ..انا اراويك ..تباني اقولها انك خذت الفلوس واشتريت فيهم ايس كريم ووزعته على ربعك هااا ..
خليفه ::

عبوود يا السخيف لاا تعور راسي انت واختك الحشره سير يله ابا ارقد ...سي يو ..

وقفل خليفه الخط وغلق موبايله وهو يضحك ..تبا تعقها على يا عبووود ..انا اراوييك ..

عبدالله تم يضحك على ربيعه وشاف اخته وهي محتاره بين منو تصدق ..وامه وااقفه وهي تبتسم ::

والله انك وربيعك اخس عن اليهااال..حمده فديتج ان بوديج باجر الصبح وبنشتري اللعبه اللي تبينها ..ما عليج من عبدالله وخليفه ..

وسحبت بنتها وسارت وقبل ما تصعد فوق رفعها عبدالله وحطها مره ثانيه فوق كتوفه وتم يدغدغها عسب ترضى وهي تضحك وتصارخ الين قالت خلااااص مب زعلاااانه ..وحبت اخوها العود وكل وااحد سار على غرفته..

عبدالله اول ما دش الغرف ..اختفت الابتسامه عن ويهه وفضخ اثيابه وبدل بسرعه واتصل على ساره ..

ساره كانت تتقلب على شبريتها ..وراسها يعورها من التفكير ..في امها اللي زعلت منها ..وفي عبدالله اللي ما رد عليها ..

وشويه رن موبايلها ..ومدت يدها تحت مخدتها وسحبت موبايلها لانها متعوده تدسه تحت المخده ..وشافت ان عبدالله هو اللي متصل..

وترددت ترد او لاااا..وبعد فتره..استسلمت وردت..

ساره ::

الووه

عبدالله::

الووه ..هلا ساره ..اشحالج..

ساره::
حمدلله بخير ...

عبدالله حس ان ساره مضايقه ..وساره حست ان في شي ناقص بينهم الاثنين ..

عبدالله::
ساره ..السموحه ترى كنت في المكتب وما قدرت ارد عليج ..كان زحمه وربيعي موجود وما قدرت ارد غير الحين ..
وبعدين انا حاولت اتصـــ...

ساره قاطعته بدون اي مقدمات::

عبدالله انا تقدملي واحد ...
وسادت لحظه صمت طويله بينهم ..عبدالله مو مستوعب شو تقول له ساره ..وساره ..دموعها شويه وبتنزل من عيونها ..وقلبها يدق مب عارفه ليش قالت له به السرعه..

عبدالله::

تقد..تقدملج وااحد..منوو ومتى صار ..وليش ما خبرتيني من قبل ؟؟

ساره::
وااحد من الاهل ..وبعدين انا اول ما دريت اتصلت وانت ما رديت ...

عبدالله::

ساره ترى قلت لج اني كنت مشغول ..وبعدين انا اتصلت فيج من يومين ما رديتي علي وانا قلت اخليج الين تهدين ..واتصل فيج..
ساره::

امممممم..اوكيه ..واونا هديت الحين واقولك انه في وااحد متقدم لي..

عبدالله::

ساره حبيبتي ..صج ها الرمسه والا انتي تختبريني ...

ساره::

لا صج ..انا ما امزح وياك ولا ظنتي انك تسمعني يالسه اضحك او ادلع ..انا يالسه ارمسك من صجي ..
انا تقدملي وااحد والصراحه اقولك اهلي موافقين عليه ويتريون بس ردي عليهم...

عبدالله::

موافقين عليه؟؟؟ وانتي شو ؟؟ بعد موافقه عليه ؟؟ وانا ؟؟

ساره :::
انت شو يا عبدالله؟؟؟انت شوو.؟؟ انت تقدمت وانا قلت لااا؟؟

عبدالله::

ساره حبيبتي انا احبج ..وانا وعدتج اني افتح الموضوع مع الاهل جريب ..
ساره::
عبدالله انا ابوي رمسني اليوم ..وقال لي ان الريال ما ينرفض ..ولد ناس وعرب ..وعندهم خير مثلنا ..وانا اذا برفض لازم يكون عندي سبب قوي للرفض..

عبدالله::
ساره صبري لا تردين بسرعه ..انا قلت لج اني اتريا الفرصه المناسبه عشان اخبر الاهل عنج ..

ساره ::

وهذه مب فرصه مناسبه ..اقولك اهلي عطوني فرصه اسبوع افكر في السالفه ...وانت تقول لي انك ادور الفرصه المناسبه..

عبداالله.::

اوكيه ساره ..انا برمس اهلي ها الايام ..بس انتي فكري زين في الموضوع لا تتسرعين ...

ساره ما عرفت شو تقول حق عبدالله ..ما تبا اذل عمرها حقه اكثر من جييه ..وفضلت انها تسكت ..

عبدالله::

ساره حبيبتي ..انا احبج ..واوعدج اني اتصرف وما اخليج بروحج في ها لموقف..

ساره حست بشويه راحه من كلام عبدالله ..لكن بعد تم قلبها مب مرتاح ..لازم تشوفلك حل يا عبدالله لااازم...


ومرت الايام والاسبوع والمهله اللي عطتها ساره حق اهلها بدت تخلص ..وعبدالله كل يوم والثاني يحالو انه يكلم اهله بس كان في شي يرده..
تعرفون شو ها الشي ..الشي اللي يخاف منه كل واحد تعرف على وحده ووصل الامر بينهم انهم يتناقشون في سالفه العرس ..اول فكره ادور في راس الريال انه ..هل انا اول واحد ..او هل انا بكون اخر وااحد.؟؟
عبدالله عنده احساس ان ساره صادقه ويااه ..بس مجرد التفكير انها عرفته قبل العرس تخليه بيتخبل ..وما يعرف شو يسوي ..
عبدالله كان يسولف مع ربيعه خليفه ..وقال خلني اسال خليفه وبشوف شو راايه..

عبدالله/::

اقول خليفه اريد اخبرك شي..

خليفه ..

قول تفضل كلي اذان صاغية..

عبدالله ::

تعرف يا خليفه ..انا اعرف واااحد من الربع ..متعرف على وحده بالتيلفون .. هو عرفها قبل عن طريق النت ..وبعيدن اطورت علاقتهم الين وصل وياها انه يرمسها بالموبايل..وحبها وحبته ..والحين يبا يتزوجها ...وييا يتقــ...

خليفه قاطع عبدالله::

ربيعك غبي ..

عبدالله اتفاجا::
ليـ ليش غبي ..
خليفه::

الحين بالذمه هذه وحده يبا يتزوجها ...يعني تعرفت عليه عن طريق النت ..ورمسته ..شو دراه انها ما رمست غيره..او ما عرفت غيره..شو يضمن له ان بعد العرس ما تتحول حياتهم لشك دائم..كيف يطمن انها بتربي عياله تربيه صحيحه..
ادري انك بتستغرب ها الرمسه مني ..لكن انا اتعرف على بنات هيه صح لكن ما افكر اني اخذ وحده من اللي تعرفت عليهن..
اذا بعرس بخذ وحده بنت ناس حشام ما عرفت حد قبلي ..اكون انا اول واحد بحياتها ..

عبدالله تفاجا من رمسه ربيعه خليفه ..معقوله خليفه تفكيره جييه ..خليفه اللي ما يخلي بنيه في حالها ..

تم عبدالله يفكر شو يرد على ربيعه ..اللي تم يلح عليه يبا يعرف منو ها الريال ..يا ترى شو يقوله ..شو يرد عليه...

[هنوف الروح]

زاد الحاح خليفه على عبدالله اللي تم يقوله انه واحد خليفه ما يعرفه زين وانه ما يروم يقول اسمه عسب ما يفضح الريال

خليفة ::

عبدالله اقوللك شي انصح ربيعك لا يتورط قوله انه افضل شي يسويه انه ما يرتبط بوحده متعرف عليها قبل العرس ولاااه بعد رمس وياه بالتيلفون واكيد ظهر وياهها والله يعلم شو استوى منبينهم ...

عبدالله قاطع خليفه بشكل لا ارادي ::

لا لا هو ما ظهر وياها ..اقصد هو قال انه ما ظهر وياها وانه احاول اكثر من مره يقنعها بها الشي لكن هي ما كانت ترضى ..تدري احس انه يباها واحس انها بينه زينه ..تعرف اقصد من رمسته عنها ..

خليفة وهو مستغرب انه عبدالله متحمس واااايد للسالفه::

وانت بلااااك متحمس وااايد ودافع عنها ..اقوللك شي صدق يمكن تكون البنيه صادقه في مشاعرها ويمكن تكون بنيه زينه مثل ما تقول ..لكن لو هي بنت ناس وعرب وزينه ما رضت من الاساس انها ترمس واحد بالموبايل ..ولو فرضنا انها ضعفت جدامه ورضت ترمسه ..يا اخي عقب العرس بيحس ربيعك انه في شي ناقص ..بيكون فيه شك ولو بسيط ولو انهم هم الاثنين ما رمسوا عنه...
على العموم لو كان واثق فيها ميه في الميه كيفه خله يولي ياخذها والا ما يخذها مشكلته ..انا عندي مشكله الحين ثانيه


عبدالله وهو يسأله باهتمام ::

هااا خييير شو المشكله ..؟؟

خلييفه وهو يحط ايده على بطنه ::

يووووووووووعااااااااان ...وانت غثيتني بسالفه ربيعك هذا..

عبدالله بطل عيونه من الاستغراب ووده يكفخ خليفه بشي على راسه/::

اسميك انت الصراحه ميوع يا خي توك زاط مناقيش ما مداك تيوووع عنبوه تونا من ساعتين ما كلين الله يعينها حرمتك عليك..

خليفه وهو يكبر في ويه ربيعه اللي فطس من الضحك::

اهب عليك الله واكبر من عيونك يالساحر قول ما شاءا لله ..تبى تحسدني على سندويش مناقيش كلته ..وبعدين لا تذكرني بالحرمه ترى مصخوها وما ردوا الين الحين علينا ..شكلي مصيري مرتبط بحمده الله يعيني ..

عبدالله وهو يضحك على ربيعه ::

جب جب حمده مليون وااحد يتمنونها ويا راسك ..بعدين الله يعينها بنت الناس اكيد سمعت عن سواد ويهك ..انت اتحرى اهلها ما بينشدون عنك والا اتحراهم بيعطونك بنتهم عشان سواد عيونك ..

خليفه وهو يفكر ::
تتوقع انها ترفض عسب ها الشي ..لااااا انا حليلني فقيرن مسكين ..الا بس اسبل بعيوني للبنات الغراشيب ..

وتم خليفه يفكر في خاطره وافقي ساره فديتج والله لا احطج على راسي من فوق فديتج وفديتج ويهج الحلو ..

عبدالله قاطع افكار خليفه وهو يقوله ::
حووو وين سرت انا ارمسك وانت سرحت..

خليفه وهو يعدل غترته ::

لا ما شي ...المهم اقولك خبر ربيعك وانصحه وقوله يفكر زين ما زين قبل لا يتورط..

عبدالله وهو يرد بصوت شبه مسموع ::
ان شا الله بخبره ...

تم عبدالله يفكر في نفسه ..ساره غير انا متأكد انها غير ..انا اعرف البنات اللعوبات ...اعرفهن زين ..وساره مب اول وحده تمر علي..

لا لا يا خليفه انا متأكد ساره غير ..انا اليوم بخبر االوالده عنها انا احبها وما بتخلى عنها في ها الموقف ولازم اكون ريال وقد كلمتي معاها ..فديتج ساره سامحيني خليتج تعانين كل ها الفتره بروحج ..انا الصراحه اناني ..ولازم اكون ريال واثبت لها ها الشي..

من ناحيه ثانيه ..وفي بيت ساره..دقت ساره باب غرفه امها وابوها ودشت عقب ما سمعت امها تقول لها اتفضلي..

دشت ساره ولقت امها يالسه على سيادت الصلاه والمسباح في ايدها ..وابتسمت لما شافت بنتها دشت عليها ..سارت ساره صوب امها وحبتها على راسها وحطت راسها في حضن مها ..ساره خلااااص قررت وقالت في خاطرها لازم اعز نفسي واصون الباجي من كرامتي ..انا ما بتريا عبدالله الين يفاتح اهله لانه شكله ما بيفتح الموضوع مو ليه وانا غبيه يوم صدقته ..حطت ام ساره ايدها على راس بنتها وقالت بصوت هادي ::

خير سارونه حبيبتي شو عندج ..

ام ساره كانت تبيى تسمع رد بنتها وقلبها يدق وخايفه بنتها ترفض الريال ..

ساره رفعت راسها وقالت حق امها :

ماماه انا يايه اقولج شي ..او صراحه ابا اقولج شيئين ..اول شي اباج يا لغاليه تسمحين لي على سخافتي وقلت ادبي معاج يوم رمستيني في سالفه العرس ..
وغرقت عيون ساره بالدموع وهي تكمل ..
ماماه كل شي يهون الا ازعلج يا لغاليه ..والله لذبح عمري لو زعلتي مني ..فديتج امي قولي انج مب زعلانه مني قولي انج مسامحتيني ..
حضنت ام ساره بنتها وقلبها بيطير من الفرحه ...فديتج يا بنتي اصلا انا ما زعلت منج وكيف ازعل من عيوني وقلبي بنتي سارونه الغاليه ..

ساره ::

يعني مب زعلانه مني يعني سامحتيني ماماه..

ام ساره::
مسموحه يا بنتي بالحل ...انا اصلا ما اقدر ازعل منج انتي او اختج علايه فديتكم والله ..وشو الشي الثاني اللي تبين تخبريني عنه..؟؟

ساره وقلبها يدق ودموعها تزيد ::
انا ..انا ..موافقه على المعرس ماماه ...ودفنت ساره راسه في حضن امها وتمت تصيح ..

ام ساره عورها قلبها على بنتها ::

بنتي سارونه فديت قلبج انا دموعج غالية ترى اذا انتي موافقه عشان انا ما ازعل او ابوج ترى انتي اهم من اي ريال في الدنيا ودموعج غاليه عندنا ..

قاطعتها ساره ::

لا لا ماماه انا اصيح لاني كل ما افكر ان موافقتي يعني اني افارق بيتنا واسير مع واحد غريب ..الفكره هذه تعور قلبي ماماه ..

حضنت ام ساره بنتها ::

فديت قلبج انا يا بنتي ..هذه سنه الحياه والبنيه اول واخر مردها بيت ريلها ..وانا ابوج ما بندوم لج طول العمر ..

ساره :
الله يعطيج طولت العمر يا امايه انتي وابوي ويخليكم ذخر لنا يا رب ..ولا يحرمنا منكم ..اصلا نحن ما نسوى شي بدونكم ..

وفي هذه اللحظه دشت عليا اخت ساره وشافت الموقف ..ساره وامها حاضنين بعض وساره تصيح وامها عيونها ادمع ..وعليا ما صدقت ركضت وحضنت امها ودمعت عيونها ..

عليا ::

شو السالفه ليش تصيحون ترى والله بصيح ..خبروني شو مستوي ..

ضحكت ام ساره من لقافه بنتها الصغيره عليا ..وساره غصبن عنها ابتسمت ..وهي اطالع اختها عليا..

ام ساره:
علاااايه فديتج باركي لاختج ساره بتعرس ..

عليا اختفت الدموع من عيونها ..وهي مو مصدقه..

لاااااه واااافقتي اخيييرا ...الله بيستوي عرس عندنا ..
عليا كانت تصارخ من الفرحه وشويه وقفت بنص الغرفه ..وقالت ::

اخيييه بتاخذيين اخو فطوووم ..وع

ساره وهي تضحك ::

ياالسخيفه ليش انا باخذ فطوم انا باخذ اخوها ..وبعدين شو بلااااج على البنيه والله انها طيوووبه ..وحبوووبه ..

عليا وهي مبققه عيونها ::

الله واكبر الحين استوت فطوم حبوبه ..طبعا مو منج من عريس الغفله اللي ظهر فجأه ..هذا وبعدج ما ملجتي عيل لو ملجتي شو بتسوين ...يا خراااب بيتك يا علياااااء طااااح كرتج ..

ساااره تمت تضحك وامها على حركات عليا وتموا يعلقون على حركاتها ..وخلتهم ام ساره وقالت لهم::

انا بسير برمس الحرمه ترى وااايد تأخلانا عليهم في الرد..

ودق قلب ساره من الخوف ..وحست باحساس غريب مب عارفه شو هو ..ما تدري حزن ...راحه ..الم ..وتمت صاخه وهي تسمع امها ترمس ام خليفه وتبشرها بالموافقه ..وتموا الحريم يسولفون وحددوا موعد عشان ايووون رسميا مع الريايل عسب يرمسون بالموضوع..

كل شي صار بسرعه ..ساره كانت سايره غرفتها وقلبها يدق بقوه ..شو بتقول حق عبدالله ..لا لا هذا مب ذنبي ..انا ما بعيش في وهم عبدالله ..وخل ها الشي درس لي ..انا لازم انهي علاقتي فيه ..خلااص انا تقريبا استويت مخطوبه وما يصير اني ارمس عبدالله ..
آآآآآآآآآآآآآآه يا عبدالله ..ما توقعت منك انك تكون من الشباب اللي يوعدون ويخلفون وعدهم..

من ناحيه ثانيه ..عبدالله في بيته كان يالس في الصاله مع امه واخته كالعاده يالسه اطالع سبيس تون وما مخلتنهم يطالعون شي ..

عبدالله يبا يرمس امه ومب عارف كيف يطفش حمده::

اوووووه حمدوووه ترى طفرتيينا بالرسووم هذه عنبوه 24 ساعه سبيس تووون ما تملين انتي ..
حمده::

وانت ليش معصب ..اصلا ماما قالت لي عادي اطالع لان باجر اجازة وما عندي مدرسه..

عبدالله ::
وحق شو نحن مسوين لج غرفه يا لشيخة حمده مخصصينها بس حق العابج وحاطين لج تلفزيون وبلاي استيشن وكل شي مب عشان تنثبرين هناك وتفكينا من حشرتج..

حمده عدلت يلستها واستعدت عشان اترد::
اصلا انت بعد عندك تلفزيون في غرفتك سير طالع هناك بعدين انا لازم ما اخلي ماما بروحها لازم ايلس وياها ..

ام عبدالله كانت ساكته منهم وتشرب شاي وما تبا تعور راسها من كلامهم ..

عبدالله::

اصلا انتي يا حمدووه ما لج غير خليفه يعرفلج زيين ..بس خساااره هو بيعرس الريال خطب و افتك منج..

حمده::

لااااه خلفوووه بيعرس ..عيل الله يعينها البنيه عليه مسكينه ما تدري ..

عبدالله ::
الا قولي الله يعينه اللي بياخذج ..اقول الوالده فديت راسج تعالي شوي وايي اباج في سالفه ..

حمده::
اهاااااا قوووول جيييه من البدااايه تبا ماماه في سالفه ..وما تباني اسمعك ..والله انتوا يا لكبار ما عندكم سالفه ..ليش ما قلت من البدايه انك تباها ..

عبدالله::

لااااه والله ..ويعني الحين لو قلت لج ابا ماماه في سالفه بتحترمين نفسج وبتسيرين غرفتج وبتخلينا نرمس على راحتنا ..

حمده هزت كتوفها وهي تقول ::

لااااا طبعا كنت بقول سيروا الغرفه الثانية هههههههههههههههههههههاااي

عبدالله وهو يفرها بالمخدة اللي عداله....وهووو يضحك

[هنوف الروح]

ضحكت ام عبدالله على حركات ولدها وبنتها غصب عنها ..وتمت تقول في خاطرها انتوا الاثنين يهاال ..وعشان تنهي الضرابه اللي بينهم قالت لعبدالله::

عبدالله يا ولدي قم خلنا نسير مكتب ابوك وخل اختك اطالع الرسوم ..وانتي حمدووه انثبري مكانج وعن الحشرة والرمسه الزايدة انزين..

حمده بكل براءة ::

اوكييه ماماه بس ..ترى بس عشان عيوونج..

عبدالله::
مااالت اونج مؤدبة الحين ..
وتم يقلدها وهو يرمش بعيووونه ::

بس بس عشان اعيونج..اسمييييج انتي لوووتيه عوووده ..

هزت حمده جتوفها وانسدحت مره ثانية اطالع الرسووم...

وسار عبدالله وامه المكتب ..وعبدالله متلعوز ومب عارف من وين يبدا ..ومتلخبط وحالته حاله..دشوا المكتب وصكر عبدالله الباب ويلس قباله امه..
تمت امه اطالعه وتترياه يرمس يقول شي وحست انه في موضوع خطير في باله ..وحاولت تجنبة الاحراج وقالت له ::

عبدالله يا ولدي خيير شو فيك شكلك متلخبط وفي خاطرك رمسه قول فديتك انا امك ما تخبي عني شي ..

عبدالله انعفس زياده وما عرف من وين يبدا وما حس بعمره الا وهو يقول::
الصراحه يالوالده انتي تعرفين اني كبرت واستوى عمري الحين 28 تقريبا ..واللي اصغر عني معرسين وعندهم عيال بعد ..وانا ريال الصراحه ابي اكمل نص ديني ..باختصا الوالده ..انا ابا اعرس..

ما صدقت ام عبدالله نفسها من سمعت كلام ولدها وتمت تبارك وتهلل وتقوله ::

يا ولدي هذه الساعه المباركه وانا من زمان اتمنى ها اليوم اللي تقول لي فيه انك تبا تعرس ...وانا عندي لك ال عروس المناسبه ..مريووم بنت خالك فديتها من بنيه حشيمة وما عليها قصور ..و,..

قاطعها عبدالله وقال لها ::

لا يا الوالده فديت راسج ..انا اعرف اني مريم بنت حشيمه واعرف انج تبيناها حقي ..لكن ...لكن انا خاطري في وحده غير..

انصدمت ام عبدالله من كلام ولدها ..لكن بلعت ريقها وقالت يا رب تكون وحده من عيلتنا ..

عبدالله منوه في خاطرك ؟؟قول فديتك تبا شرينا بنت عمك قول والا تبا خدوي بنت....

عبدالله وهو يقاطعها مره ثانيه ::

لا لا الوالده فديت راسج انا اللي في خاطري مب من العيله ..اصلا مب من ابوظبي موليه..

ام عبدالله سكتت وما قدرت تقول غير ::
منوه هذه اللي انت تباها وخاطرك فيها ونحن ما نعرفها ...وانت تعرفها ؟؟؟؟

عبدالله فهم نغزه امه بس طنش والف لها قصه وقال::

الوالده هذه اخت ريال عندنا في الدوام ..هو من العين ..وهو ولد عرب وناس وطيوب وحبوب ..تذكرين مرة سرت العين مع خليفه ..كان هو ويانا ووصلناه البيت والريال عزم علينا الا ندش ونريح شويه عنده وما قصر ويانا ..

قاطعته امه وقالت له ::

والبنيه انت كيف عرفتها وكيف شفتها ؟؟؟؟

عبدالله بلع ريقه وقال ::
الصراحه ...هيييه ..خليفه نسى شويه اوراق في السياره وسرت انا ايبهم من السيارة وبالصدفه كان الدريول واصل واخت الريال نزلت من السياره ..وانا شفتها ..هيي ما شافتني بس ما شاء الله عليها يامي قمر ..وحشيمه اول ما لمحتني تغشت عني ودشت بسرعه داخل البيت ..وما ادري كيف سرت سألت الدريول قلت له منو هذه قال انها اخت الريال ..

وسكت عبدالله وطول الوقت عيونه ما كانت في عيون امه ..كان يتكلم وعيونه ادور في الغرفه مره يطالع المكتب ومره يطالع ايدينه ..بس ما قدر يحط اعيونه في عيون امه ..
قالت امه وهي متشككه ::

وشو دراك ان البنيه مو مخطوبه او حد رامس عنها ..

هني عاااد انطلق لسان عبدالله ::

لا لا الوالده .,,, انا الصراحه سالت عنهم ..وتعرفين خليفه عنده اهل في العين بعد خليته يتخبر عنهم ..وعرفت انها مب مخطوبه او حد رامس عنها ..وبعدين انا لمحت للريال في الدوام وشكله ما عنده مانع...

ام عبدالله ::

وشو من عرب ؟؟

عبدالله ::
ظواهر والنعم فيهم ..الوالده انا من شفتها وانا خاطري فيها ..واتمنى انج توافقين عليها ..

ام عبدالله سكتت وما رمست ولا قالت شي..وتمت تفكر ..شو ها الورطه يعني يا ولدي يوم تفكر تعرس تاخذ غريبه عن البيت ..ما نعرف شو من ناس هم او شو طبايعهم ..وانت شو دراك يا ولدي اذا كانت بنيه زينه او لا..

عبدالله شاف ان امه طول سكوتها ::
الوالده هااا شو قلتي ..ترى انا اعرف ان مريم وخدوي بناتنا وما عليهن قصور ..بس انا صدق تعلقت في هذه البنيه ..والود ودي يا الوالده نسير نخطبها اليوم قبل باجر...
انصدمت ام عبدالله من رمسه ولدها ..بلااااه هذا مستعيل ..::

عبدالله يا ولدي هذه الامور يبالها تفكير مب الاا جييه ..بعدين انا لااازم اخبر ابوك ..ويتخبر عن ها الناس ..بعدين لا تنسى ان ما نعرف حد من العين عسب ينشد عنهم ...العرس والزواج له اصول يا ولدي ..وانا بخبر ابوك في السالفه وبنشوف رده ..

عبدالله وده يصرخ ويقول لها امي ما شي وقت انا اخاف سارة اطير مني ..لكن غصب عنه سكت ..وضغط على عمره ..

عبدالله:::

خلاص اللي تشوفينه الوالده ..
ونشت ام عبدالله من المكتب وشكلها كان واضح انها مضايقه حييل من السالفه ..لان خاطرها ان ولده ياخذ وحده من اهلهم مب وحده غريبه عنهم ..

عبدالله لحق امه للصاله وتوقع انها تسير ترمس ابوه في السالفه ..لكن تفاجأ انها يلست في الصاله وتمت تسولف مع حمده ولا كأن في موضوع لازم تتكلم فيه مع ابوه..

وبيني وبينكم ام عبدالله ما كانت متحمسه للسالفه ان ولدها ياخذ وحده ما تعرفها ولا تعرف طبعها ...وعسب جييه تربت الين ما تشوف ابو عبدالله ومتي ما حصلت فرصه بترمسه..

في ها الوقت كانت ام خيفه بطير من الفرحه ..وهي حاطه في بالها ان ولدها خليفه ما في بنت تروم ترفضه ..وتمت تيبب في البيت والبيت عندهم معتفس وخليفه يطير من الفرحه ..واخته فطووم متغصصه لكن بعد مستانسه ..

والكل يرمس والكل مستانس ..وقالت ام خليفه حق ولدها::

خليفه يا ولدي ترى انا قلت للحرمه انا بنسير عندهم يوم الخميس الياي ..جهز نفسك ما نبا ناخر السالفه خلاص نخلي الملجه الشهر الياي ..يمديها شهر تجهز عمرها فيه ..والملجه ترى علينا ..وبنسويها في احلى صاله ...والا اقولك ترى هل العين ما يحبون الصالات وااايد بنسويها في خيمه عدال بيتهم شرات ملجه خدوي بنت عويش..

خليفه وهو يضحك ::

ههههههههه خيير خيير الوالده صبري بعدنا ما يلسنا واتفقنا مع الرياااييل على شي ..اخاف يطلبون مهر غالي وانا ريال فقيرن مسكين على قد حالي ..

قاطعه طارق اخوه العوود::

اهب عليك يا خلفوووه الحين انت ما عندك شي ..عيل الملاااايين اللي داسنها في البنوك مالت منووو هاااا...

خلييفه وهو ينقز ويمسك اخوووه من رقبته في ضحك وغشمره:::

قوول ما شاء الله اهب عليك ...ومن شر حاسد اذا حسد..اعووووذ بالله من عيونكم...اماااايه اقري عليه اخاف يستوبي شي وانا بعدني ما عرست ..

ضحك خليفه على اخووه وحركاته ..وخافت ام خليفه على ولده وقامت من صدقها تقرى عليه ..وخليفه مستانس وهو حاط راسه في حضن امه ويالس على الارض ..

طارق ::
امااايه لا تصدقينه هذا اكبر لوتي في دبي انتي ما تعرفين عنه شي ..طاع والله من صدقج تقرين عليه ...

ام خيلفه::

يا ولدي انا ما صدقت ولدي يبا يعرس اخاف عليه من الحسد ..فديتك يا خليفه ...

طارق :::

اههاااا طبعا خليفه اللي في حضن ونحن نشرب من ماي البحر ..طبعا هذا الحبيب ولد الحبيب ..من ريحه الغالي ..يعني انا ما سويتي ي ها الحركات كلها يوم عرست عااادي الدنيا عندج ..

ام خليفه وعيونها ادمع من ذكر طارق طاري ابووه ::
لاا يا ولدي فديتكم كلكم نفس الشي والله ..

خليفه من شاف امه بتقلبها حزن ..غير السالفه وقااال::

تعااااالي الوالده و طلبواااا مهر غالي من وين ايبلهم ..بعد ترى هل العين اعراسهم غيير تفقر اللي ما ينفقر ..

ام خليفه ::

افا عليك يا ولدي ..تحاتي الفلوس ونحن موجودين ..انا هني واخوانك هني ..واخوك العود ما بيقصر معاك ..

هني عاااد رفع خلييفه حواااجبه حق اخووه بحركه غييض ..

هيييه والله طارق ما بيقصر معاي ..


طااارق وهو فاهم حركات اخووه وقصده::

هييه ترى طارق يغرف من البحر ..شو رايك ادفع عنك المهر بعد ...

وضحكوااا الجماعه وام خيفه ما مصدقه ان ساره وااافقت...ما مصدقه انهم بيدخل الفرح بيتهم مره ثانيه عقب سنين من وفاه ابوهم ..

في بيت ساره ..

ام ساره منعفسه مع الشغالات ومع الطبابيخ ..عشان يجهزون البيت حق الضيوف اللي بيوون اخر الاسبوع ..

عليا وهي اطالع امها ::

اقووولج ساره بلاااهاا امج محتشره ..مب جنه الناس بيونا اخر الاسبوع ..ليش تزاعج على البشاكير من الحين..

ساره وهي سرحانه:::

مااادري ..يعني انتي ما تعرفين ماماه لااازم ها الشغلات تشرف عليها بنفسها ...

عليا تمت اطالع ساره ::

اقولج شي ساره ..بس لا تزعلين ..

ساره::

قولي انا ما بزعل ...

وقالت في خاطرها ..ليش قلبي فيه حيل يتحمل زعل ..خلااااص ما في شي يستاهل الزعل..

عليااا:::

سارونه احس انج مب مستانسه ..احس انج وافقتي عليه عشان ماما وبابا ما يزعلون منج..ماادري احس انه في شي ناقص في فرحتج..

ساره طالعت اختها ::
حبيبتي عليا طبعا انا زعلانه...عيل في حد يفارق ها البيت وما يزعل ..تعرفين احس اني مثل النبته اللي بيجلعونها من مكانها وبيزرعونها في مكان ثاني ..ويا عالم بتعيش او بتموت ...

عليااا ::

بسم الله بلااااج استوتي مأساويه ...لاااا حبيبتي النبته بتعيش وبتثمر ورووود حلوه بعد ..بس لاااازم تسميين وحده من ها الوررووود عليااااااا...

ضحكت ساره من كلااام اختها ...وقالت في خاطرها اتمنى ها الشي ..

وشويه دخل عليهم سيف ..

سيف::

ها العروووس ..اشحالج..

ساره وهي تبتسم ::

بخييير يا سواااف ...

سيف اونه معصب ::

لاتقوليين سواااف ..من حلاااات اسمه ريلج خليفة ..تدرين انا بزقره خليفووووه ..غياااضاا فيييج..

ساره ::

لو سمحت لا ترمس عن الريال وهو مو موجوده ...

سيف ::

طااااع هاااي من صدقها ..الله يعيين انتي بعدج ما عرستي وجييه تسوين فينا ..عيل لو عرستي شو بتسوين ..اقووولج جم بتطلبين مهر ..

انصدمت ساره من سوال اخوها ...ما فكرت في ها الشي ::

ما ادري ما خطر في بالي ..ليش انا اللي احدد مب ابوي.

سيف وهو يعدل جلسته ::

يا غبيه اطلبي انتي ابوي بيسير وبيقول ما بنكلف على الريال ومدري شوو..انتي اطلبي مهر نص مليون ..وعطيني النص وخذي انتي النص الثاني ..عسب اشتري الرنج اللي خاطري فيه..

ساره وهي مو مصدقه ::

سواااف يا لطمااع تباني اكسر ظهر الريال ونعيش طول عمرنا في ديووون عشااان تشتري رنج ..

سيف وهو يتمصخر عليها::

يا لغشيمه ..ويين تفقرينه ..انا كنت مع ايوي وحمد يوم سألنا عنهم ..يا حبيبتي انتي طحتي في بير ذهب ..هذول من هوامير دبي وعندهم الخير والخيرات ..عندهم 3 عماير ماجرينها ..غير الااراضي والمزارع ..وغير ان ابوهم يو توكل ترك لهم الملاااايين ..

ساااره وهي تكفخ اخوها بالمخده اللي في ايدها ::

اهب عليك يا سيف ..بتحسد الناس ..عن يستوي لهم شي ..بعدين شو شايفنا فقارى ..الحمدلله والشكر عندنا الخير والخيرات كلها..اذا هم عندهم مزارع فنحن عندنا واذا على الاارضي والبيوت ترى الخير واصلنا والحمد لله ..

سيف هو مسوي عمره فقير :

عيل ما دام عندنا كل ها الخير اقنعي ابوي يشتريلي الرنج ..فديت خشمج انا .ساره ابوي مستانس ها الايام سبه الخطبه ومزاجه رااايق كليمه عشاني عشان سواف..

ساره وهي تقوم من مكانها ::

لا يا حبيبي انت عارف شو راي ابوي في الموضوع كله ...اشتغل واعتمد على نفسك واشتري اللي تباه عقب ..باااي يا شاااطر ..

وشردت ساره فوق سارت صوب غرفتها ..وقلبها يدق تتصل في عبدالله او لاااا ..ما تعرف شو تسوي ...

[هنوف الروح]

دخلت ساره غرفتها وهي تحس بألم في قلبها ..صكت باب غرفتها بالمفتاح وبندت ليت الغرفه وشغلت الابجورة اللي عال شبريتها ..ويسلت على طرف الشبريه وحظنت المخده الصغيرة ..ودمعت عيونها ...هذا هو الجو اللي كان عبدالله يخليها تسويه يوم يبا يكلمها ..اونه رومانسي ..ابتسمت ساره ..وتمت تفكر كم مره صدته لما يحاول يمصخ رمسته وياها ..وتقوله انها بتشغل الليت وبيخترب الجو ..وتضحك عليه لما يقعد يترجاها انها ما تخرب الجو عليهم ..ويعلق عليها ويقول (( انتوا قوم العين وين والرومانسيه وين )) وترد عليه وتقوله ((( حبيبي نحن اللي اخترعنا الرومانسيه ))
ويضحكون على بعض ..هزت ساره راسها .ليش تفكر فيه ..ما تبا تفكر فيه ..انا لازم اقطع علااقتي فيه ..ليش ما تتصل عبدالله ..ليش تغيرت ..على الاقل اتصل وقول انك ما تباني ..لا تخليني ذليله ..لا تجرح قلبي اكثر ما هو مجروح..
لا لا انا ما بتصل فيه ..ليش هو ما يتصل ...لا انا لازم يكون عندي كرامه ..انا بترياه الين اخر الاسبوع اذا ما اتصل انا اللي بتصل ..لا لا ما بتصل بطرش له مسج وبقوله اني انخطبت رسمي ..وما له شغل فيني ..وينساني ولا يفكر فيني..
وتمت ساره تفكر وتفكر ..وغفت وهي تفكر ..

من ناحيه ثانيه ..عبدالله كان متأمل ان امه ترمس ابوه وقال انه بيفاجا ساره بالخبر وبخليها شويه تتحرقص ..بس لازم استعجل امي اخاف الناس يوافقون على المعرس واتوهق انا عقب..لا لا ما حد بياخذ ساره مني انا بكون ريلها انا بس وهي بتكون زوجتي ..فديتج ساره ..فديت عمرج انا ...انا كيف كنت غبي وما سويت شي الين الحين ..اخاف اطير مني وما ينفع الندم عقب ..احسن شي اني ارمس الوالده مره ثانيه..احس انها ما رمست الوالد ..اشوفه اليوم سفهني وما قالي شي ..
وظهر عبدالله ومن غرفته ونزل تحت في الصاله ..ولقى اخته حمده يالسه اطالع الجاسوسات الثلاث ..

حمده كانت مندمجه وما حست بعبدالله وهو وراها يتحرك شويه شويه يبي يخوفها ..قرب منها عبدالله ومد ايده وقاالهااا ::
بووووووو حمدوووووه هههههههههههههههههههههاااااي

حمده صرخت من الخوف والمفاجأه وتمت تزاعج عليه ونطت عليه تبي تضربه لكن ما قدرت اطوله لانها قصيره وهو ما شاء الله اطول عنها وكل اللي قدرت اتسويه انها ادوس على ريله وتتعمد تفركها بقوله على جلده..صرخ عبدالله من الويع وحمل اخته ::
حمدووه ويااا راااسج سلختي يلدي يا الدفشه ..انا اسوولف وياااج .
حمده ::
تسووولف وياااي انا قلبي بغى يوقف من الخوف ...
عبدالله ::
سلاااامت قلبج يا بعد عمري انتي ...ان شاء الله الجاسوسات يوقف قلبهن ولاا انتي ..
حمده ضربته وصرخت عليه ::

لاااا لااا تقوول جييه انا احبهن وااااايد ..

عبدالله:::
تحبييهن ..انزييين الله يهنييكم ..والله حاااله شو تحبين بالرسوووم هذه والله انهم يغشون الواحد...
حمده ::
اصلا انت شو فهمك بالرسوم انا بس اعرف ..اوووف عبووود ترااك حشرتني شو تبا الحين خرت علي الرسوم..
عبدالله وهو يتمصخر عليها ::

ابا بيت شعبي الشيخه ..ممكن..مالت عليج بس عن الهذره الزايده ..وين الماما ..
حمده ::
ما ادري ماماه جنها سارت صوب المطبخ تشوف شو يسووون البشاكير..
عبدالله ::
انزين انا بسير لها..
وقبل ما يكمل عبدالله رمسته دشت امهم الصاله وهي معصبه ..
ام عبدالله::
الله يغشهم ها البشاكير ما يسون شي اللا انت واااقف على رووسهم..حشا طفروووبي الصرااحه ..
نشت حمده وعقت عمرها في حضن امها بدلع وهي تحاول تغيض اخوها العوود..
عبدالله::

طبيهم عنج الوالده شو تبين منهم يغثونج ويلوعون بجبدج..هذه حمده عندج علميها ادش المطبخ وتسوتي حرمه بيت شراتج..
حمده::
والله شو قالولك عني طباااخه واللا بشكااااره ...
ام عبدالله::
لا فديتج اخوج يباج تتعلمين شي يفيدج يوم بتعرسين ..
عبدالله ::
هذا اذا رضا حد ياخذها اصلا ..بعدين انتي وين بتعليمن شي يفيدج وانتي اربع وعشرين ساعه مجابله ها التلفزيون ومشغله الرسووووم..هاااا ..
لفت حمده ويهاا صوب امها بدلع وقالت ::
ماماه انتي تبيني ادش المطبخ واتعلم اخااف اعور ايدي بسجين او اقص صبعي ..
ام عبدالله وهي تحضن بنتها /::
لا فديتج بعدج اصغيره انا اللي بسوي لج كل شي ..انتي بنتي حمده الشيخه ما بدشين مطابخ..
عبدالله وهو مبقق اعيونه مو مصدق ان حمده قصت على امه بها السهوله:::
الوالده تراها هذه اكبر لوتيه ما عليج منها ..اونه اقص اصبوعي ..اخخخ يالقهر..

ام عبدالله::

انت بلاااك على اختك ..وليش ما سرت المكتب الين الحين الساعه قربت على سبع ونص..
عبدالله وهو يحاول يغمز حق امه انه يباها في سالفه..وحمده اطالعه وطالع امه وفهمت شو يبا ..

حمده ::
اقووول عبوود لا تغمز انزين اذا تبا امك سير انت وياها المكتب انا ما بتحرك من هنييييي...

ضحكت ام عبدالله علي حمده وردها ..

عبدالله ::
اصلا انتي يا حمده الدفشه يا ادفش ما خلق ربي ..مب ويه حشمه انا قلت ما بقفطج لكن مدام جييه ذلفي غرفتج اشوووف بسرعه وانا مب ساير المكتب وبرمس انا والوالده هني ..يلااااه اشوووف سيري فوووق..
حمده ::
ما با انا كنت هني قبلكم وانتوا توكم واصلين انتوا اللي تسيرون المكتب مب انا ..
ام عبدالله::
يا ولدي قم نسير المكتب وفكنا من حشرتها ما بنخلص اليوم اذا تميت انت وياها ها الشكل..
قام عبدالله وامه وما نسى عبدالله وهو مار من صوب اخته انه ايير شعرها بقوه على غلااااستها .. وضحك عليها وهي تصارخ وتشتكي حق امه ..وطنشتهم امهم وسارت ولا كانها سمعت شي ..ما بتعور راسها معاهم..
دشوووا المكتب وصك عبدالله الباب..

ولف سوب امه وقال::
الوالده ما قلتيلي شو صار خبرتي ابوي ..احس انه اليوم سافهني ما عطاني ويه ..حتى اليوم لما زقرني في الميلس قلت يمكن يبا يفاتحني في السالفه ..لكن كان يباني في شي ثاني غير موضوعنا ..شو ما خبرتيه...؟؟

ام عبدالله::

والله يا ولدي الصراحه انا ما خبرته ..حسيت انه شويه مشغول ومب متفيج يسمع اي شي الحين ..وقلت اخاف افاتحه في السالفه يصدني وانت تعرف ان ابوك متوقع انك تاخذ بنت عمك او بنت خالك..

عبدالله ::
بس يا امي ما يستوي جيييه انتوا وااايد اتأخرون السالفه واخاف البنيه اطير من ايدي الصراحه ..
ام عبدالله::

خلها اطير في ميه وحده بدالها يتمنووونك شو تبا فيها ..
عبدالله فهم ان امه مب متحمسه للموضوع وما ماخذه الموضوع جد..حس بقهر وعصب ..

عبدالله::
الوالده انا بقولج شي الصراحه...انا غير ها البنيه ما باخذ لا بنت عمي ولا بنت خالي ..انا قلت لج اني انا ابا اعرس بهذه البينه وما في غيرها ..واذا انتي ما تبين تخبرين ابوي بالسالفه انا بفتح معاه الموضع ..قبل لا اطير البنيه من ايدي..

عبدالله ما حس بعمره وهو يرمس امه بها العصبيه وما حس بابوه وهو واااقف وراااه ويسمع رمسته كلها..وانتبه ان امه اطالع شي ورااه ولف عبدالله وشاف ابوه وااقف وشكله معصب ..
حس عبدالله بشويه احراج لكن قال في خاطره احسن خله يسمع دام الامور وصلت لها الحد ...
ابو عبدالله::

شو السالفه عبدالله اشوف صوتك علا على امك ومن متى نحن في ها البيت الصغير يرفع صوته على الكبير وين الحيا والحشمه وين الادب ..والا انا ما عرفت اربيكم عدل ..انت شويه وبترفع ايدك علينا..والا شفت عمرك استويت ريال خلاااص ما حد يردك..
حست ام عبدالله بقلبها يعورها على ولده وقالت خلني ادافع عنه شويه خذت حيلي ولدي:
لاا ايو ابو عبدالله ..عبدالله ولدك وما يقصد شي وانت ربت عيالك عدل ..بس هو الشيطان اللي دخل في السالفه..
عبدالله ارتاح من سمع صوت امه ::
السمووحه يالوالد السموحه الوالده ..لكن الوالد دام انك موجود اباك تسمع السالفه من البدايه ..
ابو عبدالله:
قول يا عبدالله اسمعك ..مع اني فهمت شو تبا من الباب..
وخبر عبدالله ابوه السالفه مثل ما قالها حق امه بالظبط..وقال::
والحين ياابوي انا الصراحه اخاف البنيه اطير من ايدي وهي اللي خاطري يباها ..وانا اعرف انكم تبوني اخذ وحده من اهلي ..لكن انا قلبي اختار هذه البنيه وما ابي غيرها ..
ابو عبدالله ::
عيل ما دام انت قررت شو حقه تفاتحنا بالسالفه..سير اخطبها لنفسك احسن شو رايك..

عبدالله قال في خاطرها احسن اطري الجو شويه وسار صوب ابوه وامه وحبهم على راسهم::
افااا بس يا بو عبدالله الحين انا اسوى شي من دونكم انا اصلا من دونكم ولا شي ..ولو سرت عندهم بروحي بيفرني من عند الباب..انتوا الخير والبركه..
ابو عبدالله حي قلبه على ولده ..بس اتذكر اخوه واخو حرمته::

بس يا ولدي شو تباني اقول حق اخوي وحق ابو على خالك ..هم يتوقعون انك تاخذ من عندهم ..

عبدالله::
ابويه الزواج قسمه ونصيب ..لا تغصبني على شي انا ما اريده ..دخيلك الوالد انا محتاج وقفتكم معايه الحين وصدقني انا متاكد انهم بيتفهمون الموضوع ..
تم ابو عبدالله ساكت وهو يفكر بالسالفه ..وطالع ولده وهو يفكر ويفكر..وكل ما يحاول يظهر عله في السالفه عبدالله يرد عليه..وحس ان الولد يباها ها البنيه ..ولما سمع اسم عيلتهم عرف انهم عرب وناس عندهم خير ..وقال في خاطره انا اذا ما حققت رغبت ولدي بيتم في خاطره وانا ما اريد اكسر خاطر ولدي ابدا ..
قام ابو عبدالله ::
انزين يا ولدي مبديا انا موافق لكن بشرط بنسال عنهم زين ما زين وما بكتفي بكلامك عنهم ..
ولف صوب ام عبدالله ::
شوفي يا ام عبدالله الزواج قسمه ونصيب وانا متاكد ان بنت اخوج وبنت اخوي اكيد بييهم نصيبهم ..وانا بحاول افهم اخوي الوضع اذا حسيت انه بيزعل وانتي بارك الله فيج اباج تسوين نفس الشي ..ترى ما عندنا غير عبدالله واحد بس

نش عبدالله من مكانه وتم يحب رااس ابووه ويحب ايده ويحب رااس امه وحضنته امه وتمت تصيح وقالت ::
اللي تباه يا ولدي بيصير انا ما ابي اخرب عليك فرحتك..

عبدالله ما صدق عمره وطار من الفرحه ..واول ما لقى فرصه وكان بروحه مسك موبايله وبغى يتصل في ساره حبيبته يبشرها لكن قبل ما يتصل كان خيفه متصل عليه:::

الوووه هلا والله هلاااا هلا بالشيخ خليفة هلااااا..
خليفه ::

هلا والله الشيخ عبدالله ..خشمك..انت وين يا ريااال حرقت موبايلك من كثر ما اتصل عليك ..وينك ..

عبدالله :::
والله موجود انت اللي وينك ما تبين..
خليفه ::
عبووود بااارك لربييعك خلاااااص العرب وااافقوووا ..وبنسير الخميس نحدد سوالف العرس والملجه..
عبدالله استانس لربيعه وااايد وبارك له وهو ما يدري انه يبارك له بزواجه من حبيبته..
مبرووك يا بو سلطان تستاهل والله اخييرا وااافقت البنيه ..اخااف الا بس اهلها غصبوها عليك هههههههه

خلييفه :::
يا خي انت الصراحه تغث الواحد ...شو غصبوهااا ..اصلااا وين بتحصل واحد شراتي شاب وسيم عريض المنكبين..
عبدالله ووهو يضحك :::
ههههههههههه يا خي نسووولف وياااك يعني ما نسوووولف ..وانا اشهد انك رياااال ما تنرد ..حليلها حمده بتحمل اصدمه الحين ......

خلييفه::
هههههههههههه هييه والله مسكينه الله يعينها ..اقووول لا تخبرها الا بعد ما املج اخااف تسوي لي سحر عقب ما اعرس..
عبدالله::

جب جب جب لا تمصخها هذه حمده الشيخة حمده مليون وااااحد يتمناها..
خليفه ::
ههههههه انزين يا رياااال انا واااايد مستانس ..اقووول تعاااال بنسير المارينا ابا اشتري نعال يديد عزك الله ..ودهن عود وسوالف عسب يوم نسير عند العرب اكون كاااشخ ..

عبدالله::

اوكييه انا بمرك انت وين الحين ...

خليفه انا يالس في مكتبك ..وبعدين رشيد ترى مصخها ما مسوي لي سالفه يقول هو صاحب المحل..
عبدالله::

هههههههههه يا خي تراك غثيت الريال ..حليله رشيد ..يالله انا بييك الحين..

عبدالله صك عن ربيعه واتصل على ساره ..لكن موبايلها كا مغلق ..وحاول اكثر من مره بس نفص الشي مغلق ..هذا وقته يا ساره تغلقين موبايلج ..وتم يحاول الين وصل المكتب وما شي رد ..
وسار ويا خليفه المووول يتشروو اغراض ..وكل ما حصل فرصه وتم بروحه لما خليفه ينشغل شويه ..يتصل بساره لكنه مغلق..وتم يفكر ليش ساره غالقه موبايلها..

في بيت ساره كان سيف وعليا يضحكون على ساره وهي متلعوزة في موبايها اللي اخترب لانه طاح في كوب الشاي ::

سااااره::
جب انت وياهاا اصلا ها من عيوونكم انتوا الاثنين ..اعوذ بالله ما كنت ادري ان عيونكم حاره..
سيف وهو يضحك عليها::
تستاهلين عسب مره ثانيه يوم اقولج سويلي معاج شاي تسوين فاهمه او لاا..
الللي صااار ان ساره كانت حاطه موبايلها في جيب بيجامتها اللي على الصدر ..وحامله صينيه فيها شاي وبسكوت وعليا وسيف عيونهم على البسكوت والشاي وحشروها يبون مثلها ..وما طاعت ساره قالت لهم سيروا كل والحد يسوي حق عمره ..وما كملت رمستها واول ما حطت الصينيه على الطاوله انزلق الموبايل وطاح داخل كوب الشااااي ..
وانعفست ساره وضحكوا اخوانها عليها ..وحاولت اظهر الموبايل من قلاااس الشاي لكنه كان وااايد حاااار..ويوم ظهروه كان الموبايل مطفي ..

سيف::
اصلااا خلااااص اخترب كله حتى البطاقه لازم تسوين لها بدل تالف يا الذكييه..

ساره وهي ومتغصصه ::
لااااا في وااايد ارقاام انا مخزنتها وما حفظتها يااا ربي شو اسوي..سوااف قوم اشتر لي موبااايل يدييد الحين يله فديتك ..

سيف::
طاع هذه اونه الحين ..طالعي الساعه الحين عشر وربع بالليل ..وحتى لو اشتريت لج اتصالاات باجر يبطلون مب الحين عسب اظهر لج بطاقه يديده ..الا جان تبين بطاقه واااصل ورقم منقع يديد هههههههههههههه

ساره ::
تخسي انا اشتري واااصل ..ها اللي ناااقص بعد ..انا خط يا عمري ..
عليااا::
نعم نعم نعم وبلااااهم اللي عندهم بطاقه واااصل ..مب بشر..
ساااره هي تضحك::
هههههههههههههه لا بشر لكن ..بشر قوم بو رنه ..هههههههههههههههههههه...

هذا اللي صار عند بيت ساره وعبداله من الصوب الثاني بيمووت من القهر يبا يعرف شو السالفه ..

خليفه ::
اقوول عبدالله ..
عبدالله::
قول يالمعرس..
خليفه::
ههههههههه عبدالله انا ابا اطلب منك طلب ...
عبدالله:
افااا عليك تم قبل حتى ما تقوله..
خليفه::
تسلم والله انك ريااال ..بس انا بغيت انك تكون الشاهد يوم بنكتب عقد الزواج ابا اسمك يكون في عقد زواجي ..ممكن..
عبدالله تفاجا من خليفه وستانس وااايد::
افااا عليك بس ابشر وانا بعد يوم بعرس اباك تكون الشاهد مالي في عقدي شو رايك ..
خليفه ::
افا عليك انا وانت اخوااان ..

عبدالله وخليفه ما كانوا يعرفون شو مخبي لهم القدر........

[هنوف الروح]

تم عبدالله متغصص من ان ساره غالقه الموبايل ..وبنفس الوقت تم يحاتيها ...مو من عوايدها ساره تغلق موبايلها ..يا ترى شو السالفه ..عبدالله سأل ابوه اليوم ان كان تخبر على عرب ساره ..وابوه رد عليه وقاله انه موكل واحد من ربعه يسأل عنهم في العين ..عبدالله واثق من ان ابوه ما بيتردد لحظه في الموافقه اول ما يعرف كل شي عن اهل ساره ..عرب واجاويد ..لكن السالفه طولت ..وهو خايف ان ساره اطير من ايده ..ساره آآآه يا ساره ...متى بس بتكونين لي ..متى بملج عليج وتستوين حرمتي ..ملكي انا وبس ..وظهر عبدالله موبايله ..وفتح الصورة اللي كان مخزنها باسم الاهل وهي اصلا صوره ساره ..وتم يطالع الصوره ويدقق فيها ..الله ما حلااااج يا ساره ..رقيقه وناعمه ..وتم يكبر في الصوره ويدقق في شعرها و وويهها و يكبر ويكبر ويشوف ادق التفاصيل الين حس انه بينفجر خاطره يسمع صوتها ...اتصل مره ثانيه على تلفون ساره لكن نفس الشي مغلق ..تنهد عبدالله وهو منسدح على شبريته ..وبطل الرسائل وكتب لها رساله من خاطره ...

(( حبيبتي نور عيوني عمري حياتي ساره ..حبيبتي انا رمست ابوي وامي ووافقوا واكيد اكيد ان شاء الله على نهايه هذا الاسبوع او بدايه الاسبوع الياي بنييكم عسب نخطبج رسمي ..حبيبتي حاولي عشاني انج ترفضين اللي تقدملج او ماطلي اهلج الين اقولج متى بالظبط الاهل بييونكم يخطبونج حق..عسب تستوين حرمتي ..ملكي انا وحدي وبس ..واستفرد فيج هههههه...اظهر كل اللي في خاطري من زماااان ههههه ...احبج اموووووت فيييج اعشقج واهواااج حياااتي ردي علي بسرعه لاني ابا اتطمن عليج موبايل كله مغلق ...حبيبي ونور عيونج عبادي....))

وطرش لها الرساله ..وفتح التقارير ولقى مكتوب ..قيد التسليم ...تنهد وقال بنشوف يمكن باجر الصبح تبطل موبايلها ..

ورد مره ثانيه وبطل الصوره وتم مبقق عيونه على ساره ..الين ما رقد وحلم فيها ...

ثاني يوم الصبح ساره راقده في امان الله ...وفجاه حد يبطل بابها بقوه وتنش ساره من الزيغه وهي تشهق..وكانت عليا عند راسها واقفه ...

ساره:::
بسم الله ..انتي شووو ما شي مذهب عندج ..ما تعرفين ادقين الباب بهدوء..خرعتيني ويا راسج ..عليوووه..

عليا ::
سارووه ..سارونه قومي نشي بسرعه فديتج ماما تبانا نسير بوظبي وياها عسب نشتري جلاابيات من هناك ..وقالت لي عادي اسير وياكم بسرعه قومي قبل لااتغير رايها ..

ساره ما كانت اصلاا مع عليا ..لانه اول ما قالت عليا بنسير بوظبي ..دق قلب ساااره ...عليا ما تدري ان قلب ساره في بوظبي ..ما تدري انه حبيب اختها في بوظبي ...لا ما تبا تسير هناك تخاف تضعف وتتصل عليه ...لا ما بسير ..

ساره:::

لا مب سايره..

عليا بهتت في اختها .ويلست عدالها في الشبريه وساره تعدل بيجامتها وتير اللحاف من اختها اللي كانت يالسه تيره صوبها وشويه الدموع بطيح من عينها ..

عليا:::

ساره عن السخافه ...ساره عشاني انتي تدرين انه مانسير بو ظبي الا مع ماماه واذا انتي ما سرتي هي ما بتسير ..وانا ابا اتحهز للدوام من هناك ..يلااا ساره فديتج عاااد عشاااني ..

نشت ساره وسارت صوب التسريحه ويلست تمشط شعرها الناعم وهي اطالع عمرها في المنظره ..وقالت ::

لا يعني لا ..عنبوه ليش نسير بوظبي عسب الجلابيات ..الكبت متروووس ...وبعدين عندنا هني في العين.. اذا لازم نشتري في اليشمك وغيره من المحلاااات ...واذا ماما لزمت سيري انتي وياها ترى ذوقنا وااحد..

عليا ما صدقت اختها وتمت اطالعها ..وسارت ووقفت وراها ..وتمت اطالع اختها ... العلاقه اللي بين ساره وعليا وااايد قويه ..اكثر عن خوات ..صديقات ..الوحده تفهم الثانيه..عليا حست ان ساره اختها فيها حزن ..عيونها ما كانت تلمع حالها حال اي عروس يديه ..سحبت عليا المشط من ايد اختها وتمت تمشط لها شعرها بهدوء وبدون ما ترمس ..عليا حست ان اختها في قلبها شي ..وما حبت تزيد الم اختها ..معقوله ساره تكون وافقت على الريال بس عسب ترضي الوالده ..تسويها ساره ...ما تحب تزعل امي ابدا ..تسوي اللي تباه عشانها ..حتى لو على حساب سعادتها ..ساره حست بغصه في قلبها ونزلت راسها تحت وحست الدموع بتخنقها بس ما حبت تبين لاختها ها الشي ..وحضنت عليا اختها ساره وساره ما تحملت وتمت تصيح من خاطرها وعليا تصيح ..ودخلت عليهم امهم ومن شافت بناتها بها الحاله زاغت وسارت صوبهن ::

شو بلااااكن بناتي بسم الله عليكن الله يحفظكن شو استوى ..عليا ساره شو بلااااكن ..

ساره وعليا طالعوا بعض وابتسموا لبعض ابتسامه ذات مغزى على قولهم..ونشت عليا ::

لا ما في شي ماما ..بس ساره سوت لي فلم هندي من الصبح ..اونها مب قادره اتخيل حياتها من دوني بعد العرس ..

ساااره::
ههههههههههههه ويااا راااسج انا ما اتخيل حياتي بعيد عن ماماه وباباه مب انتي ..

ام ساره ارتاحت بعد ما حست ان ما في شي في بناتها ..وقالت لهم ..
الحين انا طرشتج يا عليا تزقرين اختج عسب نتحرك بوظبي والا عسب تسون لنا فلم هندي ..فديتج ساره ما نبى نتاخرك يا بنتي بعدني وراي ميه شغله وشغله مع البشاكير ..واليوم الثلاثاء وما باقي الا يوم ولازم تشترين جلابيه يديده عسب ندخلج عن ام المعرس وتشوف بنيتي الحلوة ..

ساره ::
ماما فديتج والله ما له داعي ترى انا كبتي مترووس جلابيات يديده ..وبعدين ما لها داعي سيره بوظبي ..ترى عندنا محلات في العين ...بعدين الصراحه ما لي خلق للدرب ساعه ونص وعقب حوامه في السوق وعقب نرد ساعه ونص والله تعب وانا لازم احافظ على بشرتي نظره والا شو رايج هههههههههههههههه

ام ساره ::

انا الصراحه تعاييت فيكن كيفج خلاااص بس بعد بتنزلين السوق وبتشترين يشمك يديد لازم تلبسين شي يديد فديتج..

ساره ::
اويكه ماما ولاا يهمج ..اللي تبينه بيصير ..

عليا :::
ما لت عليج ساره ضيعتي علي سيره بوظبي ..

ساره ::

عليووه اصطلبي لا الحين اكنسل سيره السوق كلها بعد ..

عليا::

لا دخيلج شي احسن من لا شي ...ياااربي متي بعرس انا بعد..

ام ساره :::
اسمييج ما تخيليين ..نحن اول ما يطرون العرس نستحي ومانروم نرفع روسنا من المستحا وانتن بنات الايام هذه اللي يستر بس ..

ضحكت ساره على اختها عليا وخفه دمها ..سااره وااااايد تحب اختها عليا تمووت فيها ..وتحمد ربها ان لها اخت متفهمه مثلها ..

في ابوظبي خليفة في الدوام حاشر البقعه على عبدالله ..
خليفة :::

يا عبدالله يا خي رمس ها الرائد غثني يا ريال ما يبا يعطيني اجازة باجر اونه ما يقدر لانه الشغل ما يتحمل اني اغيب او اخذ اجازة ..

عبدالله ::

انزين خليفه انا شو اقدر اسوي يا خي انت داوم نص الدوام واظهر عقب وسير دبي ..يعني لازم تاخذ كل اليوم اجازة

خليفه::
عبوود لا طفربي انت الثاني ..تدري انت انا ليش ابا الاجازة صح والاا لااا ...يا خي لازم اسير دبي اليوم واجهز شويه اغراض الوالده تباهن ..ولازم شتري شويه اغراض بعد انت تعرف يا عبوود يله فديت خشمك رمسه تراااه يحبك واااايد ههههههه

عصب عبدالله وفر خليفه بالملف اللي جدامه وطارت الاورااق ::

شو بعد يحبني شو ها الرمسه يا الماصخ ..تبي اجازة هااا ما شي دواااك تم الين باجر الساعه 2 ونص الظهر وعقب سير دبي ..يالهرم شو ها الرمسه الماصخه..

خليفه هو ناقع من الضحك على ربيعه::

ههههههههههههههههههههههااااي خلااااص يا خي اسووولف وياااك ..يا خي لا تسويها سالفه وتعصب ..خشمك والله انت شيخهم ..وبعدين شو دخل الاجازة بمشاعر الريال صوبك ..اعترف ما يعاملك معهامله غير عنا هااا..معامله سبيشل ..

هني عاااد عصب عبدالله نش من الكرسي ولف صوب خليفه اللي حاول يشرد بس عبدالله لحقه لف ايده على رقبته وهو يضغط عليها وخليفه مسوي عمره بيختنق ويبا يضحك بس مب قادر لانه عبدالله شادر على رقبته ..

عبدالله ::

الرياال ميزني عنكم لانه شغلي احسن عنكم يا التعبانين وانا شغلي يخلي الكل يعاملني معامله خاصه لاني مهتم فيه اوكييه يا لهرم وان سمعتك تقول ها الرمسه الماصخه مره ثانيه ما تلوم الا نفسك يا خلفوووه..

خليفه تم يسوي حركه الهنوود اونه خلااااص اخر مره ويهز راااسه وجمع ايدينه مع بعض وحطهم تحت لحيته وهز راسه وهو يقول ::

زيين ارباااب ممكن تخليني اتنفس شويه ..

عبدالله وخر عن خليفه بس قبل ما يرد مكتبه مسك الملف وكفخ خليفه على راسه مره ثانيه..وقاله ::

هييه جييه اباك تادب يا الهرم ..

خليفه وهو يمثل اونه يتنفس بصعوبه ويهوي على عمره بالملف::

عبدالله يا ربيعي يا اعز الربع مب انا ربيعك وانت ربيعي ونحن ربع من زمان ..يا خي رمسه قوله اني بعرس واني محتاج الاجازة باجر ضروري ...بعدين انت شو خانتك ربيعي ليش ما تشيل عني الشغل باجر ..

عبدالله ::

نشاااد عنك اشيل شغلك ..لااا يا بابا كل شي بحسابه ..تبيني اخدمك اخدمني ...

خليفه ::

عنبوه ما شي بلاااش في الدنيا ..يله ما علينا شو تبا امر تدلل ..

عبدالله ::
تعزمني على الغدا اليوم عقب مانخلص الدوام ..وتترس السياره بترول ..تفولها ..وو..

خليفه ::
اوكيه امري لله ..ذليتنا يا خي ..حاضرين للطيبين ..لكن هاا شوووف تكلم الرائد لاني عقب المغرب اليوم برد دبي ولو تنطبق السما على الارض ما بداوم باجر..

عبدالله ::

اوكيه ..deal ... اتفقنا ..

في العين ..

ردت ساره وعليا من السوق متأخرين مع اخوهن سيف ..كانت الساعه تقريبا عشر ونص..

سيف اول ما وصل الصاله عق عمره على الكنب وهو يتنهد :::

حشى يا بوكم شو ما تتعبون يالبنات من السوق عافانا الله ..من اربع العصر الين الحين ...والله ظنتي لو ما انا قلت نرد البيت عادي تباتون في السوق صح..

ساره يله عاااد سواااف لاتستوي جييه ..انا كم مره بعرس هاا خبرني وبعدين كم ساره عندك هااا خبرني ..

سيف::

وحده وحده ذليتينا ..عليااا خلي البشكاره تييب لي ماي عطشان ..

علياا::

ماااري مااااري هاتي ماي بااارد حق بابا سيف ...

سيف وهو يطنز عليها ::

بابا سيف ..مالت قولي مستر سيف انا تعبت وانا احفظ ها السيلانيات والهنديات يزقروني مستر سيف وانتي تقولين بابا سيف شو هاا الحاله ..

ضحكت عليا عليه ..ساره اتذكرت بطاقتها ...

ساره::

سواف وين بطاقتي انت ما قلت بتظهر لي بدل تالف وين الموبايل ..

سيف ::
الحين انا ما عطيتج رقمي الثاني ..خلااااص شو تبين بعد لاحقه على رقمج بعدين امي عطتج موبايلها وبصراحه اليوم الوالد ما عطاني فرصه اني اسير مكان ..وكملتها الوالده بعد العصر جبرتني اوديكم السوق ..انا مدري ها الدريول اللي يايبينه ونعطيه معاش كل اخر شهر شو وظيفته هني ...

ساره :::
لااااا سواااف ابا رقمي ما ادر ي احس اني ضايعه من دونه ..بعدين باجر الاربعاء وبعد ابوي اكيد يباك وياه عسب الذبايح ..اوووه الحين شو اسوي ..اقولك شي انا بسير اتصالات بروحي وبظهر الرقم ..

سيف وهو ينقز من مكانه ::

ان سرتي اتصالات والله لا احش اريولج حش ..ها اللي ناقص ما عندنا بنات يسرن اتصالات ..البقعه متروسه شباب وما يصدقون يشوفون عبايه تمشي ...ما شي سيره انا باجر اذا حصلت وقت بسير اظهر لج البطاقه..اوكييك يا عسل بالكيك..

ساره ::

اوكيييك يا عسل ...

صعدت ساره غرفتها وقلبها يدق وفيها شوووق مو طبيعي ..شوووق ولهفه ..كانت مشتاقه تسمع صوته ..مشتاقه تسمع صوت حبيبها اللي ما تدري انه هو بعد مشتاق لها موووت..دشت ساره غرفتها وصكت الباب وراها ..حطت كل الاكياس في الارض وقالت في خاطرها ..ليش يا عبدالله ...كان ودي تكون انت مكان اللي بياخذني ..كنت اتمنى اني اتزهب حقك انت مب لغيرك..آآآآآه فديتك شقد انا مشتاقه لك ولصوتك ..ولهمساتك ....

في بو ظبي ...

عبدالله يالس يشك الموبايل ماله وفتح التقارير ...قيد التسليم ..انقهر عبدالله وحس انه في شي مب طبيعي ...يعني مو معقوله تكون ساره غالقه موبايلها يومين ورا بعض ..اكيد في شي ..ليكون فيها شي ...رد اصل مره ثانيه ولقاه مغلق ..
وينج حبيبتي ساره ابا اقولج اشيااء وااايد صارت لي ....وتم يتذكر كيف كان يسولف هو وياها بالساعات وما يخلصون ..كيف يخبرها كل شي عن حياته وعن اهله وعن اخته حمده ..وعن ربيعه ..خليفه ..وانه اعز ربعه ..وهي تخبره كل شي يستويلها في حياتها ..كل شي ..حتى الامور الخاصه ..ما كان هناك بينهم شي يخبونه عن بعض..
عبدالله كان يحس بشوووق غريب لساااره ...

[هنوف الروح]

الاربعاء الصبح ..الساعه 11 ونص في بيت ساره ...ام ساره محتشرة على الشغالات عسب ينظفون الميلس زين حق باجر ..شالين البقعه فوق تحت ..وسارت صوب المطبخ الخارجي وكلمت الطبابيخ انه يوم توصل الذبايح يجهزونها حق باجر ..وخبرتهم شو يطبخون حق باجر ..

عليا يالسه اطالع امها من دريشه الصاله وهي تتنازع مع البشاكير في الحديقه وتقولهم انهم يعدلون وينظفون الحديقه ..
ساره يالسه اطالع التلفزيون وتبرد اظافرها بدلع وهدوء..وطالعتها عليا وقالت لها ..

عليا:::
اقولج ساره ..الحين باجر العرس والا شووو؟؟؟ ماماه محتشره على البشاكير جنه باجر العرس ..حليلهم والله ..عيل لو بتعرسين شو بتسوي فينا ..

ساره وهي تكمل برد اظافرها وبدون ما اطالع اختها ::
انتي ويا راااسج شو يعورج خليها تشغلهم شويه ..بعدين مب اي حد بينخطب ..انا الشيخة ساره يعني كل شي لازم يكون تمام التمام ..يعني انتي لو بتعرسين بنطلب لج مشاوي من مطعم الملاااح يسدج ..ههههههههههههههههاااي

هني سارت عليا صوب اختها وسحبت المبرد من ايدها وهي اتحداها ::

تخسييين الا انتي يا الهرمه انا ابوي واموي بيسون عرسي في برج العرب ومب اي حد بيحضره بس اللي عندهم بطاقه ذهبيه وبس يعني الهااي هااي وانتي وريلج بنصدق عليكم ببطاقات برونزيه يمكن يدخلونكم من البوابه هههاهههههههههههااااي..

ويرت عليا شعر ساره وشردت من جدامها ولحقتها ساااره وحاولت تمسكها بس عليا كانت لابسه بيجامتها وساره لابسه جلابيه خفيفه للبيت وما قدرت تلحقها ورفعت ساره جلابيتها وركضت ورا اختها وتمواا يصارخون مثل اليهاال وما حسوا الا باب الصاله ينفتح ويدخل اخوهم العود حمد وياه سيف وابوهم ..ركضت عليا وانخشت ورا ابوها وساره اتجمدت لان جلابيتها كانت مرفوعه الين ركبتها وشكلها الصراحه كان شويه وبيتصفع ..ابتسم ابوها يوم شافها ..وسيف تم يسويلها حركات يغايضها من ورا ابوها ..وحمد اللي ما يحب دلع البنات معصب ..

حمد ::

يا هي حاااااله الحين بالذمه هذه بينه باجر بتعرس ..عنبوه انتي وها المخبله عليووه ما تبوون من حركاتكم وحده يالسه بالبيجاما والثانيه مظهره عصاقيلها والله انتن ما تخيلن ..

وسحب عليا من ايدها وقال لها ::

انا جم مره قلت لج ها اللبس ماتنزلين فيه الصاله لبسيه في غرفتج وبس ..

عليا وااايد تخااف من اخوها حمد وسحبت ايدها وانخشت مره ثانيه ورا ابوها ..اللي تم يطالعها ويضحك عليها وما قال شي لانه عارف ان حمد بيتوالهن عدل وهو ما يقدر ينازعهن اصلا لانهم مايهون عليه بناته..وحضن بنته عليا ..
وسار حمد صوب ساره اللي تجمدت مكانها ورفعت راسها اطالعه لانه ماشاء الله وااايد طويل واضخم عنها ..وطبعا خافت وهي تقول في خاطرها تعال بابا صوبي بيصفعني حمد..ومسكها حمد من ايدها ورفع شويه جلابيتها وما كانت لابسه سروال يغطي اريولها وطالعها في عيونها وقال..

جم مره قلت لج انا ما اداني البنات اللي ما يلبسن صراويل تسترهن ..وبعدين انتي الحين ياهل عنبوه باجر بيون العرب بيخطبونج وانتي ..شوه اقول بس يا ربي الله المستعان بس..

هني ادخل ابوهم وقال ::

خلا ص يا ولدي ما صار الا الخير بعدين البنيات ما ظهروا من البيت ..ما عليك منهن تعال بنكمل سوالفنا في الميلس ..
وهني تلقفت عليا :
لا اااا باباه الخدم ينظفون الميلس بعدهم ما خلصووه ..
وسكتت يوم شافت حمد خزها بعيونه..وبلعت لسانها ..ضحك سيف عليها ..واقترح ابوهم انهم يسيرون فوق الصاله اللي في الطابق الثاني ..وسار ابوهم وخوهم حمد..وهني عاااد نقع سيف من الضحك عليهم..

سيف :::

وووووووهووو هزءوووهن ياااي تستاااهلن ..والله لو تشووفوون اشكالكم كيف كانت هههههههههههااااااي دواااكن ...وحده ببجامتها والثانيه مسويه عرض عصاقيل ..واااااااااي هههههههههههاااااي...

ساره وعليا ساروا صوب سيف وطاحوا عليه بالمخدات مالت الكنب اللي في الصاله ..

ساره ::

جب حب ويا رااسك ..اصلااا عادي ما صار شي شفت باباه ما قال شي ..

عليا ::

هييه والله فديته باباه ما قال شي ابدا..

سيف وهو يضحك:::

هاهااااااااي العله مو في باباه يا خبله انتي وياها ..شفتو حمد كيف هزئكن ووووووووووووووووووووييي..دوااااكن ...

ساره وعليا عصبوا من سيف وطاحوا فيه ضرب بالمخدات ..بس ما قدروا عليه لانه ببساطه دزهن وشرد عنهن فوق ولحق ابوه واخوه العود..

هني اذكرت ساره رقمها وزقرته قبل لا يصعد فوق ::
سواااف وين بطاقتي ..

سيف::

اوووه ما حصلت وقت ..اقووول بسير عقب الصلااه وبظهرلج وحده اوكييه ..بس ذكريني اوكييك يا عسل بالكييك..

وسار فوق ..وسارت عليا وساره فوق بعد قبل لا يتهزءون مره ثانيه من اخوهن حمد..

في دبي ...

خليفه كان في السوق مع اخوه طارق يتشرون اغراض حق البيت وحق الوالده ..

طارق ::

خليفه الحين انت مستعد للعرس يا خوي ..؟؟

خليفه ما فهم قصد اخوه ::
مستعد؟؟شو تقصد من اي ناحيه..؟؟
طارق ::
يعني من كل شي ..تعرف العرس يباله فلوس ومخاسير وشغلااات وااايد..مستعد يا خوي؟؟
خليفه:
ان شاء الله مستعد ..لا تحاتي اخوك بو سلطان ما عليك..كل شي متوفر والحمد لله..
طارق ::
اعرف وانا خوك ..لكن شوف اذا احتجت اي شي ما يردك الا لسانك ..
خليفه ::
ماتقصر يا خوي ..اعرفك تحبني وتبي تشيل عني العرس كله صح..ههههههههههه
طارق ::
ويا راااسك اسميك ما تنعطا ويه يا خلفوووه ..حدك من درهم لالف بس هههههههههههههههه
خليفهه:::

افاااااا من درهم لالف وانا قلت بيقول لي من درهم لميه الف ..ما علينا ..الله كريم ..الله يخلي الوالده..

طارق ::

هيييه طبعاااا انت خليفه انت الدلوع حبيب القلب انت ..ونحن نشرب من ماي البحر..
خليفه::
اعوذ بالله ومن شر حاسدن اذا حسد..يا خي بتحسدني على حب الوالده لي ..يا خي انا حبوب وانا انحب كل من يعرفني يحبني ..شو يعورك انت هاااا...
طارق :::
ههههههههههههه ما شي يعورني الله يهنيكم مع بعض ..اخلص بس ورااانا شغلاااات العصر بعد لاتنسى الوالده تبا تسير السوق ما ادري انا هذه خطوبه بس وجييه سوت عيل في العرس شو بتسوي بعد..
وضحك خليفه واخوه طارق على السالفه وكملوا طريجهم ...خليفه في خاطره باجر تكون الملجه مب الاا خطوبه ..واي شي تباه ساره بينفذه حقها ما بيخلي اي شي في خاطرها ابدن ..فديتج ساره متى بتكونين حرمتي بس متى ..وتم يذكر اول مره شافها وكيف تخبل عليها ..

[هنوف الروح]

في بيت عبدالله ،، عبدالله مو مصدق انه امه وابوه وافقوا على انه يخطب ساره ،، وتم يحب راس امه واراس ابوه وهو مو مصدق ،، وتموا يخططون كيف يتقدمون لأهل ساره وهني تذكر عبدالله انه ما يعرف رقم بيت اهل ساره ،، كل اللي يعرفه هو موبايلها ...

ام عبدالله :::

عبدالله يا ولدي انت عطيني رقم بيتهم وانا برمس ام البنيه ،،

عبدالله وهو مب عارف شو يرد على امه ،، وكل اللي قدر يقوله ،،

ان شاء الله امي انا برمس ربيعي وبخذ منه الرقم ..وبخليه بعد يمهد الموضوع لاهله..

ابو عبدالله ::
خلا ص يا ولدي اتفقنا انت هات الرقم وامك هي بتفاهم مع ام البنيه ،،ويحددون وقت نزورهم ..

وتموا يتفقون على اشياء وااايد ،،عبدالله ما كان وياهم في نص الكلام اللي قالوه ،،كان يفكر في ساره وانه لين الحين موبايلها مغلق ،،ومن وين بيحصل الرقم ،،ااخ يا ساره وينج يا بعد عمري انتي ...

في بيت ساره ،،،،الوقت كان المغرب وكانت ساره وامها وعليا يالسين في الصاله يتناقشن في سالفه العرس ،،

عليا ::

ماما صدقيني ساره لازم اتحنا شو بدش على الحريم وايدها بيضا ما فيها حنا ،، بعدين خلاااص انتو وافقتوا يعني ما لها لزوم هذه الشكليات ..

ام ساره ::
لا يا بنتي ما يستوي باجر ساره ما بدخلها الا اخر شي عقب ما يتفقون الرياييل على كل امور العرس ،، وما بخليها تقعد وااايد ،،سمعتي ساره فديتج ,, ادشين تسلمين على ام ريلج وتقعدين شويه وعقب تستاذنين وتردين داخل انزين فديتج..

ساره كانت سرحانه تفكر ،،تفكر في عبدالله ،،آآآآآآآآآخ ليش مب قادره تشيله من راسها ،،خلااااص هو تخلى عنها ،، وما شي فايده الحين من انها تفكر فيه..

عليا::

حوووو ساااره وين سرحتي ،، الحين انتي بعدج ما ملجتي وجيييه سرحانه في الريل ،، اللي يستر لو ملجتي شو بتسوين ...

ساره :::
جب جب ويا راااسج ،، انا افكر في باجر ،،ماماه اسير الصالون اسشور شعريه والا ما له داعي ..

ام ساره ::

يا بنتي اذا في خاطرج سيري فديتج ..سيري العصر وردي انتي واختج ..

عليا:::

وااااااو انتي الصرااحه اروع ام شفتها بحياتي ..
ونقزت عليا صوب امها تحضن فيها وتبوسها ،، وامها تضحك عليها وساره تضحك،، وشويه ودخل عليهم سيف وتم يطالعهم،،

سيف::
طبعا الحضن والتبويس كله حق البنات في ها العيله ...انا ما لي رب ..فقيرن مسكيين ..

ام ساره ضحكت على ولدها ويرته من ايده وحضتنه وقالت له ::
انت يا سيف نور عيوني يا بعد عمري ..
ساره حست بغيره ::

لاااااه وانا شووو بنت البطه السوده ما لي رب والا عشان خلاااص بودركم وبسير بعيد عنكم ..

ام ساره::

لا فديتكم كلكم والله سوا ...كلكم عيالي ونظر عيني انا وابوكم ..ما فيكم واحد احسن عن الثاني..
سيف مصخها ونسدح وحط راسها في حضن امه وهو يغايض عليا ..ورفع الكيس اللي في ايده وفره صوب ساره ..

سيف::
دووج ساااره موبايل يديد وبطاقتج ..كل شي داخل الفاتوره وكل شي ..

ساره ما صدقت عمرها ::
فديتك سوااف اخييرا ...ولااا عبد شاريلي موبايل يديد ..حبيبي والله يا أخي الصغير ..

سيف::

هييه عشان تعرفين اني اضحي عشانكم انتي وخالتي قماشه عليووووه..

هني عليا عصبت وقالت ::
لاتصدقينه ساره انا شفت ماماه وهي تعطيه الف درهم عسب يشتري لج موبايل يديد..اونه بيشتري من حسابه الخاص تصدقين انتي ها الرمسه..
هني عاااد ضحكت ام ساره عليهم وسيف غطا ويه بشيله امه ..وقال لعليا::

اسمييج يا خالتي قمااشه ما حد يسوي شي جدامج ..

ساره ما همها كل هذا واستاذنت وسارت غرفتها عسب تركب البطاقه في الموبايل وتشحنه..واول ما دشت غرفتها ،،صكت بابا الغرفه ..وسارت صوب شبريتها ،،قلبها كان يدق بسرعه ،،ما تعرف شو تسوي ،،وشغلت الموبايل ،،وانتظرت ثواني واول رقم كانت تخزنه من اول ويديد هو حبيبها ..لكن قبل ما تكمل وصلت لها رساله ...قلبها دق بقوه كان عندها احساس ..غريب وتمت اطالع موبايلها وبطلت الرسائل ::

(( حبيبتي نور عيوني عمري حياتي ساره ..حبيبتي انا رمست ابوي وامي ووافقوا واكيد اكيد ان شاء الله على نهايه هذا الاسبوع او بدايه الاسبوع الياي بنييكم عسب نخطبج رسمي ..حبيبتي حاولي عشاني انج ترفضين اللي تقدملج او ماطلي اهلج الين اقولج متى بالظبط الاهل بييونكم يخطبونج حق..عسب تستوين حرمتي ..ملكي انا وحدي وبس ..واستفرد فيج هههههه...اظهر كل اللي في خاطري من زماااان ههههه ...احبج اموووووت فيييج اعشقج واهواااج حياااتي ردي علي بسرعه لاني ابا اتطمن عليج موبايل كله مغلق ...حبييج ونور عيونج عبادي....))

ساره قرت الرساله ..مره ومرتين وثلاث واغرقت عيونها بالدموع ..ما تدري شو تسوي ..ليش تأخرت يا عبدالله ..ما اعرف شو اسوي..باجر العرب بييون .. تمت ساره ادور وادور في غرفتها مثل المينونه ..ما تعرف شو تسوي ..وشافت تاريخ الرساله والوقت ..فديته مطرشه من اربع ايام ...ساره ما تدري شو تسوي ..حست ان عقلها بنفجر من الضغط وطاحت على شبريتها ...وغمضت عيونها وهي تصيح من خاطرها ..

في بو ظبي عبدالله كان يالس يفكر وهو ينتظر الاشاره الضوئيه تتبدل وتستوي لونها اخضر ..وشاف موبايله ينور فجاه ..وسحب الموبايل من شاحن السياره وتم يشوف شو السالفه ..وانتبه الى انه تقرير..وفتح التقرير وشاف مكتوب فيه ..تم تسليمه الاهل ...
عبدالله ما صدق عيونه وما انتبه الى ان الاشاره صارت خضرا والسيارات من وراه يهرنون له ..وتحرك بسرعه وما صدق يحصل له باركن وبركن السياره وعلى طول دق رقم ساره ...وانتظر شويه ورن الموبايل ..دق قلب عبدالله بقوه ..
وهو ينتظر رد ساره ..

ساره كانت مغمضه عيونها وراسها يعورها من التفكير ..وسمعت رنه الموبايل..ونزقت من مكانها و رفعت الجهاز وشافت رقم حبيبها على الشاشه

قلبها دق بقوه ما عرفت شو تسوي ترد عليه او لا..ومن غير ما تدري ردت عليه..

ساره::

....................

عبدالله بصوت هادي ::

الوووه..ساره...

ساره::
هلا
عبدالله ارتااااح يوم سمع صوووتها وحس انه كان عطشاااان وارتوى ..غمض عيونه ورد راسه وراا على الكرسي هويقول لها::

فدييييييييييييييييت انا ها الصوت والله ..هلا ملاااااااااااااايييين فيييج ولا يسدن يا شيخه البنات...يا عمري يا حياتي ..وييييينج ساره حبيبتي اشتقت لج مووووت ..كيف تتخليين عني كل ها الفتره كلها ..وما اعرف عنج اي شي ..

ساره قلبهاا دق ودق من سمعت صوت حبيبها وغمضت عيونها وتمت تقول في خاطرها فديييتك يا عبااادي::
هلا عبدالله ..
عبدالله تجمد من برود ساره::
ساره حبيبتي شو فيج ..عسى ما شر ..ليش موبايلج كان مغلق كل ها الايام..
ساره ::
لا ابدن كان مخترب ..والبطاقه بدلها اخوي وتوه اليوم جددها لي ..

عبدالله ::

ساره تدرين ان اهلي وااافقواا على اني اخطبج وان شاء الله امي بترمس امج ها الايام ..وانا كنت اريد منج رقم بيتكم...
قاطعته ساره بألم::

خلاااص عبدالله ما ينفع..

عبدالله حس ان قلبه بيوقف من كلام ساره::
ساره شو ما ينفع ..ساره شو صاير خبريني ..ليش انتي مب صريحه وياااي؟؟
ساره وصوتها تخنقه العبره::
خلاااااص عبدالله ..خلااااص انت واااايد تاخرت ...انا نخطبت ..وباجر بيوون العرب يخطبوني رسمي وبيتفقون مع اهلي على كل شي ..كل شي موعد الملجه و..العرس ..وكل شي ...خلاااااااص انا وانت انتهينا ..

عبدالله كان يسمع كلام ساره وهو مو مصدق اللي يسمعه ..ساره خلااااص طارت من ايده مستحيل ::

ساره انا احبج وانتي تعرفين ها الشي انا اموووت فيج ..انا حبيبج عبدالله ..عبااادي ..كيف ..كييف تستوين حق واحد غيري..؟؟ساره انتو بعدكم في البدابه ..يعني بعده ما صار شي رسمي..

ساره قاطعت عبدالله::

عبدالله ما اقدر خلاااااص ..ما اقدر احط اهلي بها الموقف انا واااافقت ,,وااافقت عقب ما شفت انك تاخرت علي ..شو كنت اتوقع مني اني اقول لهم لااا ..ليش ما كان عندي سبب واااحد مقنع اني اقولهم لا..شو تباني اقووول يا عبدالله

عبدالله غمض عيونه وحس بغصه في قلبه ..بها السهوله ساره بطير منه ..ساره حبيبته ..

عبدالله::
ساره دخييلج لا تسوين فيني جييه ..ساره انا عرف انج تحبيني ..ما تصبرين عني ..وانا ما اصبر عنج..ساره انا بخلي امي ترمس امج باجر لا مو باجر الحين لو تبين ..دخيلج ساره دخيلج لا توافقين عليه..

ساره وهي تصييح وصوتها مخنوق من الدموع:::
عبدالله انا واااافقت خلااااص ..ما اقدر اغير رايي ..مستحيل ..م اقدر احط اهلي في موقف بايخ مع الناس..اقولك باجر يايين يتفقون على الملجه والعرس ...يعني خلاااص كل شي انتهى..

[هنوف الروح]

قالت ساره جملتها الاخيرة وسكتت لانها تمت تصييح من القهر والالم،، كانت تصييح وقلب عبدالله يتقطع من صياحهاا،،وبدون ما يحس نزلت دمعه قهر من عينه ،،كيف ساره تستوي حق واحد غيره ،،ما يتصور انه في حد غيره بيقولها احبج ،،فديتج ،، وهي بترد عليه بنفس الكلام،،لا مستحيل ..

عبدالله ::

ساره حبيبتي صدقيني ما فيها شي ،، انتي بس قولي لامج انج ما ارتحتي يوم شفتيه ،، ساره الزواج مو بالغصب حبيبتي ،، قولي لهم انج صليتي استخاره مره ثانيه وما ارتحتي ،،،قولي لهم اي شي ..وانا اوعدج اني اخلي الوالده ترمس امج الحين لو تبين ،،ساره ردي علي ..لا تصيحين فديييتج كله ولا دموعج يا بعد عمري ..

ساره ما قدرت تيود عمرها من الصياااح ومن سمعت كلام عبدالله حست بقهر زياده..وقاالت/::

عبدالله انت شو اتحراني ...انا مب ياهل عسب اسوي ها الحركه في اهلي واحطهم في ها الموقف ،، عبدالله انا اول ما تقدملي الريال خبرتك ،،وشو كانت رده فعلك ..انك بتحاول مع اهلك ..بتحاول ...مب شي يقهر ها اللي قلته ..انت حط نفسك مكاني ..شو من سبب مقنع اقوله حق امي او ابوي او حتى اخواني ..شو تباني اقولهم ..لاااا ماما السموحه ابوي انا احب عبدالله وهو بيحاول مع اهله انهم يوافقون علي ..لانهم يبونه حق بنت عمه..هاااا شو تباني اقووول انت خبرني ..خلااااص عبدالله كل شي انتهى... انتهى ..

عبدالله انصدم من كلام ساره ومن قسوتها معاه،،لكن فكر في كلامها ولقاه صحييح هو اللي تاخر هو اللي شك فيها من البدايه ،، اصابع ايديك مب مثل بعض يا عبدالله..كيف انا فكرت في لحظه اني اشك في ساره ...

عبدالله ::

يعني ما بتحاولين حتى مع اهلج ،، يعني كل شي انتهى خلااااص ،، انتهى يا ساره..؟؟

هني ساره جمعت قوتها وضغطت على قلبها وقالت بصوت ثابت :::

هييه عبدالله كل شي انتهى ،، وانا كل شي اقدر اسويه الا اني افشل اهلى جدام العرب اللي بيونا باجر،، و..و..وابي اطلب منك طلب ...

عبدالله بصوت حزين ::
امري..
ساره::
عبدالله انا خلاص ما بكون لك ،، يعني اباك تنساني ..وتنسى انك عرفت وحده اسمها ساره ..انساني وعيش حياتك ..واباك تدعيلي انه ربي يوفقني ويظهر ريال زين ..واباك بعد تنسى رقميه ..ولا تفكر فيني ..وتعيش حياتك ..ووانا بعيش حياتي ..وصدقني مع الوقت بننسى..

عبدالله كان يسمع ساره..وعيونه تطالع بدون هدف سرحانه في ورق الاشجار اللي في الحديقه اللي جدامه ..تبيني انساج ..وادعيلج مع هذا اللي بياخذج مني...انتي تطلبين المستحيل يا ساره..

عبدالله::

تبيني انساج يا ساره ..بها السهوله ..تبيني انسااج ..ولا وبعد ما تبيني ادق لج..شو خايفه اسببلج مشاكل مع اهلج وريلج..لا يا ساره اكون جذاب لو قلت لج اني بنساج ..اكون جذاب ان قلت لج اني بدعيلج مع هذا اللي بيخطفج مني..وانا ما اظمن اني اذا هزني الشوق وكن ابا اسمع صوتج ما ادقلج ..لا ما اقدر اظمن لج ها الشي ..انا احبج وبظل احبج ..
مع اسلامه ساره

وبند عبدالله تيلفونه بسرعه بدون ما يعطي ساره فرصه انها ترد عليه ...

ساره تمت اطالع موبايلها وهي مصدومه ..خلااااص راح عبدالله ..خلااااص انتهى كل شي ...تمت اتصيح وتصيييح وما عرفت شو تسوي ..وعقت عمرها على الشبريه وغطت ويهاا بمخدتها ..وتمت تصيح بصوت مكتوم عسب محد يسمعها..

من ناحيه عبدالله اول ما صك تيلفونه فره على السيت اللي عداله ..ومسك راسه وحس بالم فظيع في راسه وريح راسه على دركسن السياره..وما كان قادر يفكر حس بالم في قلبه ..الم فظيع وما كان قادر يتنفس وبطل بابا السياره ووقف برع وتم يتنفس بقوه وساره ويلس على حافه الزرع اللي على الرصيف ..وسمع تيلفونه وهو يصيح بس ما كان يقدر يرد عليه طنش وتم يفكر ..وركب سيارته ..وتحرك صوب البحر ..وسار مكان بيعد ما فيه ناس ووقف السياره ..ونزل يتمشى على البحر وترك موبايله في السياره ..مع انه سمعه وهو يرن مره ثانيه بس ما قدر حتى يطالع منو كان يتصل ..وتم يشمي وما يسمع غير صوت البحر والهوا يضرب فيه ..كان الجو هادي ..وكان عبدالله يبي مكان هادي يفكر فيه ..ويلس على الشاطي .. الرمل كان شويه بارد وفصخ نعاله وتمت يتحسس بروده الرمل ..وحس بشويه راحه ..وتم يفكر بهدوء ..الغلط مب على ساره ..الغلط عليه انا ..انا اللي مصختها ..كنت ابا وحده اتسلى وياها ..كنت ابا وحده تعيش معاي قصه حب ..لكن بدون ما اعطيها بالمقابل شي..ساره ما تستاهلني ..لكن ..انا ما اقدر انساها ابدن ..انا لازم اسوي شي ..انا ما بسكت عن ها الوضع..
وقام بسرعه ولبس نعاله ورد لسيارته ...واول ما بطل باب السياره سمع موبايله يرن..وشاف ان خليفه هو اللي متصل ..
تنهد عبدالله ..الحين شو اقول له ..ارد احسن ما بيسكت بيحرق التيلفون الين ارد عليه..

واستسلم عبدالله ورد علي خليفه::

الو هلا خليفه ..
خليفه اول ما سمع صوت عبدالله احتشر وتم يعاتب وينازع وصوته كان عالي لدرجه ان عبدالله وخر السماعه عن اذنه ..

خليفة:

يا خي انت وييين حرقت تلفونك من كثر ما ادق لك ..مسوي عمرك عمله صعبه ما حد يقدر يرمسك ..انت ما تعرف اني معرس ولازم تراعون حالتي النفسيه شويه ..شو من ربع انتوااا..

عبدالله غصب عنه ابتسم من رمسه ربيعه ..والله محد يقدر يخليه يبتسم وهو مضايق غير خليفه..

عبدالله ::
اسمحلي الشيخ خليفه ..السموحه منك يا طويل العمر وهات راسك احبه ..الواحد يعني ما ينسى موبايله في سيارته مثلاا..

خليفه::
ووانا من متى ادق لك صار لي ساعه وانا احاول ارمسك ..وانت ولا في خاطرك شي..

عبدالله::

خلااااص قلت لك انا غلاطاااااااان المفرووض اني اعرف انك تتصل حتى لو نسيت موبايلي في السياره ..عندي قرون استشعار قالولك ويااا راااسك هاااا..

خليفه:::

هههههههههههه انزين سامحتك ..بس لا تعيدها ..المهم..

عبدالله :::
اخييرا وصلنا للمهم ..هااات المهم..

هني خليفه قال شي صدم عبدالله ..عبدالله حس ان الدنيا ادور من حوله ..ما صدق اللي كان يسمعه ..

يا ترى شو قال خليفه حق عبدالله..؟؟؟؟

[هنوف الروح]

ساره تمت طول الليل في غرفتها ما نزلت تحت وحتى لما امها زقرتها للعشا قالت انها ما تبي ،، وتبي ترقد عسب باجر تكون مصحصحه ،،وخلتها امها على راحتها ،، ساره ما قدرت ترقد الين الفجر ..وسمعت الاذان وقالت اقوم اصلي احسن لي ..وسارت وتوضأت للصلاه وصلت الفجر وعقب ما خلصت تمت تدعي ربها من خاطرها ..قالت ..يا رب انت ادرى بالخير وين لي ..اذا في زواجي من ها الانسان خير لي في ديني ودنياي ومعاشي فيسره لي وبارك لي فيه ..واذا كان زواجي منه شر لي في ديني ودنياي ومعاشي فاصرفه عني واصرفني عنه ..واقدر لي الخير حيث كان ورضني به يا رب..ومن التعب رقدت على السجاده لانها طول الليل ما رقدت وما حست الا بدق على باب غرفتها ..ورفعت راسها وطالعت الساعه ..لقتها قريب ال11 ..وكانت عليا عند الباب بطلت ساره باب غرفتها وتحس راسها يعورها تبي ترقد اكثر ..بطلت الباب وردت صوب شبريتها وعقت عمرها ..كانت تحس بتعب ..يووعانه رقااااد ..تلحفت وغطت وييهاا..

عليا طالعت اختها من اول ما بطلت الباب واستغربت كيف شكل اختها مرهق والهالات تحت عيونها وعيونها حمر ... وراقبتها وهي تتلحف وتبي ترقد..وتحركت صوبها ويلست عند شبرتها ..وقالت لها :::

سارووه قوومي حريم اخوانج اوصلوااا ..بسم الله ليش شكلج جيي تعبااان ..عيونج حمر وعندج سواد تحت عيونج ....شو ما رقدتي البارحه ؟؟

ساره وبصوت تعبااان وما فيها حييل ترمس::

عليااا دخيييلج انا ما لي خلق ارمس اي حد الحين ..انا ما قدرت ارقد امس وما رقدت الا عقب الصلاه ..بليييييييييز خليني ارقد خبري ماما اني ما ابا اتريق وما ابا اتغدى ابا ارقد الين اشبع رقااد وعقب بنش بروحي..

عليااا:::

اونج عاااد تبيني اقول لماما ها الرمسه ،، تبينها تسفرني ...وبعدين ليش ما رقدتي المفروض كنت تريحين نفسج..

هني ساره ما تحملت ونشت مره ثانيه وقالت بصوت عالي::

عليااااا دخييلج خليني ارقد والله تعبانه طول الليل مب راااقده ،،، وحريم خوانج خل يلتعنن انا ما بنزل اسلم على احد وما ابا ريوق وما ابا غدا..وان كثرتي في الرمسه ترى ما بعرس انزييييييييييييين..

وردت تلحفت وما طالعت اختها عليا اللي كانت مصدومه منها ومن رده فعلها الغريبه..عليا اعتقدت ان اختها متوتره عسب ان اليوم هو تقريبا بيكون الخطوبه الرسميه والاتفاق على كل شي..قالت في خاطرها .حليلها ساره شويه وبتستخف ..
لو انا مكانها والله جان من الفير نشيت وسرت الصالون ..وقامت وخلت اختها في الغرف وصكت باب الغرفة وراها بهدوء..

وخبرت امها ان ساره ما قدرت ترقد طول الليل وانها تبي ترقد الين تحس بالراحه وعقب بتنزل ...تمت امها صاخه ما ترمس وقالت في خاطرها مو مشكله نخليها ترقد ها الفتره وبوعيها انا بنفسي الساعه 2 الظهر تكون شبعت رقاد ....

في دبي ..في بيت سلطان بن هادف المنصوري ..ام خليفه شاله البقعه عليهم لانه عيالها تاخروا وبناتها بعدهم ما وصلوا وما وصلت غير رفيعه اخت خليفه..كانوا مجتمعين في الصاله وخليفه يسولف مع طارق ع الموبايل يتأكد منه وين واصل ..

خليفه ::
اوكيه طارق نترياك لاتاخر الوالده هني شاله البقعه ع روسنا ...

طارق ::
ان شاء الله ..مع السلامه ..

وعقب ما صك خليفه عن اخوه العود ..طالع اخته وتم يسولف معاها ..

رفيعه :::
ها خليفه يالله يا خلفوه والله كبرت وبتعرس ههههههههههههه

خليفه وهو يفرها بالمخده :::
جب جب ويا راسج اونها كبرت وبتعرس ..شو نسيتي اني اكبر عنج ..انتيي اللي ما صدقتي اول ما خطبج ناصر ما صدقتي وعرستي ..
انحرجت رفيعه وحست ويهها احمر لانه ناصر ولد عمها وزوجها كان بينهم قصه حب واضحه للكل وتكللت بالزواج ...

رفيعه :::
انزين بنشوف شو بتسوي انت اليوم الله يعينها بنت الناس يوم بتشوفك شو بيستوي بها..
خليفه م قالت اخته ها الرمسه اتذكر شرطه انه يشوف ساره ...النظره الشرعيه ...

خليفه::
الوالده اقول خبرتي ام البنيه اني ابا اشوفها اليوم ..

ام خليفه::
هييه يا ولدي خبرتهم وام البنيه خبرت ابوها وما عنده مانع ..

خليفه::

هبييه اتحرى بعد ما يرضون ..لازم النظره الشرعيه..

رفيعه::

اونك عااااد نظره شرعيه ..اللي يسمعك يطيح واااقف يا خليفه..انت اصلا تبا تتاكد من ذوق الوالده ..
انحرج خليفه وبغى يفرها مره ثانيه بالمخده اللي في ايده..لكن دخول اخوه طارق خرب عليه..
طارق::
السلام عليكم ورحمه الله..

الكل::
وعليكم السلام والرحمه ..

ام خليفه ::
وينكم يا ولدي ما يتسوي جذا اتاخرون على العرب ..الحين متى بنظهر ومتى بنوصل ..هذه العين مب دبي ..يعني درب يا ولدي..

خليفه وطارق طالعوا بعض وابتسموااا::
الوالده العين نشخطها في ساعه ...ههههههههه

ام خليفه ::
سااااعه ؟؟؟؟ احيد العين دربها ساعتين مب ساعه ...الله ان شفتكم تسرعون في الدرب يا ويلكم مني...
ضحك خليفه وطارق من عصبيه امهم..وطمنوها انهم ما بيسرعون ..
طارق ::

رفيعه ترى حصه فوق عند فطوم سيري لها تباج ..

رفيعه ::
ان شاء الله ..عن اذنكم ..

وسارت رفيعه فوق عند ختها فطوم وحرمه اخوها حصه...

طارق:::
اقول خليفه ..الحين كيف بنتحرك ..نخلي الرياييل في سياره والحريم في سياره ..؟؟شو الراي..؟؟

خليفه وهو يفكر ::

والله يا طارق اعتقد اذا خلينا الحريم رواحهن في سياره بيصدعن براس اللي يسوق من الهذره وحشرتهن..تدري شو نسوي احسن..
انا بتحرك في سياره وفيها الوالده ورفيعه وعمتك وخالد ..عسب تستحي امي ورفيعه وعمتي منه وما يقرقرن ع راسي طول الدرب..وانت تحرك في سيارتك ومع حرمتك وعمتك وخالووه ..ومحمد عسب يستحن من محمد وما يحشرنك برمستهن ..وما بيتم غير علي وراشد وسعيد وهذيلا شباب يتحركون في سياره وحده ..شو الراي

ضحك طارق من تخطيط خليفه ::
اوكيه اتفقنا ..اسميك انت حركات ..عيل ما بياخذ راحته غير الشباب اللي سايرين رواحهم في سياره وحده ..

ضحك خليفه معاه ..وهني اتذكر طارق عبدالله ربيع اخوه ::
الا بتخبرك خليفه ..مب انت قلت عبدالله بيي ويانا ..

خليفه تذكر عبدالله وكيف كان تصرفه غريب ومو طبيعي ..

والله مدري يا خوي ..بس هو ما بيي اعتذر وقال عنده ظروف في بيتهم ..والله مدري ..حسيت انه مو طبيعي ..بس انا اعرفه عبدالله ما بيقصر معاي لو ما عنده ظرف قاهر يمنعه ..
طارق::
هييه والله عبدالله الصراحه ريال والنعم فيه..

خليفه وهو يضحك ::
ما عليك بس هو عدني يكون الشاهد في العقد ..وانا اتفقت وياه انه يوم بيعرس بكون انا الشاهد في عقده..

طارق ::
ما شاء الله عليه عبدالله الصراحه رياال ..المهم خلينا الحين نسير الميلس شكلهم الشباب وصلوا اشوف راشد يتصل ..
خليفه ::
يالله سرينا..

في ابو ظبي وفي غرفه عبدالله بالتحديد ..كانت الغرفه مظلمه وعبدالله منسدح في شبريته ..وهو سرحان يطالع السقف ..عبدالله ما يعرف كيف وصل البيت وما يعرف كيف قدر يسوق سيارته وهو بها الحاله ..وحتى اصلا ما يذكر كيف وصل غرفته..راقد في شبريته ..بنفس الكندوره مالت امس ..مبطل العقم مالت الكندورة ..وشكله كان واااايد تعبان ..ولين الحين يتذكر الحوار اللي دار بين وبين خليفه....غمض عبدالله عيونه وهو يتذكر الحوار اللي دار بينهم ::

خليفه وهو يضحك::

المهم يا عبدالله انا سامحتك على غلطتك الشنيعه انك ما رديت عليه..
عبدالله وهو يبتسم:::
لااااه الحمد لله ان سامحتني تصدق بغيت امووت ..ويا راسك ..قول شو عندك يالله شو المهم ..

خليفه::
انزيين ييننا للمهم ..عبدالله مب انا قلت لك اني اباك تكون الشاهد في العقد ..انزين ابا منك طلب ثاني ..

عبدالله ::
امر خليفه ..

خليفه ::
ما يامر عليك عدو..اباك باجر تسير وياي العين عند عرب راشد بن حمد الظاهري ..في خاطري تكون وياي ..عسب يعرف انه عندي ربع كشخه مثلي يا عبووود..هههههههههه ..لاااا اسولف ويااااك ..بس انا صج خاطري تكون وياي باجر .انت مثل اخوي عبدالله وانت تدري به االشي..

عبدالله اصلا ما سمع باجي رمسه خليفه..لانه من سمع اسمع راشد بن حمد الظاهري ..بغت تصيبه جلطه..قلبه دق بقوه ..
راشد بن حمد الظاهري ..هذا هذا ابو ساره..هذا اسم ساره ...معقوله يكون خليفه بيخطب من بيتهم ...لاااا بس كييف ..كييف يصير ها الشي ..
خليفه حس ان عبدالله سرح ومب ويااه ..::
الوووه عبووود ..وين سرت يا ريااال...شو بلااااك .لاااااه انت مب طبيعي ابدا ه الايام ..
عبدالله حب انه يطمن نفسه وحب يتاكد من الاسم بنفسه::
اقول خليفه ..انت تقصد قوم راشد بن حمد بن سعيد الظاهري؟؟؟
خليفه:::

لا ااا لا عبدالله ..انا اقصد قوم راشد بن حمد بن سيف الظاهري ..شو تعرفهم::؟؟؟

عبدالله ما قدر يوقف ويلس على الرمل البااااارد وحس ببروده في جسمه ..لااااا خليفه ساير يخطب من بيت ساره...ومحد في بيتهم بنات غير ساره واختها ..وساره اهي اللي اتقدمولها ..لااااا مستحيييل..ليييش ليييش حبيبتي انا ..ليش يا خليفه ما اخترت غير حبيبتي انا ...
وفجاه تذكر كل شي ..وربط بين الاحداث ..تذكر لما قالت له ساره انه عندم ملجه بنت خالها ..وتذكر انه في نفس اليوم بعد خليفه سار العين مع اهله ..وتذكر لما قالت له ساره انه في عرب من دبي تقدموا لها ..تذكر اشياااء وااايد ..
تذكر فرحه خليفه بالموافقه ..وحزن ساره بالموافقه ..تذكر انه خلاااااااااااااص ساره طارت من يده ..وحطت مثل العصفور الجريح في ايد ربيعه...

ليييييييييييييش يا رب ..ليييش من بين كل البنات ..ما يختار خليفه الا سااره ..هذه حبيبتي انا ..

خليفه كان يزقر عبدالله بصوت عالي ..وعبدالله يطالع التلفون في ايده ويسمع ربيعه يقوله ::

الوووه ...الوووه ..عبدالله ..عبدالله..شو بلااااك رد عليه..عبدالله عن الحركات عاااد..

رفع عبدالله السماعه مره ثانيه الى اذنه وقال بصوت شبه مسموع::
هييه خليفه ويااك..
خليفه حس انه في شي مب طبيعي::
وين وياااي يا رياال وانا ارمسك وانت ما ترد عليه..عبدالله في شي خبرني ترى انا اخوك..
عبدالله بلع غصته وحاول انه ينهي الموضوع بسرعه لانه مب قادر يكمل كلام مع خليفه::
اقول خليفه انا اسمحلي باجر ما اقدر ..عندنا ظروف في البيت ..
خليفه::
مسمووح بالحل يا خوي ..بس خبرني يا عبدالله اكيد كل شي بخير ..ما فيك شي ..,الاهل كلهم بخير..؟؟

عبدالله ::
هييه الله يسلمك كلهم بخير ..اقول خليفه ابوي على الخط الثاني السموحه برد عليه..الله ..الله يوفقك في خطبتك..

عبدالله قال كلمته وحس ان قلبه بينعصر من الالم ..وصك التلفون بسرعه بدون ما يتريا بيعه يرد عليه..
وعق تلفونه على الارض وسند راسه بادينه الثنتين ..وحس انه مخنوق ..ومب قادر يتنفس ..وبسرعه فك العقم مالت كندورته ورفع راسه فوووق عسب يتنفس..
ونزلت دمعه قهر من عين عبدالله..وتبعتها دموع من القهر ...ليش ساره بالذات ...لييييش حبيبتي انا ..ليش تاخذ ربيعي ..اخوي ..لييييييييييييييييش..صرخ عبدالله بكل صوته في البحر ..وما سمع رد ..

بطل عبدالله عيونه مره ثانيه وما حس الا بدمعه حاره تحرق خده ..عبدالله نادرا ما كان يبكي ..كان دايما قادر انه يتحكم في مشاعره بشكل كبير ..
وطالع الساعه ..كانت الساعه خمس لعصر ..وفكر في ساره شو اتسوي الحين ..اكيد سارت الصالون تتعدل اعرفها ساره تحب ادلع عمرها ..فديتج يا ساره .. لكن انا استاهل ..انا اللي ضيعت ساره من ايدي..وخليفه شو ذنبه ..ما له ذنب ..خليفه تصرف التصرف الصحيح ..راح وخطب البنيه من اهلها ..مب انا اللي تعذرت وتحججت ..لكن ..لكن هذه حبيبتي انا ..هذه ساره ..ساره ..سارونه القمر ..وحس عبدالله بغيره رهيبه تاكل قلبه..ورفع موبايله وظهر رقم ساره وحاول يتصل ..لكن اصابعه ما تحركت وما قدر يدق الرقم..حس بالذنب ..خليفه مايستاهل منه ها الشي ..وفر عبدالله موبايله بعيد عنه ..وغمض اعيونه...وسمع دق على باب غرفته ..وسمع صوت ابوه يناديه..عبدالله ما كن له خاطر يرمس احد الحين ..لكن اصرار ابوه عند باب غرفته خلاه غصب عنه ينش ويبطل الباب حق ابوه..

ويوم دش ابوه الغرفه وشاف الوضع استغرب ..منظر عبدالله ما كان طبيعي ومنظ الغرفه الكئيب..الظلام وشكل عبداله خلا ابووه يستغر ويخاف على ولده..
ابو عبدالله ::
عبدالله يا ولدي ..شو بلااااك عساك بخير ..شي يعورك ..ليش جييه غرفتك ظلام وانت مسوي بعمرك جييه..

عبدالله ::
ما شي الوالد ما فيني شي..
عبدالله قال كلمته وتحرك صوب الدريشه ..وفتح الستاره ..وشاف اخته حمده تلعب تحت في الحديقه ..ومجمعه العابها حاوليها ..

ابو عبدالله ..::

لا تقول لي ما شي ..اكيد فيك شي ..وضعك مو عايبني..يعني امس دخلت ولا سلمت ولا يلست ويانا ..ومن امس ما شفناك وما تريقت ويانا ..وشكلك امن امس ما بدلت ملابسك ..كندورتك نفس ما هي ..وطالع عيونك كيف غاديه حمر..عبدالله شو بلاااك؟؟

قال ابو عبدالله بصوت حازم ..وقلبه يعوره من حال ولده ..عبدالله التفت لابوه وما عرف شو يقوله ..وكل اللي قدر يقوله ::

ابويه ..خلاااص انا ما ابا اعرس ..البنيه انخطبت حق واحد ثاني..
هني فهم ابوه السالفه ..حس من حاله ولده ..انه ها البنيه مب مجرد اخت ربيعه بس ..لا هي اكيد حبه ..لانه لو ما كانت حببته ما بيزعل كل هالزعل...

وطبعا ما قدر يواجه عبدالله بها الشي ..لكن قعد عدال ولده وقال له:::

شو يا ولدي ..الزواج قسمه ونصيب ..والله خلق ها البنيه ..خلق مليون غيرها ..ومب عبدالله ولدي اللي يهزه شي مثل هذا ..
يا ولدي المفروض تحمد ربك ..المسلم يحمد ربه على كل شي في الخير وفي الشر ..لانه ما يعرف الخير وين مكتوب له ..
والبنت هذه لو كان فيها خير لك كان ربي كتبها لك وماكان في شي في الدنيا يمنعك ان تاخذها ...صح او لا ؟؟

عبدالله حس بغصه في حلقه ..ورد بصوت شبه مسموع ::
صح..
ابو عبدالله ::
خلاااص يا ولدي ..لا تسوي بعمرك جييه ..وتعبنا وتعب امك وياك..اهي من امس واليوم تحاتيك ..وحمده اليوم تسال عنك ..لا تعزل نفسك عنا ...زومع الوقت بتنسى ..

انسى ...!!! وين انسى يا بوي ..وساره حبها يسري في دمي ..الكلام سهل يا ابويه....وعشان يطمن ابووه قام عبدالله ودخل وسبح وغير ملابسه وقال لابوه انه خلاااص بيكون احسن ..بس هو كان مضايق شويه ..ومع رمسه ابوه حس بالراحه... وسار ابو عبدالله ..وظهر من الغرفه ..بعد ما تاكد انه ولده بخير...

[هنوف الروح]

كل شي مثل الحلم ..كل شي حولها مثل الخيال ....ساره كانت تحس انها تحلم ..كلمات عبدالله ترن في راااسها ....ساره كانت في الصالون مع اختها ..الساعه قربت للست ونص ..وامهم حاشرتنهم عسب يخلصون بسرعه لانه العرب قربوا يوصلون ..كانت عليا مستانسه جنها اهي العروس ..وساره اطالعها وترد عليها وتحاول تبتسم كل ما رمست اخها ..كانت تحاول تركز وياها ..ما تبا تسرح بافكارها بعيد..بعييد وتفكر في حبيبها اللي ما بيكون زوجها مثل ما كانت تخيل ..ساره كانت مثل القمر ما سوت شي مبالغ فيه ..بالعكس سشورت شعرها ولفته من تحت ..وحطت مكياااج واااايد خفيف وناااعم ..ولبست اليشمك وصارت بدر منور..اليشمك اللي لبسته ساره ..كانت الوانه وااايد رااايقه ..تركواااز مع وردي فاااتح ..وداخله معه درجات الوردي الغامج بس بشكل واااايد راقي ومرتب ..ومكيااجها بنفس الدرجات لكن على خفيف مثل ما طلبت ساره...
ورن موبايل عليا وكان اخوهم سيف تحت يترياهم ..وقامن ولبسن العبي ..وسارت عليا تحاسب راعيه الصالون ..وساره ظهرت موبايلها ..وطالعت الشاشه..ما اتصل ولا سال ...المفروض اني ما افكر فيه ..خلااااص ما يستوي يا ساره عيب عليج ...وردت موبايلها في شنطتها وسارت ورا عليا ونزلوا تحت وردوا البيت...

في حدود الساعه سبع ونص وصل خليفه واهله بيت راشد بن حمد الظاهري ..واستقبل ابو ساره وعياله الرياييل وسارواا الميلس ..وسارن الحريم مع ام ساره ميلس الحريم ..واستقبلوهم ورحبوا فيهم وما قصروا معاهم ..انترس البيت ..ميلس الريااييل كان متروووس ما شاء الله ..وميلس الحريم بعد ام ساره وحريم عيالها ..وام خليفه وبنتها وحريم عيالها وعمات خليفه ,,والكل يسولف ويتعرفون على بعض ..

بعد مرور ساعه تقريبا ..سارت ام ساره وزقرت بنتها ساره اللي كانت يالسه في الغرفه بهدوء وعليا اللي كانت محتشره ..
عليااا::

اقوول ساره يوم بدشين اقرى المعوذات على عمرج..انزيين ..واي وحده تقولج قمر ما شاء الله .كبري في وييهاا بس في قلبج...اوووه ساااره انتي بااارده والله لو انا مكانج جان ما عرفت ايلس في بقعه ...

دشت ام ساره الغرفه ..وقالت لساره::
ساره فديتج يالله عسب تسلمين على العرب ..ولا تنسين عقب ما تنزلين بيزقرج ابوج وبتشوفين الريال ..وبيشوفج ..ما اوصيج يا بنتي ..بارك الله فيج لبسي شيلتج يله يا بنتي ..الله يحفظج ويبارك فيج ويعطيج من خيره يا رب..

لبست ساره شيلتها ..كانت وااايد هاديه..تحس بحاله سكوون غريبه ..كانت طالع امها وهي ترمس ..وتحس انها ما تسمع شو تقول ..كل اللي كانت تسمعه هو دقات قلبها ..تحس بدقات قلبها في اذونها ...حتى انها شكت ان امها تسمع نبض قلبها ..واول ما وصلوا باب ميلس الحريم لفت ساره صوب امها اللي حطت ايديها على راس بنتها وتمت تقرى عليها ..
دشت ام ساره وعقبها دشت ساره ..
كانت مثل الاميرة في مشيتها ..ودلعها ..لبسها لليشمك كان موفق ..مع الشيله اللي فيها تطريز وردي خفييف على تركواز روووعه ..وشعرها الناعم ياي على صوب ..خلا الحريم كلهم يقولون ماشاء الله ..الله يحفظها ..وام خليفه حست بالفرحه لانه هذه القمر بتستوي حرمه ولدها ..وطالعت بنتها العوده وغمزت لها ..يعني شفتي ذوقي ..وابتسمت اخت خليفه ..

سلمت ساره على كل من في الميلس ..وردت يلست عدال امها ..وشويه دق موبايل امها ..وسمعت امها تقول ان شاء الله ..
وقامت ام ساره وساره وظهروا من الميلس ..ولبست ساره عباتها ..وعدلت شيلتها ..وكان شويه من شعرها ظاهر ..وشكلها وااايد حلوو ..
وسارت مع امها الين الممر اللي يفصل بين الميلس ويربطه مع الفيلاا من ورااا..وشافت اخوها حمد واقف يترياها ..
استحت ساره من اخوها اللي اول ما شافها ..تم يكبر في نفسه خاف انه يحسد اخته على جمالها ..بس اتضايق ان اليشمك كانت فتره الصدر واايد نازله والعبايه ماتغطي واايد والشيله خفيفه ..بس سكت وقال انا موجود وهذه نظره شرعيه وما بخليه يطول ..

اول ما وصلت ساره صوب اخوها وشافت نظراته .عرفت شو السالفه ..واحترمت نفسها ولمت عباتها وحاولت ترفع اليشمك لفوق الصدر شويه لكن الشك اللي فيه كان يره لتحت..

حمد::
ها ا ساره ما اوصيج ..بسر ازقر ابويه والريال..

ساره حست بخوف ..شو لو طلع شكله مو حلو ..شو لوطلع شكله قصير ..او متين ودب..شو اسوي ..وحست بحراره في جسمها وقلبها تم يدق بقوه ...
وشويه ودخل ابوها ونزلت ساره راسها ..وشافت بطرف عينها ثلاث رياييل جدامها ..وسمعت صوت ابوها واخوها حمد وسمعت صوت ريال يقول :::

السلام عليكم ..

ساره من الربكه رفعت راسها وقالت وعليكم السلام..واضطرت ترفع راسها اكثر لان الريال كان ماشءا لله واايد طويل وعريض ..وشكله ..شكله كااان وااايد حلووو..وبسرعه نزلت راسها وابتسمت ابتسامها خفيفه ..

خليفه من صوبه ..بغا يموووت من جماال ساره ...يااربي شو ها ..هذه بتكون حرمتي ..يااالله يا حلاااتها ..

وهني عااد خليفه بجرأه مد ايده صوب ساره وهو عارف انه ابوها واخوها يراقبونه..وقال لها ::

اشحالج ساره؟؟

ساره ما عرفت شو تسوي تمد ايدها او لا وطالعت ابوها واخوها اللي كان متنرفز من حركات خليفه وجرأته..واستسلمت ساره ومدت ايدها وسلمت عليه ..خليفه اول ما حس بجلد ساره على ايده ذاااب من نعومه ايدها ..وضغط على ايدها بحركه خفيفه ..خلت ساره ترفع عيونها ويت عيون خليفه على عيون ساره وشافت ساره خليفه يبتسم بطرف شفايفه ويرفع حواجبه ..جنه يغايضها ..ولا اراديا ابتسمت من حركته ..وحست بخدودها حمر..وسحبت يدها بكل هدووء وخجل..
وهني عاااد حمد قال لخليفه ::
ها خليفه نرد الميلس عند الريايل احسن ..

خليفه ما طالع حمد ولا همه احد واقف..وقال وعيونه ما بغت تخوز عن ساره ::
ان شاء الله نرد الميلس ..تفضل عمي ..
ورد خليفه وابو ساره الميلس عند الريايل ..وحمد رد مع ساره داخل ...ساره كانت مستحيه من جرأه خليفه ..ووصلوا الصاله الداخليه ..وزقر امه ورد هو الميلس..ويات ام ساره وقالت لها ::
ها يابنتي شفتيه ؟؟شو ان شاء الله ارتحتي يوم شفتيه؟؟

ساره اتفاجات من سؤال امها ....وبدون ما تردي ردت ::
هييه امييه ..
وحست بخدودها حمر ..وقالت لامها انا بسير الغرفه ماما انا ما اقدر ادش عند الحريم مره ثانيه ..وما ضغطلت عليها امها وتركتها ترد غرفتها ..

ساره وهي تصعد الدرج..حست بنفسها تبتسم ..شو ه الريال ..كيف يتجرا يعصر ايدي ..وكيف يتجرا يرفع لي حواجبه ..

بس والله انه الصراحه فن ..شكله واااايد حلو..وطوله يذبح ..وهني ابتسمت وحست برااحه ..ودشت غرفتها .وعلياا كانت تترياها ..
عليااا ::

هاااا ساااره بشري ..شفتيه ..شو رااايج ..خبريني كل شي بالتفصييل..كل شي ..سمعتي كل شي..
وقبل ما ترد ساره على اختها ..قاطعتها مره ثانيه وقالت ::

يااالله ساااره خدوودج حمر اشوووفهن ..شووو شكله حلوووو الريااال..

ضحكت ساره على اختها ..وخبرتها كل شي وقالت لها::
والله الصراحه شكله حليوه بس انا ما دققت فيه وااايد ..نظراته واااايد جريئه وما قدرت اطالعه وااايد..يعني لا باس فيه ..

عليااا تمت تناقز من الفرحه ..وضحكت ساره على اختها ..وشويه تحسنت نفسيتها ....وسحبتها اختها من ايديها وقاموا يدورون في الغرفه مثل اليهاال..

الحين طبعا عرفتوا ان فيه قبول صار من جانب ساره ..طبعا ساره بنفسها مستغربه كيف انها ..حست براحه يوم شافته ..
وعقب ما تعشا الضيوف ..ظهروا من بيت اهل ساره تقريبا الساعه 11 وربع بالليل وسمعت ساره تيبيب الحريم من تحت في الصاله ..وعليا الملقوفه طفت الليت وسارت صوب دريشه اختها ساره وقاالت ::

ساره بسرعه تعالي راويني اياه بسرعه وينه ..
وضحكت ساره وسارت عند اختها ..وانخشوا وراالستاير ..واشرت ساره على خليفه من بعيد ..كان يالس يساعد امه تركب السياره وعقب ما صك الباب .عدل عقالع وغترته ..وصعد الرنج ..وتحركوا الجماعه ..

عليااا::

الله يااا ساره هذا ريلج ..الله يا حلااااته..غاااوي ..يذبح ..ما شاء الله عليه ..عن نظربه عين عقب تقولين حسدناه..
والله وسيييم ..
ساااره::

حووو علييووه بلااااج هذا خطيبي انا مب خطيبيج..
وضحكت ساره على اختها اللي حست انها قفطت ..
عليا::
انزييين بسم الله بعدنا ما ملجنا وتغااار علييه ..ساره حبيته صح ..
اتفاجات ساره من سؤال اختها :::
شو حبيته ..وين اعرف عشان احبه ..بس ارتحت له ..بس ..

ودق باب غرفه ساره ..ودخل حمد وابوها وسيف وامها ..وتموا يباركون لساره ..
سيف:::
مبرووووك يالعروووس ..والله الصرااحه طحتي على عرب فنانيين ..ما اوصييج الرنج انزين ساره ..

ضحكت ساره على اخوها ..وحركاته..وتم ابوها يخبرها على شو اتفقوا الرياييل وعلى المهر وعلى كل شي وقال لها ..

بنتي ترى الرياايل مستعيل ويبا الملجه عقب 3 اسابيع ..والعرس يباه في الصيف شهر 6 شو رايج ..

علياا تلقفت كالعاده وقالت ::
لاااااااااااا شو ثلااااث اسابيع ما يمدينا نفصل ونخيط وو...

وبلعت لسانها يوم شافت حمد يخزها بعيونه ..وسيف من ورااه يقووول دواااج ...

ساره قالت ::
والله يا بوي مدري انتوا شو رايكم ..ماما شو رايج ..
ام ساره ::
والله يا بنتي مدري الصراحه انتوا بنات ها الايام يبالكم شهور لين ما تجهزون للعرس..ونحن الحين شهر 2 وفي اخره بعد ..يمديج تعدلين عمرج في ثلاث اسابيع ...

ساره ::

اعتقد ماما ..ان شاء الله اخلص في ثلاث اسابيع ...

ابو ساره ::
خلاص يا بنتي بنخلي الملجه ..تارييخ امممممممممم ..10/3/ والعرس عقب هم بيحددونه ؟...

ام ساره::
خلااص يا بو حمد شورك وهدايه الله ..مبروووك يا ساره يا بنتي ..وعقباالج يا عليا ..
ودمعت عيون ام ساره ..وهني الكل تاثر ..والكل قام يبارك ويهني ويخططون للملجه ..كل هذا صار في بيت راشد الظاهري..

وعبدالله هناك في بو ظبي قلبه يعوره وهو يالس يفكر ..خلااااص ساره طارت مني ..وطالع الساعه ..كانت قريب الوحده ..خليفه ما تصل ..ولا قال شو صار ...عبدالله كان يحس بغيره فظيعه ..ومسك موبايله وبغا يدق لساره..لكن اصابعه ما قدرت تكمل ..ورد موبايله مره ثانيه ..وشويه رن موبايله وشاف ان خليفه متصل بسرعه رد عليه...

عبدالله::
الووه هلاا خلييفه ..هااا بشر شو صااار ..وافقوا العرب ..
خليفه وهو مستغرب من رمسه عبدالله::

عبدالله بلااااك هم موافقين من زمان بس سرنا اليوم نحدد العرس والملجه وكل شي و..نشوف الحرمه..هههههههه والحمد لله كل شي تماام في تمااام ..

عبدالله حس بقلبه يتقطع..يشووف الحرمه ..شفت ساره ..شفت حبيبتي ..

عبدالله ::
مبروووك..
عبدالله تم يسمع خليفه وهو يخبره اهل ساره ,,وشو اتفقوا وان المجله عقب ثلاث اسابيع .وباجر بيعرفون التاريخ بالظبط وكل شي ..وان العرس في شهر سته ..

عبدالله تم يفكر سته ..يعني عقب 3 شهوور ..
حس بدواار في رااسه ..وحس بالم يعتصر قلبه ...وفوق هذا كله الشعور الفظيع بالغيره اللي حس فيها عبدالله..

يا ترى شو بيصير بين خليفه وعبدالله ....

[هنوف الروح]

عقب ما صك عبدالله عن خليفة ما ياه ارقاااد،، تم يفكر ويفكر ،، والغيرة بتاكل فؤاده ،، وتم ما سك الموبايل وخاطره يدق لساره ,,, وكتب الرقم وتم صبعه على زر الاتصال وهو متررد يدق او لا وبدون ما يحس ظغط على الاتصال .. وتم قلبه يدق بقوة ،، يا ترى بترد ساره او لا ،، ورن الموبايل من الجهه الثانية ،، وتم يرن ويرن ويرن ..ومن صوبها ساره ما سكه الموبايل واطالع رقم عبدالله وعيونها تدمع ..مب عارفه شو اتسوي ..ترد او لا ،،شو بيقول لها ،، وبدون ما تحس ضغطت على زر الرد ...

وانتظرت حد يرمس...

عبدالله من حس ان ساره ردت قلبه دق ما توقع انا ترد عليه...

عبدالله :

الــ ... الووه ..سـ...ساره..

ساره ::
........................

عبدالله وهو يسمع نفسها على الموبايل ..ما يدري ليش حس انها تصيح وان دموعها عل خدها ..

عبدالله ::
الوه ساره ..ردي علي لا تعذبيني ...دخيييلج ساره ..ردي علي ..

ساره::

هــ ..هــ ..هلا عبدالله ..

عبدالله حس بقلبه يعتصر من سمع صوتها ::
ساره فدييتج لا ترمسيني بها الرسميه دخييلج ..شتميني سبيني ..لكن لا ترمسيني جيييه..

ساره ::
عبدالله ..عبدالله دخيلك ..عبدالله خلاااااص انتهى كل شي ..دخيلك انساني ..
عبدالله :::
انساااااج !!!! انا انسااااج !!!مستحييل يا ساره وانتي تدرين بها الشي زين ...انتي حياتي عمري وقلبي ..كيف انساااج ..اذا انتي تقدرين تنسين انا ما اقدر....

ساره وهي تحس بألم في صدرها وقلبها ::
وفي حد يفرط في قلبه يا عبدالله ..

سكت عبدالله وحس انه في حد صفعه على ويهه ..ما الومج يا ساره من حقج تقولين ها الشي انا للي فرطت فيج ..انا اللي ضيعتج من ايدي...

عبدالله ::
ساره انا قلت لج ارفضي الرياال ..وكا ن عندج فرصه .. انتي اللي ما بغيتي ..وكــا...
وقاطعته ساره بحده .::
شو ارفضه شو نلعب نحن هني ..اقولك انا ما اقدر احط اهلي في موقف سخيف جدام اي احد ولا اني انزل روسهم حتى لو على حساب سعادتي...

سكت عبدالله ..وسكتت ساره ...حسوا ان في شي غلط..

عبدالله ما عرف شو يقول لساره ..وساره ما عرفت شو ترد ..وتمت صاخه ودموعها تنزل وتحرق خدها ..

عبدالله ::
ساره والحين شو يا ساره ..خلاااص بها البساطه انتهى كل شي..حبنا انتهى..

ساره حست بالالم يزيد وقالت المفروض انا ما ارمسه ..شو ذذنب الريال اللي ياب اهله وحشمني وخطبني ورفعني جدام اهلي ووافق على كل الشروط اللي فرضوها اهلي ..ما يستحق مني ها الشي..لازم اوقف عبدالله عند حده..ولازم اشوف قدري ومصيري وارضى به ..

ساره::
عبدالله ممكن اطلب منك طلب...ممكن تنساني ولا تتصل علي ..انا خلاااص استويت في ذمه ريااال ثاني ..ارجوك لا تتصل ولا تكلمني وانساني وخليني اشوف حياتي بعيده عنك ..

هني عاااد تغيض عبدالله وما عرف شو يقول ومن قهره رد بدون ما يحس::

ذمه ريااال ثاني ..!!!! ليش انتوا ملجتوااا..عسب تقولين جييه ..والا انتي ما صدقتي انه تقدملج خليفة ووافقتي على طوول ..انتي بعدج مخطوووبة ..ليش تقولين على ذمته ..

ساره انصدمت من رده فعل عبدالله ..وكيف عرف اسم الريااال ..وكييف ..وقبل ما تقول اللي تفكر فيه ..عبدالله رد وكمل رمسته بكل ما فيه من غيض وقهر و..وغيرة..

عبدالله ::

هيييه يا ساره ترى اللي تقدملج اعرفه ..واسمه خلييفة المنصوري ..ولا ازيدج من الشعر بيت ..هذا خليفة اعز ربعي ..تعرفينه ..خلفوه الحشره ..اللي دومني اقولج عنه ..وكنتي تغارين منه ليش انه دوم معاي ...تتصورين عااااد اللي تغارين منه صار ريلج ..ههههههااا او بيصيير ريلج ..شفتي الدنيا شقااا ضالمه..شفتي القدر كيف حطنا في ها الموقف...وعلى فكره خليفه ما يدري اني احبج ولا يدري عنج شي ...لكن ما تدرين شو ممكن يصير في الايام الياااايه ...

عبدالله كل الكلام اللي قاله ..قاله من حرته ومن غيرته ..اللي كانت بتاكل قلبه ..وهو نفسه منصدم كيف طلعت منه ها الرمسه ..

ساره ما ردت وحست الدنيا تدور بها ..حست انه بيغمى عليها ....من بين كل الريايل يتقدملي ربيع عبدالله ..لااا مستحيل ..اكيد عبدالله يقص علي ..ساره بدون ما تحس قالت ::

عبدالله دخيلك لا تعاملني جييه ..لا تقص علي .. هذا مب خليفه ربيعك ..وانت بس تبا تقهرني صح ؟!!

عبدالله كمل رمسته وحس انه جرح ساره ...لكن ما يدري شو استواله ..الغيره بتاكل قلبه ..وكان يريد يلعوز ساره معاه ..يبياها تحس باللي يحس فيه هوو..

عبدالله ::

لا صدقيني هذا ربيعي واعز من اخوي خليفة..خليفة المنصوري...اعرفه واعرف اهله زين واخوانه كللهم....وتبيني اعطييج رقمه تتاكيدن بعد ما عندي مانع..شو بتسوين يا ساره ..كيف بتستوين حرمه اعز ربيع لحبيبج..ها ها حبيبج السابق ...

عبدالله قالها وسكت ..وحس بنفسه حقير وهو يقول ها الرمسه ..لكن الغيره كانت تاكل قلبه ..وما سمع رد من ساره اللي كان صوتها يبين انها تبجي بحرقه من اللي قاله عبدالله ..كانت تصيح من رمسه عبدالله من اسلوبه ..ومن طريقه رده ..واهم شي من اللي عرفته عن زوج المستقبل..شو ذنبه خليفه ..اكيد الريال ما يعرف شي ..وما قدرت تكمل مع عبدالله وبدون ما تحس صكت الموبايل ..وفرته على الارض..وحطت ايديها على راسها ..تحس ان راسها بينفجر ...شو تسوي ..تكمل او لاااا..كيف اتصرف..

من صوبه عبدالله ..مو مصدق اللي سواه ..كيف رمس مع ساره بها الاسلوب ..كيف كان وقح وحقير معاها ...حس ان الموبايل بند ..ورد اتصل عليها لقاه مغلق..انقهر كيف بترمسه ساره الحين ..كيف بيوضح لها انه مش ممكن يسوي اي شي يأذييها ..كيف بيشرح لها انها حتى لو خذاها خليفه ..بيضل يحبها لين اخر يوم في حياته..

كيف اتصرفت بها الاسلوب ....وشويه رن موبايله ..اتصور انه ساره بدق له ...لكن اللي متصل كان خليفه ...قلبه دق ..خليفه ليش متصل الحين ..توني من ساعه مكلمنه ..يا ترى خبرته ساره..وتم يقول في خاطره شو ها الغباء كيف تخبره وهي توها حتى ملجه ما ملجو..وتم يطالع الموبايل وهو يرن الين ما سكت ..ما قدر يرد عليه ..ما قدر يرد على ربيعه ..كيف يتكلم وياه ..وهو توه مكلم اللي بتستوي حرمته ..
لاااا خليفه ما يستاهل مني ها التصرف الحقير...سامحني يا خليفه سامحني يا خوي ..لكن الغيره كلت قلبي ..وشويه رن موبايله رنه المسج ..وتوقع انها ساره وبطل بسرعه الرساله يقراها واكتشف انها من خليفه ..وكان مطرش له هذا المسج::
(( عبووود انا مب قااادر ارقد من الفرحه ...انا مو مصدق عمري ..اذا نشيت الصبح وشفت اتصالي لا تحتشر عليه تراني ما صدقت ..ههههه ..عقبااالك يا خوي ..))

عبدالله حس بالم في قلبه وحس بدموعه تنزل ..كيف قدر يخون خليفه ..خليفه ما يستاهل ها الشي منه ..سامحني يا خليفه ..سامحني على اللي سويته ..

وظل الحال على ما هو عليه ساره ما خبرت حد شو فيها ..كان الحزن باين على عيونها ..وامها ملاحظه ها الشي عليها ..وكانت كل يوم ادش وتقرى عليها المعوذات وتحصنها ..على بالها ان في حد من الحريم صاب بنتها بعين ..لكن ساره كانت اتطمن امها وتقول لها لا تخافين انا بخير بس انا افكر في الحفله وترتيبات الملجه،،والمشاوير اللي كل يوم يضربونها لدبي وابو ظبي،،

ومن صوبه عبدالله ما حاول انه يدق لساره مره ثانيه..ما كان يريد انه يزعجها ،، وفي داخل نفسه كان خايف انه ساره تكون كرهته..وما كان يبا يسمع اي كلمه كره من ساره ..

الوحيد اللي كان طاير هو خليفه ...كان حاشر امه وحاشر اهلله ..وما كان يبا اي شي بسيط للملجه ..كان كل شي يباه فخم ..حتى انه قرر يسوي الملجه في قاعه الانتر في العين ..وما طاع انها تكون في خيمة ...وحجز الفرقه ..وطل شي جهزه ..اللي يشوفه يقول عرس مب ملجه ...
وساره كانت في دوامه التحضيرات ..لكنها ما نست كلمه عبدالله وتمت ترن في اذنها ((

((وعلى فكره خليفه ما يدري اني احبج ولا يدري عنج شي ...لكن ما تدرين شو ممكن يصير في الايام الياااايه ...))

يا ترى شو قصدك يا عبدالله ..مستحيل انت تسوي شي يضرني ..لكن شو لو سويتها وخبرته ..يا الله راااسي يعورني من ها السالفه كلها ...انا شو سويت بنفسي ..الله يستر وما يفضحني عبدالله جدام اهلي ..حرااام ما يستاهلون مني ها الشي..
ساره من كثر التفكير ..ضعفت وااايد ..وامها محتشره عليها ...وتباها شويه تمتن ...والكل مرتبش عليا واخوانها وابوها ..حتى حريم اخوانها بعد ...هذه ملجه ساره ..ساره الدلوعه ..الكل متوقع انها تكون قمر يوم ملجتها ..والكل يبا يظهر في ها الملجه ..

وعلاقه خليفه مع عبدالله تغيرت شويه ..خليفه من صوبه حس انه عبدالله تغير ..صار فيه شي لكن مب عارف شو هو..
حس انه مرات عبدالله يكون جاف معاه بدون سبب ..واكثر شي لاحظه انه يتنرفز اكثر اذا ياب طاري الملجه والعرس..
مرات يقول في خاطره ليكون يحس بالغيره ..وتم يضحك على نفسه من ها التفكير الغبي ..لكن اللي ما يعرفه خليفه ان عبدالله صدق يحس بالغيره ...والغيره كانت تظهر عليه مرات كثيره ..ومارت يقدر يخفيها ...

شو تتوقعون النها يه ...الايام اليايه بتخبرنا عنها

[هنوف الروح]

سيف ::

قسم بالله اذا ما ظهرتوا من المحل ترى والله اخليكم تردون بتكسي العين ...

سيف قال كلمته وهو معصب من ساره وعليا اللي مصخوها في محل الفساتين ، كانت البروفه الاخيره لساره في فسان الملجه واللي كان رهيب عليها ..لكن ساره ضعفت والمصمم اظطر انه يضيج الفستان شويه عسب يناسب خصر ساره..
عليا طالعت اخوها وهي معصبه ::
بلااااك سواااف تريااا يا خي شويه ها فستان ملجه مب لعبه .شو اتحرا انت ..
سيف وهو مو مصدق اللي يسمعه ..وراسه يعوره من الحواطه مع خواته من الصبح الين الحين العصر ..
سيف::
انا اللحين ابا اعرف منو العروس انتي والا ساره ..عنبوج ساره ما رمست انتي شله ترمسين ..
وطالع اخته ساره وكان يبا يقول شي بس سكت يوم شاف اخته حاطه ايدها على راسها ومغمضه عيونها ..
سيف ::
ساره بلاااج راسج يعورج شو؟؟
ساره ::
ما ادري سيف احس بدوخه وراسي يعورني ..
عليا ::
ساره فديتج انتي ما كلتي شي من الصبح بس ها العصير ..اقول سيف ودنا المارينا نتغدى فديتك الحين الساعه قربت من الاربع ونحن بعدنا ما تغدينا ..
سيف ::
مو مني منكن اللي من محل نعل لي محل فساتين ولي محل اكسسوارات وشغلات تااافه ..صدق انكن حريم ..
عليا::
سيف لا تم تحتشر علينا ..يله فديتك تصدق توني احس باليووع...

كل هذا وهو ظاهرين من المحل وركبوا استيشن سيف وسار بهم سيف المارينا موول يتغدون ..
ساره ما كانت منتبه لسيف وعليا ..كانت تحس بدوخه ،، وتحس بلوعه ،،وراسها يعورها..وتبي تاكل شي بس يسد يوعها ..حست انها صدق ميوعه عمرها يعني من امس ما تعشت واليوم بس شربت العصير اللي اشتراه سيف وبالغصب ..ماتدري ليش تحس نفسها مسدوده عن الاكل..ومن ركبت السياره زاد الالم اللي في راسها ،، وحطت ايدها على راسها وتمت تتنفس بهدوء عسب يخوز عنها الالم ..لكن ما حست بتحسن وما حست يوم وصلوا المارينا الا يوم سيف قال لهم يله وصلنا..
ونزلت عليا وساره وسيف ..واول ما دشوا من الباب ظرب الهواء البارد ويه ساره من تحت الغشوه ..وزادت الدوخه في ساره ..علياا كانت ترمس ساره ..وساره اطالع عليا لكن هي مب سامعه اي كلمه من اللي تقوله اختها ..وشافت سيف يقرب صوبها ..وفجأه حست بان الناس من حولهم ما شي صوت لهم بس اشكال تتحرك ..وحست انها مثل اللي يسبح في البحر وما حست بعمرها وهي تمسك ايد اخوها او تحاول توصل لايد اخوها ..وشافت سيف وهو يركض صوبها ..وعليا تحاول تمد ايدها صوبها ..وفجأه اسودت الدنيا من حولها ...طاحت ساره..اغمى عليها في المارينا ..والتموا الناس عليهم ..وعصب سيف لان المهنده والاجانب وبعض الفضولين تمواا ملتمين وما حشموا البنيه اللي طاحت ولا ان فيه ريال واقف معاها ..وزعج عليهم ::
وخرواا لعنته الله عليكم ..خلوووها تتنفس ..
ووصلوا السكيورتي وبعدوا الناس واتصلوا بعض الشباب بالاسعاف وما شي ربع ساعه الا وساره في سياره الاسعاف ..ويهها كان اصفر وشاااحب..وعليا اتصيح وهي عدالها وسيف معاهم ..
وسارت المستشفى ..واتصلت عليا بامها ..وخبرتها السالفه ..وما شي ساعه ونص الا وام ساره وحمد وابوهم عند الدكتور ..ام ساره تبجي وتحضن بنتها اللي وعت وتمت اطمن امها ..
ساره بصوت ضعيف ::
ماماه فديتج لا تصيحين انا والله بخير شوفي..بس دخت لاني كنت يوعانه ..
وغمضت عيوونها لانه راسها رد وعورها والمغذي بعد يعورها ..وعليا واقفه على صوب وهي متلومه في اختها ..وما تعرف شو تسوي ..
حمد وسيف وابوهم كانوا عند الدكتور ::
ابو ساره::

ها دكتور خبرنا بنتي شو فيها ترى اول مره يستوي ها الشي فيها..

الدكتور::
لا لا ما تخفش يا سيدي ،، دي دوخه بسيطه ،،سببها عدم الاكل ،، يمكن بنتكم بتعمل ريجيم..او حاجه ..

ابو ساره::
هييه يا بوك ما ادري ها لبنيات شو يبنه ها الريجيم ..بس هي بتكون بخير يا دكتور..

الدكتور ::
بأذن الله ،، ما تخفش يا حجي،، هي بس عوزالها راحه تلات ايام واكل كويس ..وحتكون بخير ان شاء الله..
حمد ::
يعني ما فيها شي يا دكتور قول طمنا ..
الدكتور ::
يا ابني ما فيهاش حاجه باذن الله ،،هي الحكايه ان الدوخه جت نتيجه قله الاكل ..انتوا انصحوها بالاكل الكويس وان شاء الله حتكون زي الحصان ..

ابو ساره ::
اهب عليك يا دكتور قول لا اله الا الله على بنتي عن تظربها بعين ..
نقع سيف من الضحك من رمسه ابوه..وقاله ::
ابويه الدكتور ما يقصد شي ..هم جييه المصريين رمستهم ..يعني بتستوي بخيير ما فيها الا العافيه..
وانحرج الدكتور ::
ما كانش اصدي حاجه والله يا حج..
ابو ساره ::
هييه ما عليه يا بوك ترى انا متروع على بنتي ..السموحه منك يا بووك ...

الدكتور ما فهم شي بس قال ::
حصل خيير..ادوها الادويه دي شويه مقويات وفيتامينات تاكلهم بعد الاكل مرتين في اليوم..

وظهروا من عند الدكتور وساروا عن اختهم في الغرفه ،، دقوا الباب ودشوا ..
ساره من شافت ابوها دمعت عيونها ..ولوى عليها ابوها وتمت ساره تحبه على راسه وتم ابوها يتفداهاا..

ابو ساره::
يا بنتي فديت روحج انا ..شو تبين من ها الريجيم اللي يقول عنه الدكتور ..كلي يا بنتي ..طاعي ويهج كيف غدى اصفر شرات الكركم ..مب زين عليج..
ساره ::
انا ما اسوي ريجيم والله باباه ..بس انا حسيت بتعب لاني مب ماكله من الصبح..
ولف ابو ساره صوب ولده سيف ،،اللي من شاف نظره ابوه عوره بطنه وعدل يلسته::

وانا الحين طرشت بناتي معاك تيوعهن , حق شو ما غديتهن وعقب كملتوا اغراضكم..

سيف::
والله العظيم يا بويه انا قلت لهن ومن الساعه 2 الظهر وانا ازن على روسهن انه نسير نتغدى..وكل ما اشتري شي حقهن ساره ما تاكل وبالغصب شربت العسير وما كملته بعد ..صح عليا ..

عليا كسر خاطرها اخوها وقالت ::
هيه والله باباه ترى ساره ما طاعت تتريق وسيف اشترى في الدرب سندويشات حقنابعد ما طاعت تاكلهن وبالغصب شربت عصير ..

بلع سيف ريقه وارتاح يوم عليا رمست ..وهني طالعت ام ساره بنتها ::
ساره انا ما بخليج الا يوم تاكلين اكل مثل البشر مب اكل يهال نص كووب عصير ومدري شوو..

انا بكلم الطباخين يجهزون لج عشا مرقه لحم و..
ساره ::
لا ماما دخيلج ما ابا كل ها السوالف ..انا بكل اللي اقدر عليه ..دخيلج لا تغصبيني..
حمد ::
ما شي عن المصاخه بتاكلين الي الوالده تسويه لج طاعي شكلج غاديه صفرا بسم الله ..عنبوه ما استوت ملجه عيل في العرس شو بتسوين ..
سكتت ساره وحست انه ما في فايده...ما يدرون انه نفسها منسده من شي ثاني غير الملجه..
من كثر تفكيرها باللي صاير معاها ..معقوله القدر يكون قاسي معاها له الدرجه..

من ناحيه ثانيه في ابوظبي وبالتحديد في محل عبدالله ..
عبدالله وخليفه يالسين يسولفون مع بعض ..وخليفه كل ساعه وياه تلفون من اهله ..ويكلمهم ويصك عنهم ويرد يكمل سوالفه مع عبدالله..
وشويه رن موبايله مره ثانيه..عبدالله عاااد تنرفز وقاله ::

خلفووه قم قم اطلع برع انت وموبايلك يا خي حشرنا وبعدين شو ها الرنه الحشره اللي مسونها في موبايلك ..هااا..

ضحك خليفه على عبدالله ورمسته ..وقال له ::

لا والله ها المره مب الاهل هذا احمد ربيعنا ..هلا هلا حمووود خشمك يا رياال ويينك عنبووه ما تسال ولا تخبر ..

سكت خليفه يسمع رد ربيعه ..وعبدالله تم يطالع النت في المحل ويراجع كمن فاتوره في ايده وخليفه يسولف مع احمد ..ويسمعه عبدالله وهو يقول ..لاااا لحول الله ..يا ريااال ...

ومن صك السماعه سأله عبدالله ::

شو بلااااك انت واحمد ؟؟
خليفه::
ما شي يقول انه اليوم كان في المارينا مع اهله ..وفي واحد مع اهله وطاحت عليهم بنيه والتموا الناس واحتشر الريال اللي كان معاهم ويابوا الاسعاف وحااله..

عبدالله ::
لحوول ليش شو صار مني والدرب طاحت البنيه ..شو اغمى عليها ..

خليفه ::
والله ما ادري شو السالفه بالظبط لكن الي عرفته انها اغمى عليها واختها مدري منو عدالها كانت تصيح عليها والريال محتشر على البقر اللي اتجمعوا هناااك..اخ يا لاقهر لو انا هناك جان ادبتهم هها المهنده والاجانب اللي تارسين البلاد ..
عبدالله ::
انزين الله يستر عليهم ..المهم ..راجع معاي ها الفاتوره راسي يعورني مب قادر اركز فيها ..
خليفه وهو يشوف الفاتوره وتم يراجع مع عبدالله الفواتير الباقيه..

في العين ...
عقب ما ردت ساره واهلها البيت وبالغصب ساره رضت تاكل العشا وشربت الدوا وقالت حق امها انها تبي ترقد ..وما خلتها امها ..وتمت تقرى عليها ..وتحصنها ونامت ساره في حضن امها من التعب ..

ومرت الايام ..ساره تمت في البيت اسبوع ما تظهر ..وتحسنت حالتها لانه امها ما كانت تعطيها فرصه ,,,تريقها وتغديها وتعشيها ..وزاد وزن ساره شويه مع الادويه والفيتامينات رد الدم لويه ساره وتوردت خدودها ..وما كانت امها تخليها تظهر من الشبريه ..وكل يوم تقرى عليها ..
حتى عليا سارت مع سيف يظهرون فستانها من عند المصمم ..وكا ن فخم وووايد روعه ..سيف في السياره مع عليا مرتبشين ..ويوم قربوا البيت قالت له عليا ..

سيف صك المسجل عن يمسعه الحين حمد ويسفرنا انا وانت..

سيف ::
انتي يسفرونج هب انا،،، انا مواااطن ..وانتي سيلانيه خخخخخخخخخ..
عليااا ::
تخسي حرمتك سيلااااانيه ...هب انا ...
سيف ::
جب جب لا تقولين عن الحرمه سيلااانيه تفهمين او لااا...
عليااا::
طااع هذااا من صجك الحين انت خلي ها السييلااانيه ترضي فيك اول عقب تعال وارمس..هههههههه
سيف وهو يبركن السياره في الكراج ::
يله اووت انتي كشتج هذا اللي يوديج مكااان مره ثانيه ..
علياا::
اصلا مو بكييفك ،،ما عندنا حد غيرك يودينا ويييبنا ..
سيف::
لاااااااه والله وها الدريوليه اللي يايبينهم حق شووو..هاااا ..يستلمون معاااش اخر الشهر حق شووو..
عليااا::
هذا هوو انت الدريول الخاص حقنا انا وساره ..اما هاييلا دريوليته العزب...باااي لا تنسا اتييب الاغراااض ..
وسبقته ودشت الفيلااا وشافت ساااره يالسه في الصاله لابسه بيجامتها الورديه وحاطه راسه في حضن امها وفاله شعرها وامها تمشط لها شعرها..حست بغيره ..وبسرعه ركضت وعقت عمرها على امها ..
ساره::
بسم الله انتي ايييه يا الدفشه ..بلااااج ما تشوفين ماماه تمشط شعري...

عليااا وهي تدلع وتمرغ في حضن امها ::
فديييت ماماتي انا والله انج وحشتيني ...

ام ساره وهي تضحك عليها::
فديتج يا عللاااايه يا بنتي والله بدونج البيت هادي ويوم توصلين تنبض فيه الروووح..
سيف وهو واااقف حامل فستااان اخته ومتلعوز فيه ::

ايييهااااا ياالدنيا وانا ولد البطه السوده ..وفر فستان ساره على الكرسي وسار صوب امه وسحب علياااا من حصن امه وعق عمره على امه وتم يلوى عليها بقوه ..

سيف::
فدييييتج ياااا امي يااا ماما ياامااااايه ..ياااحلوة اللبن ...
ساااره صارخت علييه:::
سيييفوووه وياااراااسك فستاااني يا السخيييف..
وركضت ورفعت فستانها وحست انه ثجيل من الشك الله فيه ..وزقرت الشغاله عسب اتوديه غرفتها ..
وكملت قعدتها مع امها واخوانها وثلاثتهم يتضاربون على حضن امهم ..وهي مستانسه عليهم ..
................................

[هنوف الروح]

عبدالله انا ما بيي الاسبوع الياي كله ..

قال خليفه ها الكلمه حق عبدالله وهو يالس يرتب الاوراق في درج المكتب طالعه عبدالله وهو مستغرب منه ليش ما بيي ليش ..معقوله الوقت قرب ..معقوله الملجه قربت ..هييه صح ما بقا شي الاسبوع الياي تاريخ 10/3 /2006 ..كمل عبدالله الطباعه على الكمبيوتر ولا جنه حد رمس ..

رفع خليفه راسه وطالع عبدالله ...وهو مستغرب ليش ما رد عليه خليفه قام من كرسيه وسار صوب عبدالله اللي حتى ما رفع عيونه صوب ربيعه ..سحب خليفه الماوس من ايد عبدالله .وهني عبدالله عصب وهو جنه يبا دقه عسب يعصب ويطلع حرته ..
عبدالله وهو معصب ::
خليفه بلااااك انت ما تشوفيني مشغوول يا خي ما في داعي لحركاتك هاي وحن في الشغل ..

خليفه هني عاااد عصب ومن حرته سحب واير الشاشه من الفيشه وفرها بعصبيه ..

عبدالله دز خليفه بقوه من جدامه ومن الحركه هذه بغا خليفه يطيح لانه صدم في المكتب اللي وراه ..وعصب خليفه ودز عبدالله وقال له بكل عصبيه ::

بلااااك انت شو مستويلك ..مب طبيعي ..مب عبدالله اللي اعرفه ...شو فيك ..قووول اذا انا ضايقتك في شي ..قووول يا خي وفكني من ها الحركااات ..
قال خليفه كلمته وهو معصب ووصوته كان عااالي وااايد حتى ان الضباط والشباب اللي في المكاتب اللي عدالهم تجمعوا الصووت...

عبدالله سكت ما عرف شو يقول حق ربيعه ..ما عرف شو يرد عليه ..وشويه دخل عليهم الرائد خالد ..
الرائد::
خير شو مستوي هني ..بلااااكم عسى ما شر..؟؟

عبدالله وخليفه ما ردوا ..وكل واحد يطالع الثاني في عيونه ..الموقف كان مشحون ..والكل مترقب ..وعبدالله وخليفه كانوا متحفزين ..
خليفه تم يفكر في داخله عبدالله بلاااك قوول فيك شي انا متاكد فيك شي ..ليش تبعدني عنك ..ليش وانت اخوي ..
عبدالله يفكر في داخله ..انا ليش وغد معاك يا خليفه ..مو ذنبك اذا انا كنت جبان ونذل ..انت اخوي وانا ما اقدر اعاملك جذا انت ما تستاهل مني ها المعامله ..
وهني عصب الرائد وقال لهم :
انا مب جني ارمسكم والا انمصختوا ما تسمعون ..
هني وقف عبدالله وخليفه وضربوا تاهيه حق الرائد وقالوا في نفس الوقت ::
ما شي سيدي ..
عبدالله ::
عفوا سيدي بس شويه خلاااف بسيط وان شاء الله بينحل ..والسموحه اذا صوتنا علا..
خليفه::
اسف سيدي هذه غلطتي ..انا سحبت الواير وعبد الله كان يطبع تقارير مهمه ..
الرائد يعرف شو علاقته عبدالله وخليفه ..يعرف انهم اكثر من اخوان ..والكل في القسم يعرف ها الشي ..اكيد في شي صار منبينهم ....لكن الرائد قال بصوت حازم ::
هذا مكان شغل وما في داعي لها الحركات اللي ما لها داعي ..اعتقد كلامي مفهوم ..
عبدالله وخليفه ::
مفهوم سيدي..

وظهر الرائد وكل من الفضولين اللي كانوا واقفين توجه لمكتبه ..محد يقدر يدخل بين عبدالله وخليفه ..الكل يعرف انهم يحلون مشاكلهم بدون محد يدخل ..

خليفه رد وشبك الواير للكهرباء ورد لمكتبه ويرتب الاوراق بدون ما يرفع راسه لعبدالله ..
اللي كان وااقف يطالع ربيعه وفيه غصه ..خليفه انا اسف انت ما تستاهل مني ها التصرف ..انت ريال اكثر مني ..وتحرك عبدالله صوب ربيعه وحط ايده على جتف ربيعه وضغط عليه..ورفع خليفه راسه بهدوء صوب ربيعه ..وشاف عبدالله وعيونهم تتواجه ..وقام خليفه من مكتبه ولوى على ربيعه وقال عبدالله ::
السموحه خليفه السموحه يا خوي ..والله انه مالك ذنب في اللي احسه ..
خليفه ::
مسمووح يا خوي عبدالله انت تعرف اني ما اروم ازعل منك ..بس عبدالله خبرني شو فيك ..والرفجه ..ورفجه غاليك تخبرني شو فيك ..انا مب ربيعك ..مب اخوي ليش تخبي عني ..

عبدالله طالع خليفه ..وما عرف شو يقول ..والله طلع معاه ::

والله يا خليفه الصراحه ..لإي مشاكل عندنا في البيت ..اختي العوده ردت من بيت ريلها ..وبينهم مشااكل وااايد ..اكتشفت انه ماخذ مغربيه من وراها ..وسالفه وهي تبا اتطلق ..والوالده ما تباها اتطلق ..والبيت معفوس فوق حدر ...

عبدالله قال كلامه وهو مو مصدق عمره كيف الف ها القصه...

خليفه ما عرف شو يقول ..وتم ساكت ..اول مره عبدالله اييب طاري اخته العوده..انحرج خليفه من ربيعه وكل اللي قدر يقوله::

عبدالله الصراحه ما اعرف شو اقول ..يعني الصراحه..

عبدالله:::
لا خليفه عادي لا تقول شي ..انا كنت متنرفز من ها الموضوع لانه صار له فتره ومب عارف شو اسوي لا انا ولا الوالد...وانت طبعا مشغول بالملجه ..وكل ها الضغط علي انا في البيت ..

خليفه ::
لا عبدالله افا عليك ..وانا ما عندي دم وكل يوم احشرك بطاري الملجه ..والله لو قلت لي ..
عبدالله ::
لا افا عليك عادي وانت شو ذنبك من حقك تستانس ..انا بس ما حبيت اخرب عليك فرحتك ..لاني اعرفك بتاحتيني وما بتفرح..

خليفه ::
المهم الحين شو ما شي يديد ما شي فرصه للصلح..الريال ترى عرس وخلاااص ..الا اذا كنتوا شافين انه ما بيكرم اهلكم ..

عبدالله ::
لا ان شاء الله فيه فرصه للصلح ..عماتي وامه يرمسون الاهل وان شاء الله بيحلون الموضوع ..
المهم خبرني ليش تبا اجازه الاسبوع الياي ..

خليفه وهو يرتب الاوراق وحطهم فوق المكتب عدال الاوراق الثانيهاللي رتبهم من ساعه ..

والله تعرف يا عبدالله الحين خلاااص ما شي وقت الاسبوع الياي الملجه ..والوالده حاشرتني تباني اخذ اجازة ..لانه طارق ما يروم يسير العين كل فتره وفتره عسب دوامه ..وان لازم اسير العين واشوف الترتيبات ..وذا كل شي جاهز ..وكله على راسي..
عبدالله ابتسم له ::
كله على راسك..مب جنه طارق اللي مسوي كل شي وانت الشيخ متفيزر هني ومجابلني وكله تحلم وتتمنى وانا اشووف قلوووب تظهر من عيونك يوم تطري الحرمه هههههههه

ضحك خليفه من كلام عبدالله وقال له ::
تخسي انا تظهر مني قلوب ..شو قالوك عبدالله ..ههههههههه بعدين لا تنسى تعزم الاهل كلهم وخصوصا حمدوووه..هههههههههه

عبدالله ::
حمدوووه يامسود الويه ..وتطري اختي عقب ما ظربت فيها خيانه وبتعرس بوحده ثانيه ..

خليفه ::
يا بوك انا ما ارووم لحمده الله يعينه اللي بياخذها ...خخخخخخ
عبدالله وهو يلخبط الاوراق اللي رتبها خليفه ويعق نصها على الارض ..وخليفه مصدوم من حركته ..

عبدالله ::
جب يا لسباال دوااك رتب الاوراااق مره ثانيه ..مثل ما سحبت الواير وانا برد اطبع التقارير من اول ويديد..ههههههههههاااااااااااااااي
وضحكوووا الشباب مع بعض وردت الاجواء اتلطفت ..

علاقه عبدالله وخليفه وااايد قويه ..لكن اللي صاير ان عبدالله الغيره بتاكل قلبه ..وضغط على نفسه وهو يرمس ربيعه ..لانه هو الغلطان على خليفه ...وما حب يزيد الطين بله مثل ما يقولون..

وتمر الايام ..ويقرب يوم الملجه ..وما باقي على الملجه بس غير يومين ..وبيت راشد الظاهري مرتبش ...
طبعا الكل واصل البيت كل اخوان ساره مع حريمهم وعيالهم والبيت مرتبش وحشره..

عليا تقنع امها انها تسير مع ساره الصالون ::
ماماه دخيلج مااماه خليني اسير الصالون دخيلج ..

ام ساره ::
لا ما شي شو تبين تسوين في الصالون ..اختج وعندها شغل هناك انتي شو له تسيرين ..ماشي سيره ..
ساره ::
ماماه دخيلج خليها تسير ويايه ..انا ارتاح يوم تكون معاي عليا..دخيلج ماماه ..

تعبت ام ساره من الجدال مع البنات واخر شي قالت ::
اووووه تراكن صدعتولي رااااسي ..خلاااص انا تعايييت فيكن ..سيرن الصالون ..وفكني من حشرتكن...

علياااا::
وااااو تعيش اروع ام في العالم ..ام علياااا..

ساااره ::
لااا حبيبتي ...ام ساااره...

سيف من وراااهن ::

جب انتي وياها ..الام يزقرونها باسم الريال ..يعني انا ..تعيييش ام سيف..

وهني طالعت ساره وعليا سيف وهن مستغربات من متى وهو واقف وراهن::
انت من متى هني..وعدين شو حشرك معانا ...

سيف وهو ياكل تفاحته بكل بروود::
ما ادري انا دخلت لقيتكم تشجعون الوالده .قلت اشجعها ..حشرن مع الناس عييد...وبعدين مب قلتوا تبون تسيرون الصالون ..يله ترى والله ما اوديكن ..بسرعه يله ..
قامت عليا وساره يلبسن عبيهن ..::
ويلس سيف حذال امه وهو يطالع اخته ساره تلبس عباتها ..وسألها بكل براءه::
ساره انتي شو تبين من الصالون ..مب باجر الحنايه بتينا البيت شو يوديج الصالون اليوم هااا..

هني طالعت عليا وساره بعض وضحكوا على اخوهن وتموا يغمزون لبعض ..وشافهن سيف ::
مسوداات الويه ..انا يالس ارمسكن ..شو بلاااكن تتصاصرن ..هاااا..اخ ع المذهب..

ضحكت ام ساره من ولدها وقالت له ::
سيف سير بارك الله فيك وجهز السياره جدمها عدال باب الفيلا ما نبا حد يشوف العروووس انزين ...

قام سيف وقال وهو يطالع امه ::
بس عشان خاطرك يا جميييل ...واااادي بوسه على الهوااا...امووووواااح...

وظهر سيف من الغرفه وعليا وساره يضحكون على حركاته ...

ومن صوبهم في دبي اهل خليفه مرتبشين ..وفي بيت خليفه..فطووم محتشره على المصمم لانه ما سوالها الحركه اللي تباها على الاكمام وطول شويه الاكمام ..
فطووم::
اوووه ماما شوفي الفستااان كيف كمه طوويييل شو ها الحاااله ..ما ابي ردووا خله يعدله ..
ام خليفه ::
يا بنتي وين طويل هذا حتي ما يغطي جتفج بلاااج انتي شو تبين تلبسين من دون كم ...
خليفه يطالعهن وهو ساكت ..
فطووم ::
ماما شو فيها كل البنات يلبسن جييه الحين ..وبعدين هذه ملجه اخوي مب حد غريب يعني البس اللي اباه صح او لاااا..
وهني خليفه تنطق::
فطوووم يلاا عاااد ما عندنا بنات يلبسن حمااالااات ..وبعدين يكون في علمج انا اللي قلت للمصمم يسوي حركه الكم هذه انزين مسوده الويه حضرتج قايلته بدون اكمام وحمالااات هاا..ماااشي وان زودتي الرمسه ترى بخليه يزيد الكم ..

هني عصبت فطووم وقالت له ::

لاااااه ترى اللي بتاخذا يوم ملجه خدوووي كانت لابسه حمالااااات وقامت تهز على الاستييج..
وقالت كلمتها وشردت ورا امهااا..لان خليفه عدل يلسته وقااال شووووو ..

خلييفه ::
منووو قااالج ..جب ولا كلمه يله عااد لا طولين لسااانج ..ذلفي غرفتج اشووووف يلاااا..

وشلت فطووم فستانها وهي اتحرطم ..
وقالت ام خليفه ::
حرام عليك يا ولدي ليش اتشعم اختك ..بعدين البنت ما جذبت ..ساره كانت لابسه حمالات في ملجه خدووي...

خليفه انحرج وما عرف شو يرد ..

.................................................. .....

[هنوف الروح]

طبعا انقفط خليفه من رد امه وما عرف شو يرد عليها ..

وسوى عمره مشغول بالموبايل ..وتم يفكر في داخله ..حماالااات ..يا ويل حالي انا ..انا اراوييج يا ساره تلبسين حمالات وتهزين بعد ..لاااا مااا شي ها الحركات عقب العرس ..الحملااات تلبسيهن بس حقي..والهز بس حقي انا ..فديييتج وين ما كنتي ..آآآآآآخ متى الملجه بس ..احس ان اليومين جنهم شهرين ...

في بو ظبي ..

عبدالله موقف سيارته عند البحر ويحس بالضيق ..خليفه توه مرمسنه ومأكد عليه انه يحضر يوم الخميس هو والاهل لانه يباه يكون الشاهد مثل ما اتفقوا الشباب قبل..

عبدالله ما قدر يقوله لا لانهم متفقين من قبل،، تم يطالع البحر ويحس بالالم في قلبه ،، خلااااص ما بقى غير يوم ويملج خليفه على ساره ،، وتستوي حرمته ،،كيف بيحط عينه في عين ربيعه ،، كيف يقدر يكون عادي وياه ،، اهو الحين مب قادر يكون على طبيعته مثل قبل ،،شو لو عرف خليفه انه يعرف ساره قبله،،شو بيكون موقفه ،،وتم يذكر سوالفه مع ساره ،، وكم مره قال لها احبج ،، وكم مره قالت له احبك،، وتفداها ،، وتتفداه،، وكم ..وكم...

آآآآآآآآآآآآه يا ساااره شو سويتي فيني ..ليش انا فرطت فيج ..كيف باجر انا اكون شاهد على زفافج ..انا باجر بوقع ورقه موتي ..كيف احضر ملجتج على ربيعي...كيييف...
يا ترى شو تسوين الحين يا ساره ،، انا ما شلتج من بالي يوم واااحد ..وظهر موبايله من جيب الكندوره وبطل الصور ..وفتح صوره ساره..وتم يطالع الصوره ..شاف ابتسامتها ...ودلعها ..وبدوون ما يحس قرب شاشه الموبايل من شفايفه وطبع بوسه من كل قلبه على صوره ساره ..وحس بنغزة في قلبه..كيف فرطت فيج يا ساره ..يا عمري وحياتي ...
وتذكر خليفه ..وحس بالذنب ..هو يالس يطالع صوره حرمه ربيعه..شو بيكون موقفه لو هو كان محل خليفه..اكيد ما بيرضاها لعمره.. ومع ها الشي ما قدر وتم يطالع الصوره..هذه اخر تذكار بيني وبين ساره ..ما بمسح الصوره ..لا ..محد بيشوفها ...ومحد يتعبث في موبايلي ابدن،، لا يا ساره حتى لو خذاج خليفه انتي بتمين في قلبي ..
كل هذه الافكار كانت ادور في راس عبدالله..وما حس بالوقت يمر ..وما حس الا يوم ابوه يتصل عليه،، يتطمن عليه،، وقال له عبدالله ..انه بيرد البيت ..

في غرفتها ..ساره ..كانت منسدحه كانت تفكر وهي مغمضه عيونها ..الساعه كانت..جريب ال2.30 وما قدرت ترقد ..باجر الملجه ...خلاااص باقي اربع وعشرين ساعه واكون حرمه خليفه..آآآآآآآآآآآخ يا قلبي ..اناا وااايد خااايفه ...الله يستر من اللي مخبيه لي القدر.....يعني يا عبدالله انت ما تقدملي ويتقدملي ربيعك..ربيعك!!! وتمت اتقلب في شبريتها مب عارفه ترقد..اليوم يتمهم الحنايه وحنتها ..وتمت اطالع حناها ...هذه الحنه مب لك يا عبدالله ..هذه حنه لخليفه....ونزلت دمعه من عيونها ..وكانت وااايد مضايقه ..وبدون ما تحس قامت ..ودشت الحمام وتوضت ..وتمت اتصلي وتصلي الين تعبت وتدعي ربها انه يستر عليها وما يفضحها وانه يحبب خليفه لقلبها وينسيها عبدالله..ونامت وهي على سجاده الصلاااه..


(((يووووووووووووووووم الملجه)))

الساعه عشر الصبح ..سمعت ساره دق خفيف على باب غرفتها ..هي ما كانت راقده من الاساس .زمن الصبح سمعت الحشره في البيت ..صوت عليا وعيال اخوانها وامها والكل محتشر .. وما حبت تنزل تحت لانها تبا ترقد ..وتمت اطالع الساعه..كانت عشر ..

ساره::
منوووه؟؟

عليااا:
انا علياا ..ممكن ادش؟؟

ساره مستغربه من الادب اللي نزل على اختها مره وحده..
وقامت وبطلت الباب....وعرفت شو سبب الادب ..علياا كانت واقفه ومعها ابوها ..وحمد اخوها العوود..قفطت ساره لانها كانت لابسه بيجامه كت ..وفتحت الباب وسارت بسرعه ولبست شمد الصلاه..
ساره::
هلااا باباه ..صباح الخير ..صباح الخير حمد..

حمد ::
صباح النور العروووس ..شووو راقده الين الحين ..واختج ناشه من صباح الله خير يقول هي العروس مب انتي..

انحرجت عليااا..بس ما قدرت اترد ..ابتسم ابو ساره ويلس عدال بنته في الشبريه ..
ابو ساره::

هاا بنتي سااره..شحالج الغاليه ...كيف اصبحتي ..

ساره وهي بعدها منحرجه::
بخيير الحمد لله..
يود ابو ساره ايديها ورفعهن وتم يطالع الحنا ..

ما شاء الله يا بنتي شو ها الحنه الغاوية ..ماشاء الله لا اله الله..والله كبرتي يا ساره وغديتي عرووس ،، ويا اليوم اللي يباخذج مني ريال غريب..
ودمعت عيون ابو ساره..وعليا ما صدقت طاحت في حضن ابوها وهي تقول::
باباه فديتك ..انا هنيي موجوده ..وساره بنتك ..ما لها غناه عنك..

ساره::
فديت ابويه انا ..اصلا ما في ريااال يرووم ياخذ مكانك ..انت الغالي والعزيز..

ابو ساره ووهو يحضن بناته ::
لا يا بنياتي ..هذه حكمه الحياه ..مصير كل بنيه بيت ريلها ...

حمد ::
يا بويه بلاااك الله يهدااك بتصيح العرووس ..ما نبا عيونها منفخه عقب تزيغ الرياال يقول ما باها..

ابو ساره ::
يخسي الا هوو ..قصوووره هو وين بيحصل مثل بنتي ساره ..جمال وادب واخلاااق ..الله يحفظج يا بنتي ..
حمد ::
انزين يا بويه انت ما قلت لها اللي يايين عشاانه؟؟!!
ابو ساره::
هييه يا بنتي انا بكون وكيلج في العقد ..والريال بيخلي ربيعه واخوه شهود على العقد ..لكن لازم يسمعون الموافقه منج انتي ..فبارك الله فيج اباج تخلصين امورج من صالون الحريم بسرعه وتكونين في البيت قبل المغرب لانه عقب المغرب بنملج ان شاء الله..

ساره وهي مستحيه ::
ان شاء الله باباه..
عليااا طبعا تلقفت كعادتها ::
اندوووك انته اونها استحت والويه غدا احمر..خخخخخخخ

حمد ::
عيل تبينها شراتج دفشه ..ساره من بونها وهو رقيقه وحساسه ..هب شراتج ..صبي مو بينه..

عليا وهو اطالع ابوها ::
باباه شو حمد شو يقول لي..

ابو حمد::
يا ولدي لا تحرش في خواتك ..كلهن بناتي وكلهن حساسات وما شي احسن عنهن..
وضحكوا الجماعه من حركات عليا وخبالها ..
وظهروا من الغرفه وتمت عليا وساره رواحهم بالغرفه..

علياا::

وااااااااااااو ساره الحنه وااايد حلوه على ايدينج .ما شاء الله عقب تقولين حسدناج..واشوف ريوولج وااااااااااااو ..والله احلى عن حنتي ..

ساره وهي ادز عليا عنها::
اكيد احلى يا العبيطه مب انا العرووس..

عليااا::

اندووك انته اييييهااا بدينا بالخقه ..الله يعيينا عقب الملجه ..
ساره ::

عليييوووه اسكتي والله اني زااايغه ما اعرف شو اقول لو سالوني موافقه او لا..والله اخااف انخرس وما اعرف ارد...

علياا::
والله ما عندج سالفه ..لو انا مكااانج والله لاقوول بالصوت العااالي مواااااااااااااااااااافقه ..ولو تبون العرس اليوم ما عندي ماانع ههههههههههههه..

ساااره::
هههههههههه عليا يالماصخه..شو هااا لو تسمعج ماما والله تذبحج..صدق انج ماصخه ..انا لازم ايوزج بسرعه عن تنحرفين هههههههههههه..

وضحكوا البنات وقاموا بسرعه يتلبسون عسب ينزلون تحت...

ومر الوقت ،، والكل ارتبش .. وكل حد خذ اهله وداهم الصالون ...ساره وعليا في صالون بروحهم ،، وحريم اخوانهم في صالون ثاني ،، وخليفه واهله ياين من دبي جاهزين ..

الساعه سبع كانت ساره في البيت وكانت قمر 14 وصلت البيت وكان فاضي ما فيه حد غير امها اللي كانت تترياهم ..وسارت ساره وعليا الغرفه مع امهن وساعدوا ساره في لبس فستانها ..الي كان فخم بمعني الكلمه ..وكانت مع الفستان مسكه صغيره عباره قفصه صغير ومطرز نفس لون فستان ساره حركه سواها المصمم اونه قفص الزوجيه...
ودق سيف الباب ولما شاف اخته ..تمت يكبر في قلبه عن ينظرها..
سيف::
اوه ساره اتصدقين ما عرفتج ..شو هااا الحلاااه ماشاء الله عليج ولله قمر ..ولاااا علياا بعد كااشخه ...والله في امل منكن ....اقوول ساره يله نزلي بسرعه يبون يسمعون الموافقه ..
ونزلت ساره مع اخوها وسارت صوب الممر اللي يفصل بين ميلس الرياييل والفيلا ولقت اخوها حمد واقف ..ويوم شافها حمد قلبه دق وحس بعيونه ادمع ..ساره كبرت وصارت عروس ..وحس بشويه غيره في قلبه ..هذه اخته وبياخذها حد غريب ..وتعوذ من الشيطان وابتسم لاخته وحبها على راسها يوم شافها ..واشر لها ان الملا واقف ورا الباب ..ودق قلب ساره بقوه من الخووف..ومن ورا الباب سالها الملاا..اذا كانت موافقه تاخذ خليفه بن سلطان بن هادف المنصوري؟؟..وسكتت ساره وضغطت امها على ايدها وطالعها حمد ..وهز راسه وهو يبتسم لها ..يعني لا تخافين نحن هني ...وقالت ساره بصوت خفيف ::
نعم موافقه..
..

[هنوف الروح]

وشويه وعلت التيبب في بيت ساره ..ومع وصول حريم اخوانها وعماتها وشويه انترست البقعه حريم والكل يبب من صوب ..ووصلت المصوره الى البيت ..وقامت ام ساره وخذت الحريم وودتهم ميلس الحريم وكلهن تجمعن والكل ينشد عن الثاني عسب ما ينسون حد وهم سايرين الفندق..

وتمت ساره وعليا وسيف في البيت ..وتصورا مع بعض ..ودخل ابو ساره عليهم وحمد وباقي خوالها وعمامها وسلوموا عليها وتصوروا مع بعض ..ووقف سيف عدال ساره وقال لها::

تدرين ان راشد ولد عم خليفه طلعت اعرفه شفته مره مع واحد من الربع في الكليه..
ساره ::
زين والله ..

سيف::
عااد ريلج خقااق ..خله ربيعه واخوه العود شهود على العقد ..كان خاطري اوقع على العقد واشخط توقيعي الملوكي ..

ساره دق قلبها بدون ما تحس::
منوه ربيعه ..اقصد مب هو عنده اخوان غير طارق العود..
سيف وهو يعدل غترته وعقاله عسب يتصور اخر صوره قبل ما يسيرون الفندق..
سيف رمس بشكل طبيعي لكن ما يعرف ان اللي قاله ..قلب فرحه اخته ::
ربيعه اسمه عبدالله ...
وكمل سيف رمسته لكن ساره ما سمعت غير اسم عبدالله ..وحست بدوخه وبالغصب مسكت نفسها ..
وما حست الا بالمصوره وهي تقولها انها تبيها تقعد عسب تصورها وهي يالسه...

بالقوه ساره ركزت وياها ويمكن اللي خفف عليها بعد وجود اختها وحشرتها على كل صوره ..

الساعه كانت تسع ونص والمفروض ان ساره توصل ودش القاعه الساعه عشر..
عليا تسولف ومرتبشه في السياره وتحتي شكلها ومكياجها وتسريحتها وتعطي التعليمات لساره في المشيه والدلع والنظرات ..وساره مو معاها بالمره..
من عرفت ان عبدالله كان الشاهد في الملجه طارت الفرحه ..وخافت تنزل دموعها ..واللي انقذها وصولهم للفندق ..وكان زحمه واتصلت عليا في امها ..انهم وصلوا ..وتجهزت الفرقه عسب زفه العرووس..وطفوا ليتات القاعه ..وتمت ام ساره تقرى على بنتها ..وتمت ساره تقول في خاطرها ..خلااااص انا لازم اكمل ..كل شي انتهى ليش انا زعلانه ..ومضايقه ..اليوم ملجتي والمفروض اكون فرحانه..وما تدري شو اللي قلب حالها ..يمكن يوم امها كانت تقرى عليها خفت شويه من الخوف ..وقرب عليا منها بعد خفف منها ..ودشت القاعه وركزوا ليتات القاعه عليها ..وكانت بدر منور..ودشت تمشي على زفه الفرقه وكانت قمر يمشي بدلع ترفع راسهامره وتنزله مره وتبتسم وتوقف مره وترفع فستانها وتدلع في مشيتها الين وصلت فوق عند الكوشه وشغلو ليتات القاعه وبدت الربشه ..
وقامن البنات يرقصن ..وفطووم اخت خليفه ..وعلياا ما قصرووا تحدوا بعض الين قالوا بس ..والمصوره شغاله تصوير في ساره..والكل يبارك لها ..والكل كان سعيد..وفرحاان..ما عدا شخص واحد بس..
كان يبتسم والود وده انه يبكي من الالم ..عبدالله كانت حالته حاله يوم وقع على العقد كشاهد ثاني عقب طارق..ومن سمع الملا يذكر اسم ساره بالكامل في الميلس حس بغصه ,,لا ما ابي احد يسمع اسمها ما ابي احد يعرف عنها ،،حس بغيره عليها ،،وشاف فرحه ربيعه وربكته،،
وما عرف كيف بارك لربيعه بالملجه ..وما عرف لين الحين هو كيف قادر يحافظ على ابتسامته وروحه جدام الكل .. وهو من داخل يتقطع ...ويسمع ربشه الفرقه ..وتيبيب الحريم كل حزه والثانيه..
وما حس الا الساعه 11 الا ربع وشاف خليفه وابو ساره وحمد وطارق يتكلمون مع بعض وشاف خليفه يغمز له وفهم انه الوقت اللي بيدش فيه القاعه ..ارتبك عبدالله وما عرف صج شو يسوي ..
وشويه شاف خليفه يأشره تعال..سار له عبدالله ..وقلبه يدق..
خليفه::
عبووود ادعيلي والله اني ما اعرف شو اسوي..الحين بدش القاعه ..
عبدالله وهو يبتسم ..::

لااا افاا عليك خليفه ..شو خايف ..سير ودش القاعه ..شوف لي عروس بنيه حلوة..ههههههههه

خليفه::
اقوول حمده داخل الا اباها تصور معاي ..هههههه
عبدالله::
هههههههههه تبا تذبح بنتنا انت ....يله عندك الحرمه شو تبا في حمده الحين ..
ووصل حمد ::
يله خليفه القاعه جاهزة انا ما بدش كلهم حريم وانا ما احب اسير مكان متروس حريم ..الوالد بيسر وسيف وياك وعمامي وخوالي ..انزين..
خليفه::
يا رياال دش معانا يمك نتشوف لك وحد حلوه وتجدد شبابك هههههههه..
انحرج حمد ما متعود على ها لرمسه ..ترى هو مطوع ..وما عرف يبتسم او يعصب ..لكن في انهايه ابتسم..
وعبدالله انقذ الموقف::
ههههههههههههههههه خليفه انت ما تيوز عن سوالفك حتى وانت معرس ..يله سير ادخل اقاعه ما اوصيك هااا ..هههههههههه

عبدالله يبتسم ويضحك وهو من داخله يتقطع بيمووووووووووت من القهر والغييره ..
رد ويلس في الطاوله اللي ابوه يالس عليها ,,

وفي قاعه الحريم الكل ارتبش يوم اعلنت الفرقه ان المعرس بيدش..ولبسن الحريم عبيهن وشيلهن..ونفس الحاله خفضوا ليتات القاعه ..وشلت الفرقه زفه للمعرس ودق قلب ساره وهي واقفه اتريا ريلها ..وكانت اطالع امها واختها اللي كانت تحت اطالعها وتبتسم ,,
ودش خليفه وعداله ابو ساره وحمد وسيف ومن وراهم عمام ساره وخوالها وانترست البقعه ريايل وسيف ما صدق وهو يطالع يمين ويسااار ويسوي حركات خريشه عسب يلفت نظر البنات ..
ودق قلب ساره اكثر واكثر ..وخليفه صعد الاستيج وقرب من ساره .وبغا يمووت من جمالها ودلالها ..ووقف جدامها وسلم ابو ساره على بنته وحبها على راسها وسحب ايد خليفه حطه على ايد بنته ..وخليفه ما صدق ضغط على ايد ساره ..نفس حركه الخطوبه بس ها لامره بقوه خلا ساره ترفع عيونها واطالعه ..وهي مستحيه ..وابتسم لها ..وسوى حركه قويه الصراحه تفاجات فيها ساره .. قرب منها وباسها على راسها ..وحط ايده تحت خدها ورفع راسها اكثر وباسها على خدها اليمين والشمال وقاال::
خليفه::
مبروك ساره ..
ساره وهي مستحيه::
الله يبارك فيك
ووقف عدالها بكل جرأه ..خليفه يعرف انه محد يقدر يقوله كلمه وحد ..لانه خلااااص سار ريل سااره ..اتنرفز ابو ساره ..لكنه هدا بنفس الوقت لانه خلاااص هذا ريل بنته حلالها ..وسيف قام وربش البقعه ..لانه الفرقه شلت اغنيه عيضه سود العيووون واخترش عليها سيف وقام ايوول في الاستيج ويسوي حركات ..ةتخبلن عليه البنات في القاعه ..
وقعدت ساره وقعد عدالها خليفه..وتمت يطالعها وهو مو مصدق ..عيونه مبققه فيها وهو مبتسم ...يطالع شعرها ..مكياجها وحناها اللي وااصل قريب الكتف ..وفستانها ..وساره اطالعه وتبستم وتقول في خاطرها ..الله يغربل ابليسك بلااااك بتاكلني بعيونك..
وشويه الا بنيه صغيره وقفت جدامه تسلم عليهم ..ساره تمت اطالع البنيه وتتفداها ..محلاتها ..تذكرها بحد ..تشبه حد ها البنيه ..وشافتها وهي سايره بكل ثقه صوب ..خليفه..وهو يبتسم وقرب منها ..وسلمت عليه ..وسمعتهها ساره وهي تقووول::
مبرووووك خلفووه اخييرا عرست ..
وضحك خليفه من خاطره من جرأه حمده ويرها من ايدها وحضنها وتم يبوسها وهو مستانس عليها ..وطالع ساره اللي مستغربه منها وهو تقول اكيد وحد من بنات اخوانه ..
طالعها خليفه وقال::
ساره اعرفج هاي ربيعتي حمده ..ههههههههه هاي كن ناوي ا خذها لكن غيرت رايي..
ابتسمت ساره وهي محتاره شو يقصد هذا ::
هلاا حبيبتي الله يبارك فيج..
خليفه ::
ساره هذه حمده اخت ربيعي عبدالله ..اعز ربعي ..
انصدمت ساره ..الحين عرفت ليش البنيه اتذكرها بحد تعرفه ...ذكرتها بعبدالله ..يالله انا كل ما احاول انسى شي يذكرني فيك يا عبدالله ..وتمت حمده تدلع شويه عند خليفه ..وعقب نزلت من الاستيج ...
وحان وقت انهم يردون البيت لان الوقت تاخر وكان الساعه قريب الوحده..
وطبعا القاعه فضت من المعازيم وما بقا غير الفرقه اللي كانت تشل قشارها واهل ساره واهل خليفه ..
خليفه فوق في الاستيج يسلم على خالاته وعماته وخواته وهو يبا فرصه انه يقعد مع ساره ..وما صدق يوم قالت المصوره انها تباهم ينزلون شويه وسيريون الغرفه اللي مخصصينها للتصوير..

فرصته الحين عسب يستفرد في ساره...

[هنوف الروح]

دق قلب ساره بقوه يوم درت انها بتكون في الغرفه التصوير بروحها مع خليفة ..لكن اللي طمنها شويه هو وجود المصورة ومساعدتها ...وقالت في نفسها يخسي ما يروم يسوي شي والمصوره موجوده..
حليلها ساره ما تدري انه خليفه كل شي عنده عااااادي كووول...المهم ..وصلوا غرفه التصوير كانت المصورات جدام خليفة وساره سبقوهم وبطلوا الغرفه وجهزوا عدتهم ..ساره كانت تمشي شويه شويه لانه فستانها كان وااايد ثجيل وكعبها ما يساعد بعد انها تسرع.خليفه من صوبه ما صدق وما سك ايد ساره اونه يساعدها هو ما صدق انه يمسك ايدها ..ويطالعها ويبتسم ..وشافها وهي مرتبكه ومستحيه وحالتها حاله ..
خليفه بصوت هادي::
ساره اشحالج ..
طالعته ساره باستغراب شو يقصد هذا ..ويوم يت عينها في عينه غمز لها وابتسم واستحت ساره من حركاته ..

ساره ::
الحمد لله بخير انت اشحالك؟؟
خليفه :
والله دامج يمي انا بخيير ..شوو استانستي في الملجه ؟؟عسى بس بيضنا الويه..وما نقص شي ؟
ساره ::
لا ما عليكم اقصور ..الكل كان مستانس وفرحان ..
خليفه سكت شويه ..وبعدين قال:
وانتي؟؟ استانستي ؟؟
ساره :
..................

خليفه::
ساره انا سألتج ردي علي ..اري...

وقطعت رمسته المصوره وهي تقول لهم ::
استااز كل شي جاهز لو تسمح توئف انت والمدام إدام الخليفه الاولى ..
وتمت تصورهم المصوره اكثر من صوره ..مره ساره بروحها ومره خليفة بروحه..حليلها ساره يوم تصور بروحها ..خليفه يتم يسوي لها حركات تخليها تستحي ويحمرون خدودها ..والمصوره تضحك على حركاته..
المصورة::
استااز خليفة انت مهضووم كتيير ..هلا لازم نصوركم مع بعض ..بدنا شويه حركات منكن لزوم التصوير..
خليفه بكل ثقه ::
حااااضريين ..
ساره فهمت شو قصد المصورة وما عرفت شو تسوي وحالتها حاله ..اول شي المصوره طلبت من خليفه انه يوقف ورا ساره ويحط ايدينه على خصرها ويطالعون بعض بحب ..
ساره في خاطرها تقول اي حب الله يخلييج ..وين اقدر اطالعه انا ..
خليفه ما صدق وقف وراء ساره ويرها صوبه لين لصقت فيه ولوى عليها وهمس في اذنها ..
فديييت ريحه عطرج انا ..
استحت ساره من حركته وجراته ..دق قلبها بقوه اول مره تكون قريبه من رياال بها الصوره وطالعته ..ورفع لها حواجبه بحركته المعتاده جنه يغايضيها ..وسمعت ساره المصوره تقول لهم ..
ايوه لا تتحركوا حلوه الصوره هيك ..يلاا واحد اتنين ...

ساره طالعت خليفه في عيونه ..حلااات عيونه عسليه غاامجه ورمووشه كثيفه ..وخليفه غاص في عيون ساره عسليه فاااتحه وتم يطالعها ويتفحصها ..
المصوره ::
اوكيه استاااز بدنا ايااك تلف ايدينك على خصر المدام وانتي مدام لفي ايدنك على رأبتواا للاستااز..
عاااد هني سااره صدق استحت ..شو ها الحركاات اللي مالها داعي ..بروحي اللي فيني كافيني..طبعا خليفه كان تلميذ مطيع كل شي يسويه بحذافيرة ويزيد عليه من عنده حركات..
خليفه ::
يلا ساره تعالي..
ويرها صوبه ولصقت ساره فيه مره ثانية وحست بنفسه الحار على خدها وشفايفها ..ونزلت راسها من المستحى ..
المصورة ::
يلااا مدام ولووو هدا زوجك بلاا ها الدلع والحيااا..راح تطلع الصوره اتجنن كتير ..

خليفه::
يلااا مدام صدئيني راح تطلع الصوره حلوة ..هههههههههههه
ساره::
اوكيه ..بس عااد بسرعه ترى اخاف اضحك واخرب الصورة..
خليفه::
شو بسرعه خلي المصوره ظبطت الصوره عدل شو روانا ..
ويرها اكثر ونزل راسه صوب اذنها وهمس لها ::
فديت اللي يستحون انا ...
ورفع راسه مره ثانيه..ساره خدودها لبقن من الحيا وما عرفت شو اتسوي وين اطالع ..يالله كيف جرئ ها الرياال..
المصوره :
يلاا مدام واحد اتنين ....

وتموا على ها الحاله فتره نصف ساعه تصوير وحركات ..وساره بتمووت من حركات خليفه ..مره يهمس ومره يضغط على ايدينها ..
ويوم خلصوا التصوير راحت المساعده للمصورة تزقر ام ساره وام خليفه ..والمصور الثانيه انشغلت بترتيب اغراضها ..وساره وخليفه كانوا يالسين على الكنبة اللي بالغرفه..

خليفه يقرب من ساره وهي تبعد ..وهو يضحك عليها ويأشر بعيونه على المصوره ..ويهمس لها ::
ابصملج بالعشره انها معجبه فيني ههههههههههه

ساره ::
لااااه ..
وقرب خليفه ..وبعدت ساره الين وصلت اخر الكنبه ولصق خليفه فيها ..ساره::
خليفه بس عااد وخر شويه ..دخليلك ..

خليفه :
ااااسف انتي حرمتي ..ما ببعد ..
ساره::
انزين وخر المصوره بعدها هني..استحي..
خليفه ::
تبيني اطردها ونتم على راحتنا عااادي..

ساره بسرعه ::
لااا لاااا شو تطردها ..مب قصدي ..

خليفه::

عيل شو قصدج يا قمر ..
استحت ساره ...ومسك خليفه ايدها ورفعها وتمت يطالعها وهي منزله راسها واطالع المسكه مالتها ..
خليفه::
ساره ما قلتي لي ..استانستي في الملجه اليوم..
ساره ما عرفت شو ترد عليه::
هييه ..اكيد كل شي كان حلو ومرتب ..ليش ما بستانس يعني ..
خليفه ::
انزين ريحتيني ..انزين ابا منج شي ثاني ..
ساره دق قلبها وقالت ::
خير تفضل قول..
خليفه::
ابا اخذ رقم تيلفونج ..وبعطيج رقمي عسب ارمسج ..
ساره ما عرفت شو ترد عليه::
رقمي ..والله مدري ..ما عليه خذه من ابويه..احسن صح...
خليفه فهم قصد ساره..واحترمها على ها التفكير ..ما عليه بيطلب الرقم من ابوها ..
وقرب خليفه من ساره اكثر ..وقرب ويه منها وقال ::
تدرين انج حلوة ..واحلى من يوم شفتج وقت الخطوبة..فدييتج.
ساره استحت وصار ويهها طماطه ..ياربي ليش يقرب جييه وخر شويه ابا اتنفس..
وقام خليفه يطالع ساره وفستانها ..ومد ايده وتم يتبع خطوط ونقش الحنا على ايدها وقال::
يا حظ الحنا والله ..لامست جلدج ..ليتني مكانها ..
وهني دشت المصوره ووراها ام خليفه وام ساره ..وبسرعه رد خليفه مكانه اونه عاااد منا سوى شي ..
ام خليفه وام ساره دشوا وكان وراهم حريم بعد في بعضهن متغطيات والبعض عادي كاشفات ويههن..طبعا هايلا كانوا خوات خليفه ونصهم حريم اخوانه وباقي حريم العيله ..وتموا الحيم ايببون والكل يرمس والكل يبارك ..
ام خليفه::
مبرووووووك ياولدي يا خليفه ..خذيت دره وزينه بنات العين والله ..حطها بعيونك ياولدي ..
ودمعت عيون ام خليفه وتمت اتصيح من الفرحه..وقالت ::
ليته ابوك كان موجود ...
وهني عااد ادخلت ام ساره ::
لاااا افا عليج يا ام طارق لا تخربين فرحت عيالنا ..الخير والبركه فيج يالغالية وخليفه ترى ولدنا مثل ما ساره بنتنا ..
ومسحت ادموعها ..وظهر خليفه وسار صوب الرياييل عسب يعطي فرصه للاهل ياخذون راحتهم مع العروس..
وفي طريقه لقاعه الريايل ظهر خليفه موبايله ..وشاف مسج .وفتحه يقراه ..كان من عبدالله...

(( خليفه الف مبرووك انا مظطر اسير لازم اودي الاهل ورانا درب لبوظبي ...وانت دشيت القاعه وما بغيت تظهر منها ..شكلك ما صدقت ههههههههه ..المهم بينا تليفون ومبرووك مره ثانيه ..))

ابتسم خليفه وطالع الساعه كانت جريب الثنتين فاليل ..ووصل قاعه الرياييل وكانوا اخوانه واخوان ساره وعمامها وخوالها متواجدين واخوها سيف ..وحمد ..
وابوها بعد يالس يتريا ..واول ما وصل القاعه ..اللكل علق عليه..

سيف::
وينك يارياال ما بغيت تظهر من القاعه ..هههههههههههههه

خليفه ::
شو تاخرت عليكم والله ما حسينا بالوقت ههههههههه
ابو ساره ::
مبرووك يا ولدي ..ما اوصيك على بنتي ساره ..حطها بعيونك وحافظ عليها ..ترى لا تنسى وراها اهل يحبونها ويحمونها ..
خليفه قال في خاطرها شو داش حرب انا ..
خليفة:::
لااا افا عليك عمي ..ساره في عيوني والله ..لا توصي حريص..بغيت استأذنك في شي عمي..
ابو ساره::
تفضل يا ولدي ..امر..
وهني وصل حمد عندهم .وكمل خليفه رمسته..::
عمي بس بغيت رقم ساره بعد اذنك وبغيت استاذنك في اني ازروها في البيت عندكم..
وسكت اوب ساره شويه ..حس بشويه غيره ..لكن ما ظهر هذا لخليفه..وحمد تنرفز من ها الرمسه..شو بعد يرمسها ..ولااا بعد يزوورها في البيت ..ما عيبته الرمسه بس ما علق لانه ابوه كان موجود..
ابو ساره:
ما عليه يا ولدي بعطيك رقمها ..لكن الزيارات اممممممم.اترى يا ولدي نحن في العين غير عنكم في دبي ..نحن شويه متحفظين في هاالامور..
خليفه جهز دفاعاته وقاال::
عمي اول شي انا احترم رايك ..لكن يا عمي هذه حرمتي ..ولازم اقعد وياها واعرف تفكيرها وشو تحب وشو ما تحب ..يعني عشان نتعود على بعض قبل العرس..والا شرايك حمد؟؟
حمد وهو متنرفز::
والله ما ادري الشور عند الوالد ..بس اقولك عندنا في العين ما شي ها الرمسه ..ما عندنا زيارات وخرابيط ..يكفي انك بترمسها ..شو تبا بعد ..الوالد شو رايك؟؟

خليفه عصب شويه بس ما بين وطالع ابو ساره اللي قال ::
انزين يا ولدي ..ترى العرس عقب ثلاثه شهور ..وبخليك تزورها كل يوم خميس ..
ارتاح خليفه من الكلام ..وكمل ابو ساره كلامه ::
لكن ...
خليفه:
خير عمي لكن شو..
ابو ساره ::
لكن مابتكونوا رواحكم ..سيف بيكون وياكم قاعد ..
خليفه صابه احباط ..لكن ما عليه سكت وقال شي احسن من لا شي ..وطالع سيف اللي كان يالس يسولف ويا قوم راشد ..وقال في خاطره سيف مقدور عليه...
وعطى ابو ساره رقم بنته لخليفه ..

[هنوف الروح]

خلصت الحفله والكل راد بيته وبلاده ،،، وسيف مركب في السياره امه واخته ساره وعليا والشغالات وراء،، والحبيب مرتبش ومشغل الاغاني باعلى صوووت عيضه سووود العيوون ..ويوووول وهو يسوق ،، وعليا تشاااركه بالتصفيق وساره تضحك عليهم وامهم محتشره عليهم ::

سيف يا ولدي انتبه للسواقه بارك الله فيك ،،يا ولدي طالع الشارع ..لحول ولا قوه الا بالله يا سيف الوقت متاخر مب زين الاغاني ها الوقت ..حسبي الله على ابليسك ...

ساره قال بصوت شويه عالي لانه صوت الاغاني كان عالي::
ماماه خليه لو دري عنهم حمد والله يسفرهم..
شويه مرت سياره حمد الاستيشن عداااال سياره سيف ويهرن حمد اكثر من مره لسيف ..وارتبش سيف وزاد السرعه وعلى باله انه حمد يباه يسرع ،،هو ما يدري ان صوت المسجل كان عاااالي وحمد متنرفز منهم ومعصب ومتحلف لهم ...حمد في السياره مع ابوه وعياله وحرمته والشغاله ..

ابو حمد:
يا حمد لا تسرع شوفه كيف سرع لما قربت منه..
حمد ::
يا بويه ما تسمع المنكر ..حق شو ها الصوت وها الاغااااني اخر الليل .. قسم بالله لاهزبه خلنا نوصل البيت ..

وسيف مرتبش وما عنده خبر ...

ووصلوا البيت ...
وكلن دخل البيت واول ما بركنوا السيايير ..نزل سيف يساعد ساره عشان تنزل ونزلت ام ساره وعليا ..والشغالات نزلوا الاغراض ..وشويه وصل حمد عندهم وهو متنرفز ..وقااال وهو معصب::

سيف يا مسود الويه شو ها المنكر اللي سويته ..شو ها الاغاني اخر الليل ..شفت الساعه جم الحين انت ومسودت الويه عليووووه..عليا من سمعت اسمها انخشت ورا امها اللي كانت محتشره بعد عليهم ::

ليش تنخشين وراااي دواااكم انتي واخوج ..انا يالسه انصح فيكم من ظهرنا من الفندق ..بسكم وبسكم وانتوا ولا في الخاطر ..يوله وتصفيق ..
وهني عصب حمد ::

بعدددد يوله وتصفيق داخل السياره..

سيف راسه عورده من كثر الرمسه وطالع ساره اللي كانت تبتسم له وهي مشفقه عليه ..جنه يالس يقولها ..انقذيييني ..

ساره ::

خلااااص حمد خلااااص ماماه ما صار الا الخيير ..بعدين هم كانوا محتفلين فيني ..يعني ما تبونهم يستانسون عشاني..يله حمد يله عاااد بو راااشد..قلبك ابيض ..

وسكت حمد ووصل ابوهم ::
خلااااص يا ولدي تراهم بخير والحمد لله ..يله بارك الله فيكم الوقت متاخر وباجر العرب بيوون يتعشون عندنا ..سيروا ارتاحوااا..

عليا وساره من سمعوا طاري العشا حسوا باليووع...لانه ساره ما كلت وااايد اليوم ...وعليااا كانت منشغله بالرقص تحدي فطوم اخت خليفه ..
واول ما وصلت ساره الغرفه هي وعليا وساعدتها عليا بالفستان وفصخت كل مجوهراتها .زسارت لبست بيجامه ويلست ..واتصلت بسيف ..
سف::

هلاهلا العروووس ..خيير شو عندج توني داش الغرفه شو تبيين ..

ساره ::

سيف انا يوعانه وتعرف خاطري في شووو؟؟؟؟

سيف ::

يووووعاااانه الحين ؟؟؟انزين دشي المطبخ .. والا خلااااص عرستي ما بدشين مطابخ..
ساره ::
سيف عن المصاخه منو له خلق يدش المطابخ الحين ..يله اطلب لنا بيتزا خل ناكل وااايد يوعااانه ..والله لو في حد يطبخ الحين بريااني جاان طلبت ..

سيف::
لحووول لها الدرجه يووعااانه...انزيين ..منو بيدفع هههههههههه..لاااا اسووولف الحين بطلب وبيي اتعشا معاكم ..وابااكم تخبرووني عن الغراشيب اللي بالملجه ..وشوو قالواا يوم يولنا بالاستيج ..
كل شي انزين ..

ساره ::
هههههههههه انزين ويا ها الرااااس ..بس اطلب بسرعه ترى انا ميته يوووع..
...............
وعقب ما طلب سيف وتعشا هو وخواته وتمواا يسولفوون الين الساعه 3 ونص وكل واحد رد غرفته وساره استعدت للنووم ..
ومن حطت راااسها بسرعه رقدت ..وشويه تسمع موبايلها يرن ..وتغصصت منو ها الحشره ليكون سيف او عليا والله لاذبحهم ..وبالغصب رفعت راسها وبطلت عيونها ..وكانت مره داااايخه وتبى ترقد.
ومدت ايدها تحت المخده وسحبت موبايلها ..وتمت اطالع الرقم بنص عين والعين الثانية مغمضه..وما عرفت الرقم ..رقم غريب اول مره تشووفه ..وردت ..
سااره بصوت مبحووح وفيه رقااد:
الوووه..
خليفه ::
هلا بها الصووت والله ...
ساره انصدمت ..ما عرفت صوته في البدايه ..لكن استعوبت الامر ..واستحت ..وما عرفت شو ترد عليه..
خليفه::
ساره انا خذت رقمج من ابووج ..شو فديتج رقدتي ..توقعت ما ترقدين من الفرحه..لكن الظاهر اللي انا ما رقدت من ا لفرحه ههههههههههه

ساره استحت وقالت::

لاااه ..بس انا كنت تعبانه لانه من الصبح ناشه ومارقدت الا الحين..اخذت الرقم من باباه؟؟؟
خليفه وهو يقووول في خااطره ..يا حلااات باباه من شفايفج يا ساره وتعمد يقوول بكل جرأة::

هييه فدييتج خذته من عمي ..حبيبتي تبين ترقدين ؟؟؟
ساره قفطت وما عرفت شو تقوول واستحت ..شووو هااا من بدايتها حبيبتي وين حبيتني وانت ما تعرف عني شي..
ساره::
والله الصراحه ما اريد اكون دفشه ..بس والله انا ما اقدر ارمس الحين اصلا انا ارمسك الحين وعيوني مغمضه من التعب ههههههههه...
ذااب خليفه من نعوومه صوووتها وقااال:::

خلاااص فديتج ..اخلييج ترتاحين ..هذا رقمي وخزنيه عندج ..اوكيه غناتي ..وباجر ترى بنييكم نتعشى ..اكشخي حقي ههههههه مع انج ما تتوصين ما شاء الله عليج ..يله ما بطول عيج الحين ..
تامرين بشي فديتج..

ساره بصوت هادي::
لا ..خليفه ..تسلم ..
خليفه ::
الله يسلمج ..ما بقول سوري على الازعاج بها الوقت لانج مرتي ..وبحشرج اي وقت ههههههههه
يله فديتج تصبحين على خيير..
ساره::
وانت من اهل الخير ..
..........................
ساره تمت تفكر وتفكر ..خليفه دمه خفيف واايد ..وحبووب ...وكله يتفداني ..ههههههههه والله انه فنتك ها الرياااال..
وما قدرت تفكر وااايد لانها داخت من التعب ورقت من خاااطرها ...

اليوم الثاني في ابو ظبي ..الساعه كانت 11 الصبح ..عبدالله بعده منسدح في شبريته ويطالع السقف ..ويفكر في ساره ...وخليفه ..وفتح موبايله على الصور...وتم يطالع صوره ساره ..ويقول في خاطره ...خلاااص ساره استويتي حرمه ربيعي ..وحس بغصه في قلبه ..وما قدر يتحمل وبند الموبايل وشل بعمره ونزل تحت عند اهله ..وسمع ضحكه امه وابوه على رمسه حمده..

حمده.::
والله باباه انت ما تعرف البنات كيف يرقصووون ..والله يضحكوون ..اونه جييه يهزوون لوراااء....

وقامت تقلد البنات اللي رقصن في الحفله امس..وامها تضحك عليها ..وابوها يضحك عليها ..ووصل عبدالله وشافها وهي تقلد البنات ..ورفعها وهي مب حاسه فيه ..وتعلقت في رقبته عسب ما اطيح..
حمده:::
ههههههههههه عبدالله نزلنييييييييي بطييح ..ماماه بابااااااه شوووف ولدك...
ابو عبدالله::
دوااج مسوده الويه...عبدالله تم معلقها جييه الين اتأدب وما تقلد بنات العرب..ههههههه
عبدالله وهو يحاوليندمج وياهم ::
ههههههههههه ومنو قال اني بنزلها تحت انا بخلييها فوووق معلقه ..عشان اتادب ..
حمده::
مامااااه خلييه ينزلني تحت بطييح ..هههههههههههههههههه
وتمت تضحك لانه عبدالله تم يدغدغها ...ونزلها وهو تقوووله ::
توووبه والله تووووبه ههههههههههههههههه ما بقلد حد هههههههههههههههه توووبه
واولما نزلت عقت بعمرها في حضن ابووهاا اتدلع ..
عبدالله ::

انتي يا البزيه قوومي من الوااالد استحي استويتي حرمه اشطولج وبعدج تعقين عمرج على ابوج..

ام عبدالله::
بسم الله على بنتي بعدها ياااهل فديتها خلها يا ولدي اتدلع علينا ..اذا نحن ما دلعناها منو بيدلعها..
حمده:
فديييت ماماتي انا والله اممممواااااح...
ويلس عبدالله عدااال ابوووه ...وصبت له امه قهوه وسكت ..وقالت له امه::
هاا يا ولدي عبدالله ما شاء الله على ربيعك خليفه ..من دش القاعه وهو عينه ما خازت عن مرته...وهي ما شاء الله عليها قمر لا اله الا الله ..واهلها عرب ما عليهم كلااام ..
عبدالله ما علق ..وتم يطالع امه وهوو ساكت اونه يشرب القهوه ..وكملت امه..
شو رايك نخطب لك اختها ماشاء الله عليها قمر صح هي صغيره بس حرمه ..شو رايك بو عبدالله ..
عبدالله ::
لا لا لا شو اختها ما ابا ..منو قالج اني ابا اعرس اصلاااا..
وطالعه ابووه وقال له::
يا ولدي لازم تعرس ..طالع ربيعك ما شاء الله طاح على عرب ما عليهم كلااام...واذا اخت البنيه ما مخطوبه نخطبها حقك قبل لا يخطبها حد ثاني ..
حمده::
هييه عبدالله الله يخلييك ..وناسه انت وخليفه تاخذووون خوااات والله حلووو..
عبدالله ::
جب انتي ويا راااسج حق شوو تدخلين برمسه الكباار هاااا جب ولا كلمه..
حمده زاغت من اخوها ليش عصب عليهااا..وسارت صوب امها وطاحت في حضن امها..
عبدالله حس انه سخيف ...وقاااال عشاان يلطف الاجواء::
حمدوووه ويااا راااسج انا ما بعرس الا عقب ما اطمن عليج انج عرستج ..ما اباج اطحين في جبدي ابتلش فييج هههههههههههه
وحط الفنيااان وقاال بسرعه قبل لا يرمس ابووه::
السمووحه بسير اسبح والتجهز لصلاه اليمعه ..
وصعد بسرعه فوق لغرفته ..عسب محد يرمسه في اي شي..........

[هنوف الروح]

دخل عبدالله غرفته ،، وهو وااايد ضااايج من رده على اهله ،، وتم يدور ويتحرك مره عند الكبت ومره عندالتسريحه وهو مب عارف شو يسوي ،، ويلس على شبريته مره ثانيه ،، ومسك موبايله وبطل الصور وفتح صوره ساره ،، وتم يطالعها ،، وهو يفكر فيها ،، خاطري اعرف شو سويتي امس ساروتي خاطري اعرف شو لبستي وكيف تعدلتي ،، اااااااااخ يالقهر ..تحيدين اول كيف كنتي تخبريني كل شي ،، وين سرتي وشو لبستي ،،حتى يوم تاكلين تخبريني شو كليتي ،،،والحين كل ها حق خليفه ،، كل اخبارج وعلوومج حق خليفه آآآآآآآآآآآآآآآآآآه وفوق هذا كله انتي بكبرج حق خليفه،،، وتم يطالعها وهي مبتسمه ،،فدييتج يا ساره ..يا حظ خليفه فيج ..وبند الصوره ..وحط الموبايل حذاله..وقام يجهز عمره للسبوح الا شويه ورن موبايله ...وكان خليفه ..حس عبدالله بتأنيب الضمير مره ثانية ...كيف يقدر يخون ربيعه بها الطريقه الحقيره ..كيف لين الحين يحتفظ بصوره ماله حق انه يشوفها ،، ورده للواقع رنه الموبايل ..ورد على خليفه وهو مسوي نفسه مستانس وعادي الامر عنده ::

الووووه هلا هلا هلا والله بالمعرس ..خشمك يا رياااال ..وين امس دشيت القاعه وما بغيت تظهر ههههههههه

خليفه::
ههههههههههه هيييه هييه كلني برمستك ..المفروووض انت تتصل وتبارك لي يالهرم ..خشمك..
عبدالله يلس على شبريته وغمض عيونه وهو يقول في خاطره ابااارك لك ..على شو على موتي ..وقال :
اونك عاااد شوو كل يوم هوو ..الناس تبارك مره وحده بس ..وانا كل ما اشوفك ابارك لك !! شوو ويين تبااا..هههههههههههههه

خليفه::
اااخ يالهرم هذا وانا من امس يالس ابقق اعيوني في الغراشيب انقيلك غرشوبتن تذبح لكن انت ما تستااهل ..خلاااااص سير دور لك حد غيري ايوزك..
عبدالله ::
هههههههههههااااااي لاااا حبيبي وصلني الخبر ..قالولي ان عيونك ما خاازت عن الحرمه اممممممممممم فشلتنا ا خلفوووه حتى حمده رمست عنك هههههههههه...

خلييفه::
فدييتها حمده والله امس كانت مثل العسل ..بغيت اكلها من حلاااتها ..تدلع علي وانا مااروم اقول شي ..لااا وحسيت الحرمه غاارت منها بعد ههههههههههههههههههه
عبدالله قلبه دق بسرعه يوم عرف ان حمده شافت ساره ::
هههههههههههههههه وين تباا خلااااص انسى حمده ..عقب ما ملجت على غيرها لا تييب طاري اختي على لساانك..خونت فيها وخذت غيرها ..
خلييفه::
ااااوووهووو عبووود ترااك حشرتنا بختك حمدوووه ..يله بخلي طروووق يا خذهااا ههههههههه المهم بخبرك شي ..
عبدالله ::
هااا قووول يالمعرس ..مشكله انت اليوم معرس منو يرووم يرمسك بعد اليووم...
خلييفه::
خخخخخخخخخخخ عبووود ترى انا اليوم ساير العين مع الاهل ..اهل الحرمه مسوين عزيمه على شرف سمونا الكريم هههههههههههههههه..وتبي الصج انا من الفرحه بطييير
عبدالله :
مشكله والله حاله باادي وطاح بعصيده..الله يعينها بنت الناس عليك ..انزين يا بوي سير بس لا تفشلنا خلفووه اثقل شوي انزين ..
خليفه ::
ههههههههههههههههههه....

عبدالله وهو مستغرب من خلييفه ليش يضحك وما رد عليه وشويه الا استوعب الموضوع وقال بسرعه ::
خلفوووه والله ان ما داومت بااااجر لاذبحك...انت خذت اسبوع اجازه بسك عاااد ..
خلييفه::
ههههههههههههههههه يا عيني على اللي يفهمني ..
عبدالله ::
خليفه من صجك ما بداااوم بااجر ..شوو اجازتك تنتهي الخميس واليوم يمعه وباجر الدواام ..تعرف انا ما يخصني فيك لا اعرفك ولا تعرفني ..
خلييفه::
ياالله عاااد عبدالله انا ربيعك وانت ربيعي..
وكمل عبدالله عنه::
ونحن ربع ادري الاسطوانه مالت كل مره ...بس لاااااااازم اداوم شو تبا ..تاخذ اجازة ما بيعطونك والله لو تذبح عمرك ...
خليفه::
اوووووه والله ترااك ذبحتني .انزين شوف انا بسير اليوم العين متى ما رديت من العين وحسيت فيني حيل اداوم ..بداوم ..وانا ما قدرت عااادي اييهم متاخر ساعتين ،،يا خي ما اقدر تخيل بسير العين وبنرد دبي وبالباجر بتحرك بوظبي ..الصراااحه تعب ..
عبدالله::
لااااه ..قوول والله ..تعب ..الشيخ خليفه شو رايك ما اداوم ها الاسبوع بعد..
خليفه::
هههههههههههه والله لو بايدي ما ادوااام واتم في دار الزين واقابل الزين ..اااااخ يا قلبي ..

عبدالله وهو متغيض من ربيعه::
جب جب جب اسطلب وغد رياااال عاااد شو ها الرمسه الماااصخه..شوووف واسمعني عدل تسير العين وترد الاهل وترد بو ظبي ان شاء الله حتى لو كانت الساعه اربع الفير ..تنش في بوظبي متاخر احسن بدل ما تنش في دبي متاخر..سمعتني والا لاااااا
خلييفه::
حاضر سيدي...ويا رااسك خلااااص بداااوم بداااوم امري لله ..مالت قلت يمكن عشاني عريس يديد بتراعوني ..مااالت عليكم وعلى ادارتكم ..هههههههههههه
عبدالله::
طبببببببببعااااا مو منك تكبرت علينا ..قلبك في العين الحين ..مب على الشغل شرات اول..
وسمع عبدالله صوت ام خليفه تناديه وهو يرد عليها انه بينزل عقب شوي..
خليفه:
انزين يا عزيزي ...انا مظطر اخليك الحين ..بينا اتصاال ..يمكن عقب ما ارد من العين ارمسك ..يمكن مب اكييد ههههههه
عبدالله::
والله طاح كرتك يا عبدالله واستويت في المرتبه الثانيه..ما علينا الله كريم..
خليفه مره ثانيه امه زقرته وسلم على ربيعه وقاله ان بينهم اتصال وبند عنه..

تم عبدالله يطالع الموبايل ..يا حظك يا خليفه ..ساير عند حبيبتي ساره..كيف قدرت اجاريك في الرمسه ..ان شاء الله انك ما حسيت بشي بس ..الله يستر..
في العين ...
عليا محتشره على ساااره :::
سااارووه عن المصاااخه عاااد قومي بنسير الصالون ..
سااره وهي تنشف شعرها عقب ما سبحت ..ولابسه جلاااابيه بيت خفيفه ...
لالالالالالالالالالالا مااابي بس عااااد ملييت من الصواالين ..ما ابي انا بعدل عمري..والا انتي شاكه في قدراتي ...
علياا::
لا فديتج وين شاكه في قدرااتج ..ادري انج تعرفين تعدلين عمرج ..لكن تعديل الصالون غير ...بعدين الريال اكيد يبا يشوفج اليوم ..يله اعااااد خلينا نسير ..
ودشت ام ساره الغرفه ::
شوو بلاااكن شاالات البقعه على رووسكن ..عليوووه شو عندج محتشره ،،
عليااا::
ماماه شوفي بنتج هذه ما تبا تسير الصالون ..صدق انج بنت فقر مب مالت عرس..
وهني كفخت ام ساره عليا على راااسها وقالت ::
جب ويا رااسج شو ها الرمس الماصخه يا لهرمه ..بنتي انا بنت فقر ..تبينها شراتج ..مطيوووره على العرس..
سااره ضحكت على اختها لين قالت بس ..وعصبت عليا من اختها ونشت تبي تصفعها وهني ركضت ساره وهي تضحك وصعدت على السرير وهيو تقوول::
والله يا وييلج ان قربتي مني ترى والله ازقر باباه ..ماما طاعييها شو تبي تصفعني ..
وماكملت ساره رمستها لانه عليا ركضت وراها وصعدت فوق الشبريه ويرت ساره من شعرها وساره تضحك وتصارخ ::
ااااي عليوووه يالماااصخه هديني ..ترى والله ادوووسج ..ااااااااااااااي
وهني دش سيف على صوتهن ..واول ما شاف المنظر نقع من الضحك ..كانت امه اطالع البنات وهي حاطه ايدها على راسها جنها تقوول ما شي فايده ..وهو ظهر موبايله وشغل الفيديو وسجل الحركات الغبيه اللي تسويها خواته ::
عااااشوووا هذي ضراابت البنااات ..هههههههه ترى ما تعرفون اضاربووون ..عليااا هييه يري شعرها ..سااره مالت علييج شووو افااااا عليااا ادووسج رفسيها ..دااافعي عن عمرج وااابوي علييج ..خخخخخخخخ
ام ساااره قالت ::
انتن ما بتادبن غير يوم ازقر حمد ..انا برااويكن ..
وبسرعه ظهرت ام ساره من الغرفه وسارت تزقر حمد ..واول ما سمعت ساره واختها اسم حمد اعتدلن ..
وسيف نااقع من الضحك ..
ساااره كانت حالتها حااااله ..شعرها منكوووش وحالتها بليه ما تقول عروووس..وعليااا شكلها كان فتوه وتمت اطالع اخوها سيف وهو مره طايح من الضحك عليهن ..وطالعت عليا ساره وانقهروو من اخوهن وبسرعه كل وحده شلت بايدها مخده وطاحن فيه ضرب ..وهو يضحك ويقوول::
لا دخييلكم بتعوروني بصب دم منكم ..خخخخخخخخخخخخخ
وبسرعه قام سحب المخده من ايد ساره ومن ايد عليا ومسكهن الثنتين بايدينه ودزهن بقوه وطاحن على الارض ..وهو يضحك عليهن ..
اقوووول سيرن تعلمن كارتيه عقب تعالو ضاربوني ..شو ها الضراابه ..ضرابه يهااال ..تبوني اعلمكن كيف تضاربن ادفعولي وبعلمكن..خخخخخخخخخخخ
وسار وخلاااهن وهن مستغربات منه ...وكيف طيحهن بسرعه وبسهوله وهن ثنتين ..وتموا ساكتين ..واتذكروااا كلااام امهن انها بتزقر حمد ..وبسرعه قامن وعدلن الغرفه وكل وحده تمت تمشط شعرها ..عليا لبست وقايتها اونها عاااد مؤدبه..وساره تمت تمشط الشعر ..
ونسوا ان حمد اصلا في بيته ما كان في البيت عندهم وامهم كانت تهددهم بس عشان يسكتن ....والله حااله..

[هنوف الروح]

على الساعه 8 العشاء كان بيت راشد بن حمد الظاهري خليه نحل ...وصل خليفه وامه واخته ومعاه اخوانه وحريمهم وخواته والريايل ..
والحريم سارن ميلس الحريم والريايل في ميلس الريااييل..والكل محتشر والكل يبارك ..والكل يتريا العروس تنزل وتسلم على الناس..

ساره في غرفتها ..ومعاها علياا...ساره كانت لابسه يشمك وااايد حلو ..شرته من بوظبي ..وفلت شعرها ..وعدلت عمرها برووحها وما سارت الصالون ..وشكلها كان وااايد حلوو.ولبست العقد اللي خليفه لبسها اياه في الملجه ..عقد المااس وااايد رهييب ..وتعطرت وتمت اطالع نفسها في المنظره ..وسالت اختها عليااا..

ساره::
علياا شو راايج حلو المكيااج ..احس لااازم ازيد الجحال شويه صح ..لازم اثجله والا شو رايج..
عليااا نشت اطالع اختها ووتتمعن في الجحاال .وقالت ::
لا ساره وااايد حلوو مظبووط والله ..بس لو تزيدين البلاااشر يكون احسن ..شويه بس مب واايد..
وزادت ساره مثل ما قالت اختها ..واخر شي تمت اطالع عمرها وهي راااضيه..
ويلست تتريا امها تزقرها ...
وقالت حق علياا::
علياا تدرين ..فطووم اخت خليفه حبووبه ..
عليا وهي يالس اطالع مكياجها اللي سوته على خفيف حسب توصيات امها ..

يعني ..لله لاباس فيها ..
ساره وهي تضحك وتغمزها ::
يله عااااد عليوووه خلي عنج الحركات ..ترى البنيه زينه ..وحبوبه ..شوفي كيف رقصت امس ويااج وكنتوا الصراحه مسوين ديتو روووعه ههههههههههههههه
عليااا ويلست عداال اختها ::
هييه والله الصراحه عجيبه في الرقص ..الصراحه هي ما فيها شي ..يعني حبوبه ..
ساره تمت تضحك على اختها وقالت لها ::
انزين طلبتج عليا ..لا تخلينها الليله تيلس بروووحها ..فدييتج ..ترى ما بقى غيرج انتي وهي والباقي كلهن معرساات ..يعني عيب نخليها برووحها ..وان بغيتي تصعدين الحجره ..خذيها ويااج ..انزين لا تخلينها عند الحريم..شو بيقوول عنا الرياال عقب ..
عليااا قاامت ::
هيييه طبببببعااااا ما نبا الريل يزعل ..طااااااح كرتج ياا علياااا .,,خلااااص الشيخة ساره ..بنحطها في عيوونا ...وين ما بسير بخذها ويااي ,,حتى المطبخ ههههههههههههههخخخخخخخ

ساره ::
عليا يالسباله عن الحركات انزين ..هههههههههههه

ودشت ام ساره وقالت لها تنزل تسلم على عمتها وحمياتها ..ونزلت ساره واول ما وصلت الميلس ..كل الحريم قامن ويببن حريم خوانها وامها وعمتها وخوات خليفه والكل ارتبش ..حتى ان صوت التيبيب وصل الين ميلس الرياااييل وشل قلب خليفه معاااه...
وتم الكل يسوولفوون ويباركون والكل يتعرف على بعض زين ..وسيف رابع راااشد اكثر ..وكان بينهم ووايد قواااسم مشتركه ..واستاانس سيف على راااشد ونفس الشي راشد دش مزاجه سيف ..واللي يشووفهم يقول ربع من سنين ..من كثر السوالف اللي قالوها ..
وعلى الساعه تسع ونص حطوا العشا ..والكل تعشااا..وشربوا القهوه والشاي وكل شي كان حسب الاصول ..
حمد وطارق تفاهموا اكثر ..يعني لانهم نفس السن تقريبا ..ونفس التفكير ..ورمسوا عن شغل كل حد فيهم ..
من صوب الحريم ..السوالف اكثرها حش ..ههههههههههه..بنت فلااانه شو كانت لااابسه ..ومنو اللي كانت لابس ازرق وقامت ترقص ..ومن وين فصلتوا فستان العروووس ... ومن هاالاموور..وساره توزع ابتسامات ..وترمس بخجل ..وعليا وفطووم شلن نفسهن وسارن فوق غرفه علياا..وساره يالسه عداال عمتها ام خليفه ..وهي تسالها عن الملجه واذا في شي نقص ..وساره تجاوب بادب واحترام ..وامها اطالعها وهي يالس تقرى وتكبر على بنتها عن حد يصيبها عين ...

ومن صوب الريااييل ..خليفه يطالع الساعه متحرقص ..الساعه قربت العشر ونص ..يبا يشووف حرمته ..يبا ييلس وياااهااا شويه ..
ومب عارف كيف يخلي طارق ينتبه له ..كان مندمج مع حمد بالسوالف ..وابو ساره مندمج مع عم خليفه ..وقام خليفه ..وبطل موبايله وفتح الرسااايل ..وكتب رسااله حق اخوه طارق اللي يالس في الجهه المقابله له في الميلس..
طارق مندمج في الرمسه مع حمد الا شويه يرن موبايله رنه المسج..وسحب موبايله من جيبه ..وهز راسه لحمد انه عن اذنك شويه بشوف المسج..واول ما بطل المسج بغا ينقع من الضحك ..

(( طالعني لا افرك بالفنيان اللي في ايدي ))

ورفع راسه وطالع اخوه اللي ابتسم له واشر له براسه تعااال..
واستأذن طارق من حمد وسار ويلس حذال اخووه ..يلس طارق ومب عارف كيف ايود عمره من الضحك..
طارق::
يا خي انت ما تيووز عن حركاااتك شوو هااا الحاااله هههههههههه

خليفه::
والله شو سويبك اشووفك اندمجت مع حمد مره ونسيت انه عندك اخو فقيرن مسكين يبا يشوف حرمته ..
ياخي طالع الساعه قربت11 وانا الصراحه ابا اسلم على الحرمه ومب عارف كيف اقول لعمي ..شوفه كيف مشغول مع عمي علي بالرمسه..شو اقول له ..خبرني..
طارق::
والله ماادري يمكن مايخليك تشوف بنته ..وين بتشووفها الحين .خلاااص خلها مره ثانيه تراك بتزورهم نهااايه الاسبوع ومسموح تشووفها ..
هني تحفز خليفه وعدل يلسته::
وانت اتحراني ياي العين ازط واجابل حمد وابوه ..لا حبيبي انا ياي اشووف مرتي ..بتقووله والله انا اقول
طارق من شاف اخووه جييه ..ضحك عليه وكسر خااطره ..
انزيين انزيين ..مشكله عيااال الفقر ..برمس حمد وبخليه يرمس ابووه ..لا تفشلنا ..اركد..
وقام طارق ورد عند حمد وقال له السالفه..وسكت حمد شويه ..وطالع ابوه ..ويوم شافه ابوه يطالعه ..حس انه في شي ..واشر لولده انه يلحقه ..وظهروا برى الميلس ..
حمد:
ابويه خليفه يبا يسلم على ساره ..شو راايك ..
ابو ساره::
شو بعد يسلم عليها الحين ..لا حول ولا قوه الا بالله ..وما نقدر نمنعه بعد يا ولدي..الساعه جم الحين ..شوف بنخليه بس عشر دقايق يسلم عليها ..وعقب يرد الميلس ..وخل سيف ويااهم ..انزين ..
واتفقوا على ها الشي...واتصل حمد على امه وخبرها السالفه ..وهي خبرت ساره ..وقامت ساره وجددت مكياجها وتعطرت ..وقلبها يدق ويدق ..ويمكن اطمنت لانه سيف وياها ما بيسوي حركاته لانه اخوها موجود..
وييين يا سارااا ما تعرفين خليفه زيين هههههههههههه..

[هنوف الروح]

ودخل سيف مع خليفه عند ساره في الصاله الداخليه للبيت وكانت ام ساره معاهم ..وسلم خليفه على عمته وبارك لها ..وتم شويه يسولف ..وشويه ظهرت عنهم وتم سيف يالس يطالعهم ويبتسم بخبث وهو حااس انه مثل العزوول بينهم ...لكنه مستانس بها الوضع..
ويلست ساره عقب ما سلمت على خليفه ..وطبعا خليفه اول ما شاف ساره ذاااب من جمالها ..كاانت ووااايد حلوه..اليشمك اللي لابستنه ..مع الشيله الخفيفه ..وشعرها فالتنه وواصل تحت جتفها طبقاات واايد حلوو..ومكيااجها ..وعطرهااا ..
ويلس حذالها ..وطالع سيف اللي اول ما طاحت عيونه على خليفه ابتسم وشق الحلج ..
وخليفه في داخله يقوول كيف اتخلص منه..ودشت الشغااله ومعاها العصيير وحطت جداامهم ..
خليفه قال لساره::
شحاالج ساره ..عسااج بخير..
ساره قلبها دق بقووه..مرتبكه من كل شي ..من قرب خليفه منها ..ومن وجود اخوها معاهم ..ومب عارف كيف تتصرف..وهزت راسها وابتسمت وماطالعته في عيونه وقالت ::
الحمد لله بخير ..انت اشحالك..
خليفه ::
بخيير يعلج الخيير ..
وسكتواا........وطالع خليفه سيف اللي يالس ومستمتع بالللي يصير ومستانس بالاحرااج الي مسببه لاخته وريلها ..وهني عاااد يت فكره في راس خليفه..
خليفه::
سيف ماشاء الله اشووفك انت ورااشد طايحيين سواالف مع بعض..شوو تعرفون بعض من قبل شوو..

سيف::
يعني شفته مره مع واحد من الربع في دبي ..وتذكرته ..ترى هو يدرس نفس التخصص مالي ..وتقريبا هو سابقني بسميتر وااحد بس ..
خليفه::
هييه ماشاء الله عليه رشوود دحييح ...ترى انا واعدنه اشتريله رنج سبورت اول ما يتخرج وييب امتيااز ..
وسكت خليفه وطالع سيف ..وسيف من سمع رنج سبوورت عوره بطنه ..هو خاطره في رنج ..
وكمل خليفه بكل بروود::
هو يقول يبا نفس الرنج مالي لكن انا افكر اشتريله وحده غير ..انت شفت الرنج مالي صح ..
سيف::
الا شفتها ..تعرف انا بعد بشتري رنج لكن الوالد مصمم اني ما شتريها الا عقب ما اتخرج ..وشكلي ما بسوق الرنج الا عقب ما اشتغل ..
خليفه ظهر مفتاح الرنج من جيب الكندوره وفره على سيف اللي بسرعه لقطه..
دووك مفتااح الرنج ولا تحط في خااطرك ..خذ لك لفه انت وراااشد ويوم اتخلص تراني مب ساير مكان ..
سيف تم يطالع المفتاح ويطاع ساره االلي تقوله بعيونها لاااااتسير ..لكن ما قدر يقاوم اغراء الرنج ..وقال في خاطره ..ترى هو ريلج شو بياكلج يعني..وقال لخيلفه::
انزين بس ما ناخذ لفه ..بس بشوف كيف شكلها من داخل ..وبركب راشد وياي ..
وقام بسرعه ولا تريا حتى رد خليفه ..اللي تم يضحك عليه ..
ساره بلعت ريقها يوم لف خليفه صوبها وتم يبتسم ..وقااال بصوت هادي وهو يرفع حواجبه ::
وشخبارها الشيخه ساااره..
ومد ايده عسب يمسك ايدها ..وارتبكت ساره وانعفست ..يااربي ليش ارتبك جييه معاااه ...
خلته يمسك ايدها ..وقالت له::
بخيير..تعرف باباه لو عرف ان سيف خلانا برحنا بيعصب عليه ..حراام عليك ..
ضحك خليفه وقرب اكثر من ساره ..اللي تبعد كل ما قرب خليفه..
هههههههههههههههه لا بيعصب ولا شياته....مب انا ريلج وانتي مرتي ..خلااااص انتهت السالفه..بعدين شو بكلج انا مثلااا..
ساره وهي ما تقدر اطالع خليفه في عيونه ..::
لا ااا لااا مب القصد ...بس بس يعني بيعصب..
وقال خليفه ::
عيل لو دري شو بسوي اكيد بيعصب اكثر...
وابتسم وهو يتريا رد فعل ساره اللي قالت وهي اطالعه :
شو بتسوي..
وبسرعه وبدون ما تحس طبع خليفه بوسه خفيفه على خدها ..وضحك عليها يوم لصقت في الكنبه وزاغت ..
خليفه::
ههههههههههههه تعااالي وين تبين ...هههههههههه تعااال والله في خاطري من امس بس كنت ميود عمري ...تعالي والله ما بعيدها تعالي خلااااص عنبوه شو ريلج انا ..
ساره وهي منحرجه وويها استوى احمر من المستحا:
خلييفه عن الحركاات ترى والله اعصب انزييين ..بعديين لا تعيييدهااا والله ترى بزعل..
خلييفه ضحك منربكه سااره وقااال ::
انزييين بس تعاال عندي ..تعااالي اشربي عصير ..هههههههه
وقرب من الطاوله ..وكان فيها قلااسين عصير وخذ واحد وشرب منه ونفس القلااااس مده لساره وهو يطالعها ..وقال ::
شربي ساااره ..
طالعته ساره وهي تقوول في خاطرها شو ها الحركاات ترى قلاااسي موجود..وقاالت له:
ما عليه خليفه بشرب من قلاااسي كمل انت عصيرك ..ومدت ايدها عسب تشيل اقلاااس الثاني ..لكن خليفه ما خلاااها ..وقال لها وهو يطالعها في عيونها ::
لا شربي من قلاااسي ساره ..
وطالعته ساره ..وفهمت قصده ..وابتسمت له بكل هدووء ..وسوت حركه جريئه بس عسب تقهره ..يبي يحرجها هي الحين بتحرجه..مدت ايدها صو ايده وخذت القلااااس وتمت اطالع وين مكان اللي شرب منه وقامت وشربت من نفس المكان ..وطالعت خليفه ..اللي شويه طيير من الفرحه..
وقااال لهااا وهو بياكلها بعيوونها::
فديييت اللي يشربون عصيري انا ..
وضحكت ساره عليه ..وتم يطالعها ..وهو مومصدق عمره ..هذه اللي يتمناها ..وحده حلوه وبنت ناس وذكيه ..فهمت شو يبا منها ..كان يبا يتأكد شو بتجز منه اذا قال لها اشربي من نفس قلاااسي او لااا..
فدييتج يا سااره ..وقرب اكثر منها ..وساره تبعد لين لصقت في اخر الكنبه..وخليفه قرب وااايد منها ..
وقااالت ساره عشااان تكسر الصمت اللي بينهم ::
خليفه ..شخباارك..بعد..
خليفه وهو يسحب شيلتها ويلعوزها ..::
تبين تعرفين اخبااري ..صدقيني لو قلت لج بتفلعيني بالقلاااس على رااسي هههههههههه
ساره استحت من حركاته وقالت له::
خلييفه بسك عاااد شو تبا خل الشيله مكانها ..لا تيرهااا..لحووول ترى والله ازقر ابووي الحين..
ضحك عليها خليفه ::
ههههههههههههه زقرييه ..شو فيها رياال يبا يطالع شعر حرمته ..شووو حرااام والا عيييب..
ساره ::
خليييفه بسك عاااد ..لو دخل سيف الحين شوو بيقوول ..الصراااحه انت وااايد جرئ...بسك عاااد ..لاتسحب شيلتي ..
ودزته ساره ..وبدل ما يتحرك لصق اكثر ..وشمت ريحه عطره ..
واستحت ...خليفه استانس يوم ذزته ساره ..وعيبه الوضع ..ولما حاول يمد ايده ويبي يلف ويهها صوبه .الا سمع دق على الباب..وبسرعه رد مكانه وساره عدلت شيلتها ..ودخل سيف ..وهو مرتبش وقاال::
الصرااحه يالنسيب ...الرنج مالك ..طررررررررررررر...انا بشتري وحده شراتها ..جريب ان شاء الله.
وسكت يوم شاف انه محد رد عليه..وخليفه يعدل غترته وسااره اطالع ايدينها ..وقال في خاطره بلااااهم هاييله ..وما اهتم وكمل كلااامه..

خليفه الوالد يباك في الميلس ..يله سرينا ..بسك اليوم خخخخخخخخخخخخخ الزياره الثانيه الاسبوع الياي خخخخخخخخخخخخخخخ
وضحك خليفه على سيف وحركاته ..ولف صوب ساره ..وسيف اونه عنده ذووق وخلاااهم ووقف عداال الباب اونه عاااد ما يبا يسمع شي..
خليفه::
اووه شو ها الحااله ..اقووول برمسج اليووم فالييل لا تبندين موبايلج ..ترى بشخط من دبي وبييج الين هني انزييين..
ساره وهي تبتسم له ::
ان شاء الله..بس عااد لا تاخر لاني ابا ارقد..ههههههههههه
خليفه وهو يطالع سيف ويتاكد انه ما يشوفه ::
ترقدين..انتي سويها بس وبتشوفين شو بسوي فيج الاسبوع الياي ههههههههههههه
ومد ايده وحطها على خصرها وبسرعه باسها على خدها ..قبل ما يشوفه سيف..وقال بصوت عالي اونه ما سوى شي..
يله مع السلامه ..
وساره مصدوومه منه ومستحيه..ومب عارفه شو اتسوي ..وقلبها شويه بيظهر من مكانه ..
وتمت بروحهافي الصاله ..ايدينها كانت ترتجف ..اول مره تحس بها الاحساس ..وغطت ويهها باديينها ..وتمت تبتسم في خاطرها ..وتقول ..ويا رااسك خليفه شو ها الحركات..عنبوه ..هذا اول يوم وجييه تسوي فيني ..عيل لو تعودت عليك شو بتسوي ..ههههههههههههههه وتمت تضحك عليه ..وبدون ما تحس قالت ::
فديتك خليفه..
وقامت وسارت الميلس عند الحريم ..وسمعت التعليقات من خواته وحريم خوانها ..وتمت تبتسم وما قالت شي..

[هنوف الروح]

الوقت بسرعه ..واهل دبي ردوا لدارهم ،، وعلى الساعه 12 ونص بالليل كان البيت ما فيه حد غير اهل ساره ،، واجتمعوا اهل ساره في الميلس الداخلي للبيت وكلن يسولف عن اليوم ،،حمد يمدح في طارق ،، وابو ساره يمدح في عم طارق علي،، وسيف مستانس على راشد ،، وطبعا سيف تم يترجى ساره انها ما تخبر ابوه انه تركهم بروحهم في الميلس وساره ذلته الين ما وافقت ،، والكل يسولف وشويه قام حمد واستاذن وشل عياله وحرمته ورد بيته ،، وشويه شويه الكل قام ينسحب وما تم غير الثلاثي المرح ..ساره وعليا وسيف،،، عليا شدتها سوالف اخوها عن ربيعه راااشد ..ومن رمسته جدام ابوها من ساعه عيبتها شخصيه راشد ..بس ما حبت تبين ..وسيف كان مندمج وهو يخبر ساره عن رنج خليفه وشو كان داخله وساره طبعا مب فاهمه نص الرمسه اللي يقولها لانه يرمس عن شغلات في السياره هي ما تفهم فيها ...وشويه قاطعته عليااا ::

بسك سيف حشرتنا ترااك ،، عنبوووه يقول ولد فقر عمرك ما ركبت رنج ..

سيف ::
اقول عليا ذلفي حجرتج ..انتي شو فهمج بالسيايير ..

ساره ::
فديتك سيف بسك حبيبي ..يله نسير نرقد لاني صدق منتهيه ورااي سبووح والين ما اخلص بتكون الساعه قربت للثنتين..
تنهد سيف وقال::

هذا اللي ييلس مع بنات ..ما تعرفون غير اللبس والمكيااج ..واشيااء مهمه مثل السيايير ما تعرفون عنها شي ..ماااالت عليكن...سيرن رقدن ..
وضحكوا خواته عليه ..سيف حياته السيايير ..وصعدت ساره غرفتها ..وبسرعه سارت تبدل ملابسها وسبحت وردت تغسل شعرها من الاسبراي اللي كان فيه..وطولت في السبوح..ويوم ظهرت كانت الساعه وحده ونص تقريبا ..وتلبست وتمت تمشط شعرها ..وشويه رن موبايلها ..وعرفت انه خليفه وخلت الموبويل يرن شويه ويوم قررت اترد سكت الموبايل ..استغربت وقالت غريبه لي بند ..وتمت متردده تتصل او لااا .لا لا ما بتصل اذا يباني هو يتصل <<< حركااات بنااات ...
وكملت تمشيط شعرها وتكرمت << يعنني حطت كريم على جسمها ..وقامت وبندت ليت الغرفه واستغربت انه ما رد يتصل ..وقالت ليكون من صدقه بيرد العين ..هههههههههههه ضحكت ساره وهي تفكر ها التفكير ..وقاالت مو لها الدرجه عااااد...
واويلست على شبريتها واول ما بغت تتلحف ..رن موبايلها ..وقامت وعدلت يلستها وقلبها يدق ..خليفه يتصل مره ثانية ..

ساره ::
الووه
خلييفه ::
هلا والله هلاااا ..هلا بالزين هلاااا..شو تتغلين علينا ما تردين ...
ساره ابتسمت وحست باحرااج ..وقالت بصوت هادي::
لا والله مب قصدي ..بعدين مو من حقي اتغلى ؟!!
خليفه ..بيطيير من الفرحه وهو مو مصدق عمره ..
لاااه عاااد تتغلين علي انا ..خليفه ريلج ..حبيبج ...
وسكت خليفه يبا يسمع رد ساره ..وقلب ساره كان بيظهر من مكانه من سمعت كلام خليفه..وما عرفت شو ترد ..واللي انقذها ..انها سمعت عند خليفه صوت منبه السرعه عنده يرن ..شكله مسرع ..

ساره وهي تغير الموضوع ::

خليفه ليش انت مسرع جييه ..خفف السرعه عشااني ..مب زين تسرع..

خليفه فهم ان ساره غيرت الموضوع وما حبب يعيد السالفه هو يعرف انه يبالها وقت الين تتعود عليه::

انزيين والله انتو الحريم حشره ..الوالده من صووب وانتي من صووب ..ابويه نحن نعرف نسووق..

ساره ::
واذا تعرفون تسوقون خلاااااص يعني ...تخاطر بعمرك وعمر غيرك..خفف عاااد عشاااني والا ما لي خاطر عندك؟؟

خليفه وهو مستانس ::
تخاافين علي فديتج ..ادري انج تحاتيني ..خلاااص خففت السرعه ..لكن بشرط..

ساره ..هاا بدينا بالتشرط من الحين::
خير خليفه امر؟؟
خليفه ::
ما يامر عليج عدووو..بشرط انج ترمسين وياي الين اوصل بو ظبي..اتفقنا ..

ساره استغربت منه ::
وليش انت راد بوظبي الحين؟؟؟ مب سايرين دبي..؟؟

خليفه::
هييه فديتج ردينا دبي ..نزلت الاهل ..ولازم ارد بوظبي باجر دوااام ..وعندي واااحد يالس لي مثل ضميري ما يباني اطنش الدوام ..
ساره وهي تضحك ::
منوه هذا ؟

خليفة ::
ربيعي عبدالله ..مراات اقووله انا بخلي ضميري يستقيل وانت بعينك مكانه..ههههههههههه

ساره حست جنه حد عصر قلبها ..وحاولت تجاري خليفه في الموضوع::
هههههه زين والله عندك بع يخافون عليك ..
خليفه ::
هذا مب ربيعي ..هذا اخووي واعز من اخوي ..ودايما بتسمعين طاريه لاني انا وياه واااحد ..فلااا تغارين انزين هههههههههههه
ساره وقلبها يعورها وتحس بدموعها بتنزل ..وسحبت نفسها وما ردت عليه..
خليفه ::
بلاااج ساره مزجمه ؟؟ ما احيدج كنتي بخير يوم خليتج..
ساره حست انها فرصه ان موضوع عبدالله تغير وقالت::
لا مب مزجمه ..بس يمكن لاني سبحت وغسلت شعري والهوا بارد ..احس اني بردت شويه...
خليفه ما صدق يو قالت له ساره ها الكلااام..::
والله سبحتي عيل ما قلتيلي ..كنت بساعدج ههههههههههه
ساره انحرجت من خليفه::
لاااااه شكرا ما احتااااي مساااعده اعرف ادبر امووري بروحي..
خليفه وهو يهمس لها ::
صدق والله ..تعرفين ...يعني ما كنتي بتخليني اساعدج لو انا عندج ؟؟
ساره انحرجت اكثر وقالت في خاطرها لحووول جلب الاسطوانه خليفه..
ساره::
خليفه ما خبرتني شو قالوا اهللك عن العزيمه عسى بس ما نقص عليهم شي او قصرنا في شي ..
خليفه تم يضحك على ساره يوم غيرت الموضوع وقاال::

هههههههههههههههههه لا ما عليكم قصوور..ليش تغيرين الموضوع هااااا ..لكن اليوم انتي الصرااحه كااااشخه ..وريحه عطرج ادوخ الصراااحه
ساره ردت بخجل ::
والله صدق يعني انا حلوة ...
خليفه ::
الا حلوة ..الا جميله ما شاء الله عليج ..يا حظج يا ساااره خذتي واااحد وسيم وانتي حلوه اكيد عيالنا بيظهرون شراات ابوهم حلويين هههههههههه
ساره ::

لااااااه وليش ما يظهرون شرااات امهم يعني ..وبعدين انت وااايد خقاااق ..شوو يا حظي اني خذتك ..اصلا انت المفروض تحمد ربك اني وافقت ههههههههههه
خليفه ::
وانا اشهد الصراحه ..ما عليج كلاااام ..لااله الا الله ما شاء الله عليج ..اخاااف انظرج
ساره::
احم احم ترى انتفخ من الخقه ..هههههههههه
خليفه ::
فديتج ساره ..اقوول ساره ..
ساره::
هلاا تفضل ..
خليفه ::
المره اليايه يوم بييكم ..ما اباج تلبسين جلاابية ..انزين
ساره استغربت وقالت ::
ليش يعني شو تباني البس ؟؟
خليفه ::

ابااج تلبسين لي تنورة وقميص على ذوقج ..يعني بالمختصر ما با شي واسع ابا شي مرصص ههههههههه
ساره استحت وقالت له ::
بفكر ..
خليفه ::
لااا شو تفكرين..لا تخلين شي في خاطري ..وانا في خاطري اشوفج في تنوره وقميص ولو يكون القميص حمالاات او كت يكون احسن بعد هههههههه
ساااره وهي منحرجه ::

لاااااه والله حلوو وانت شو درااك بالكت والحمالاااات ؟؟؟
ضحك خليفه علييها ::
جيييه وين اتحرينا عايشيين ..حبيبتي انا من دبي دار الحي ..واشوف كل شي..

ساره وهي مغيضه منه ::
لاااااه تشوووف كل شي والله زيين ...
خليفه وهو يضحك::
بس انا احب اشوفه على حرمتي اكيد بيكون احلى واحلى ..
ساااره وهي تفكر شو تلبس من الحين ..
خليفه ::
وبعد في شي ثاني ...
ساره ::
خير خليفه تفضل..
خليفه ::
ما في داعي سيف يكون موجود ..رمسيه ..انا اعرف اني اتفقت مع ابوج على ها الشي لكن عشاني رمسيه لا يقعد لنا ما اعرف اخذ راحتي ويااج..
ساره ابتسمت وقالت في خاطرها دواااك::
لا لا لا ما اقدر اقوله ها الشي ..وبعدين باباه قال انه لازم يكون ويانا شو استحي انا اقوله لاتيلس لالالا ما اقدر..
خليفه::
افاااا ..انزين ما عليها انا بتصرف اعرف له سيف انا ههههههههههههه
سااره::
خليفه لا تسوي حركات ترى والله لو باباه درى انه سيف ما يقعد ويانا والله بينازعه ..حراام عليك ..
خليفه وهو يضحك::
يصير خير ..
المهم مثل ما قلت لج اباج تلبسين لي مرصص وحمالااات انزين ..
ساااره ::
بفكررر ..
خليفه وهو مغيض منها ::
تدرين لو ما لبستي اللي اقولج عليه بتندمين..
ساره وهي اتحداه ::
لاااا وشو بتسوي يعني ..لا تنسي اني في بيت ابوي ..وما ترووم تسوي شي..
خليفه بصوت هادي ::
لااااه ما ارووم ..متاكده؟؟
ساره قلبها دق من تغير نبره صوت خليفه::
هييه يعني ..يعني شو بتسوي مثلاااا..
خليفه وهو يضحك ::
شو بسوي ..تدرين انتي شو بسوي والا تبين تفاصيل ..
ساااره قاطعته::
لا لا شكرا ما ابا تفاصيل ..
خلييفه تم يضحك عليها وقال حب يغيض فيها زيااده ::
اقووول ساره فديتج ..شو لابسه الحين خبريني ..
ساره بسرعه وبدون تفكير ::
ما لابسه شي خليفه شو تبا تسأ..
وسكتت وهي تفكر في ردها وسمعت خليفه وهو ينقع من الضحك عليها وهي تحاول تصلح اللي قالته::
اقصد اقصد اني شو بكون لابسه يعني هااا ..والله انك حركاات خليفه
خليفه وهو يضحك::
انا اللي حركات ..انا فقيرن مسكيين ..سالتج سؤال عادي ..انتي االي جوابج ما كان عادي ..فدييتج انا ..

وتم خليفه يغيض ساره ويتحرش فيها الين ما وصل بو ظبي وهو يضحك عليها وعلى ربكتها ..

وما صدقت ساره انه وصل وبالغصب بند الخط ..وتمت اطالع الموبايل وهي تحس باحاسيس غريبه ومب عارفه توصفها ..

[هنوف الروح]

وتمر الايام ويبدا مشوااار التجهيزات للعرس ،، وحجز القاعه ،، والفرقه ،،طبعا خليفة حشر ساره كل ساعه ودق ،، وهي تعودت عليه وعلى سوالفه وبدت تتعلق فيه اكثر وتحس بقلبها يدق كل ما سمعت رنه الموبايل اللي مخصصتها له ،، ومع الوقت ما صارت تتحسس وتتضايق اذا صدف وياب خليفة طاري عبدالله مع سوالفه ،، وعسب ما تحس بتانيب الضمير كانت اونها تدلع على خليفة وتقوله انها تغار من عبدالله لانه كل الوقت مع خليفة وفما في داعي انه اييب طاريه يوم يرمسها ،، وخليفة مسكين ما يدري عن السالفه ويستانس يوم يحس بغيرتها ويحب يغيض فيها ،، ويتعمد يذكر اسم ربيعه احيانا اذا حب يغلس عليها ،،وطبعا بعد جهد جهيد حصلوا حجز في قاعة زايد في العين حسب طلب ساره انها تعرس في العين ،،وحجزوا الفرق طبعا للرياييل حجزوا فرقة دبي الحربية لان عرس الرياييل خلوه قبل عرس الحريم بيوم عسب يفضون للحريم ومشاويرهم يوم العرس ،، وطبعا ها كله كان يتفق خليفة مع ساره بس يوم يزورها ،، ما يطيع يخبرها اي شي عن التجهيزات اللي تباها الا وقت زيارته ،، وفي اخر زياره له لعوزها لين ما خبرها شو بيسوون في عرس الرييايل ،،

ساره يالسه في الميلس تترجا خليفة انه يخبرها عن المفاجأة اللي محضرها وسيف يالس يشاركهم الرمسه وحاشر عمره وياااهم غصب ،،

سااره وهي تضرب خليفة على جتفه::
خليفة عن المصاخه عاااد بترمس او لاااا ..قووول شو عندك شو هي المفاجأة اللي بتسوونها في العرس ..

خليفة وهو ماخذ راحته في اليلسه ومستانس لانه ساره يالسه حذالة ومغيضه منه ،، وقام ومد ايده شرب عصير بكل بروود وما رد عليها وهو يرفع حواجبة غيااضا فيها ،،،
هني ساره عصبت ومسكت المخده اللي على الكنبة وهددت خليفة ::
خليفة ان ما تنطقت ترى بالممخده على راسك ..
خليفة وهو يحط العصير بسرعه عن ينجب في كندورته ويطالع سيف اللي يضحك على حركاتهم الغبية::
شفت شفت يا سيف شكثر انا اعاني مع اختك ،، في بذمتك عروس تعامل ريلها بها الطريقه وتهدده ..

سيف وهو يضحك :
دواااك من متى الفقيره تحاول تسحب منك الرمسه ذليتها يا بووك خبرها وخلااااص..
وقطع رمسه سيف ان موبايله رن واستاذن اخته وريلها وقال لهم ::
اقوول انا برد على ها المكالمه وبييكم ..خليفة لا تخبرها الا يوم اييي انا اوكيييك..
وهني عاااد ساره عصبت وفرت سيف بالمخده وهو يشرد ويضحك عليهم ..ويلست مسويه عمرها زعلااانه ولفت وييها الصوب الثاني وما طلعت خليفة اللي تم يبتسم ويحاول انه يلف وييها صوبه وهي مب طايعه ،،
خليفة::
خلااااص ساااره ،، يله عاااد فديت الزعلااانيين انا ..
ساره تبا تبتسم وميودة عمرها بالغصب ،، وقالت ::
يعني بتخبرني او لااااا ..
خليفة تم يطالعها ورفع حواجبها في حركته المعتاده ..وحط عينه بعينها وقال ::
سمحيلي ما شي ها الاياام ببلااااش ..تبين تعرفين شو المفاجأة لازم تدفعين مقابل المعلومه..
ساره م مستوعبه وقالت ::
شووو..ادفع شووو..خلييفه يله عاااد...
خليفة ::
انا طبعا ما اقصد فلووس ..انا اقصد تدفعين دفعااات معنيه ..وحسيه ..لي انا ريلج ..حبيبج ..
وسكت ...وفهمت سااره شو يبا منها خليفة وبسرعه حاولت توخر عنه وتيلس في الكرسي الثاني للكنبة ويودها خليفة وهو يضحك عليها وما خلها اتحرك..
سااره::
اووه خلييفه وخر خلاااص مااا ابي اعرف شي ..مااا بي وخر ..والله اخااف يدش سيف الحين ..
قالت رمستها وهي اطالع البااب وخايفه يدش اخوها ومستحيه من قرب خليفة منها ..
خليفة ::
عااادي خليه يدش شو يعني ..مب انتي مرتي ..اشووفه يبطل حلجه بكلمه ..
ولفت ساره صوب خليفه اللي مره كان لاااصق فيها وقالت له ::
حراام عليك لا ترمس عن سيف جييه تر...
وما كملت رمستها لانه خليفة سكتها بطريقته الخاااصه ..ودزته عنها وهي منحرجه وقافطه من جرأته ..
ساره ::
خ..خلييفة ..والله انك حركااات ..
وابتسمت ساره وحست خدودها حمراااا وما قدرت تحط عيونها في عيونه ..وخليفه مستانس على ربكتها وقرب منها وقاال ::

هييه الحين الواحد يرووم يرمس وبعد هذه الشحنه العاطفية للطاقة ههههههههههههههههه شو كنتي تبين تعرفين ممممممممم ااااه المفاجأة صح ؟؟!!! ههههههههه
ساره وهي تفر المخده عليه ::
خلاااص ويااا رااسك ما اباا شي ..الحيين عااا ذليتني والله ..
خليفه وهو يضحك ::
ما عاش من يذلج وراااسي يشم الهوااا..تعااالي بخبرج والله بتستاانسين على الحركه اللي بنسويها في العرس تعااالي قربي عاااد ..
وبدون ما تحس قربت ساره من خليفة ..وقالت له بصوت هادي ::
يله قوول اسمعك ..
خليفة داااخ من قرب ساااره منه وبلع ريقه وحاول يركز في الرمسه اكثر من انه يركز في لبسها الرهيب ..
خليفه ::
انزين يا الشيخة ساااره ..تدرين اني الشاااب المدلل في البيت هههههههههه تعرفين اخوي طارق وعمامي قرروا انهم ما يخلون عرس الريااييل عادي ..عسب جييه يوم العرس قرروا يحطون مسابقه وجائزة عشرين الف درهم لاحسن واحد ايوول مع الحربية ..وبعد تدرين ان عمي شاعر قرر يحط لغز للرياييل واللي يعرف يحله بيعطيه سيف من ذهب طبعا السيف بيطلبونه طلبيه خاصه ...وطبعا غير الالعاااب الناارية اللي بتنور سما العين ..هااا شو راايج..
سااره بطلت عيونها ومو مصدقه عمرها ..وقالت بدون ما تحس ::
فديتك خليفه والله انك واهلك راعيين واااجب وتعرفون تحشموون العرب..
وقربت منه وحبته على خده ..خليفه ما صدق يوم سوت ساره ها الحركه ولما حاول انه يقرب منها دش عليها سيف..

سيف ::
هاا خليفة شو خبرتها والا بعدك ..على فكره منصوور يسلم عليك ..
خليفة ::
عليك وعليه السلااام ..هييه خبرتها ..وهي بتخبرك ..بس مب الحين تدروون ليش ..

ساره وسيف بنفس الوقت ::
لييش..
خليفة ::
لاني يووعااان ....
ضحكت ساره علي حركاات خليفه وقامت تييب الاكل وتقربه لريلها واخوها ..اللي يوم دري بسالفه العشرين الف والسيف الذهبي طاار عقله ...وقرر انه يخبر ربعه عسب يجهزون نفسهم للمسابقه واللغز .......
وعلى ها المنوااال تم الحااال ،، الاتفاااقااات بين خليفه واهل ساره على ترتيبات العرس،،وكان الكل مستانس ،،
لكن في شخص وحيد في بوظبي ما كان يحس بالفرحه هذه ،، يضحك جداام ربيعه وهو من دااخل يتقطع،،عبدالله ما كان يقدر يمنع نفسه انه يغااار يوم يرن موبايل خليفه ،،يعرف انه ساره هي اللي متصله لانه خليفة مخصص لها رنه خاصه لها ،، وعبدالله عرف انها ساره لانه كل ما رن الموبايل خليفه شل بعمره وسار مكان بعيد شويه عن عبدالله عسب يرمس براحته ،،وعبدالله الغيره تااكل قلبه وهو يطالع ربيعه يضحك ويسولف مع حبيبته ساااره،، ومراات كثيره كان يبا يخرب عليهم ويظهر موبايل ويدق رقم ساااره ..لكن ايده تتجمد وما يقدر يكمل ويرد يحط الموبايل مكانه ،،عبدالله تغير وااايد خصووصا مع قرب موعد العرس وسوالف خليفه عن التجهيزااات وكل شي ،،كان يحس بالضيق مراات من ربيعه ،،ومره خليفه كان يالس مع عبدالله يشربون كابتشينو في ستار بوكس في المارينا ،،، الا رن موبايل خليفه وكانت ساره ..ورد خليفه بسرعه وما حب انه ينش ويخلي ربيعه بروحه فقال بصوت واطي وهو يطالع عبدالله اللي مسوي نفسه يطالع الناس والمحلات ويشرب الكابتسينو ماله..
خليفة::
هلا والله ..شخباركم
ساره::
هلا فديتك ..انت ويين ..اسمع حشره عندك ..
خليفه :
انا في المارينا ويا ربيعي ..اوكيه عقب برمسكم ..
ساره حست انه منحرج لانه عبدالله يالس ويااه ..وحست بعد بشويه ضيق لانه اكيد عبدالله سمع رمسه خليفه ودرى انها متصله ..
ساره:
اوكيه ..انتبه على عمرك ..ولا تطالع بنات النااس ..انزييين ..ترى اغاار ههههههههههه...
خليفة وهو يهمس ::
افااا معااي القمر واطالع النجوم ..يله انتوا بعد انتبهوا على عمركم ..مع السلااامه ..
وبند خليفة عن ساره ..كمل رمسته مع عبدلله ..وشويه ورن موبايل عبدالله ..وكان البيت داقين له ..
عبدالله ::
السلااام عليكم ..هلا الوالده شحالج ..عسااج الا بخييير
ام عبدالله::
هلا عبدالله شحالك يا ولدي ربك الا بخيير ,,يعلني فدا راااسك..
وسمع عبدالله حشره حمد عند امها وصوتها وهي تقوول عطيني ارمسه عطييني ماماه ...
عبدالله وهو يبتسم ::
شو عندها الحشره حمدوووه شووتبااا..
ام عبدالله ::
حشرتني يا بووك دووك رمسها والله ما اعرف شو تبااا..
حمده بصووتها الطفولي الحلووو::
الووووه عبووود شخباارك
عبدالله وهو يضحك وخليفه يبتسم لانه صوت حمده كان عالي ووصل لخليفه..
عبدالله::
خييير حمدوووه يا مسوده الويه كم مره قايلج ما تناديني عبوود ..اصغر عياالج انا ..شوو عندج..
حمده::
عبدالله فدييتك اباااك تشتريلي هديه ..
عبدالله وهو يضحك عليها ::
وليش ان شاء الله ..شو عندج ..ما حيده عيد ميلادج قرب..
حمده ::
لاااا مب حقي ..
عبدالله ::
هااا عيل حق منووه..
حمده ::
حق ربيعتي عفرااا..مسويه حفله عيد ميلاااد وعزمتني عندها ..فشيله ادش وايدي فاضيه شو بيقولون عني البنات بخييله..
عبدالله وهو يضحك عليهااا ويجاريها في الكلااام..
انزيين والشيخه عفراا شو تحب من الهدااايااا ..يسدها حلاوه جالكسي ..شووو راااايك خليفه بسهم علبه حلاواه جالكسى صح..
خليفة مع عبدالله على الخط ::
لا لا لا شوو يا ريااال غالي الجالكسي ..بسهم مصاااص بو درهم ..
حمده من سمعت رمستهم بغت تتخبل وتمت تصاارخ في التيلفوون...
لاااااا ماما ه سمعي شو يقولون اونه بيشترون مصااصه ..عبدالله والله ترى ازعل..
عبدالله وخليفه وهو ناقعين من الضحك على حمده ::
لااااا فدييت راااسج انا حمدووه لا تزعلييين الا زعلج عندي بالدنيا ..مااا اروووم انا ..انزين فديتج شو تبين اشتريلها انتي خبريني ترى انا ما اعرف جيلكم هذا شو يحبون ..اول نحن نستانس على المصاص والجالكسي ..انتو عااد مدري شو تحبوون..
حمده ::
شو مصااص وجالكسي وين عايشيين انتواا..
حمده ترمس وعبدلله مسوي السبيكر ويسمع خليفة رمستها والثاني ميود عمره بالغصب عسب ما يضحك ..
عبدالله::
هااا عيل شو تبين اشتريلها ..؟؟
حمده ::
ابااك اتسير محلااات((ويز ار اص )) في عندهم عرض مجسم عود لقطوه اسمها لولو كيتي واااايد حلوة وهي تحبهااا وااايد خذها وخلهم يغلفونها بشكل حلووو وحطوون دااخلها قصااصاات ملونه وااايد ازين ..
عبدالله وهو يظهر ورقه وقلم ::
لحظه خمدوووه من اول شو اسمها القطوة ..لولو كيتي ..والله حركاات ..انزين .ممممم ..قصاصات ملونه ..خلاااص تم متى تبينها ..اليووم ..اوكيه ..
حمده::
يله الحين سير اشتريها عسب ما تنسى ..
عبدالله ::
ان شاااء الله عمتي الحين بسير اييبها انا وخليفة ..ترانا خدم عندج ويااا راااسج ..قووولي لو سمحتوا حمدووه متى بتعلميين الذرااابه..
حمده ::
يله عبداله انا بسير اطالع الجاسوساات الثلااث ..بااي ..وفرت السمااعه ..
عبدالله كلم امه وهي تضحك على بنتها ..وبند عنها الخط ..وقال لخليفة ::
قووم يا بووك ما فينا على حشرتها ..لو ما يبت لها القطوة بتحشرنا في البيت..
ضحك خليفة من حركات حمده وقام ويا ربيعه ..يشترون الهدية للشيخة حمده..
خليفة وعبدالله ما يدرون انه بسبب هذه الهدية ..بتنتهي صداقتهم

[هنوف الروح]

دش خليفة وعبدالله محل الاالعاااب ،، وكااان وااايد عوود ،،والصراحه رهييب ،،خليفه وعبدالله تمواا يطالعون الالعاااب ومنبهرين بكل شي ..ووقفوا يطالعون مجسمااات السيايير ،،شراات اليهاال ،، ولوما تحرك عبدالله عسب يدور القطوة اللي تباها اخته كان خليفة ما بيتحرك ،، ونشووا يدوررن القطوة وما عرفوا وينها والمحل كان زحمه يهااال وامهااات مع عيااالهم ،، وما قدروا يعرفوون وين مكان القطوة واللي يشتغلون بالمحل مب فاضين عسب يدلوونهم ،، وهني خليفه يته فكره وقال لعبدالله ::
اقوول انا اعرف منو بيخبرنا عن قطوت حمدووه ..
عبدالله وهو مستغرب ::
منووه ؟؟
خليفه وهو يطالع يمين ويسااار وطاحت عينه على ثلااث بنات وافدات ..اعمارهن بين 8 و10 ..وقرب صوبهم خليفه وورااه عبدالله..
خليفة ::
السلام عليكم الشيخات ..ممكن اطلب طلب منكم ..
البنات زاغن يوم شافن خليفه وعبدالله كل واحد اطول عن الثاني ..وقالت اكبر وحده فيهم::
ايه اتفضل عموو..
خليفه حس ان البنات زاغن منه وعسب يخفف من التوتر يلس وخل طوله على طولهن وقال :
انا ادور على لعبه هني على شكل قطوة بس ما حصلتها تدرون وين احصلها ؟؟
البنات اول شي ما فهموا شو يقول ..وقالت البنت :
قطوة ..؟؟ يعني اصدك بسينه..؟؟
خليفة::
اويوااا ..بسينه ..اسمها ..لحظه...عبدالله شو اسم القطوه ..
عبدالله ::
اسمها ..لول كتيي ..اعتقد ..لولو كتي ..شي جييه ..
خليفه ::
عرفتووها ..؟؟
البنت::
ايه عموو..انت بتئصد ..لوولو كيتي ..ومين ما بيعرفها ..تعااا عموو راااح تلااائيها وراااه هوون شفت المجسمات الكبيره هونيك..
عبدالله وخليفه صدوا صوب وين ما تأِشر البنيه ..وانصدموا من حجم الالعاااب اللي مسوين عليها مجسمات ..
كل لعبه ووراها مجسمها العوود...وحصلواا قطوة حمده ..كانت عوده وتوصل الين خصر عبدالله ..
خليفه نقع من الضحك وقاال ..
خييبه ..هاااي اضخم عن حمدووه ..كيف بتشلها ..
وقربوا اكثر وشافوا السعر ..وبققوا عيوونهم ..وخليفه نقع من الضحك ..
عبدالله انصدم من السعر ::
خيييبه شو هااا الف درهم ..مسوده الويه حمدووه من الحين تشترين هدايا بالف درهم لربيعاتج..وهذه بس الا العاااب ..عيل لو كبرتي ..وعرفتي السوع والمجوهرات شو بتسوين فيني ..يا ويل حالي انا ..
خليفه::
هههههههههههههههه خلااااص عبدالله اشترها انت وعدت البنيه ..لا تخلي شي بخاطرها ..
وتنهد عبدالله وزقر الفلبيني اللي يشتغل هنااك وخلاااهم يسوونها مثل ما قالت حمده ..
وشكلهم كان ملفت وهم يمشوون في المارينا حاملين القطوة ..خيفه طبعا مستانس وعبداله منحرج..
وما صدق على الله يوصل السياره ..
واول ما صعدوا السيااره ..وصل مسج لخليفة..وفتح خليفه الرساله وتم يقراها .وابتسم ..وشافه عبدالله وهو يكتب رد للمسج ..وحس انه ساره اللي مطرشه المسج ..وحس بالغيره ..
وتم يتريا خليفه الين ما خلص المسج وقال له ..:

يا رياال فكنا تحرك طالع الساعة الحين قربت 11 ونص ورانا دواام بااجر ..
خليفة ..
انزين بوصلك المحل وخذ سيارتك وتوكل .انا بعد ابا ارد الشقه ..
ووصل خليفة عبدالله ..وركب عبدالله السياره ..ونسى هدية حمده في سياره خليفة ..والثاني اصلا مخه ما كان ويااه ..يتريا ربيعه يظهر عسب يرمس حرمته على راحته..
واول ما ظهر عبدالله سلم على خليفه وركب سيارته وتحرك ..وخليفه نفس الشي تحرك ونسى سالفه القطوة..
ويوم وصل عبدالله البيت ..ودش الصاله ..لقى حمده اطالعه ..واول ما شافها ..اتذكر القطوة..وحط ايده على راسه وقاال::
اووه حمده ..فدييتج نسيت قطوتج في سيااره خليفة ..
حمده ياها احباااط ..[س اتطمنت على الاقل انه اخوها شرى الهدية..وبسرعه عبدالله ظهر موبايله ودق لخليفه ..وتم يتريا خليفه يرد ..لكن خليفه ما كان فاضي يالس يرمس ساره ..ويشوف عبدالله على الخط الثاني ..لكن ما قدر يبند عن ساره..وقال في خاطره عقب برد عليه ..وكمل سوالفه مع ساره..
عبدالله تم مغيض من خليفه اللي ما رد عليه وعرف انه عنده خط ثاني ..من صوت رنه الموبايل..وتم يتصل عليه اكثر من مره ..لكن خليفه في عالم ثاني..
وطمن عبدالله اخته وقال لها ::
لا تخافين اكيد سار يسبح ..واول ما يشوف اني دقيت له بيتصل..متى حفله ربيعتج ..
حمده بكل برووود::
نهايه الاسبوع ..يوم الخميس..
ويوم سمع عبداله رد اخته ..يرها من شعرها وتم يدغدغها وهو مسوي نفسه معصب::
وعيل حاشرتني ..ابا هديه وابا هديه ..وانا اتحرا الحفله بااجر ويااراااايج حمدووه ..
ضحكت حمده على اخووها ...وتموااا يطالعون الرسوم مع بعض الين ما طردتهم امهم من الصاله بالغصب ..

يا ترى شو بيصير ...؟؟؟؟

[هنوف الروح]

لساعه 3 الفجر عبدالله راااقد في غرفته ومرتااح ،، وفجأه يرن موبايله ،، وينقز قز عبدالله من المفاجأة وو مستغرب منو بيتصل له في ها الوقت ،،ويوم شاف رقم خليفة انقهر وعصب ورد هو محرج عليه ،،

عبدالله ::
خييير شو عندك داق ها الوقت ؟؟
خليفة بكل برووود ::
انت اللي شو تبا حاشرني من ساعه ومتصل اكثر من مره ..خيير شو عندك ،،انا فاضي الحين قول شو تبا؟؟
عبدالله انقهر ةوده يكفخه بشي ،، وبنفس الوقت حس بغصه لانه فهم من رمسه خليفه انه كان يرمس ساره طول ها الفتره ::
خلييفه ويا راااسك انا داقلك جريب ال11 ونص وانت توك تتفيج ترد عليه ...؟؟؟شووو كنت راااقد وتك ناااش ؟؟
خليفة::
لا ابدن ..يا خي الواحد ما يرمس بالموبايل مثلا ،، ورااي تجهيزات للعرس ومناقشات لازم اتم شو بلاااك انت ..هههههههههههه خلااااص والله السموحة.. خشمك ..سير ارقد بااجر برمسك..
عبدالله::
لا والله ...احلف انت بس..اونك الحين الذوق كله ..استغفر الله العظيم ..المهم اسمع خلفووه قطوه حمدووه في السياره لاتنساها بااجر انزين حشرتني ترااهاا...
خليفة وهو يضحك ::
ادري والله مانسيتها شفتها يوم كنت ظاهر من السياره ..في الشقه عندي ..كاهي يالسه اطالعني بعيونها بسم الله على ها العيون ..خفت التغليف يخترب من الشمس ..لا تخاف هي في الحفظ والصون ..ذكرني باجر اييبها ..تصبح على خيير ..
وبدون ما يتريا رد ..بند خليفه الموبايل وحط رااسه ورقد..عبدالله وهو يطالع الموبايل ومستغرب من ربيعه ...
تجهيزات العرس قال خليفة .. اكيد كان يرمس ساره ،،وطاار الرقاااد من عيون عبدالله ..ويلس على شبريته عقب ما كان منسدح ،، وتم يطالع الموبايل ،، وفتح الصور وطالع صورة ساره ،، وحس بالغيرة ااكل قلبه،، يالله يالدنيا ...اول انا من كنت اسهر ويااج الين الصبح ،، وتم عبدالله يطالع الصورة ويلس يرمس الصورة جنه يرمس ساره وقال بصوت حزين ..تحيدين ساره والا خليفة نساااج كل شي ،، تدرين اني مع خليفة اربع وعشرين ساعه ،، تدرين انج يوم تتصلين فيه انا اكون وياااه ..ليش اتسوين جييه فيني ..ما تدرين اني اتعذب واتقطع من داخلي الف مره ،،ورفع راسه وطالع الساعه كانت الساعه 3 ونص ..ويت فكره شيطانية في راس عبدالله ..لكنه تراجع عنها ..لكن بسرعه ردت الفكره في راسه ..شو فيها اذا اتصل الحين فيها ..اكيد بعدها ما رقدت ..توه خليفة بند عنها ..اكيد بعدها سهرانه..خاطري اعرف شي واحد بس ..ابا اعرف اذا نسيتيني او لااا؟؟ ابا اعرف اذا كرهتيني او لاااا..ما اقدر اتحمل فكره انج تكرهيني ..ساره ..دخيلج لا تكرهيني ..تدرين اني ما اقدر اعيش مع ها الفكره..
ومره ثانية رفع موبايله ..ودق الرقم ..وظهر عنده اسم الاهل ..بعده ما مسح الرقم ..ما يقدر..وارتسمت على طرف شفايفه ابتسامه خفيفة..بسرعه اختفت يوم سمع الموبايل يرن..قلبه دق بقوووه ..يا ترى بترد او لاااا ..ردي ساره ..دخييييلج ردي علي ..ابا اسمع صوتج ..ابا اسألج السؤال اللي دايما في خاطريه من اخر مره كلمتج فيها..وطول الموبايل وهو يرن وما شي جواب ..واخر شي ..انكتب في الشاشه ..لم يتم الرد..وحس عبدالله بالااحبااط ..لكنه ما يدري شو استوى به حس باصرااار غريب ورد مره ثانيه يتصل..يعني توج مرمسه خليفة وما يواحيج ترقدين ..ليش ما تردين ..على الاقل سمعيني شو بقول ..عنبوه بكلج انا ...خلاااص انتي صرتي لغيري ..ردي ساره دخيلج ...
في العين وبالتحديد في غرفه ساره ....كانت ساره يالسه اطالع شاشه الموبايل وهو يرن .وقلبها يدق بقوه ..ليش يتصل شو يبا...خلااااص انساااني..دخييلك خلني في حااالي...شو تبا مني ..مب كافي ان اللي خذته هو ربيعك شو تبا بعد....وسكت الموبايل ..لكن قلب ساره ما وقف عن الدق..كان يدق بقوة..تحس ان اللي في البيت بيسمعون دقات قلبها من الخوف اللي فيها ..وشويه هز الموبايل مره ثانيه ..لانها سوته على الصامت ..وكانت مسج ..عرفت ان المسج منه ..وتمت اطالع الرساله ومب قادره تفتحها ....وتشجعت ..وفتحت الرساله ..وكانت منه فعلاا..
(( ساره..اعرف انج مب راقده...دخييلج بس ابي اعرف شي واحد ..ابي اعرف اذا اللي صار بينا ..خلااااج تكرهيني او لاااا..ابي اسمعها منج ..وما بسكت الا اذا سمعتها منج ..ساره ..صدق تحبين خليفه ..نسيتيني ساره؟؟ نسيتي عبدالله..عبوود؟؟؟ صورتج لين الحين في بالي وفي قلبي.. دخيلج اذا اتصلت ردي علي..واوعدج اني ما تصل مره ثانية ..))

دمعت عيون ساره وهي تقرى المسج ليش ياعبدالله ..ليش الحين بالذات ..خلااااص انا احاول انسى اللي كان بينا ..احاول ابد صفحه يديده مع خليفة ..ريلي ..واول ما تذكرت ساره خليفة ..حست انها تخون زوجها ..خليفه يحبها يمووت فيها ..يعشق التراب اللي تمشي عليه...وانا ..انا بعد احبه ..هني بس حست ساره بالفرق ..في ها اللحظه بالذات عرفت شو الفرق بين اللي كان بينها وبين عبدالله واللي الحين بينها وبين خليفه..
اللي كان بينها وبين عبدالله مجرد اعجاب وهي حسست عمرها وعيشت عمرها في وهم الحب وانه حبته..لانه لو كانت تحبه ..ما كانت تعلقت بسرعه في خليفة....ريلها ..زوجها..حلاالها ..هذا هو الفرق عبدالله اول ما كانت اتييب له طاري العرس كان يتهرب ويتحجج..خليفة اول ما شافها ..وعيبته ..عرف وين يروح وشو يسوي ..انساان ما عنده لف ودوران اللي يباه بياخذه بالطريقه الصحيحة...

فديييتك روووحك يا خليفة .فديت رووحك يا حبيبي ..انت حبيبي وما راح احب احد غيرك ابد ..تمت ساره تتفدى خليفه وهي مغمضه عيونها ..ودموعها تنزل ..وهي مستانسه لانها عرفت حقيقة مشاعرها..يمكن شويه متاخره ..لكنها عرفتها ..ومسج عبدالله ..خلاااها تحس بقيمه خليفة في نظرهاا..
فديتك يا خليفة ..كم مره تترجاني اقولك احبك ..وما سمعتها ..لكن انا احبك واحبك واحبك ..
تنهدت ساره ..وهي تحس بالراحه ..ومسحت مسج عبدالله ..وقررت انها اطنش المكالمات ومسحتهن من الموبايل..
وقالت في خاطرها في اقرب فرصه ..بغير رقمي ..وببدا صفحه يديده...
انقهر عبدالله لانه ساره ما ردت عليه ،،، معقوله تكون راقده ..احيدها تحب تخلي موبايلها ع الصامت ..دوم قبل لا ترقد..لكن مستحيل خليفه يخليها تسويه على الصامت ..اعرفه خليفة بيحشرها ..
ما عليه انا ما بيأس ابا اعرف ردج يا ساره ..واكيد بعرفه ..

في اليوم الثاني ..خليفة وعبدالله في الدوام ،،خليفة كان يحس ان عبدالله فيه شي لانه يوم يرمسه ما كان يحط عيونه في عيون خليفة...بس ما حب يعلق على الموضوع،، لو فيه شي كان رمس هذا اللي فكر فيه خليفة،، ومن صوبه عبدالله مب قادر يحط عيونه في عيون ربيعه ..يحس انه يخونه ..يحس انه يخوون الصداقه والثقه اللي مبينهم ...خليفة قام من مكتبة وسار صوب ربيعه وقال له::

عبوود متى تبا حمدووه قطوتها ..؟؟

عبدالله وهو يرفع راسه ويفكر اي قطوة؟؟عقب اتذكر السالفه::

هيييه والله تعااال انا نسيت ..انت يبتها وياااك ..؟
خليفة::
وين يا ريااال من صباح الله خير تباني اشيل ها القطوة وياااي ..شو تبا اللي في العماره يقولون عني ..واصلا انا نشيت متاخر بعد زين لحقت على الدوام ..
عبدالله وهو يفكر في حمده وحشرتها ::
يا خي انزين جان خليتها في السياره ما بيستويلها شي..الحين شو يفكني من حشره حمدووه ..
خليفة::
ههههههههههههههه....انزين شو الحل متى الحفله ..اليوم؟؟
عبدالله ::
لا مب اليوم ..اخر الاسبوع يوم الخميس..
خليفه عاااد ضرب راسه العناااد..وقااال ::
لااااه الخمييس وحضرتها حاشرتنا البارحه ..تدري شووو..قول لحمده خليفة يسلم عليج ويقولج ما بتشوفين القطوة الا يوم الاربعاء وفي الليل بعد ..خخخخخخخخخخخخ
عبدالله وهو يضحك ::
يا رياااال شو تبااه تحط رااسك برااس ها الياااهل ..
بس خليفه ما رد على عبدالله ..ورفع حواجبه يغاايض في ربيعه ..عبدالله من شاف ربيعه جييه قال::
خليفه احسلك لا تحطني في النص بينك وبين حمدووه ترى والله ما لي خلق لحركاتكم ..انا اللي بتحشرني في البيت مب انت ..خليفة اصطلب لا اعطيك بالملف على ويهك ...

لكن خليفه طنش وقام من مكتب عبدالله ولا جنه شي صاير ..وهو مستمتع بفكره انه بيقهر حمده..بيخليها اتووب تزقره خلفووووه..ههههههههههههههههههاااي..

عبدالله طالع ربيعه ..وهو يبتسم يعرف انه خليفه بيسوي اللي في رااسه وما بيهتم بكلامه..تنهد واستسلم ..لكنه اذا اصر على موقفه والله ليخلي حمدووه تتولااااه ما يخصه ...
...

[هنوف الروح]

في العين ..
الساعه كانت تقريبا عشر الصبح ،،ساره راقده ،،سمعت دق على باب غرفتها ،، تمللت ساره ما تبا تنش اصلا اهي ما رقدت زين عقب اللي صار امس ،،وسمعت صوت امها تزقرها ،، وقامت وحست بالم فظيع في راسها ،، يلست شويه على شبريتها وقالت بصوت واطي ::انزين لحظه شوي،، وحاولت تنش لكن ماقدرت وحطت ايدها على راسها وضغطت عليه بقوه ،، ومره ثانية رد الدق على بابها امها تلح عليها انها تفتح الباب ،،نشت ساره وهي تنود من الدوخه والالم وحست ان المسافه بين الباب وبين شبريتها طويله ،،واول ما بطلت الباب وشافتها امها شهقت بصوت عال وهي تشوف العلاااماات السودا تحت عيون بنتها وعيونها الحمر،، ساره راسها من كثر ما يعورها ما قدرت حتى تسلم على امها ردت بسرعه وانسدحت على فراشها ،، او بمعنى اصح طاحت على فراشها ،،وركضت امها صوبها وهي تقول لها ::
ساره بنتي شو بلاااج شو صايرلج ليش عيونج غاديات حمر وشو ها العلاامات السودا اللي تحت عيونج؟؟
ساره ما قدرت اترد على امها وحست براسها بينفجر من الالم وغمضت عيونها بقوه ،،وهي تفكر باللي صار امس وكيف ان اتصال عبدالله خرب كل شي،،وما قدرت اتحمل صوت امها والحاحها الي زاد ،،وبالغصب قالت وهي مغمضه عيونها::
ماماه انا شويه تعبانه ،ابا ارقد ..راااسي احسبه بينفجر ،،ماما ما عليج امر ابا بندول للراس دخيلج ..
عااد من سمعت ام ساره ها لكلام خاافت وضربت على صدرها وهي تحسر على بنتها ::
يا بعد عمري يا ساره شو معورنج بنتي قومي قومي بنوديج الطبييب قومي فديتج ..عليااا .سيف..
وتمت ام ساره تزقر بنتها ،،وساره مو متحمله اي صوت وقالت بصو واطي وهي تمسك ايد امها وتريد ها تسكت ::
ماما دخيلج انا بس بخذ بندول وبرقد وبيخف مني العوار ،، دخيلج ما ابا اسير المستشفى دخيلج امي فديتج انا لا تزقرين حد..
وحطت ساره ايديها على راسها من الالم ،،ودشت عليا وسيف اللي كانوا يالسين في الصاله على صوت امهم يوم زقرتهم ..
سيف:
خير امايه شو في عسى ما شر؟؟
عليا ::
خير ماما شو فيكم ،،وشو بلااااها ساره ؟؟
ويلست عليا عند اختها ..وسيف يطالع شو مستوي وحس انه في شي غلط ،،
ام ساره ::
يا ولدي طالع اختك شو مستوي لها ،،شوف عيونها كيف حمر وشوف ها العلامات تحتهم ،وهي تقول ان ما فيها شي وماتبا غير بندول اونه ..قوم خلنا نوديها الطبيب..
مسكت ساره ايد امها كانت تبا تصرخ وتقول لهم اسكتوا انا مو متحمله اي صوت ليش تعذبوني مب كافي العذاب اللي انا فيه..
ساره::
لا لا ماما دخيلج انا بس مب راقده عدل بالليل توني بس الا راقده واحس اني لو رقدت وارتحت بيخف الويع وبتختفي العلاامات ..علياااا...
وطالعت ساره اختها كانها تستنجد بها ..وفهمت عليا المطلووب وكملت عن اختها الكلام..
عليا ::
خلااااص ماما هي بس راسها يعورها من السهر ،، خلوها ترقد وبترتاح ويوم تبا تنش بتنش بروحها ..بس ساره بندول بدون اكل ما ينفع اذا تبين دوا لازم تشربين شي او تاكلين شي ..انزيين حبيبتي
ساره مسكت ايد اختها بقوه وقالت ::
انزين ..
عليا::
خلاااص ماما انا اعرف اخلي ساره ترتاح خليها انتي بس علي انا وبتشوفين كيف بتغدي..
سيف::
طاع هااي اونها ..جييه دكتوره حضرتج ونحن ما ندري ..قاصه على عمرج انتي ..
ام ساره::
بس انتو الاثنين ما تخيلون ..ما تشوفون اختكم كيف تعبانه ..خلااااص علياا انا بطرش لكم الحبوب مع شي خفيف تاكله وعصير تشربه ..بس لا تخلينها تاكل الحبوب بدون ما تحط شي في بطنها ..
علياا::
انزين ماما لا تخافين ..هي بس تبا ترتاح من السهر..مشكله الحب يسهر العرب..هههههههههه
ام ساره ضربت بنتها على جتفها وقالت ::
جب مسوده الويه شو ها الرمسه صدق ما تخيلن ..انتي بنت صغيره لا تقولين ها الكلااام..
قفطت علياا..وطبعا سيف ما صدق انه اخته اتهزئت ..وتم طول اليوم يعايرها ..
ساره بالغصب شربت شويه من العصير وخذت قطعه صغيره من الفطاير اللي امها مطرشتنها وكلت حبتين بندول وراهم وحطت راسها ..
اللي كان معور راسها اكثر هو اللي صار والتفكير طول الليل ،،حتى انها رقدت متاخره وما وعت خليفه مثل ماعودته انها تسوي كل يوم ،، والريال تاخر على دوامه سبه ها الشي..
ساره لقت في موبايلها 5 مكالمات من خليفه ..لم يرد عليها ..تيلفونها كان على الصامت ..تركته على الصامت عقب ما كرر عبدالله اتصالاته ..وما قدرت ترقد من التفكير في السالفه ..ومن...الخوف..
خافت من انه يبين شي لخليفة ..كيف يا عبدالله تسوي ها الشي .وانت اللي دايما كنت تقول ان خليفه هو مثل اخوك واكثر ..وفي اخ يخون اخوه في عرضه ..ليش يا عبدالله ليش ..وما حست بعمرها ورقدت ..
في بوظبي كانت الساعه 2,30 الظهر وكانوا الشباب يستعدون للخروج خلاااص خلص دوامهم وخليفه مضايق وكان يبن عليه ا لضيق ..عبدالله لاحظ عليه ها الشي وقال هم في الطريج لسيايرهم خلني اساله شو فيه ..
عبدالله::
خليفه بلاااك شكلك مضايق .خير في شي؟؟
خليفه وهو يطالع عبدالله شو اقوله الحين ،،وما عرف شو يقوله:
هاا لا .لاااا ماشي بس افكر في شويه اشيااء..يااخي العرس شغلته شغله..مااشي عبدالله بس افكر في اشيااء لازم اخلصها تعرف ما باقى شي عن العرس..
عبدالله وهو يحس بغصه في قلبه..
وين يا رياال ما بقى شي ..بعدكم جدامك شهرين للعرس شو بلااااك انت مستعيل ها الكثر..
خليفه وهو يبتسم وقال بصوت واطي ::
الا مستعيل ...الود ودي اليوم قبل باجر اعرس ..
عبدالله من سمع كلامه حس بالغيره تاكل قلبه ومع ها الشي ابتسم وجارا ربيعه في الرمسه الين وصلوا كل واحد لسيارته ..ودعوا بعض واتواعدوا يتقابلون عقب المغرب في المحل عند عبدالله..
خليفة اول ما ركب السياره ظهر موبايله ورد اتصل على ساره ..مستغرب ليش ما وعته الصبح وما ردت عليه بعد وهو حرق تيلفونها من كثر ما دق ..ونفس الشي ما شي رد..انقهر خليفه اكيد مستوي شي ..شو موبايلها خربان يعني او شوو؟؟..وما عرف خليفه شو يسوي ويت على باله فكره وظهر موبايله مره ثانيه ودق رقم سيف اخو ساره..
سيف كان في الكليه ويا ربعه يشربون كوفي ويتريون موعد الكلاس الثاني ..وشاف اسم خليفه على موبايله ورد بسرعه ..
سيف::
الو هلا هلا والله بالنسيب ..خشمك ياريااال ..وينك ما دق ولا تتصل..
خليفه ::
هههههه لا افا عليك ..خشمك ..السلام عليك في الاول ..وعقب شخبارك ..وشو علومك..
سيف:
عليك السلام والرحمه ..والله انا بخير ونعمه ..دامك بخير انا بخير طال عمرك..
خليفه ::
اقول سيف بتخبرك ..موبايل ساره فيه شي..يعني خربان ..
سيف::
لا هب خربان ..ماحيده اخترب ..ليش في شي..
خليفه ::
لا ..يارياال ..بس انا ادق لها من متى وما ردت علي..قلت يمكن خربان ..اهي في البيت ..
سيف اتذكر ان اخته كانت تعبانه اليوم ويمكن موبايلها على الصامت ..وقال بسرعه ..
هييه تعااال ترى ساره تعبت اليوم ومدري شو صار لها ..وما...
وما كمل سيف رسمته الا قطعها خليفه من سمع ان ساره تعبانه ::
شوووو ..تعبااانه ..وليش محد خبرني ..شو فيهها ..وليش ما وديتوها المستشفى ..
خليفه يرمس سيف وهويسوووق ومحرج وبدون ما يحس حول طريج الي العين ويسووق بسرعه ..
سيف وهو يحاول يهدي خليفه ويطمنه ::
لالالا والله ما فيها شي جايد ..بس عوار راااس تعرف انت دلع البنات ومصاختهن..لا تحاتي ترى انا قمت بالواجب ..سويت لها عصير وسويت لها فطاير تاكلها وعطيتها حبتين بندول واطمنت عليها وعقب سرت الكليه ...
سيف يخرط على خليفه طبعا ..وخليفه ويين شااخط للعين ..وقال له ::
انزين ليش ما وديتها المستشفى شو اتحرى عمرك دكتور ..سيف ما يصلح ها الكلام..انا حرمتي عندكم جيي تسون فيها ..
سيف قفط من خليفه ..وقال الحمد لله ان عليااا ما سمعت الرمسه والا كانت بتعيب الين سنه جدام ..
سيف::
يا رياال استهدي بالله ما يحتاااي كل هاا والله انها بخير ..صدقني اكيد موبايها على الصامت وهي راقدة الحين ..صدقني بخير ..انا توني قبل نص ساعه داق للبيت ومطمن عليها ..وقالولي انها راقده..
خليفة::
المهم سيف انا في الدرب الحين وياينكم العين ..يله مع السلامه باقي نص ساعه واوصل..
سيف كان يبا يقول شي لكن خليفه كان مبند موبايله ..وبسرعه سيف دق لساره يخبرها لكن ساره ما ردت عليه ..وتذكر من رمسه خليفه انها ماردت على اتصالته ..ورد اتصل في عليااا..لكن موبايلها بعد ما ردت عليه..وما عرف شو يسوي ..وشويه زقره ربيعه وقاله له ان الماحضره باقي لها خمس دقايق ..الساعه كانت ثلاث الا خمس ..وماعرف شو يسوي ..واستسلم ودش القاعه وقال خلي الي يصير... يصير ريااال ياي يطمن على حرمته شو فيها يعني...بلع سيف ريقه وقال الله يستر ...

[هنوف الروح]

في بيت ساره الساعه كانت اربع الا ربع العصر ..عليا كانت يالسه مع امها في الصاله يطالعون التلفزيون ..
وشويه سمعو صوت سياره جدام باب البيت عليا طالعت الساعه وقالت ::
ما احيده سيف يخلص الحين دوامه المفروض عنده دوام الين ست العصر..
شويه دشت البشكاره وهي تقول::
ماما ..بابا مال ساره عند الباب ..
علياا وامها ما فهمو الرمسه..ولا يا على بالهم ان خليفه عند البااب ..علياا قاالت ::
شووو تقولين ..منو بابا مال ساره .شو تخربطين انتي ..وما كملت رمستها الا سمعت صوت رياال عند البا ب..
خليفه::
هود ..هود ..السلام عليكم ..
ام ساره وعليا نقزوا من مكانهم وعليا عدلت وقايتها وغطت شعرها عدل وانخشت ورا امها ..
ام ساره::
هدا ..هدا تفضل يا ولدي ..حيااك ..
خليفه دش البيت وكان لابس الدريس ماله ..لانه من الدوام للعين على طول..
خليفه::
السلام عليكم ..شحالج عمتي ..شخبارج عسااج بخير ..
ام ساره ::
بخير يعلك الخير ..شخبارك انت وشخبار الوالده ..
خليفه ::
بخير ربي يعافيج ..شحالج عليا شخبارج ..
عليا ردت وهي ميته من الحيا..
الحمد لله ربي يعافيك ..تفضل حيااك خليفه ..سمحولي انا بسير فوق شويه ..
شردت عليا بسرعه لغرفه ساره..
ام ساره طالعت خليفه ..
خليفه يا ولدي حياااك ..تفضل ايلس اصب لك قهوه ..
خليفه يلس عداال ام ساره ..وقال ::
ادري انج مستغربه ييتي الحين عندكم ...بس انا من الصبح ادق لساره وما ردت علي ..وعقب الظهر اتصلت لسيف اتخبره عنها ..قال لي انها مريضه ومدري شو ..طايحه وما تبا تسير المستشفى ...
ام ساره ابتسمت وقالت في خاطرها ..فديت روحج يا بنتي ربي رزقج برياال راعي مذهب والله ..الله يحفظكم حق بعض..
ام ساره ::
لا يا ولدي ما كان له داعي تعب روحك من بوظبي للعين ..وانت تو ك ظاهر من الدوام ..اكيد تعبان ومو متغدي ..لو اتصلت على البيت كنت بخبرك انها بخير وما فيها الا العافيه ..
خليفه وهو منحرج ورفع راسه وطالع في عيون ام ساره وقال بصوت ثابت ::
انزين انا ابا اتطمن عليها ..ممكن اشوفها الحين ..
ام ساره ارتبكت وما عرفت شو ترد عليه ...ساره بعدها فوق في غرفتها و..
قاطعها خليفه بصوته وقال لها ::
ابا اشوفها ممكن تسوين لي درب ..
ام ساره وهي مرتبكه ما عرفت شو ترد وقالت //::
لا يا ولدي انا بنزلها لك الحين لا تعب عمرك بس عسب اتطمن عليها وتشوفها بنفسك..
مايلين ..ماااييليين..
تمت ام ساره تزقر الشغاله ماايليين ..عسب تزقر ساره ...
خليفه متملل ..وقال لها ::
ماله داعي انا بصعد بشوفها ..لا تعبينها بس سويلي درب ما عليج اماره..
ام ساره ما قدرت ترد على خليفه وقامت من مكانها وقالت له ::
انزين يا ولدي امري لله والله انها بخير وما فيها الا العافيه ..تعال حيااك ما في حد غريب ..
وصعدت ام ساره مع خليفه الدرج وخليفه قلبه يدق اول مره بيدخل غرفه ساره اخيرا بيشوفها في غرفتها ..بيتهم كاان واااايد حلو..ها للي لاحظه خليفه ..الذوق كان وااضح في الديكور والفخامه بعد ..خليفه بلع ريقه يوم وصل القسم اللي مخصصينه لساره واختها جناح كامل فيه غرفتين منفصلتين كل وحده بحمامها ..ولهم صاله مشتركه ومطبخ تحضيري صغير على الزاويه ..وشكله واايد حلو ..
خليفه شم ريحه الدخون اللي في المكان ..وعرف انه قرب لغرفه ساره ..واشرت له ام ساره انه يتفضل يقعد في الصاله الين ما تشوف له ساره..
يلس خليفه وهو يطالع .وابتسم في خاطره وقال ..صدق انه ذوق بناتي ..الصاله مصبوغه بلون الوردي الفاتح مع الغامج ..ودرجات اللون الوردي في كل مكان ..حتى الاكسسوارات اللي في الصاله كلها من ها الونين ..وشويه دشت الشغاله وفي ايدها صينيه فيها عصير وشويه فطاير وكيك وشغلات ثانيه ما عرفها خليفه..
رتبت الشغاله الصواني جدام خليفه ..وقالت له ::
يريد شي ثاني سير ..؟؟
خليفه هز راسه وقال :
لا .ما يريد..ثانكيو..
شويه انفتح الباب وظهرت ام ساره وعليا من الغرفه ..ولاحظ خليفه ان عليا تبتسم ابتسامه شيطانيه وام ساره منحرجه وقالت له وهي متردده ::
ما عليه يا ولدي ساره شويه تعبانه وتوها ناشه من الرقاد ترياها شويه الحين بتييك ..
عاااد هني خليفه حرج وقال لها /::
ما عليها عمتي سمحيلي انا بشوفها ابا اتطمن عليها .بس مب لازم اتعدل او تعب عمرها ..
هني عليا نطت في الرمسه وقالت ::
لا لا هي ما قاعده اتعدل ...بس سارت تغسل ويهاا ..وو..
وبلعت عليا الكلام اللي بتقوله يوم شافت امها تخزها بعين قويه ..
خليفه من شافهم اصر انه يدش وقال ::
ما عليه سمحولي انا بدش عمتي سويلي درب ..
عليا انخشت ورا امها ودشت ام ساره الغرفه ووراها خليفه ووراهم عليا اللي كانت مستانسه وبطير من الفرحه ..بالنسبه لها ها الشي قمه في الرومانسيه .وقالت لازم اشوف شو بيصير ..
دش خليفه الغرفه وقلبه يدق من الفرحه ..ولف بعيونه بسرعه على الغرفه ..وشاف الذوق والنعومه في الاثاث وشاف سرير ساره مو مرتب ولمحت عينه شخص واقف عند الباب اللي داخل الغرفه وشكله هذا هو الحمام ..ساره كانت توها ظاهر من الحمام وماسكه المنشفه تمسح ويهها وكانت لابس تيشيرت وشلحه وشكلها كان ناعم ..خليفه من شافها ذاااب فيها وده بس ياخذها بحضنه .ويطمن عليها ...طبعا ساره قفطت من الموقف وبشكل لا ارادي حطت ايديها على راسها تحاول ترتب شعرها وقذلتها كانت خرسانه ماي ..وما توقعت انها بتظهر وبتلاقيه في غرفتها ..هي من خبرتها عليا انه تحت في الصاله ما صدقتها ...الا يوم شافت سيارته جدام البيت ..والحين تلاقيه جدامها في غرفتها ..

[هنوف الروح]

جمدت ساره من شافت خليفه واقف جدامها ..انحرجت ..يا ربي شو ها الحاله ليش شافها وهي شكلها منعفس ومو مشطله شعرها ...وحست ام ساره بربكه بنتها وقالت لخليفه ::
شفت يا ولدي هذه حرمتك ما فيها الا العافيه ..تعال نيلس برع الحين هي بتييك ..خليفه ما شال عينه من ساره ..وقال..
ما عليه عموه لو تخليني شويه بس ابا ارمس ساره في سالفه ..
ام ساره تحرت ان في شي استوى بين ساره وخليفه وعسب جيه خليفه ياي البيت يشوف ساره ويتطمن عليها ..
ساره من سمعت كلامه قالت له ::
هلا خليفه شحالك ..تفضل حيااك ..عليا راويه الصاله انا الحين بييكم ..
عليا قالت بسرعه ::
لا هو يعرف وين مكان الصاله هو ياي يبا يتطمن عليج انتي ..
وحست عليا بايد امها وهي تقرصها بقوه ..ويودت عمرها بالغصب عسب ما تصرخ من الالم...وهني طالع خليفه عليا وامها وقال بصوت جاد اونه معصب ::
ماعليه عموه ممكن لو سمحتي تخلوني بس شويه مع ساره ابا اقول لها رمسه خاصه ..
ام ساره وهي اطالع بنتها وطالع خليفه ومب عارفه شو تقول..
اخيرا تنهدت وقالت ::
ما عليه يا ولدي..انا بترياكم برى في الصاله اذا بغيت شي خبرني ..
وسحبت ام ساره عليا اللي كانت مستانسه باللي قاعد يصير وسارت هي وياها ينتظرون برى في الصاله ..عليا خلت امها تمشي جدامها وهي وراها .وبحركه متعمده منها مسكت الباب وسحبته وراها وقفلته عليهم ..
واما ساره انحرجت منها وكانت تبا ترد تفتح الباب ..ومسكتها عليا وهي تهمس وقالت ::
ماما خلااااص والله فشيله شو بيقول الرياال عنا ..صكوالباب وردوا فتحوا ,,يبون يسمعون شو بقول لحرمتي والله فشيله ..
علياا عرفت كيف تخلي امها تتراجع عن فتح الباب ..لانها تعرف ان امها وااايد تحاتي ان في حد يرمس عليها ..ويلست في الصاله مع عليا وشافت عليا العصير والفطاير وقاالت :
ماما طالعي الفشيله ها الغبية مااييليين لاحقه الريااال بها الفطاير ..واكيد هو مو متغدي ..شو بيقول عنا الريال..وقت غدا وماكليني فطاير ..اخ ع المذهب...
هني نشت ام ساره وقالت ::
هيه والله يا بنتي والله فشيله ها الخدم ..بس ما اروم انزل تحت واخبرهم سيري انتي وانا بتم هني ..
عليا ردت بسرعه ::
لا ماما انتي غير ..سيري انتي وانا بتم هني ..وما بتحرك من مكاني بعد عيب الريال ش بيقول عنا ..وبعدين انا بزقرهم اول ما يخلص الغدا..
ام ساره طاوعت بنتها ونزلت تحت ...ام ساره كل شي عندها عادي الا حد يقول انها قصرت في ضيووفها ..
تمت عليا مستانسه وودها تحط اذنها على الباب وتسمع شو يقولون ..بس استحت وقرت مكانها وتمت تاكل الفطاير وتشرب العصير..
داخل غرفه ساره.....
ساره بعدها واقفه اطالع خليفه اللي كانت اول مره تشوفه بلبس الجيش ..شكله كان واايد حلو ..وسيم ..وتمت اتفداه من خاطرها ..واستحت منه وهو يطالعها ..وسارت بكل هدوء صوب التسريحه ويلست على الكرسي ومسكت المشط وتمت تمشط شعرها ..وخليفه يطالعها ..وقرب منها ..وسحب المشط منها وتم هو يمشط شعرها ..شعرها نااعم واستانس خليفه انه يمشط شعر ساره ..وتموا الاثنين ساكتين ما يرمسون بس ساره مستحيه ومنزله وييها وعيونها غرقانه بالدموع ..وخليفه اول ما شافها نزلت راسها .يلس على ركبته عدالها وصار في مستواها وهي يالسه ..وحط ايده تحت ذقنها ولف ويهها صوبه ..ساره ما تحملت وبسرعه حطت راسها على جتفه وتمت اتصيح لوى عليها خليفه وهو يهدي فيها ويحاول يعرف شو بلاها ..
خليفه::
ساااره ..بس عااااد ..خبريني شو فيج ...يله حبيبتي ..فديت ساروتي انا ..خبريني شو فيج ..بس هدي عاااد لا تصيحين دموعج غااالية علي...
ساره استحت من خليفة ومن قربه منها ..ورفعت راسها ويت عيونها في عيونه وحست بالحب الكبير اللي في عيونه ..وقربت منه وحبته على راسه وقلت له ::
خليفه ..انا ..انا .احبك ..احبك ..واموووت فيك ..انت غيرت لي حياتي كلها ..خليفة انا ..احبك موووت ..انت الامان بدنيتي..
خليفة من سمع ها لكلام ...ذاااب وحضن ساره بقوة..وقال لها ::
فديتج انا ..حبيبتي اخيرا سمعتها منج..اخيرا ..ساره حبيبتي انتي حياتي انتي ..احبج مووت ..افديج بروحي انا ..
ساره ابتسمت وطالعت جتف خليفه وحطت ايديها على جتفه وهي تمسح عليه وقالت ::
طالع خليفه خيست دريسك ..
مسك خليفه ايدها وحبها بقوه وقال لها ::
يفداااج الدريس واللي لابس الدريس ..
وحمر ويه ساره ..وحست اكثر بقرب خليفه منها ..وعسب تكسر الاحراج اللي حاسه فيه قالت له ..
شو رايك في غرفتي حلوة صح ..
وقامت من مكانها ونش وراها خليفه ..وهو حاس انها منحرجه ...وقال لها ::
اكييد حلوة دام راعيتها حلوة..تدرين شو احلى شي فيها ..
طالعته ساره وقالت :
شوو؟؟
خليفة ::
انتي ..و...
ساره ::
و..شووو؟؟
خليفة وهو يطالع سرير ساره ويغمز لها ::
انتي وشبريتج الورديه هذه هههههههههههههههههههههه..
استحت ساره من تلميحات خليفه وضربته على جتفه ..وسحب ايدها ويلس وياها على طرف الشبريه ..ورفع ويهها صوبه وقال لها بصوت هادي::
ساره ..خبريني شو فيج؟؟شو مزعلنج حبيبتي ..
ساره ما عرفت شو تقوله ..وسكتت..
خليفة::
حبيبتي خبريني مب انا خليفه حبيبج خبريني ..
ساره لفت صوبه وقالت له ::
خليفه ..اوعدني انه مها صار ما تخليني ..انه مهما صار بتم دوومك عندي ..ومابتتخلى عني ابدن..اوعدني خليفه..
خليفة مسك ايد ساره بقوة وطالعها في عيونها وقال وبدون ما ينزل عيونه عنها ::
اوعدج فديتج انا ..واحلف لج اني ما بخليج ابدن ودوومني بتم وياااج شو ما صااار ..سمعتي ساره ..شو ما صاار ..انتي حرمتي ..حبيبتي ..حيااتي ..وعمري كله ...في حد يتخلى عن عمره بسهوله..
وانت بعد اباااج تحلفين لي انج ما تخلين عني ابدن ..
ساره وبدون ما تحس حطت راسها اعلى جتف خليفه وحضنته وقالت له بصوت هادي::
احلف لك اني ما اتخلى عنك ابدن ..واني دوم بتم ويااااك ..حبيبي انت ..حيااتي انت ..
حضنها خليفه اكثر وتموا جييه حاضنين بعض لفتره ..وعقب طالعها خليفه وقال لها ::
الحين ما تخبريني شو فيج..
ساره طالعت خليفه في عيونه ..وفجاه حست ان خلاااص اللي سواه عبدالله ما بيأثر فيها ..حتى لو رد طرش مسج او تصل ..خلااااص خليفه عندها بالدنيا..وابتسمت وقالت ..
ماشي بس حلمت حلم مب حلو .خلاااني طول الليل سهرااانه ..
خليفة ::
بس ..
ساره ::
بس..
خليفه تم يطالع ساره وقال::
تعرفين شو خاطري اسوي فيج يالدلوعه انتي ..
ساره ابتسمت وقالت ::
شوو ..يعني الواحد ما يحلم احلااام مزعجه ويخاااف مثلاااا..ههههههههههه
خليفة وهو يمط شعرها ويرد راسها لوراا::
لاااا والله والحين اللي يحلم احلام مب زينه ..يخلي كل الناس تحاتيه ويضربون خطوط من بوظبي للعين عسب يطمنون عليه ..
ساره وهي تضحك ..
اااااي خليفة شعري ترى والله اضربك ..هد شعري ..يا خي انا حساسه ..شو اتحراني ما احس ..
خليفه وهو مستانسه انه ميود ساره وملعوزها ::
لااااه حساااسه هااا ..انا براااويج ...
وطالع خليفه الباب وتاكد نه مقفول ..ويوم شافته ساره عرفت شو يبا يسوي وحاولت تشرد منه لكن ما قدرت لانه يودها بقوه وهو يضحك وقرب اكثر منها وهي تقوله وتاشره على الباب::
خليفه دخيلك لاااا والله الحين تدخل ماما ..ههههههههههه خليفة وخر ترى والله ازقر لك ماماااا..
لكن وين يا ساااره ..خلاااص خليفه اللي في راااسه بيسويه ..
علياا كانت يالسه اطالع التلفزيون وتاكل الفطاير خلصت الصحن كله ماشاء الله وسمعت ضحك ساره وضحك خليفه وصل لها ..وقالت في خاطرها ...يالله متى انا اعرس بعد ..
وشويه يت الشغاله مايليين وقالت لعليا ان الغدا جاهز وان امها تباهم ينزلون تحت بسرعه ..
قامت عليا ودقت الباب على ساره وخليفه ..وسمعت صوت ساره وهو تقول منوو..
علياا::
ساره يله تقولج ماما الغدا جاهز حقج انتي وريلج ..اتريااكم يله ...
ساره ويهها احمر وطالعت خليفه اللي مستانس بالوضع وقالت له ::
بسك خليفه ترى والله ماما الحين بتيي يله قوم نتغدى فديتك ..
خليفه تذكر انه ما تغدى وحس باليوع ..وقال لها ..انزين يله ..بس على شرط ..
قالت ساره ::
بعد يتشرط الاخ ..خيير امر شو شروطك..
خليفة::
ابااج تاكليني من ايدج الحلوة هذه..
ساره ..طالعت بكل حب وقالت له بدلع ::
من عيوني ...
وقامت بسرعه من حذاله ..وقالت له يله ننزل تحت ..
وشويه انفتح الباب وظهرت ساره مع خليفه وعليا يالسه تشرب العصير ...وبسرعه نشت من مكانها..وطالعها خليفه وقال لها ::
عليا ما شاء الله عليج ما خليتي لي شي ..مب هاالفطاير كانت لي ..ههههههههههههه
عليا قفطت واستحت وانخشت ورا اختها ..اللي ضربت خليفة على جتفه وقالت ::
هب عليك قول لا اله الا الله على اختي عن تنظرها ..فديتج عليا كلي اللي تبينه ..ترااه يسولف معااج ..
خليفة وهو يضحك::
ههههههههههههههههههه السمووحه ترى والله اسولف عليا وانتي حسبت اختي فطوم والله ..
علياا::
ادري انك تمزح لا عادي ما زعلت ..
ونزلوا ثلاثتهم للصاله اللي تحت وكانت ام ساره تترياهم ومجهزه لهم السفره ماشاء الله حق عشره اشخاااص ..

[هنوف الروح]

تحت في الصالة كانت ام سارة تنتظرهم ينزلون ،، واول ما وصلوا تحت ،، شافوا السفرة ما شاء الله ممدوده ماخذة نص المكان ،، استغربت ساره يوم شافت كل ها الاكل وقالت حق امها ::

ماما شو ها كله ليش منو بياكل؟؟ جبيله!!! محد غيري انا وريلي بس!!
ام ساره ::
شو يا بنتي انا ما زودت شي كله من اكل البيت ..اكلي انتي وريلج بس اكلي ،،ترى الرياال يوعان وشكله بعد تعبان

خليفة مسوي عمره مسكين ومحترم جدام ام ساره وقال لها بصوت هادي::
الصراحه عموه وااايد تعبتي عمرج ..ما له داعي صحن يكفيني انا وساره ،،
وغمز لساره اللي كانت اطالعه وتبتسم من حركاته اللي ما تخلص وقالت في خاطرها اونك عاااد صحن يسدنا انا وانت ..وشافته وهو يقول لامها::
بس عموه قبل لا اكل ابا اصلي العصر ترى ما صليت الين الحين ،،

ام ساره::
ويدي يالله بالستر الين الحين ،،لا يا ولدي صلاتك ابدى ،،ساره جهزي السياده لريلج ،، خليفة يا ولدي سير اتمسح وتعال صلي وعقب اتغدى مع مرتك عني فداك
خليفة بكل ادب واحترام::
ان شاء الله عموه ...
وسار خليفة الحمام يتمسح للصلاه ،، وساره بعدها اطالع الاكل ،، وتقول في خاطرها ،، الحين من صدقها ماما مجهزة ها السفرة كلها حقي انا وخليفة،،وتمت اطالع الاكل
صحن برياني دياي وعداله عيش ابيض وسمج ودهن وسلطه روب مع خيار..وسلطه عادية..صحن فيه لحم مشاواي وعداله خبز ،، والعصاير ،، وسله الفاكهه،، وابتسمت ساره وهزت راسها وقالت اصلا هذه عاده امي لحد يانا مب غريبة عليها..وابتسمت وتمت اطالع خليفة وهو يجهز عمره للصلاه وتمت اتفداه في خاطرها ..
ومر الوقت وخليفة ما طاع يظهر من بيت ساره الا بالغصب وصلى المغرب في العين وتحرك لبوظبي..
في الدرب خليفة يسولف مع ساره على الموبايل يهذرب معاها ،،وشاف خط ثاني عنده يرن واسم عبدالله ظاهر في الشاشه،، واتذكر انه على موعد مع عبدالله وبسرعه قال لساره::
حبيبتي ربيعي يدق لي ترى والله نسيت اني لازم اتصل له واعتذر عن الموعد ،، الحين بيعصب وبيسويها سالفه،،
ساره وهي تعرف منو يقصد وقالت له ::
خلاص حبيبي انت شوف ربيعك شو يبا وعقب كلمني انزين فديتك..
خليفة وهو مرتاح من كلام ساره::
اوكيه حياتي ،، فديتج انا اول ما اوصل الشقه بدق لج انزين عمري ..يله باي ..احبج ..
ساره وهي تحس بخدودها تحمر وتحس بالخجل::
اوكيه حياتي ..احبك ..
بند خليفة عن ساره..ورد اتصل على عبدالله اللي كان معصب من خليفة،، واول ما رن موبايل عبدالله رد بسرعه وقاال لخليفة::

يا خي انت ما تيووز عن حركاتك هاي ،،، اذا ما تبا اتي على الموعد قوول ياخي اتصل ..طرش مسج جان ما عندك رصيد..والا بعد رصيد للمسج ما شي...

خليفة مبتسم ووهو يسمع ربيعه معصب منه ،، وساكت وما قال شي ويوم خلص عبدالله هزااب
قال خليفة بصوت هادي::
خلصت خلاااص ،، ممكن ارمس وابرر موقفي،،ممكن؟؟
عبدالله وهو متنرفز ::
ممكن..تفضل..
خليفة::
السلام عليك الشيخ عبدالله ،، اول قبل كل شي ،، وثانيا انا لو تدري الحين راد من العين وبعدني مدٌرس وتعبااااان حيييل خلااااص منتهي ابا بس اوصل بوظبي واوصل الشقه واخذ دش حاااار من الخاااطر وارقد الين باااجر الصبح ...

عبدالله دق قلبه بقوه وحس ان السالفه فيها شي اكيد ساره فيها شي ..وسأله بسرعه ::
ليش في شي ؟؟خيير ؟؟شو صاار؟؟

ساره فيها شي ؟؟كان هذا السؤال على طرف لسان عبدالله ..بس يود عمره بالغصب..
خليفة وهو مرتاح ان عبدالله نسى السالفه وهدى شويه::
لا لا الحمد لله شويه بس الاهل تعبوا وسرنا نطمن عليهم ههههههههههههه تعرف الحين ربيعك رب اسره ههههههههه
عبدالله وهو يجاري خليفة في الرمسه::

رب اسره اونه هههههههههههه انزين يا رب الاسر الحين شوو ما بتييني المكتب او شووو..
خليفة وهو يطالع الساعه كانت الساعه 7 ونص العشا وقال::
شووف انا ان وصلت ان شاء الله بحاول اني اخلص بسرعه واييك المكتب انزين وان ما قدرت خلاااص بطرش مسج انزين ..
عبدالله وهو مسوي نفسه معصب::
بعدددد بطرش مسج لااااااااا ما في دااعي الشيخ لا تعب عمرك ..ويا راسك والله ان ما تصلت تخبرني انك بتي والا لا ترى ما تلووم الا نفسك خلفووه انزييين ..
خليفة وهو يضحك ::
ههههههههههه خيييبه تهددني وانا معرس ..حليلني انا ..انزين ان شاء الله عمي بتصل لك ..يله الحين خلني اركز على الخط يله سي يوو..
وبند خليفه عن عبدالله ..وتم عبدالله يحاتي ساره ..يا ترى شو فيها ..شو متعبها ..انا اللي اعرفه ان خليفة بس له يوم الخميس يزور ساره فيه..وابو ساره مشدد من ها الناحيه وااايد..شو صااار ..ليكون ساره تعبت من اللي صار ..ادري انها حسااسه وبتم اتفكر وتفكر..يا ترى خليفة حس بشي..لا لا لا كيف بيحس...هو اصلا ما يعرف بالسالفة..واكيد ساره ما بتخبره...
انا شو سويت ..ليش جييه انا نذل ..خلااااص لااازم انسى ساااره..اشيلها من بااالي..كيف انساها ..كيف ..ويت على باله فكره ..وظهر موبايله ..واتصل على امه ..واول ما ردت امه عبدالله قاال ::
الوالده انا قررت اني اعرس خلااااص ..خطبيلي اللي تبينها انزين ..

[هنوف الروح]

عبدالله قال ها الكلام حق امه وكانت هي يالسه في بيت اخوها مايد..
ومن نطق عبدالله الكلمه السحرية ..حست امه ان قلبها بيطير من الفرحه ..وتمت اطالع خدوي بنت اخوها ..وقالت محد غير خدوي تناسبك يا عبدالله ..
وبسرعه ردت حق عبدالله وقالت له::

عبدالله بسم الله يا ولدي شو يااك ..من صج ترمس اوشوووه؟؟

عبدالله وهو متوتر::
امايه ترى اذا ما خطبتيلي الحين ..ترى والله ما اعرس ..مب انتوا تبوني اعرس ..خلااااص الحين بتحقق امنيتكم ..خطبيلي اللي تبينها ..وانا موااافق.

ام عبدالله استانست من الكلام وما حبت تزيد في الرمسه تخاف يغير رايه وهي ما صدقت على الله يطلب منها تخطب له::
خلااااص يا ولدي العروس جاهزة ..خدوي بنت خالك مايد..ما شاء الله عليها حشيمه وبنت عرب ..وانت تعرفها زين ،، واذا انت جاد بكلامك الحين برمس اخوي مايد وبفاتحه في الموضوع ..

عبدالله قلبه دق من الكلام ،،وفكر في ساره ،، لكنه بسرعه رد على امه قبل لا يضعف مره ثانيه ::
خلاااص رمسيه وانا برمس ابوي الحين وبقوله السالفه ..انزين ..يله فداعه الله ..
ام عبدالله ما صدقت اول ما بند عبدالله الخط ..لفت صوب اخوها وقالت له اباك في سالفه ..
...
عبدالله من صوبه اتصل على ابوه وقال له السالفه ::
ابويه خلاااص انا رمست الوالده وقلت لها تخطبلي خدوي بنت خالي مايد ..تعرف ابويه انا ما بتم اعزوبي طول عمري ..والله نعرفها احسن من اللي ما نعرفها ..

ابو عبدالله تم ساكت وحس ان ولده قال ها الشي بس عسب ينسى البنيه اللي كان خاطره ياخذها ..لكن في نفس الوقت ارتاح من السالفه ..وقال احسن يت منه هو ::

خلاااص يا ولدي على بركه الله ..ان كانت نيتك تاخذ بنت خالك مايد ..امك مابتقصر..وانا متاكد ان خالك ما بيردنا ...وخدوي بنت مايد ما شاء الله عليها ..خلااص يا ولدي بنتريا امك وبنشوف شو رد خالك على الموضوع..

وبند عبدالله عن ابوه وحس بشويه ضيق في نفسه ..وبدون ما يحس ظهر من المكتب وركب سيارته وسار صوب البحر ..ووقف في مكانه المعتاد ...وتم يمشي ويمشي وهو يفكر شو يسوي ..وظهر موبايله وفتح الرسايل وكتب ها الرساله لساره::
(( انا اسف ساره على كل اللي سويته ،،سامحيني اذا سببت لج اي مشاكل او اذيه ،،لكن اوعدج من اليوم ورايح ما باذيج ..ولا بتسمعين عني اي شي ..لاني خلااااص قررت اتزوج ،،ووجريب بتسمعين ها الخبر من خليفه،، لكن بتظلين ساره الغاليه ولج مكانه خاصه بالقلب ..اتمنى من كل قلبي انج تسامحيني ..وتنسين كل شي صار ..واتمنى لج السعاده مع خليفه لانه انسان يستاهل وحده مثلج ،، لانه صادق وما يعرف اللف ولا الدوران ،،السموحه منج مره ثانيه ..عبدالله ..))
وارسل الرساله وما اهتم توصل او لا ولا تم يطالع في الموبايل انها وصلت او شي ..كتب المسج ورد الموبايل في جيب كندورته وكمل مشيته على البحر ..وفجاه حس براحه ،، وطالع البحر ،، حس باحساااس غريب ما عرف شو هوو.. احساس عجيب ..خليط من الراحه والسعاده ..يمكن ارتاح لانه خلااااص عرف هو ليش كانت احاسيسه لساره ملخبطه ومب واثق منها ..ويمكن لانه عرف ان الغيره هي اللي كانت ورا حزنه طول ها الفتره اللي مضت ..ويمكن حس بالسعاده ..لانه ربيعه وصديقه واللي اكثر من اخوه اهو اللي بياخذ ساره ..وما في حد ممكن يأمن ساره معاه كثر خليفه..
وسرح بنظراته صوب البحر ..وحس انه حمل ثجيل انزاح من صدره ..وتنفس الهوا اللي ضرب ويه وفيه ريحه البحر المحببه للنفس ..وزفر نفسه الحاااار في الهوااا وطالع السما وطالع البحر وقال في نفسه..لها الدرجه انا كنت غبي ..عايش في تعاسه وهميه ..ليش ما فكرت ان اللي بياخذ ساره هو ربيعي مب حد غريب ..هو اخوي وحبيبي وصديقي اللي اتمنه على روحي وحياتي ..فكيف ما اأتمنه على ساره ..كييف..كيف ما فكرت بها لشي ...
وحس انه خفيف وان حمل كبييييييييير انزاح من فوق صدره ..وقال في خاطره ..الله يوفقك يا خليفه انت وساره ..وان شاء الله بتوفق في حياتي انا بعد ..الحياه ما توقف ..ساره كانت فرصه وانا ضيعتها من ايدي ..وخليفه عرف كيف يحول ها الفرصه صوبه وكسبها ..وهو يستاهل ..ليش ما اجرب فرصتي انا مع بنت خالي ..يمكن هي اللي بتعوضني عن ساره..واكيد انا بستانس معاها ..ليش لا ..ليش ما اعطي نفسي فرصه ..ليش عايش في تعاسه ومعيش اهلي معاي في ها لدوامه اللي انا سويتها بنفسي ..
ورفع راسه للسما وطالع النجوم ..وابتسم ..غمض عيونه ..ومر كل شي في راسه مثل شريط الذكريات السريع ..كيف اول مره تعرف على ساره..وكيف حبوا بعض ..وكيف القدر دخل خليفه بينهم ..وكيف وكيف..
وقرر عبدالله انه يبدا صفحه يديده في حياته ..ويخلي خليفه وساره يعيشون حياتهم براحه وسعاده...
وفجاه اتذكر عبدالله ان خليفه ما اتصل ولا طرش مسج ..والساعه الحين قربت من الـ 9.30 وينه ها الريااال ..ابتسم عبدالله وقال في خاطره ..الله يعينج يا ساره على مواعيد خليفه.. الهرم انا براويه..وظهر موبايله ودق لربيعه ..
ورن الموبايل ورن..ورن ..ورن ..وبعد فتره رد خليفه على الموبايل..وبصوت مبحوح قال ::
آآآلووه منوووه ؟
عبدالله وفيه خاطره يضحك ..خليفه كان رااااقد وشكله مره تعبااان وراايح فيها ..
عبدالله اونه عصب ::
خليفه شوو ها الحركات يا خي انا يالس اتريااك من امتي..الصراحه انا غلطان اني اتريتك ..يا خي قول انك ما بتي ...ليش تخليني ملطوع اترياك ..
خليفه كان ماااشي خلااااص منتهي راااقد ومب عارف شو السالفه ..ومن كثر التعب طاح الموبايل من ايده وكمل رقاده ولا عليه من حد ..
عبدالله حس ان خليفه رقد مره ثانيه ..
عبدالله ::
الووه ..الووه ..خليفه ..خلفووووه ..طاااع هذا من صدقه رقد وسفهني ..هين يا خلفووه انا اراااوييك..
وبند الخط وهو يبتسم من حركات خليفه ...وركب سيارته ورد مكتبه ..

في العين ...

ساره كانت في غرفتها ..يالسه على الكرسي ..اطالع موبايلها ..وتقرى المسج ..اكثر من مره ..خلااااص .يعني خلاااص يا عبدالله ..بتخليني في حالي ..من صج..يعني الحين ارتاح ..وقرت جملته اللي كتبها في المسج اكثر من مره (( لكن بتظلين ساره الغاليه ولج مكانه خاصه بالقلب ))
وتنهدت ..وحست انها في حلم ..معقوله ها الامور كلها صارت لي انا ..معقوله كل شي استوى ...كيف بدت الحكايه ...كيف كان عبدالله هو كل شي بحياتها ..وفجأه حل مكانه خليفه..ها اللي صار كله مثل الحلم ما صدقت كيف انتهى كل شي ..عمرها ما تخيلت نفسها لحد غير عبدالله ..عمرها ما توقعت ان خليفه بيحل مكان عبدالله في قلبها ..عمرها ما تخيلت ان فيه حد بياخذ غلا ومحبه عبدالله من قلبها ..ويمكن اكثر ..
وقالت الحمد لله ان السالفه انتهت جييه ..و الحمد لله ان عبدالله بيتزوج وبينساني ...وقامت من كرسيها وسارت صوب شبريتها وانسدحت وتمت تفكر ..في الاحداث اللي استوت لها ..وبدون ما تحس..لفت عيونها صوب الكمبيوتر مالها ..كل شي ابتدا من هناك ..وغمضت عيونها ..وقالت في خاطرها ..الحمد لله ...

في بوظبي ..رد عبدالله البيت ..وشاف امه وابوه وحمده يالسين في الصاله ..وسلم عليهم ..رد ابوه وامه ..بس حمده ما ردت ..يلس عبدالله في الكنبه ويطالعها وهو يبتسم وطالع امه وهز راسه ..شو فيها ..ابتسمت امه وقالت له بهمس اسألها ..وطالع عبدالله ابوه اللي مسوي نفسه ما يخصه بالسالفه..

عبدالله::
يااالله يا حمدووه العرب يوم تسلم يردون عليهم انزين..
حمده لفت ويهها وما ردت ..عاااد عبدالله يمووت في اخته يوم تزعل منه ..ويحب يشوفها وهي لاويه بووزها اونها زعلانه الحين..وقام من مكانه وقعد جدامه مره ..ولفت حمده ويهها الصوب الثاني ..ورد عبدالله لف ويهه صوبها ومبقق عيونه وقال ::
اونها زعلاااانه من صج ..انزين خبريني انا شو سويت والله ما اذكر شي ..
حمده دزته من جدامها وقالت له ::
لااااه ما تعرف شو سويت..والله تعرف بس تستهبل عبوود..
عبدالله وهو يضحك ويطالع ابوه وامه اللي يطالعون وهو ساكتين منهم::
والله ما اعرف ذكريني ..تراني كبرت ..والكبر شين ..خبريني شو سويت ..
حمده قالت ::
لااااه ما تذكر ..وييين لولو كيتي هاااا ..قلت ان خليفه عنده ولين الحين ما يبتها ..شو تقص علي..انا قلت لربيعتي اني بيبليها شي عجيب محد بيهديها نفس هديتي ..ليش تبا تفشلني جدامها ..
وهني اتذكر عبدالله السالفه ..وقال في خاطره اهووو باجر الاربعاء ويوم الخميس الحفله ..
عبدالله وهو يدغدغها ::
اهااا ..عسب جييه ..القمر زعلاااان ..والله ترااني اكبر نسااي ..وخليفه اخس عني..بس والله العظيم اشتريتها ..بس نسيتها في سياره خليفه ..فااااااااااااااج طيب يا حمده ..جم حمده عندي انا ..
بااااجر القطوة بتكون عندج ..بس لا تزعل نفسك يا جميل...

وحمده تضحك وتتلوى بين ايده وهو يدغدغها ..واستانست على اخوها وقالت له ::
خلاااص .هههههههههههههههه خلاااص عبدالله والله سامحتك هههههه..ماما قوليله بسس لا يدغدغني..ههههههه
ام عبدالله وهي تضحك عليهم:
بسك يا ولدي حراام عليك بيعورها جبدها من كثر الضحك من زين ..قوم بارك الله فيك ابوك يباك في سالفه ..سير المكتب ويااه ..

عبدالله وهو يضحك ::
ان شاء الله الوالده الحين بسير ..ابويه تباني اسير المكتب ..
ابو عبدالله ::
هيه يا ولدي ..نرمس هناك ..يله بارك الله فيك...
ونش عبدالله مع ابوه وسارو المكتب ..وتمت ام عبدالله اتابعه بعيونها ..وهي تدعي في خاطرها .. وقالت ..الله يحفظك يا ولدي..ويحميك ..ويسعدك ويهنيك ..وتكون خدوي بنت مايد ويهه خير عليك ...وتريحك وتترس لك البيت يهاال ..ونشوف عيالك ..يا ولدي ..

[هنوف الروح]

دخل عبدالله مع ابوه المكتب وبندوا الباب ،، ويلس ابوه على الكنبه ويلس عبدالله حذاله،، عبدالله كان يعرف شو يبا ابوه منه ،، وعارف انه بيفتح معاه سالفه بنت خاله،، لكن ما حب يفتح الموضوع الا من ابوه يرمس فيه ..
بو عبدالله اول ما يلس تم ساكت شويه وعقب طالع ولده وقال له ::

اسمع يا ولدي انت رمستني وقلت انك تبا تاخذ بنت خالك ،، وانك خلاص معزم للعرس...

وسكت ابو عبدالله ..وكمل كلامه وقال::
يا ولدي اباك الحين تقول لي وبكل صراحه ..انت تبا بنت خالك والا بس لانه البنيه اللي خاطرك فيها انخطبت ..ترى بنت مايد غالية ومعزتها شارت معزة حمده اختك ..وانا ما ابيك تظلم بنت الناس وياك ..لاني ما ابا ايي يوم وفي حد يظلم بنتي حمده او يجرح مشاعرها ..

وهني رد عبدالله على ابوه بكل ثقه ،، وتعمد يحط اعيونه بعيون ابوه وقال::

لا يا بويه انا مستحيل اظلم بنت خالي معاي ..واللي ما ارضاه انه حد يسويه في اختي حمده ما ارضاه على بنات الناس..وانا متأكد من قراري ..خلاص ابويه ابا استقر ..ابا اكون لي اسره ..واعيش حياتي ..وتاكد يا بويه اني مستحيل انزل راسك وافشلك جدام اي حد ابدا..
وقام عبدالله وحب راس ابوه ..وهني قال ابوه::
بارك الله فيك يا ولدي ..الحين بس انت ريحتني ..ونتريا رد خالك علينا ..وما اعتقد انه بيرفض ..ان شاء الله تمشي الامور بكل خير..

في شقه خليفة ..الساعه كانت تقريبا 4 ونص الفير ..سمع خليفه رنه موبايله ..وشاف رقم ساره في الشاشه ..ابتسم ..ورد ..

خليفه ::
هلا والله ..هلا حياتي ..
ساره :
هلا عمري ..شخبارك ..يله خليفه حبيبي باقي ربع ساعه على الاذان قوم فديتك وصلي الفير وادعيلي..

خليفة ::
يا بعد عمري يا ساره ..تدين اني رقدت وما حسيت بالوقت ..
ساره :
فديتك حياتي ..انا تعبتك اليوم صح ..السموحه يا عمري.
خليفة ::
لا يا ساره ..انتي حياتي ..تعبج راحه ..عادي تعبيني كل يوووم..
ساره ::
يله فديتك اذن عدنا ..يله قوم اتمسح وصلي وادعيلي لا تنسي..وبتصل فيك الساعه سبع الا ربع اتاكد انك نشيت من الرقاد ..ورااك دواام لا تنسى..
خليفه ::
ان شاء الله ..دقيلي اخاف ارقد وما اانش ..بيسفروني ولله ..هههههههه..
يله عمري مع السلامه حياتي..
ساره :
مع السلامه حبيبي..
وبند خليفه عن ساره ..وشغل ليت الغرفه ..وتفاجا يوم شاف القطوة جدامه ..وقال بس الله هاي بعدها هني ..والله لتاكلني حمده ..باجر بوديها لعبدالله...ومن ذكر عبدالله ..اتذكر خليفه انه كان مواعد الريال ..وتم يقول في خاطره مب جنا عبدالله اتصل ..؟؟ وجيك على موبايله وشاف مكالمات مستلمه من عبدالله ..9.30 ..والله ما اذكر شو قلت له خخخخخخخخخ الله يستر ليكون معصب والله يكفخني ..ههههههه اقوم اصلي احسن وباجر في الدوام اتفاهم معاه....

ساره في غرفتها ..ما ياها رقااد بعد ما كلمت خليفه ..وتمت وااعيه الين يت الساعه سبع ووعت خليفه للدوام والحبيب كان راقد ولا عليه ..وما كان مسوي المنبه ولا شي في خاطره ..معتمد انه ساره بتوعيه ..ابتسمت ساره وهي تذكر السالفه..
وتمت اتقلب في شبريتها ..اليوم بتسير اتقدم استقالتها ..خليفه ما يباها تشتغل ..ما في داعي اسير من وقت ..بسير عقب على 11 او 10 ونص ..قالت ساره في خاطرها ..ليش استعيل ..خليني على راحتي ..
ومسكت موبايلها ..وبطالت الرسايل ..وبطلت رساله عبدالله وتمت تقراها مره ثانيه ..
يا ترى بايخذ منو..بنت خاله والا بنت عمه ..دايما كان يقول لها انه امه تباه حق بنت اخوها وابوه يباه حق بنت اخوه..يا ترى اي حده فيهم ..تنهد ساره وقالت ..اي وحده المهم تكون زينه ..وتقدر تنسيك ساره ..وتكون تستاهلك يا عبدالله ..الله يسعدك ..احنا ما كنا مكتوبين لبعض يا عبدالله..الله عوضني بخليفه ..انت اكيد ربي بيعوضك بحرمه زينه ومخلصه ووفيه ..تقدرك وتسعدك..
مثل ما خليفه قدرني وسعدني ..وحسسني اني كل شي في حياته ..

في بوظبي وعلى الساعه ..11.30 الظهر ..رن موبايل عبدالله ..وكان مكتوب عليه البيت يتصل بك ..
عبدالله::
الوه ..
حمده ::
هلا عبدالله ..اقول خبر خلفوه عن الاستعباط وخليه اييب لولو كتي اليوم انزين ..
ضحك عبدالله على اخته وقال لها ::
ان شااااااء الله عمتي الحين بخبره ..خليفه ..خليفه ..
خليفه كان يالس يدخل بيانات في جهازة ورد على عبدالله بدون ما يطالعه لانه مندمج في شغله ::
هاااا..خييير شو تبا..
عبدالله ::
خليفه يا الهرم ..هذا مسج من حمده ..تقول لك ..خلفووه عن الاستعباط واحسن لك اتييب لولو كتي اليوم ..انت فاهم والا لاااا..
خليفه رفع راسه وما فهم شو يقول عبدالله ::
شوووه ..منووه لوولوووو ..اهاااااا..قطوتها اللي تخرعني صار لها جمن يووم..لاااا قول لها يسلم عليج خليفه ويقول لج القطوه صارت من نصيبه ..تعودت عليها يا رياال ..ادش الشقه اشوفها ..واظهر وانا اودعها ما ارووم على فرقاها ..
حمده من سمعت ها الرمسه ..صرخت وقالت ::
والله يا خليفه ان ما يبت لولو كتي والله اضربك انزييين ..خبره يا عبوود..باااي
وبندت السماعه في ويه عبدالله..وتم يطالع الموبايل وهو مستغرب ..وقال لخليفه::
صكت السامعه في ويهي ..اخخ عورني ويههي..خليفه ان ما يبت القطوه اليوم ترى انا اللي بضربك مب حمده ما فيني على صدعتها يوم ادش البيت سمعت ..فهمت ..
خليفه وهو يستهبل..انزين بحاول ..وكمل شغله..

وفي نهايه الدوام ..وهم طالعين من الشغل ..عند براكن السيارات..عبدالله وخليفه اتفقوا على موعد عقب المغرب يتقابلون فيه ..وذكر عبدالله خليفه بالسالفه ..وهدده ان ما ياب هديه حمده ترى موته اليوم ..وضحكواا الشباب وكل واحد سار لبيته..

[هنوف الروح]

ابوظبي ..المغرب..بالتحديد ..الساعه 7 مساءا..يوم 10/4/2006
خليفه كان متاخر على موعده مع عبدالله ونازل مسرع من شقته ..ويوم وصل سيارته ..وشغل السياره ..اذكر ..قطوه حمده..وقال في خاطره اييبها او لا اييبها او لااا..وبعدين قرر انه اييبها ويف عمره..ورد مره ثانيه صعد فوق للشقه ..ودخل غرفته وحمل القطوة ورد نزل مره ثانية ..وبطل السيت اللي ورا وسدحها ..وصعد جدام ..ورفع راسه يطالع الجامه ..وشاف ان ريل القطوة مرفوعه لفوق وما يقدر يشوف السياير منها ..وقال في خاطره شو ها الحاله ..ورد نزل مره ثانيه ..وتم يعدل ويعدل الين ما ظبط الوضع ..وصعد مره ثانيه وطالع في الجامه وشاف الامور طيبه ..قال في خاطره ..والله ما يسوى علي ريال شطولي وشعرضي ومعاي قطوة في سيارتي ..
سياره خليفه من النوع السبورت ..سياره شبابيه ..سريعه ..وعسب جييه هو مفتشل من القطوة ..مخربه برستيجه..خخخخخخخخ
وطبعا عبدالله يالس ويتحرطم على خليفه لانه متاخر عليه كالعاده يعني ما شي يديد...وتوه مظهر موباليه وبيتصل الا رن موبايلة وكانت امه ..
عبدالله ::
السلام عليكم هلا الوالده ..
ام عبدالله ::
وعليكم السلام هلا ولدي عبدالله شحالك يا ولدي عساك بخير ..
عبدالله ::
بخير يلعج الخير..دام انتي بخير انا اكيد بكون بخير..
ام عبدالله::
الله يبارك فيك يا ولدي ..يا بوك حمده حشرتني ,,وتقولك لا تنسون قطوتها ..باجر الحفله ترى ..
عبدالله سمع حشره عند امه جنها في السوق ..
امايه انتوا وين ؟؟شو مب في البيت ؟؟
ام عبدالله ::
لا يا ولدي وين في البيت ،، اختك تبا تشتري لبس للحفله ،، وتبا شي يديد،، وشغلات بنات ما اعرف فيها انا ..
عبدالله ضحك من خاطره على حمده وقال::
والله سالفه هايلا البنات ..الله يعين ..هذه وهي صغيره جيه تسوي عيل لكبرت شو بتسوي بنا ..الله يعينج امايه عليها الصراحه ..
ام عبدالله ::
ما عليك يا ولدي المهم انت لا تنسى ..وخبر خليفه انه ما ينسى دخيلكم وفكوني من ها السالفه ..
عبدالله::
ههههههههههه ان شاء الله ..الحين بتصل فيه انا ..يله الوالده فداعه الله ..
وبند عبدالله عن امه وظهر رقم خليفه واتصل فيه..
خليفه::
هلا هلا هلا والله بالشيخ عبدالله خشمك يا رياال..
عبدالله::
هلا والله الشيخ خليفه..خشمك .يا بووك انت وين ..عيزت وانا انطرك..
خليفة::
يا خي زحمه الشيشه ..ان اترس السياره ..ان شاء الله ربع ساعه وبكون عندك..
عبدالله ::
انزين اقوول لا تنسى القطوة..يبتها او لا؟؟
خليفه مسوي عمره ناسي::
اوووه يا رياال ليش ما ذكرتني ..خلاااص باجر العصر بييبها لك.
عبدالله نش من كرسيه::
شوووووووه شوو بااجر العصر...قسم بالله ان ما يبتها لحين والله لتشوف شي ما شفته بحياتك يا خلفووه..
خليفه وهو يضحك:
خيييييييبه ..شو بتجتلني يعني ..هدي هدي يا بووي يبتها ..والله اني صعدت ونزلت مرتين الشقه بس عشان سواد خشمها ..بسم الله والله انها تخرع..
عبدالله ::
والله انك حركات يا خليفه ..المهم انك يبتها ..يله اتريااك في المكتب ..بخلص شويه اورااق ..وعقب بنسير السينما وعقب نتعشى على حسابك يا حبيبي..هههههههه
خليفه ::
يا خي انت ما تراعي اني معرس ..شو الناس يا رب ..شو ها الربيع اللي ما يحس في ربيعه ..ما تدري انه كل فلس له جيمته الحين ..امري لله .سندويشات فلافل وطعميه وامري لله..
عبدالله :
شووه شو سندويشات والله لدوس فبطنك ..تاكلني عشاء محترم في مطعم محترم ..شووو تتحرى انت بس اللي بتعرس ..
وسكت عبدالله يتريا رد فعل ربيعه..
خليفه ::
شوووه.شوو قصدك ..اهااااا ..الظاهر انه في امور تستوي من ورااااي..وها الشي يباله قعده..
عبدالله ::
هههههههههههههه والله انك سالفه ..انت تعال وانا بخبرك ..اووه ..شووف حمده على الخط الثاني ...بسرعه تعال وفكني منها ...
خليفه ::
هههههههههههههه انزين قلت لك الشيشه زحمه ..يله ربع ساعه وبكون عندك..
بند خليفه عن عبدالله ..ور د عبدالله على حمده ..
حمده::
الووه عبدالله ..
عبدالله ::
هلا حمده ...هااا خيير ..
حمده :
عبدالله ذكرت خليفه بلولو كتي .؟؟
عبدالله ::
والله العظيم ذكرته..وعنده في السياره ..ويوم بيوصل بنزلها سيارتي وبييبها لج البيت ..انزين..
حمده ::
انزين يله باي ..
وبندت وما سوت لعبدالله سالفه..عبدالله طالع الموبايل وقال في خاطره ..ها البنيه يبالها ضرب ..
وتم يراجع الاوراق والفواتير وانشغل مع شويه زباين ...وعشر دقايق الا سمع صوت هرن برى المكتب وصوت سياره خليفه وحشرته ..بركن خليفه جدام المحل ونزل ..وهو نازل صرخ على راعي الكافيتريا اللي عدالهم ..
خليفه::
هااالووو .عبد الغفووور..سوي اثنين شااااي كرك ..سوي مزبووط انزيين..
عبدالغفور ::
ان شاءالله ارباب..
ودخل خليفه المحل وربش البقعه ..ولعوز رشيد كالعاده ..وسلم على عبدالله ...
خليفه ::
السلااام عليكم الشيخ عبدالله ..شخبارك ..
عبدالله :
وعليكم السلام الشيخ خليفة شخبارك انت..
وتم عبدالله يطالع ايد ربيعه الفاضيه .وفهم خليفه شو يبا عبدالله وقال له ::
خييير شوو عندك ليكون تباني ادش المحل بالقطوة ..لاااا والله تخسي حمدووه ... اخرب برستيجي جدام عبد الغفور ورشيد..نوو واااي..
عبدالله مسك ايد خليفه وحط مفتاح الستيشن في ايده وقال له :..
خليفه قبل لا تيلس سير نزل اللعبه من سيارتك وحطها في سيارتي ..دخيلك ما فيني على حشره حمده ..كل عشر دقايق دقت اتاكد انك وصلت او لاااا..
خليفه :
عبدالله عين من الله خير .توني داش محلك حتي ما يلست بعدني وتباي اظهر
عبدالله::
ما عليه الشيخ خليفه تحملنا ..بنثجل عليك .انت سير الحين وانا بعزمك على احلى شاي كرك في حياتك ..
خليفه ::
شو بعد تعزمني ..تراني خلاااص طلبت ..انزين مو مشكله ..انت تدفع.خخخخخخخخ
وخذ المفتاح وسار صوب سيارته وظهر القطوة وبسرعه سار صوب سياره عبدالله وبطل الباب وفر القطوه داخل وما اهتم انه يعدلها ..وصك الباب ورد المكتب عند عبدالله..
يوم دخل شاف ان الشاي وصل..وعبدالله كان مشغول يرمس حد في الموبايل واول ما شاف خليفه قال::
كاهو خليفه توه داش والله العظيم انه حطها في سيارتي حمده ..رحميني دخيلج..يله بويه مع السلامه ..
خليفه ::
خييبه هااي اختك حنانه ..حمد الله اني ما بخذها ابتلش فيها عقب ..هههههههه
عبدالله فر خليفه بعلبه الكلينكس اللي عنده وقال :
جب جب لا ترمس عن حمده فهمت او لاااا..اقووول خليفه انا بسير ويا رشيد ورا الستور بشوف البضاعه اللي وصلت وبييك انزين ..ما بتاخر خمس دقايق..
خليفه قام من مكانه ولف ورا مكتب عبدالله ودز عبدالله وقال له بكل ثقه عقب ما يلس في مكتبه ::
لا لا عادي اصلا المكتب مكتبي ..لا تحاتي انت بس ..سير وانت مطمن ..
ضحك عبدالله وسار ويا رشيد الستور ورا المكتب ..
خليفه تم بروحه في المكتب ما عرف شو يسوي ..بطل النت ودخل شويه الشات ..وتم يلعوز الموجودين ..وظهر ..ودش المنتدى اللي مشارك فيه ..وتم يشارك ..وسجل خرووج ..وما عرف شو يسوي ..وطالع الساعه ..وفكر في حبيبته ساره..وتذكر امس يوم كان عندها في الغرفه ..واستانس وهو يتذكر كيف لعوزها ..وبطل موبايله يبي يتصل بس اتذكر انها قالت له ان اليوم حريم اخوانها وربيعاتها يايين يزورونها ..وما حب يغصص عليها ..وفكر قال بيطرش لها مسج ..وبطل مسجاته ..وشاف ان اغلب المسجات منها وبعضهم من ربعه نكت وخرابيط وسوالف ..وما حصل شي حلو يطرشه لها ..
ولمح بعينه موبايل عبدالله....وقرر انه يشوف مسجاته واذا عيبه مسج يطرشه لموبايله...
ومسك الموبايل..وبطل المسجات ..وتم يشوف المسجات ..اول مسج لقاه مكتوب عليه الوالده..
(( لاتنسى قطوة حمده))
ضحك خليفه ..وتم يقرى المسجات وما حصل شي حلو ..بطل الحافظات ونفس الشي ما حصل شي حلو..وقرر يبطل الرسائل المرسله ..يمكن يحصل رساله حلوه ..وبطل الرسائل اول رساله ..نفس الشي للوالده..
(( إن شاء الله ما بنسى القطوه))
خليفه ضحك وقال في خاطره حليلك عبدالله شو سوت بك حمده..
وثاني مسج كان مكتوب عليه...(( الاهل))..وخليفه ابتسم وقال ما يسوي عليه عبدالله نسى هديه حمده ..وبطل المسج وهو على باله انه من ام عبدالله او حد من اهله..وقرى المسج ..ما فهم في البدايه اي شي ..وتم مره ثانيه يقرى المسج
((انا اسف ساره على كل اللي سويته ،،سامحيني اذا سببت لج اي مشاكل او اذيه ،،لكن اوعدج من اليوم ورايح ما باذيج ..ولا بتسمعين عني اي شي ..لاني خلااااص قررت اتزوج ،،ووجريب بتسمعين ها الخبر من خليفه،، لكن بتظلين ساره الغاليه ولج مكانه خاصه بالقلب ..اتمنى من كل قلبي انج تسامحيني ..وتنسين كل شي صار ..واتمنى لج السعاده مع خليفه لانه انسان يستاهل وحده مثلج ،، لانه صادق وما يعرف اللف ولا الدوران ،،السموحه منج مره ثانيه ..عبدالله ..))
خليفه قرى المسج اكثر من مره ..وحس الدنيا تلف به ..شو ها المسج ..ليش اسمي واسم حرمتي فيه ..وشو دراه عبدالله بساره ..وليش مكتوب الاهل ..منوووه يقصد ..اسئله كثيره مرت في بال خليفه ... وما عرف شو يسوي ..معقوله اللي قاعد يصير ..معقوله ..عبدالله ...وساااره ..كيف عرف سااره..لا لا لا اكيد هذه وحده غير..لا لا مستحيل تكون ساره ..ساره حرمتي انا ..ساره حبيبتي انا ..مستحيل تكون هيي..وعسب يمطن نفسه اكثر بطل تفاصيل الرساله ..عشان يتأكد من الرقم ..لا لا مستحيل هذا رقم ساره ..والمسج بتاريخ امس ..معقووله ..ساره تخوني مع ربيعي ..معقوله عبدالله ..يقص علي ويخوني في شرفي وعرضي ..معقوووله ..لا لا مستحيل..شو قاعد يصير انا مب فاهم شي ..وتم مره ثانيه يقرى المسج ...وحس بحراره في راسه ..وحس بغضب حس انه يبي يصارخ ويبي يضرب اي احد جدامه ..لكن هذه الاحاسيس كلها كانت داخليه ..كان يغلي من داخل وما عرف شو يسوي .ومثل المينون قام يدور رسايل ثانيه ...وما لقى شي ..ما عرف شو يسوي ..
معقوله اللي قاعد يصير ..انا مو مصدق ..عبدالله وسااره ..معقوله ..لا مستحيل ..كيف ..ويين ..متى ..عرفها ..كيف عرفته...متى عرفته ..امس مطرش لها المسج..شو يعني الين امس وانا مخدوووع ..شو اللي قاعد يصير انا مب فاهم ..وما يدري بنفسه الا وهو يبطل كل شي في الموبايل ..الحافظات والرسائل والتقارير ..يدور اي شي ..واخر شي بطل الاستديو..وتم يدور بين الصور والفيديو..وما لقى شي ..ودخل الحافظات الشخصيه ..ولقى مكتوب صور الاهل ..وبطلها خليفه..البدايه كانت اكثرها صور لحمده ..وبيتهم ..ومن بين الصور ...شافها ..شاف صوره ..حبيبته ..شاف ساره ..حرمته ..بجمالها ..ودلعها ..شافها واقفه ومتعدله وفستانها اللي يظهر من جسمها واايد..وما صدق عيونه ..وشاف تاريخ الرساله ..لقى انها من كمن شهر ..وشاف التاريخ ..وتذكر انه في هذا اليوم كان هو بعد في العين ..وتذكر انه في ها اليوم كان مودي اخته فطوم ملجه جريبتهم من صوب امهم ..وتذكر انه شاف ساره في ذاك اليوم .
آآآآه معقوووله يا ساره ..معقووله اللي قاعد يستوي انا بحلم او بعلم ..لا هذا كابوس مستحيل يكون حلم..مستحيل اللي قاعد يصير..ووقف خليفه وما عرف وين يسير .ما كان شايف شي جدامه ..كل شي كان غريب...وماكان يسمع شي غير تساؤلاته اللي ما حصل لها اجابه ..ومشى بخطوات ثجيله للباب..وحس ان الباب بعيد ...واول ما وصل لباب المكتب كان عبدالله ورشيد ياين للمكتب ..خليفه من شاف عبدالله ..فار الدم في جسمه ..وحس انه يبي يخنقه ..يجتله ..كيف انت تخوني ...كيف وانت اخوي ..انت ربيعي ..كييف ..عبدالله كان ماشي هو ورشيد ورفع عينه صوب ربيعه وابتسم ..لكن الابتسامه اختفت مع نظرات خليفه الحاده ..عبدالله حس بشي غريب ...خليفه كان واااقف يطالع عبدالله وعيونه حمر والعرق في ويهه من العصبيه وايدينه ترتجف ..وطالع عبدالله ربيعه وقال له ::

خليفه ..بلااااك ..

[هنوف الروح]

وما قال اكثر عن ها الكلمتين..وسكت ..ونزلت عيونه على ايدين خليفه وشاف انه ما سك موبايله ..وفجاه حس عبدالله بالدنيا ادور من حوله ..لا يكون ..لا .. مستحيل ...لا يكون شاف المسج..وتذكر انه ما مسح المسج..لا والاخطر من ها كله تذكر الصوره ..اللي كان مقرر انه يحذفها اليوم بالذات ..مستحيل يكون شافها ..لكن اللي سواه خليفه خلاااه يتأكد انه خليفه شاف المسج وشاف الصوره ..
قرب خليفه من عبدالله ..ورشيد مستغرب منهم وساكت يطالعهم ..خليفه مسك عبدالله من جتوفه وهزه بقوه وقال له ..
ليش يا عبدالله ..ليش ..
ومسك خليفه ايد عبدالله وحط الموبايل في ايده ..وسار بكل هدوء لسيارته ..عبدالله جسمه كله كان يرجف من اللي صار..وطالع ببط موبايله ..كانت صوره ساره موجوده ..وهي مبتسمه ..فجاه استوعب عبدالله اللي صار..ورفع راسه ولقى ربيعه ركب سيارته السبورت ..وبدون ما يحس ربع ورا خليفه ..وبطل باب السياره وركب عداله وخليفه يصارخ فيه ::
اظهر من سيارتي ..اقووولك اظهر..اظهر يا عبدالله ..دام النفس عليك طيبه ..
عبدالله وهو يحاول يسحب السويج من خليفه ::
خليفه والرفجه تعطيني المفتاح ..انا ما بظهر ..اقولك عطني السويج ..
خليفه دز عبدالله بقوه ...وشغل السياره ..ورد سيارته بسرعه ريوس ودعم السياره اللي واقفه على الباركن الثاني ..وداس بكل قوته على البترول
وعبدالله انضرب راسه بقوه في الدريشه ..من الدعمه ..ورد يحاول يهدي من خليفه وهو في السياره..
عبدالله وهو يصارخ في ربيعه ::
خليييفه ..اقووولك وقف ...يا خي بتجتل نفسك وبتجتل حد معاك ...هدي السرعه..خلني اشرح لك ..
خليفه وهو معصب ويصارخ::
وخر عني اقووولك ..شو خايف على عمرك خااايف ..تنجلب وما تشووف حبيبتك ..انا مثل الغبي بينكم ..تمثلون عليه..ليش يا عبدالله ليش..
عبدالله وهو يحاول يهدي ربيعه :
لا والله العظيم لا ...خلني اشرح لك السالفه كلها ..دخيلك خليفه والله انت فاهم الموضوع غلط ..خل...
قاطعه خليفه وهو معصب ويصارخ::
غللللللللللط انا فاهم السالفه غللللط!!!!!!!!!! بعد تبي تبرر ..وخر عني اقولك وخر ايدك من الستي...
وماكمل خليفه كلامه ..لانه عدي الاشاره الحمرا ..ودعم في سياره استيشن يايه من الشارع الثاني...وانجلبت فيهم السياره اكثر من مره واخر شي استقرت فوق الرصيف بعد الاشاره بعده امتااار..
وتجمعوا الناس والشرطه وحاولوا الشباب يساعدون الين ما توصل الاسعاف ..
عبدالله حس انه صدره وقلبه بيوقف من الالم اللي كان يحس فيه ..وحس بشي حار ينزل ويغطي عيونه ..كان دمه يصب بصوره رهيبه ..وتم يطالع خليفه اللي كان مغمى عليه وشاف الدم يغطي ربيعه ..اللي كان محشور بين كيس الهواء اللي في الاستيرنغ وبين الكرسي ..والدم يغطيه..غمض عبدالله عيونه ما حس بشي ..وحس بهدوووو..غريب..

[هنوف الروح]

المكان مظلم ..والصمت يخيم على المكان ..عبدالله مب عارف وين يرووح ..كان يمشي بخطوات ثقيلة..يحس انه في حد يسحبه من تحت ..وتلفت حوله اكثر من مره ..يدور شي ..او حد يتعلق به ..ويسحبه من المكان الواقف فيه ومب قادر يتحرك منه..وشويه شاف ..اضاءه خافته ..وسمع صوت حمده تناديه ..عبدالله حاول يصرخ بكل صوته ..ينادي اخته حمده ...لكن الصوت ما خرج ابعد من شفاته ..وتمت حمده تنادي عبدالله اكثر من مره ..

عبدالله ..عبوود ..دخييلك تعاااال ..انا هني ..عبوود ..انا خايفه ..برووحي ..لا تخليني ..عبدالله ..

عبدالله التفت لجهه الصوت كانت نفس الجهه اللي تظهر منها الاضاءه ..عبدالله ..كل ما حاول يستجمع قوته ..ويتحرك من مكانه ..ريوله ما كانت اطاوعه ..ويطالع تحت ..ليش ريولي ما اتحرك ..وسمع حمده تبكي ..وتناديه ..عبدالله ..دخيلك ..لاتخليني ..انا خايفه من دونك..عبدالله ..تعااال..وحس عبدالله بانه لازم يتحرك صوب حمده..ليش مب قادر يوصل لها ..وحس انه ..الاضاءه قامت تضعف ..وتبعد ..وفجأه ..رد صوت حمده ..الصوت اللي يحبه اكثر من اي شي في الوجود....وتبع الصوت ..وشافها يالسه وعاطتنه ظهرها ..وكانت لابس ثوب الصلاه اللي هو اشتراه لها ..لما بدت تتعلم الصلاه ..وتحركت اريوله ..وقرب اكثر من اخته ..وصار صوتها اوضح من قبل..والاضاءه تزيد ..ويوم وصل وراها ..سمعها وهي يالسه تقرى القران ..بصوتها الطفولي ..المحبب لنفسه اكثر من اي شي بالدنيا ..كانت يالسه تقرى سوره الاخلاص ،، والمعوذات ..وحس عبدالله ..بانه قرب اكثر من اخته ..ومد ايده .وحطها على جتفها ..ولفت حمده بهدوء صوبه ..وابتسمت ابتسامه خفيفه ..ومدت ايدها له ..ومسك ايدها ..وحس بدفء ايدها ..وقالت له ..عبدالله ..تعال معاي ..انا احبك ..تعال عبدالله ..ومشى وياها صوب الاضاء ..وحس ان الاضاء قويه وردت حمده تقرى القران مره ثانية .بصوتها الجميل ..وغمض عبدالله عيونه ..لانه الاضاءه كانت قويه ..وزاد صوت حمده ..وحس ان صوتها جريب من اذنه ..ورد بطل اعيونه ..وشاف الاضاءه مره ثانية ..لكن هذه المره كانت غير ..فتح عيونه بشويه شويه ..واكتشف ان الاضاءه كانت تصدر من الليتات اللي في سقف الغرفه..غمض عبدالله عيونه .وبهدوء بطلها مره ثانية ..وها المره كان صوت حمده وااضح ..ولف جهه صوتها ..وحصلها يالسه على كرسي عدال السرير اللي راقد عليه .وحاول يناديها لكن ما قدر..وحرك اعيونه ببطء حوله ..وشاف ان المكان غريب عليه ..يا ترى هو ويين الحين..وفتح عيونه ..وحمده مندمجه في القراءه .حاول يناديها ..لكن حس بجفاف في حلقه ..وحس ابدينها في ايده..واستجمع كل قوته ..وضغط بشكل خفيف على ايدها ..وحس انه بذل مجهود كبير ...لانه ها الحركه البسيطه حس عقبها بتعب شديد.وغمض عيونه بسببها ..
حمده من حست ان ايد عبدالله ضغطت على ايدها ..وقفت عن القراءه..وقلبها دق بقوه..ورفعت راسها بشويه شويه خايفه انها تزعج اخوها ..وحست مره ثانيه بايده وهو يضغط على ايدها ...ورفعت عيونها صوبه ..كان مغمض عيونه ..وبهدوء فتح عبدالله عيونه ..وتقابلت عيونهم لثواني ..وابتسم عبدالله بصعوبه ..لاخته ..واختفت بسرعه الابتسامه .ورد غمض اعيونه..حمده ما عرفت شو اتسوي ..وقلبها دق بقوه ..خصوصا ان الاجهزة اللي متصله بجسم اخوها قامت تظهر اصوات ..واشارات هي ما فهمت عليها ..وقالت حمده بصوت واطي..

عبدالله...عبدالله..عباادي..بطل عيونك حبيبي..انا حمده..عبدالله انت تشوفني ..
ودمعت عيون حمده ..اكثر لما حست ان عبدالله رد عليها ..بانه ضغط على ايدها مره ثانيه بس ها المره كانت اقوى شويه من المرات اللي سبقت..وحست بان قلبها بيوقف من الفرحه..وماكانت عارفه شو تسوي ..تسير تنادي ابوها والدكتور ..والا تم ويا اخوها ..وما كان هاين عليها انها تخلي عبدالله ..كانت خايفه انه يبطل عيونه وما يحصلها ..يقوم يرقد مره ثانيه ويطول في رقدته ..طبعا حمده مب فاهمه شو معني غيبوبه ..وكانت اتحرى ان اخوها راقد ..وتمت اطالع الباب ..وتقول في قلبها ..
بابا ..تعال بسرعه ..تعااال..ودارت عيونها في الغرفه ..وشافت زر الطوارئ ..مرسوم عليه ممرضه ..واتذكرت ان امها قالت لها اي شي تشوفينه على اخوج ..ظغطي ها الزر بسرعه بتييج النيرس...وما كذبت حمده خبر..وبسرعه سحبت الزر وتمت ضاغه عليه اكثر من مره..وبنفس الوقت ميوده ايد اخوها ..وتمت ترمسه ..
عبدالله ..عبدالله ..بطل اعيونك عشاني ..شوفني انا حمده ..عبدالله والله وحشتني..اشتقتلك ...واشتقت لصوتك ..عبدالله اخوي حبيبي ..بطل عيونك يالله عاااد ..والله مو حلو البيت من دونك...
ما كملت حمده كلامها ..الا باب الغرفه انفتحت ودش منه الدكتور ومعاه ابوها وممرضات ..وبعد دكتورين ..

ابو حمده سحبها من عدال السرير وحضنها وقالها لا تخافين حمده..وشافت حمده الدكاتره ..يفحصون الاجهزة..ويفحصون اخوها ..وفجاه سمعتهم يقولون ..لابوها..ان عبدالله ..افاق من الغيبوبة..وبدت اعضاءه الحيويه تعمل بشكل طبيعي اكثر من اعتماده على الاجهزة الطبية..وشويه بطل عبدالله عيونه..وصرخت حمده بصوتها وقالت .::
عبداااالله..باباه شوف عبدالله بطل عيونه مره ثانيه..والله العظيم طالعه ابويه شوووفه بطل عيونه..
دمعت عيون ابو عبدالله ...وما قدر ينطق ...وما قدر يوقف على ريوله ..ويلس على الكرسي وتم يقول::
الحمد لله..الحمد لله ..الف حمد وشكر لك يا رب..
وحضن بنته بقوه ..وتمت حمده اتصيح وقالت للدكتور :

خلاااص دكتور ..اخويه ما بيرقد مره ثانيه هنييه..
ابتسم الدكتور وهو مشغول يعاين عبدالله ...اللي مب عارف شو السالفه ..بس حاس بالربشه اللي حاوليه ..::
لا يا بنتي خلااااص ..اخووكي مش حينام هنا مره تانيه ..باذن الله ..

وما مرت ساعه على انتشار خبر ان عبدالله فاق من غيبوبته ..الا انترست المستشفى باهل عبدالله وخواله وعمامه..وانزحم القسم اللي نقلوا فيه عبدالله ..بعد ما كان في قسم العنايه المركزة..واصر ابوه انه ينقلونه الي قسم الـ V.i.p ...
عبدالله كان مو مستوعب اللي صار له ..غرفته كانت متروسه رياييل ..عمامه وخواله ..وربعه ..وكان يسمع من كل حد كيف صار كل هذا ..وكيف انه سوى حادث..
عيون عبدالله كانت ادور شخص واحد بين كل الموجدين ..شخص وده انه يشوفه ..وكل ما سأل حد عنه قال له ..انت ارتاح واظهر بالسلامه اول وعقب بتعرف..كل يوم يمر وعبدالله يحس انه السبب في اللي صار له ..وما خلا حد ما ساله عن ..خليفه..وبسرعه يتغير الموضوع ..ويشغولنه بموضوع ثاني...واستغل عبدالله فرصه انه حمده كانت بروحها معاه ..كانت يالسه تحكيله عن البيت ..وكيف انها زعلت يوم درت انه سوى حادث..وكيف انها ما قدرت تسير المدرسه..واستغرب عبدالله يوم سمع انه في غيبوبه ..شهر كامل ..وقلبه كان يدق كل ما طروا الحادث ..ليش محد اييب طاري خليفه ..ليييش ..وكان يبعد اسؤأ الاحتمالات من راسه ..مسك عبدالله ايد حمده وقال لها بصوت ضعيف ::
حمده ..حبيبتي ..بسالج ..انتي تحبيني صح..؟مب انا اخوج العود ..
حمده ::
هييه ..احبك وااااايد ..وما اباااك ترقد ها الكثر مره ثانيه انزيين..
عبدالله قلبه عوره يوم سمع اجابه اخته البريئه::
انزين حمده حبيبتي ..والرفجه ..قوللي ..خليفه ..شو اخباره ؟؟؟وينه ؟؟ليش ما يا يزورني ؟؟
حمده نزلت راسها وما ردت عليه..وتمت اطالع ايدها ..
عبدالله مسك ايدها ورفع راسها وقال لها::
حمده حبيبتي خبريني ..خليفه ..صار له ..شي..وينه ..؟؟
حمده بكل براءه::
بس باباه ..قال لي ما اقولك ؟؟
عبدالله انقبض قلبه اكثر وقال لها ::
حمده دخييلج خبريني ..خليفه ربيعي وابا اتطمن عليه ..خبريني ..

اتنهدت حمده ..وقالت وبدون ما اطالع اخوها ..::
عبدالله ..خليفه راااقد...

ما فهم عبدالله شو تقصد حمده من الرمسه وقال لها ::
شوووه..شو يعني راااقد..شو تقصدين..؟؟
حمده عدلت يلستها وقالت له اونها تشرح له::
عبدالله بابا قال لي ..انه يوم ظهروكم من السياره ..وودوكم المستشفى ..صارت لكم غبيـ...غيبوو...غبيووبه..ما اعرف ..لكن بابا قال انكم راقدين..ومحد يعرف متى تنشون ..لكن انت الحمدلله نشيت ..وباقي خليفه حليله ..
عبدالله .ارتاح يوم درى ان اللي فكر فيه الحمد لله ما صار..لكنه اتضايق يوم عرف انه ربيعه في غيبوبه..وهو السبب..غمض عبدالله عيونه ..وهو يتذكر شو صار..وكيف وقع الحادث...خليفه في غيبوبه واخر شي يعرفه انه عبدالله يخونه ..
اتضايق عبدالله من الفكره ..وحس انه لازم يشوف ربيعه ..لازم يوضح له شو صار ..لااازم..
شويه ودخل ابو عبدالله ومعاه امه ..
امه عبدالله لوت على ولدها وحبته وهي اتصيح وقالت::
الحمدلله يا ربي والله بغيت امووت يا ولدي ..لو تدري كم مره دعيت ربي انه ياخذ من عمري ويعطيك ..
عبدالله حب ايد امه وقال لها ::
الله يطول بعمرج يا الوالده ..دعواتكم اهي الي نجتني والله من الحادث..
ويلس ابو عبدالله وامه عدال ولدهم وتموا يخبرونه كيف كان الوضع وكيف وصلهم الخبر..وشو صار .والصدمه اللي يتهم يوم دروا انه في غيبوبه..
وكلام الدكتور اللي قال لهم ..ان الغيبوبه محد يعرف متى الشخص يصحى منها ..يمكن في يوم ويمكن في شهر ويمكن بعد سنوات طويله..وها الشي اللي احبطهم ..وخبروه عن حمده اللي كل يوم كانت تيلس عنده وتقرى له القران..
واستانست حمده ..وتمت اتدلع جدام اخوها ..وابتسم عبدالله ..وطالع ابوه وقال له ::

وخليفه ؟؟
سكت ابوه ..ونزل راسه ..ولفت امه ويهها الصوب الثاني ودمعت عيونها ..
عبدالله كرر والح في سؤاله::
ابويه ..خليفه؟؟شو استوى له؟؟خبرني ابويه؟؟
ابو عبدالله::
يا ولدي ..انت تعرف ان الحادث كان قوي ..والحمد لله انه نجاكم منه ..لكن تعرف الدعمه كانت صوب خليفه ..وحالته كانت اسوء من حالتك ..وسوله اكثر من عمليه ..لكن بعده في غيبوبه ..والله وحده يعرف متى يظهر منها ..

انصدم عبدالله من رمسه ابوه ..وحس بقلبه يعوره اكثر ...اللي صار هذا كله منه هو ...اهوو السبب..لو صار شي لخليفه ..عمره ما بيسامح نفسه ابدا..ابدا..
عبدالله::
ابويه اريد ازور خليفه ..
ابو عبدالله..::
يا ولدي انت بعدك تعبان ..الدكتور قال لازم الراحه التامه ..حتى البيت ما طاع انه نوديك له ..
عبدالله بصوت حازم ..::
ابويه اريد ازور خليفه..خيفه ربيعي ..ومستحيل ما اكون يمه في الموقف..لاني اعرف انه لو اانا مكانه ..كان هو اول الناس يمي..وانت يا بوي تعرف ها الشي ..

[هنوف الروح]

صدق الله العظيم...

خلصت ساره قراءه جزء من القران ..وحبت المصحف وحطته على الطاوله اللي عداال خليفه..وتمت اطالع خليفه ..اللي في غيبوبه اكثر من شهر ..دمعت عيون ساره ..وهي تشوفه وهو موصل بوايرات ..واجهزة ..وتمت تدعي في قلبها انه ربها ينجيه ..ويقوم من الغيبوبه..وتذكرت كيف وصلها الخبر ..تذكرت انها كانت يالسه في الصاله مع حريم اخوانها ..ودخل حمد وسيف وابوها ..وتموا يطالعونها ..وسكتوا كل اموجودين في الصاله..واللي رمست هي امها ..قالت لهم :
بسم الله بلاكم ساكتين ..خيير شو صار ..
حمد وسيف كانوا منزلين روسهم ..دق قلب ساره ...حست انه في شي صار..وبدون ما تدري وقفت وقالت ..ابويه ..خيير..في شي..
مشى ابوها صوبها وقال لها يلسي يا بنتي بخبرج شي..ما قدرت ساره تيلس وحست انه في شي خطير استوى ..وقالت بدون ما تحس ::
خليفه..خليفة ..فيه شي..؟؟
ونزل ابوها راسه ..مسكت ساره جتف ابوها وقالت ::
ابويه خبرني ..خليفه صار له شي ..سيف ارمس ..بلااااك ساكت ..حمد قول شي..
ومسك ابوها ايدها بقوه ..وقال لها::
يا بنتي ..كل شي مقدر ومكتوب ..خليفه ..خليفه انجلبت فيه السياره ..هو وربيعه ..وهم الحين في المستشفى ..وحالتهم صعبه واااايد..

ساره ما سمعت باقي الرمسه ...دارت فيها الدنيا ..وطاحت..ونقلوها المستشفى ..واول شي قالته يوم حست .خليفه..واول ما تعافت ..اصرت انها تزوره..ومحد قدر يمنعها ..واول ما شافته ..ما قدرت اتيود دموعها ..كانت تبي تحضنه ..تبي تخفف من المه ..لكن ما قدرت بسبب الوايرات والاجهزة اللي موصلينها فيه..وشافت اهل خليفة كلهم .امه واخوانه ..وخواته..واصرت ساره انها اتم مع خليفه ..وما تحركت من عنده ..من الصباح الين ينتهي وقت الزياره...
بطلت ساره عيونها .وهي اتذكر ..كيف انه اخوان خليفه ..كانوا حليلهم ..محتارين بين اخوهم وربيع اخوهم ..كانوا يزورون خليفه ..ويزورون ربيعه...اللي الكل عارف انه اكثر من اخ بالنسبه لخليفه..
نهدت ساره..وطالعت ريلها .كان مغمض عيونه..طالعته ساره بحب وحنان ..
رفعت ايدنها للسما ودعت من كل خاطرها ..
(( يارب يا ذا العزة والجلال والجبروت ،، يا من لا يضام من لجأ اليك،، اسألك بكل اسم سميت به نفسك ،، او انزلته على عبادك،، او ستأثرت به في علم الغيب عندك،، ان تشفي خليفه زوجي ،، وتحفظه من كل سؤ،، اللهم لا ملجأ لي سواك،، انت ربي ،، اعلم بحالي مني،، يا من لا يمل سؤاله ،، ويغضب اذا ترك سؤاله ،، يارب ،، يا كريم ،، يا عظيم ،، يا ذا الجلال والاكرام،، ارحمه برحمتك ،، وانزل عليه ،،لطفك وعفوك واحسانك، يا رب يا رحيم ،، يامن يجيب دعوة الداعي اذا دعاه ،، اشف لي زوجي خليفه،، وارحمه برحمتك،، اللهم امين ..اللهم امين..اللهم امين...
ونزلت دمعه من عيون ساره..وحست بالم في صدرها ..ومسكت ايد خليفه..وحبتها ..ورفعتها عند عيونها ونزلت دموع ساره على ايد خليفه..
ساره استانست يوم سمعت انه عبدالله فاق من الغيبوبة..وتمت تقول في نفسها اذا عبدالله الله نجاه ..اكيد الله بينجي خليفه ..بعد.. وتمت تفكر في نفسها ليش تجاوزوا الاشاره..ليش..الكل مستغرب من ها الشي ..شو صار منبينهم ..الكل يقول انهم تنازعوا في المكتب ..واللي يعرفونه انهم صعدوا السياره مع بعض ..وكانوا مسرعين ..وصار الحادث لانه خليفه اتجاوز الاشاره ..والحمد لله ان صاحب الاستيشن ما ياه غير رضوض متوسطه ومحد صار له شي..غير خليفه وعبدالله..
وعبدالله نجا من الغيبوبه..وما بقا غير خليفه ..وردت اطالع خليفه..ورفعت ايده مره ثانيه لشفايفها ..وحبته ..وقالت له بصوت خفيف..
خليفه ..حبيبي ..يله شد حيلك ..انا اترياااك..خليفه ..انا احبك ..وامووت فيك ..لا تخلى عني ..
وتمت ترمسه ..خليفه كان في غيبوبته ....وما يحس باللي صاير حواليه..كل يوم كان مسموح لشخص واحد انه يزور خليفه بس..وكل يوم كانت ساره عنده ..ومرات امه ..ومرات حد من اخوانه ..
ولما انتهت زياره ساره ..ظهرت من قسم العنايه وسارت صوب اللفت ..كانت متغشية ..وانتظرت الين يفتح اللفت بابه ..واول ما فتح ..كان داخل اللفت اثنين مواطنين واستحت ساره ونزلت عيونها..لانه واحد منهم كان على كرسي متحرك..والثاني ريال عود..وسلم الريال العود مع اللي في الكرسي ..ورفعت ساره عيونها وردت السلام بصوت واطي..وحست بالدنيا ادور بها ..هذا عبدالله ..ظهر الريال وولده من اللفت ودخلت ساره مكانهم ..طبعا هي عرفت عبدالله ..لكن عبدالله ما انتبه لها ..ما عرفها وهي متغشيه..وقبل ما يصك اللفت بابه..التفت عبدالله يطالع منو هذه الحرمه..وشاف وحده متغشية ولافه ايدينها على جسمها بقوه ..وصك اللفت بابه ..ما عرف شو اللي خلاه يلف صوب الحرمه ..لكن في شي خلااه يلتفت ..
ساره داخل اللفت ..ما قدرت ريولها تشيلها ..يلست على الارض وتمت ترجف..ليش عبدالله في الكرسي المتحرك..ليش ..
وتم ها التساؤل يدور في راس ساره ....

[هنوف الروح]

وصل عبدالله وابوه الى غرفه خليفة ..ووقفتهم الممرضه وقالت لهم ان الزياره خلاااص انتهت وما يسمحون لاي احد بالدخول .. لكن عبدالله وابوه تموا يناقشونها ...

عبدالله::
ما عليه اختي ..سمحيلنا ..بس خمس دقايق ..هذا ربيعي وانا كنت وياه في السياره ...وابا اتطمن عليه ..
الممرضه ::
ما بئدر والله ..ممنوع الطبيب محدد له بس شخص واحد يزوره ..انتو هيك بتعبوه للمريض..
ابو عبدالله::
ما عليه يا بنتي تراه ربيعه ويحب يتطمن عليه ..عطيه بس خمس دقايق ..يشوفه ويتطمن ..
عبدالله ::
هيه بس خمس دقايق وان طولت دخلي وظهريني برع ولج الحق..
الممرضه تمت محتاره بينهم ..لكن قلبها حن لما شافت عبدالله وحالته وعرفت انه هو اللي كان في السياره مع ربيعه ..وقالت له:
خلاص استاز ..لكن بس خمس دقايق ..ما بئدر اكتر من هيك ..بلييز لا تعملي مشكل مع الطبيب..وحاول انك ما تجهدو للمريض ..وازا حبيت تحاكيه ..حاكيه بصوت واطئ ازا سمحت ..
عبدالله سمع تعليمات الممرضه ..ودخلته الممرضه على خليفة ..وتركته بعد ما ذكرته مره ثانيه بالتعليمات بصوت منخفض..
عبدالله ما عرف شو يسوي..كان يسمع صوت الجهاز اللي موصل بجهه قلب خليفة ..وشاف الاجهزة والوايرات اللي موصوله بجسمه ..حس عبدالله بتانيب الضمير ..كل هذا بسببي ..كله هذا بسبب غبائي ..وانانيتي ..سامحني يا خليفه سامحني يا خوي ..ومسك عبدالله ايد خليفه ..وضغط عليها بشكل خفيف ..ونزلت دمعه من عينه ..ورفع عيونه لخليفه ..وقال له بصوت خفيف ..خليفة ما ادري اذا كنت تسمعني او لا ..خليفة انت ربيعي ..واكثر من اخوي ..وانت اعارف ها الشي ..خليفة احلف لك باللي نجاني من الحادث وعطاني عمر يديد..ان ساره حرمتك اطهر منها ما شي..انسانه جدا محترمه ..وصدقني الصورة اللي شفتها ..هاي طرشتها لي قبل لا تعرفك وبعد الحااااح مني ..وهي ماطرشتها الا وهي كانت حاطه في بالها اني بتقدم لها ..والله العظيم انها عمرها ما تجاوزت حدودها في الرمسه معاي ..وكانت دايما توقفني عند حدي اذا حاولت اني اتجاوز حدودي..والله العظيم انها يوم انخطبت لك وملجت عليها ..ما رمستني ..ولا حتى ردت علي يوم انا اتصلت فيها ....خليفه صدقني ..ساره جوهره غالية ...وصدقني واكررها لك عمرها ما خانتك ...ولا بتخونك ..وانا حتى طرشت لها مسج استسمح منها ..ويمكن اللي سويته غلط ..بس انا كنت ابا اعرفها ها الشي واني خلاااص بعرس ..وبشوف حياتي مع انسانه ثانيه..والله العظيم والله العظيم والله العظيم انها ما خانتك..صدقني يا خليفة ..ساره تحبك وانا متاكد من ها الشي ..
وقف عبدالله من الكرسي وهو ماسك ايد ربيعه ..وعيونه تدمع..وحب راس ربيعه ..ونزلت دموع عبدالله على جبهت خليفه ..وقال عبدالله بصوت مبحوح ..سامحني يا خليفة ..الله يشفيك ويعافيك ..ويردك لاهلك وناسك ...سامحني يا اخوي..
وما قدر عبدالله يوقف اكثر لانه جسمه بعده ضعيف ..ويلس على الكرسي المتحرك مره ثانيه ..
ودخلت الممرضه وقالت له :
استاز بلييز ..خلاااص ما بئدر اخليك اكتر من ها الوئت مع المريض..
عبدالله وبدون ما يطالعها..هز راسه ..وضغط بشويه على ايد خليفه وقال له ...مع السلامه يا خوي ..الله يشفيك ويقومك بالسلامه ان شاء الله..

وظهر عبدالله من الغرفه ..وما قدر ايود عمره وتم يصيح مثل الياهل جدام ابوه اللي لوى عليه وتم يصبره::
لا يا ولدي بارك الله ..ما يصير جذا ,,,انت ريااال مؤمن ..خل ايمانك بربك كبير.ان شاء الله بيقوم بالسلامه مثل ما قمت انت ...

عبدالله وهو يحاول يمسك نفسه::
كل ها بستي انا ..خليفه ما كان بيستويله شي ..ان السبب..والله لو صار له شي..ما بسامح نفسي..ابدا ما بسامح نفسي..
وشويه ظهرت الممرضه وهي مسرعه من غرفه خليفة ..ووقفت عند الرسبشن وقالت للمرضه اللي واقفه ورا انها تنادي للدكتور ..وما شي دقايق اللا انترست البقعه دكاتره وممرضات ودشوا غرفه خليفه..وعبدالله وابوه مستغربين من اللي قاعد يصير ..وحاول ينادي الممرضه ..لكن الكل كان مشغول ومو فاضي...
ووقف هووابوه على صوب يتابعون اللي قاعد يصير ..واول ما خطفت من عدالهم الممرضه.زمسك عبدالله ايدها وقال لها ::
نيرس خبريني شو مستوي شو صار..؟؟؟
الممرضه وهي مرتبكه::
المريض تحرك..فتح عيونه..بليييز لازم ابلغ اهلو تا ييجوا ..هاي اوامر الطبيب..وبسرعه وقف عبدالله وسار صوب غرفه خليفه وطالعه من خلف الزجاج اللي بالممر..وشاف الدكاتره فوق راسه ..والممرضات ..وخليفه شكله كان تعبان ...ويطالعهم وهو مستغرب..ودمعت عيون عبدالله ..وقال في خاطره ..الحمد لله ..الحمد لله ..
وفي لحظه غريبه ..لف خليفه راسه صوب الحاجز الزجاجي للغرفه..وشاف ربيعه عبدالله واقف هناك ..والدموع في عيونه..خليفه ...حس باحساس غريب..وتقابلت عيونهم لدقيقه..وابتسم عبدالله لربيعه ...ورد خليفه الابتسامه ...لكنه بسرعه غمض عيونه من الالم ..حس انه بذل مجهود كبيير ..وجسمه كله يعوره..وفتح عيونه مره ثانيه..ولف مره ثانيه صوب الزجاج..لكن عبدالله ما كان موجود ..
وما شي نص ساعه الا انترست البقعه ...اهل خليفه كلهم حضروا ..امه واخوه العود كانوا اول الواصلين ..وتمت امه اتصيح وتهلل ..وتحمد ربها انه رد لها ولدها..
ونقلوا خليفه من غرفه العنايه المركزة ..الي غرفه ثانيه ..في نفس قسم عبدالله..
واول ما استقر الوضع وستقر خليفه في غرفته ..وامه واخوانه وخواته حواليه ..دخلت ساره مع امها ..طبعا اخوان خليفه ساروا الغرفه المخصصه للضيوف..وخواته نفس الشي ...وتمت ساره وامها وام خليفه ..
ولوت ام خليفه على ساره وهي تصيح ..
الحمد لله ..الحمدلله ..يا بنتي ..الله جبر بخاطري وردي ولدي ..الحمد لله ..
ام ساره::
الحمدلله على سلامته يا ام طارق...تستاهلين سلامته ..الحمد لله على سلامتك يا ولدي..
خليفه بصوت مبحوح::
الله.يسلمج..
ساره وهي خاطرها تلوي على ريلها لكن منحرجه من امها وام خليفه:
خليفه..الحمد لله على سلامتك ..بغيت امووت ..يوم دريت بالحادث..الحد لله انه ردك لنا ..ردك لي ..
ومسكت ايد ريلها بقوه ..وخليفه يطالعها بكل حب ..ليش مب قادر يكرهها ..ليش ..ليش وده انه ياخذها في حظنه..
وقالت ام خليفه لام ساره..
تعالي يام حمد نترياهم مع الحريم ونخليهم على راحتهم...واول ما ظهروا من الغرفه ..رمت ساره نفسها على خليفه وتمت اتصيح..وحط خليفه ايده على راسها ..وقالت له ساره::
خليفه..خليفه...لو تدري شو صار لي ...بغيت امووت ..حتى كانت سودا بعيوني..دخيلك خليفه عشاني ..عشاني ..لاتسوي ها الحركه مره ثانيه ..لا تسرع....والله اني امووت لو كان لاسمح الله استوى بك شي..انت عمري وحياتي ..كيف تباني اعيش من دونك..
وتمت اتصيح ..وخليفه حس بحب كبير لساره ..وغمض عيونه ..وهو يتذكر كيف صار الحادث..ورفع راسها وقال لها بصوت مبحوح::
الحمد لله ساره ..الحمد لله على كل حال ..شو كنتي اتحرين انج بتخلصين مني بها السهوله..هههههه
ساره ابتسمت وحبت زوجها على راسه وخده وقالت له::
لاااه انت كنت اتحرى انك بتهرب مني ..والله انا لاصقه فيك وماكو فكه مني هههه
وغمض خليفه عيونه ..كان بعده تعبان..وشويه دخل الدكتور والممرضه ..وقال لهم كلهم ان المريض لازم يرتاح..وباجر يقدرون يزورونه..

[هنوف الروح]

عقب ما غادر الكل ،،وبالغصب ام خليفة سمعت كلام الطبيب والممرضات انه خليفه لازم يرتاح ومب لازم اطول فتره الزياره بالنسبه له ،، لانه حالته ما تسمح ،،ويقدرون يزورنه كل يوم لكن ما يطولون عليه ،،عقب ها كله كان خليفه بروحه في غرفته يطالع الباقات اللي في الغرفه وسلات الحلويات اللي في كل مكان ،،غمض عيونه وتم يفكر ويفكر ،،يا ترى شو بيصير ،،دمعت عيونه وهو يتذكر كل شي ،، يتذكر كيف صار الحادث وكيف كانت نهايته ،،وتذكر عبدالله ،،ربيعه عبدالله ،، اخوه عبدالله ،، تذكره وحس بغصه كبيره وما قدر يتنفس ،، معقوله ان ها اللي صار كان حقيقه ومب حلم ،، معقوله ،،ساره ..وعبدالله ..مبن بين كل البنات يا عبدالله ما تحب الا ساره حبيبتي ...ومب بين كل الشباب يا ساره ما تعرفين الا ربيعي وخوي عبدالله !!!! سبحان الله ..انا في حلم او علم ..كيف صار ها الشي ..وكيف انا وعبدالله حبينا نفس البنيه ..كييييف..خليفه راااسه عوره من كثر التفكير وما عرف شو يسوي..وبدون ما يحس نزلت الدموووع غزيره من عيونه وما قدر يوقفها ..وتم يتنهد ويصيح بصوت واطي خايف حد يسمعه .،،شو بسوي الحين..شو اقولهم ؟؟!!
من ناحيه ثانيه ..عبدالله كان منسدح في غرفته في المستشفى يفكر في نفس الموضوع ،، شو بيكون الحال الحين ،، شو بتكون النهايه يا ترى ،، اكيد كرهني خليفه ،، وما وده يشوفني ..وين يشوفني وانا كنت مخزن صوره حرمته في موبايلي..كيف يحترمني وانا مطرش لها مسجات وعندي رقمها ،،، خليفه شو دراه ان ساره عقب ما انخطبت قطعت علاقتها فيني ..شو دراه ان ساره ما تخون ،، وكيف بيصدقها حتى لو حلفت له اغلظ الايمان ،، ياااااه ..غمض عبدالله عيونه وهو يفكر في الموضوع ،، شو اقول حق ابوي اذا اصر اني ازور خليفه ..شو اقول حق ربعي وهلي واهل خليفه واخوانه اللي ما قصروا وزاروني ووقفوا مع ابوي في الحادث جني ولدهم مب بس خليفه ..شو اقول ..؟؟!! شو اسوي ؟؟!!!..وساره ما تستاهل مني كل ها الشي .. ولا خليفه ...
يااااه ما اغباني ..ليتني مسحت صورتج يا ساره ..ليتني ما طرشت لج اي مسج ..ليتني احترمت رغبتج وما ضايقتج ..ليتني ..وليتني..لكن ماتنفع كلمه ليت الحين ...خلااااص الحين لازم نحط النقط على الحروف..لازم اواجه خليفه ..لازم ابري ذمه ساره من الموضوع كله ..ساره ما لها ذنب في اللي صار كله ..

غمض عبدالله عيونه وهو معزم بالباجر يسير عند خليفه ويخبره كل شي ويستسمح منه ..
تمت ها الفكره في رااس عبدالله ..وتم يحضر الكلام اللي بيقوله لربيعه خليفه ...عبدالله مب عارف ان الباجر مخبي له مفاجأه ..

ثاني يوم في( مستشفي خليفة ) المكان الي يتعالج فيه عبدالله وخليفه في نفس الوقت الساعه كانت عشر ونص ..وساره حاشرة خليفه تباه ياكل شويه من الاكل اللي يايبتنه وياها وهو مب طايع..
خليفه بصوت ضعيف ومبحوح::
ساااره دخيلج.. والله ما لي نفس ما اقدر ....تراج اخس عن الوالده ..

ساره ::
يله عاااد حبيبي عشاان خاطري والله تاكل ها اللقمه بس ..انت اصلا ما كلت شي ....ولااا زم اتغذى زين ..شوف ها الوايارت اللي معلقينها عليك ما بيخوزونها الا يوم تحسن اكلك ..بليز حياتي عشاااني ..عشاان سارونه الحلوة ..
وقربت منه وهمست في اذنه بدلع ::
بعطيك هديه حلوة ان اكلت ها اللقمه ..
وغمزت له ساره بدلع ودلال وابتسمت لان خليفه فهم شو تقصد ساره من كلامها ..وابتسم وبطل حلجه ولقمته ساره بايدها ..
ساره بكل حب ::
فديتك والله خليفه ..يله عشاني ..تحمل عشان ترد لنا بسرعه ...لاعت جبدي من المستشفى ..واباك تظهر منها باسرع وقت ..
وحطت الصحن على الصينيه العوده عدالها ودزتها بعيد شويه عنها ...وحست بايد خليفه على ايدها ولفت عليه اطالعه بكل حب ،، وقربت منه وعطته بوسه على خده وعلى راسه ..وابتسمت له يوم غمض عيونه ..وقربت اكثر وحبته على عينه اليمين واليسار .وقالت له ::
خليفه حياتي تدري اني احبك وامووت فيك ..ولو بايدي اعطيك من عمري عمر ثاني ..يا بعد قلبي انا ..
طالعها خليفه وحط عينه في عينها وقال لها ::
صج ساره تحبيني ؟؟يعني تحبيني من كل خاطرج ؟؟
استغربت ساره من سؤاله ،،وانصدمت من رده فعله ،،كيف يسال ها السؤال ؟؟!!
ساره باستغراااب::
خليفه حبيبي ..انت شو تقول ؟؟!! شو ها السؤال الغريب ؟؟!!
خليفه وهو يكرر السؤال مره ثانيه وعيونه في عيون ساره بحزم ::
سااره انا سألتج انتي تحبيني صج ؟؟تحبيني بطريقه عمرج ما حبيتي فيها احد من قبل؟؟!!
ساره وهو مو مصدقه اللي قاعده تسمعه من خليفه ..
خليفه ..حياااتي ..انت حبيبي وانت عمري ..وانا احبك من كل قلبي ..انت خليت لحياتي طعم ولون ..من قبل كانت حياتي عاديه ..ومن عرفتك كل شي تغير..كل شي صار له طعم ..كل شي صار غير وكل شي استوى حلو بطريقه عجيبه..يمكن انا ما اقدر اوصلك اللي اباه ..لكن اباك اتاكد من شي وااحد ..انه انت الوحيد اللي في حياتي كلها وما في حد غيرك..وصج انا احب اهلي لكن انت محب...
وهني قاطعها خليفه وقال بكل وضوح وجراه ومراره بقلبه :
وعبدالله ؟؟
اهني عااااد حست ساااره بالدنيا ادور فيها ،، اي عبدالله ..منو عبدالله ،، منو تقصد يا خليفه وانربط لسانها مره وحده وما عرفت اتكلم ...

خليفه كرر سؤاله وعيونه تدمع من الالم :
وعبدالله يا ساااره عبدالله ؟؟؟عبدالله ربيعي؟؟عبدالله اعز ربعي ؟؟بعد حبتيني اكثر عنه؟؟؟

ساااره انخطف الدم من ويهها وما عرفت شو اتجاوبه ..عبدالله ..معقوله يكون عبدالله قاله شي ..لا مستحيل ..مستحيل ..حست الدنيا ادور فيها ..معقوله هو يعرف بالموضوع ..
خليفه وبدون ما يتريا رد ساره:
ساااره دخيلج جاوبيني على سؤالي ..ساره انا عرفت كل شي ..وعرفت انج حبيتي عبدالله قبلي..ما يهمني كيف عرفتيه ..اهم شي عندي الحين واللي ابا اعرفه ..انتي حبيتي عبدالله مثل ما تحبيني الحين ؟؟؟!!!حبيتي عبدالله قبل ما تعرفيني او بعد ما عرفتيني؟؟؟ ساااره قولي رمسي لا تسكتين دخييلج..
خليفه كان يهز ساره من جتوفها وهى مب عارفه اترد عليه..شو اقولك..شو تباني اقوول..دموعها كانت تنزل بغزاره وهي مب حاسه فيهن..وخليفه بعد عيونه حمر وتدمع من الوضع كله ..
خليفه كل شي عنده يهون الا الخيانه ..كل شي عنده يغفر له الا الخيانه ..خليفه حس بالتعب وما قدر يتحمل وحط راسه على المخده وايده بعدها ميوده ساره ..ما قدر يبطل عيونه ...ما حب ان ساره اتشوفه ضعيف جدامها ..ما حب دموعه تنزل جدام اي حد..
ساره كانت ترتجف بقوة ومن الغصه والعبره ما رامت ترمس او تقول شي ..وبدون ما تحس عقت عمرها على خليفه وحضنته بكل قوتها وتمت اتحبه على راسه وعيونه وخدوده وخشمه وشفايفه .وتقول له ودموعها تنزل ::
خليفه ..خليفه ..انا ما ادري انت كيف عرفت ولا يهمني ..المهم عندي والي ابااك تعرفه انه انت الريال الوحيد اللي حبيته من كل قلبي ...ومن كل قلبي اباه يصدقني ..خليفه حياتي وعمري انته...اباك تتاكد من شي واحد ..انه الدينا ما ضحكت لي ولا عرفت معني الحب الا معاك انت وبس..لا مع عبدالله ولا غيره..يمكن علاقتي كانت مع عبدالله قبل ما اعرفك ..لكن والله العظيم انها ما تعدت التليفون ..والله العظيم ..واحلف لك باللي خلقني اني ما تجاوزت حدودي معاه ..واباك تتاكد ان اللي كان بينا كان اعجاب اكثر منه حب ..وها اللي اكتشفته عقب ما عرفتك..تدري ليش ..تدري ليييش..لاني عرفت معني الحب الحقيقي معاااك ..عرفت كيف الحرمه تخاف على ريلها ..عرفت ان الحلال ما في احلى عنه واطهر عنه وارقى عنه..
واباك تعرف بعد اني ما عرفت عبدالله عقبك ..ولا كلمته ولا كلمني ولا اعرف عنه شي ..وما اريد اعرف شي..تدري ليش ..لانك انت كل شي بحياتي ..لانه انت عمري وقلبي وروحي..وما بي من ها الدينا شي الا رضاك وحبك ..وصدقني يا حبيبي اني بمووت لو حسيت انك تشك في حبي لك ...
خليفه كان يسمعها ...ولوى عليها وضمها بكل قوته ..وحس انها صادقه في مشاعرها ..وحس بحب كبير ناحيتها ..ورفعت ساره راسها وعيونها في عيون خليفه وقالت له:

خليفه انت الوحيد اللي في حياتي ...وما يهمني اي حد ثاني ..انت تفهم او لا..انت الحب الاول والاخير في حياتي كلها ..
وقامت ساره بسرعه ودشت الحمام وتمت اتصيح ..واتصيح ...وسمعت خليفه وهو يناديها ..وما قدرت توقف على ريولها ..ويلست على الارض وضمت ريولها على صدرها وحطت راسها وهي تحاول انها تسكت عمرها ومب قادره وصوت خليفه يقطع قلبها من كثر ما ناداها ...

خليفة يبا ينش من مكانه ويسير صوب ساره ،، يبا يحضنها ويهديها ،، حس بحب كبير صوبها ،، خليفه حبه لساره كان كبير ،، وزاد حبه لها بعد ما سمع منها ردها حس ان كل كلمه كانت تظهر من شفايفها تضرب قلبه وتقوله ساره تحبك ساره عمرها ما تخونك ،، وحس ان الكلام اللي قالته ساره سمعه من قبل..مب غريب على اذنه ها الكلام ،،حاول انه يقوم لكن اريوله ضعيفه بده ما يروم يوقف مب شويه انه يكون شهر ونص راقد في غيبوبه ويقدر انه يحرك ريوله ..كانت واااايد ضعيفه ويبالها تمارين عسب تسترد قوتها وتكون مثل اول ،،،خليفه حس بالخوف على ساره .،، وزقرها مره ثانية :

سااره دخيلج ردي علي ،، ساره ابا اشوفج ، ردي علي ،،الله يخليج ساره ،، طمنيني عنج ،، ظهري ابا ارمس ويااج،،سااااره ترى ما ارووم اوقف على ريولي لا تذليني جييه دخيلج..

ساره من سمعت ها الكلام عورها قلبها على خليفه ..وقامت .وغسلت ويههاااا..وتنفست بكل هدوء ..وظهرت وتمت واقفه على الباب..وبدون ما ترفع راسه ..سمعت خليفه يقول..

ساره فديت قلبج انا تعالي صوبي ..دخيلج تعالي ..والله ما اروم امشي ولا اقدر اوقف تعالي ..
وما قدر خليفه يكمل تم يكح ويكح ..وحس انه صوته لاااص بيختفي..
وركضت صوبه ساره وعطته مااي وهي تقرى عليه وتسمي عليه ..ومن شرب خليفه الماي حس براحه شويه ...ومسك ايد ساره بقوله وقال لها بصوت تعبان:
ساره انا احبج وامووت فيج ...واذا انتي عمرج ما حبيتي احد كثري فانا اقولج اني عمري ما حبيت وحده ولا بحب وحده بعدج ...
ساره حست بشي غريب ..ما تدري شو هوو..المفروض ان ها الكلام يريحها ...وتحس بالفرحه ..لانه زوجها سامحها خلااااص ..لكن في شي نغص عليها فرحتها ماعرفت شو هوو..
وكل اللي قدرت انها تسويه انها تحب خليفه على راسه ..ونشت ساره وظهرت موبايلها ودقت للدريول ايها ..خليفها ستغرب من حركتها وقال لها ::
وييين بتسيرين ؟؟؟والله ما تسيرين ؟؟مستحيل اخليج اتسيرين انتي فاهمه ؟؟بعدني في خاطري رمسه اقولها ..
قاطعته ساره وقالت له وبدون ما اطالع في عيونه ::
لازم ترتاح ..الدكتور قال ما نضغط عليك..بييك المغرب ان شاء الله..
واصر خليفه انها اتم ،، واللي انقذها وصول طارق واخوه مع شويه شباب وقامت وظهرت وسارت صوب الغرفه المخصصه لمرافق المريض وانخشت فيها ..أول ما دخلوا الريايل دق الدريول وقال لها انا وصلت تحت ..وظهرت ساره من الباب وشافها طارق وسار وراها وسلم عليها ..

طارق ::
السلام عليكم ..ساره اشحالج..

ساره انحرجت ،،، واايد تستحي من طارق:
وعليكم السلام ..الحمد لله الله يسلمك انت شخبارك ،، وشخبار الاهل كلهم والوالده ؟؟
طارق بخير علج الخير ،، والله الوالده بتي العصر ..مع الحرمه وخواتي،،وانتي ..هااا قرت عينج بشوفت ريلج ههههههههه

ساره انحرجت اكثر وما لها خلق اتسولف ::
هيي والله الحمد لله على كل حال ،، ما عليه اسمحلي طارق الدريول تحت ومظطره اسير السموحه منك..
طارق انحرج وحس انه معطل ساره::
لاااا افا عليج،،، تبيني اوصلج الين تحت عاادي والله ..
سااره:
لااااه والله ما له داعي تسلم والله ،، وما تقصر ،، ما عليه سير وشوف خليفه وربعك ما باخركم ..
مع السلامه وسلم على الوالده ..
وسارت بسرعه بدون ما تنتظر الرد منه ..
استغرب منها طارق ، لكنه قال اكيد هي منحرجه لانها واقفه بروحها معاي ،، وما تم يفكر في الموضوع واايد ..وسار عن اخوه يتطمن عليه.

[هنوف الروح]

رجع طارق الغرفه مره ثانية ،، وشاف خليفه وربعه يسولفون ،، لكنه حس ان خليفه مب وياهم
كان شكله سرحان ..وفي شي شاغل مخه ،، وتاكد منها الشي يوم قال ربيعهم خالد شي عن عرس خليفه وضحكوا الشباب لكن خليفه ما كان وياهم ..وانحرج خالد..وهني طارق ادارك الموقف وقال لهم::

يله عااد الريااال شكله تعبااان وميهود ،، يباله يرتاح شويه ،،صح خليفه ؟؟
ومسك طارق ايد اخوه عسب ينبه للرمسه،، وهني خيليفه طالع اخوه وقال وبدون ما يعرف شو الموضوع :
هيه صح ..
وهني قاموا الشباب وسلموا على خليفه ووصلهم طارق اليين الرسيبشن ورد لاخوه ..اللي كان مغمض عيونه وحاط ايده على راسه اللي كان يعوره من التفكير بساره ..وعبدالله..

طارق كان خايف على اخوه وااايد وبعد خايف لان الدكتور قال ان العلاج الطبيعي بيطول ويمكن خليفه يحتاج للسفر خارج للعلاج ،، عسب تتقوى ريوله ،، وتم طارق يطالع خليفه وقرب صوبه وقال له :

خليفه ..شو تحس ...شو يعورك بالظبط..لو تبي من اليوم بنسفرك خاري للعلاج ..انت بس قول شو يعورك ولا تخلينا نحاتيك..

خليفه وهو يطالع اخوه باستغراب:
طارق بلاك ما فيني شي يا خوي ،، انا بخير ،،بس راسي يعورني شويه،،المهم شفت ساره وهي ظاهره من ساعه ..؟؟
طارق :
هيه شفتها ..كانت مستعيله ...يمكن انحرجت يوم شافت الشباب دخلوا..
خليفه وهو يطالع اخوه :
هييه ..يمكن انحرجت لما دخلتوا..طارق بتخبرك..

طارق ::
خير خليفه شو عندك..

خليفه وهو متردد ..يتكلم او لا..::
طارق ..شو..شو..حال عب..عبدالله ..شو حالته ..وينه ...

طارق كان حاس انه في شي مستوي بينهم ها الاثنين ومب عارف شو صار منبينهم .::

والله عبدالله بخير الحمد له ..ونفس الشي يباله علاج طبيعي ..لكن حالته اخف عن حالتك.. هو يروم يوقف شويه بروحه ..لكنه بعد يباله تمارين وعلاج وان شاء الله بيخف..انتو احمدو ربكم ان النخله ردت السياره والا كنتوا بتنجلبون مليون مره ..الله ستر وسلم ..

خليفه وهو يطالع اخوه ،، وحس بألم في قلبه ،، شو اسوي شو اقول الحين ،،وقطع طارق تفكيره وقال له :
خليفه بسألك شو صار ؟؟ليش كنتوا مسرعين جييه ..مب من طبعكم ها الشي ..؟؟شو صار ان احس ان فيه شي؟؟خبرني شو صار؟؟

خليفه وهو يحاول يتجنب نظرات اخوه:
ما شي..مااا في شي..عادي انجلبت فينا السياره ..
طارق وهو مو مصدق اللي يسمعه ::
عااااادي؟؟شو اللي عااادي؟؟عاااادي انك تسرع ويا ربيعك في الشارع العام ..وتعرضون نفسكم وغيركم للخطر..؟؟؟هااعاااادي؟؟ خليفه عااادي انك الين الحين ما تسال عن ربيعك عبدالله ؟؟ وهو ما ايي ايزورك ..مع انكم في نفس المستشفى ..؟؟ في شي مستوي وانا مصيري بعرفه يا خليفه صدقني ..

طارق قال كلامه ونش من عند اخوه لان الممرضه دخلت وتبي تعطي الادويه حق خليفه..

في غرفه عبدالله ..

حمده وامها يالسين مع عبدالله يسولفون وهو مستانس على حمده وخبالها ،،

حمده ::
تعرف عبدالله ،،انا سويت لك لوحه عووده وعلقتها في المدرسه وخذت عليها المركز الاول ،، هييه رسمت فيها ورود وزينتها وكتبت عليها ايه قرانية وعقب بيت شعر يتحمد بسلامتك وعقب كتبت اني مشتاقه لك واااايد واني اباااك اترد لنا بالسلامه لانه البيت مو حلو بدونك ..

عبدالله وهو يبتسم لاخته ويطالعها بكل حب وهي اتدلع ويطالع امه اللي بعد مبتسمه ، وحز في خاطره في ها اللحظه ان كل شي يتغير ،، وسرح عبدالله بتفكيره شو بتقول عني امي اذا درت بالموضوع ، شو بيكون موقف ابوي اذا عرف ..وشو رد فعل اهل خليفه ..عبدالله ما قدر يستانس باللحظه الحلوة اللي عاشها مع امه واخته ..وحس بايد امه على جتفه تهزه ..وتقول له:

عبدالله يا ولدي شو فيك؟؟ليش شردت مره وحده..

عبدالله وهو يطالعها :
هاا..لا..لا...معاااكم ..هاا حمده كملي وشو بعد صاار..

حمده وهي اطالعه بكل استغراب ،،:
شو صار في شوو؟؟ماماه ترمسك مب انا ..

وشهقت حمده وقالت بصوت عالي :
لااااايكون انا يالسه ارمس وانت ما كنت تسمعني يا عبووود هااااا ...
ضحك عبدالله وهو يشوف رد فعل اخته وقال :
لا والله.. والله اني سمعت شو قلتي ..مب انتي خذتي المركز الاول في لوحتج صح او لا؟؟
حمده وهي اتنفس ونها ارتاحت ::
هييه اتحرى بعد انك ما سمعت ..

وسمعوا ثلاثتهم دق على الباب..وصوت رياال يقوول هود هود وينادي عبدالله...

اام عبدالله عدلت شيلتها وسارت حمده عند الباب وشافت طارق اخو خليفه واستحت حمده يوم سلم عليها وحبها على خدها وقال لها :
هلا حمده شحالج حبيبتي ..شخبارج ..وشو اخبار المدرسه ؟
حمده وهي اونها عاااد مستحيه ومنزله رااسها وهي تجاوبه بكل ادب:
زينه ..تبا عبدالله ..ماماه هني بعد ..تبا اتسلم عليها ..
انحرج طارق وما عرف شو يرد عليها ..وشويه سمع صوت عبدالله يقوله ادخل.
ودخل طارق ولقى عبدالله بروحه في الغرفه وحمده استغربت وقالت له ::
عبدالله وين ماماه ليكون سارت عني؟
عبدالله وهو يضحك عليها :
لاااه وين اتسير عنج ..انروم نحن نسوي ها الحركه فيج ..نعرفج بتاكلينا ..
وضحك طارق من رد عبدالله ..وسارت حمده الغرف المخصصه لمرافق المريض لان امها كانت هناك ..
طارق حس بشويه احراج وسلم على عبدالله وقال له بسرعه :
عبدالله اذا اهلك هني ترى عادي برد وقت ثاني ..
عبدالله :
لاا ما عليك يا ريااال ..محد غريب ترى الوالده وحمدوه اختي الخبله ..
طارق وهو يضحك :
حرام عليك والله انها حبوبه ..المهم انت شخبارك...
عبدالله :
والله الحمد لله ..احسن عن قبل..الحين اقدر انش بروحي واتحرك بدون الكرسي لكن بعدني لازم استخدم العكازات ..بس الدكتور قال انها حل مؤقت الين ما تقوى ريولي..
طارق :
الحمد لله ..ان شاء الله ترد بالسلامه وتقوم حق اهلك وناسك بخير ..
وسكت شويه طارق وقال حق عبدالله وهو يطالعه في عيونه :
خليفه يسلم عليك..
عبدالله انصدم وبهت شويه في طارق وقال له :
شوووووه؟خل..خليفه ..يسلم علي انا ؟؟هو قال لك سلم على عبدالله ؟؟
طارق حس صدق انه في سالفه جايده مستويه بين ها الاثنين ..رد عليه طارق وهو مستغرب من رد فعله:
اييه ليش انت مستغرب ..خليفه يسلم عليك ..ربيعك يسلم عليك ..عبدالله شو صار من بينكم ؟
طارق عق السؤال بسرعه ويطالع رد فعل عبدالله ،، اللي ما عرف شو يقول وسكت ونزل عيونه ..
طارق حس انه ضايق عبدالله وهو ما يبا ها الشي ..وقال له:
اسمعني يا عبدالله ..شوف مهما صار بينك وبين خليفه ..ترى هو ربيعك وانت ربيعه..وانت شرات الاخوان ما تستغنون عن بعض..فلا تخلون اي شي يفرق من بينكم ..انا ما اعرف شو استوى بالضبظ ولا ادري شو سبب الحادث ولا شو سبب سرعتكم اللي بغيتوا تجتلون فيها خلق الله ..بس اللي اعرف زين ومتاكد منه انكم مهما صار بينكم من مشاكل انت اكبر منها واقوى انكم اتخطونها ..
عبدالله عيونه دمعت وما قدر يرفع راسه ..وقال في خاطره..انت ما تعرف شو اللي صاير ..لو كن مكانه ..كنت بتذبحني ..اقل شي تذبحني ..ها شرفه ..عرضه ..وانا خنته ..ان ما استاهل حتى انه يسامحني ..
طارق حط ايده على ايد عبدالله وقال له :
عبدالله يا خوي ..المواجهه اهم خطوه في حل المشاكل..صدقني ..انت ابدا الخطوه الاولى وبتشوف كيف الامور بتنحل وبترد شارت قبل واحسن ..لانه خليفه ما له غنى عنك ..يا خي انا كنت اغااار من كثر ما اييب طاريك ..سرت ويا عبدالله ..وكنت عند عبدالله ..واليوم سهرنا انا وعبدالله..والله حاااله .ههههههههههههههه

ضحك عبدالله من كلام طارق وحس انه يبا يلطف الجو وقال له ::
ان شاء الله ..بحاول ..ان شاء الله يتفهم ..لكن خبرني هو شخباره الحين ..احسن من قبل..
طارق وهو ينش من مكانه ويغمز له :
سير له وانت بتعرف ..هههههه ..يله فداعه الله ..
طارق كان بيظهر من الغرفه وشاف الباب انفتح ونزل راسه وشويه ظهرت حمده وهي ماسكه العصير وخايفة انه ينجب ..ضحك طارق عليها وخذ منها قلاس العصير وقال لها :
مشكوره يا عسل ..الله يحظي انا اليوم ..ها البنيه الغاويه صبت لي عصير ..اذووب انا ..
استحت حمده وشردت عند اخوها وانخشت وراه وهي تقول بصوت واطي:
العفو ...ماماه كانت تباني اييب قهوه بس نا ما قدرت ايود الفنيان لانه حار قلت لها صبي عصير احسن..
ضحك طارق من ردها وعبدالله ابتسم وقال ::
يااالله حمدووه من متى الحيا والخجل ها كله ما احيدج..ههههههه
طارق وهو يبتسم لها :
مشكورة يا قمر ..
وتم يطالعها وقال لعبدالله ..
تصدق انها تشبهك ..حليلها ..يله عبدالله ما اوصيك ..المواجهه اهم واول خطوة..
وسلم عليه وظهر من الغرفه ..

حمده طالعت اخوها وقالت ::
شو يعني المواجهه ..شو يقول ربيعك ..ما فهمت ..
عبدالله وهو شارد بتفكيره :
بس انا فهمت ..
وعزم عبدالله انه اليوم يواجه خليفه...

في بوظبي ..في الشقه اللي ماجرينها اهل ساره ..ساره يالسه في غرفتها ..تفكر وتفكر ..شو بيصير ..كيف عرف خليفه ..كيف درى ..ياااه راااسي ..راااسي يعورني ..شو اسوي ..شو اقوله ..لكن انا قلت له كل الي في خاطري ..وكيفه يصدق او لا..
ساره عيونها كانت حمر من كثر الصيااح ..ما عرفت شو تقول حق امها..ولا حق عليا..ما كان لها خلق تشوف اي حد ..
شو اسوي يا ربي ..شو اسوي ..ما اقدر اطالع خليفه ..ما اقدر..بس والله اني احب خليفه اكثر والله ان..خليفه هو حبي الاول والاخير..ما اقدر اعيش بدونه ..ما اتخيل حياتي بدونه ..كنت وااايد خااايفه من ها اليوم ..وااايد خاايفه ...كنت حاسه ان السعاده اللي انا فيها ..ما بتكتمل ..استغفر الله العظيم ...والله اني محتاره ..شو اسوي ..ما ادري شو اسوي ..وزااد عواار راااسها ..وما عرفت شو تسوي..وحطت ايدها على راسها وحست انه بينفجر ..وسمعت دق خفيف على الباب ..ودشت عليا وقالت لها :
ساره فديتج ماما تقول لج تبين اتسيرين المستشفى حق خليفه..؟؟
ما ردت ساره وتمت صاخه ..وبدون ما اطالع عليا قالت لها ..
لا ما اريد..انا وااايد تعبانه وراسي يعورني ..سيروا انتوا اذا تبون ..
وتغطت وما عطت اختها اي فرصه للنقاش..
ظهرت عليا من الغرفه وسارت وبلغت امها باللي قالته ساره..واستغربت امها من ردها ..لكنها قالت خلاص خليها على راحتها ..

[هنوف الروح]

عبدالله يالس يشرب شاي مع اخته حمده في الصاله ،،ويطالعون التلفزيون ،،وحمده تهذرب وتهذرب وعبدالله مستانس على سوالفها ،،وشويه سمعوا صوت سياره ..وماشي دقايق الا دخلت امه ووراها خدوي ..

ام عبدالله :
السلام عليكم ..
عبدالله وحمده :
وعليكم السلام ..
حمده قالت بسرعه وحضنت امها ،،وسلمت على خدوي بنت خالها ..وقعدوا كلهم ،،وطالع عبدالله حرمته خدوي وهو مستغرب ليش ممتاخرين الين الحين..وقال:
خدوي ليش تاخرتوا ..وين ها كله موعد ما صارت..
خدوي ابتسمت وطالعت خالتها ونزلت راسها وما رمست ..ام عبدالله ابتسمت وقالت لعبدالله :
عبدالله قم بارك الله فيك حرمتك تباك في سالفه ..
عبدالله وهو مستغرب ..:
خير ؟؟شو فيه ؟؟خدوي فيه شي؟؟
خدوي ردت بصوت خجول :
تعال حبيبي اباك في سالفه ..
عبدالله نش مع حرمته وطلعوا فوق ..واول ما وصلوا الجناح المخصص لهم ..
طالع عبدالله حرمته وهو مستغرب ..فصخت خدوي عباتها ويلست عدال ريلها وهي اطالعه بكل حب ..
عبدالله منتظر انها ترمس وتم يطالعها وعقب قال..
خدوي حبيبي ياله عااد شو فيج ..خبريني..
قامت خدوي من مكانها ووقفت جدام عبدالله وهي مبتسمه .وحطت ايدها على بطنها ..ورفعت راسها وطالعت ريلها ..
عبدالله طالع حركتها وتم مستغرب وشويه استوعب حركتها ونقز من مكانه ووقف جدامها وهو يقول :
خدوووي فدييتج ..شو ..انتي..انتي..حا..حااامل ..

خدوي استحت وحمرت خدودها ..وهزت راسها ..
عبدالله صرخ من فرحته وقال :
حياااتي انتي والله ..الف الف مبروووك تستاهلين والله ..ياا عمري والله انا مو مصدق نفسي ..معقوله ...معقوله انا بستوي اب ..يااااه الحمد لله ..الحمد لله ..تعاالي ..تعالي يا بعد عمري يلسي ولا تتحركين وكل شي تبينه بييج الين عندج..

خدوي تمت تضحك وقالت له ::
حبيبي وييين بعدني ترياا الين اوصل الشهر الخامس او السادس عسب ادلع على راحتي ..
عبدالله :
لاااااه شو الخامس والسادس ..انتي من اليوم ورايح ما تسوين شي سمعتي ولا تشيلين ولا تحطين سمعتي ..
وركض عبدالله وفتح باب غرفته وتم يزقر امه وحمده وابوه بصوت عال..
وماشي ثواني الا وصلوا الجماعه وهم مستغربين منه ..
ابو عبدالله:
عبدالله خير يا ولدي شو يااك ..ليش تصارخ..؟
ام عبدالله :
خله على راحته يا بو عبدالله ..ترى من الفرحه الواحد ما يعرف شو يسوي..
حمده مستغربه شو صاير ..وهي اطالع خدوي اللي خدودها كانن حمر ..ومستحيه ..وطالع عبدالله اللي يحضن ابوه ويحضن امه من الفرحه ..
وقالت ام عبدالله :
اخير يا بو عبدالله بتشوف حفيدك من ولدك عبدالله ..هييه ترى خدوي فديت عمرها حامل ..
استانس ابو عبدالله وحضن ولده بقوه وتم يبارك له ..واستانست حمده وتمت تناقز وهي اتصارخ وقالت :
الله اخييرا بستوي عمه عيالك ...والله بصفعهم خخخخخخخخخخخ
عبدالله مسكها وحملها لفوق وقال لها :
والله والله ان لمستي حد من عيالي يا ويلج ..
وضحكت ام عبدالله عليهم وقالت :
هههههههههه شو بلاااكم انتو بعدكم الياهل ما وصل ومحتشرين عليه...
خدوي وهي منحرجه من الوضع كله ومستحيه :
والله خالوه انا بخليه عندج وانتي يوديه من عبدالله وحمده الصراحه اخاف عليه من ها الاثنين

ضحك ابو عبدالله وقال :
مبروكين يا عيالي تستاهلون ..يله عاااد خدوي يا بنتي انتبهي لعمرج وما اوصيج ترى خالتج مثل امج اي شي خبريها انزين بنتي ..بارك الله فيج..
خدوي :
ان شاء الله عمي والله خالوه مثل امي واكثر وهي تدري بمعزتها عندي..

وقالت حمده بصوت طفولي برئ :
عبدالله تعرف اذا ظهرت بنيه بنسميها حمده انزين ..
عبدالله وهو يضحك :
لااااه وإن ظهر ولد شو بنسميه حميد مثلاا..
حمده ردت بسرعه وقالت :
لاااا ..بنسميه خليفه...
وهني عاااد سكت عبدالله ...حس انه في حد صفعه ..واختفت ابتسامته ..وحاول ابوه انه يخفف التوتر اللي صار من كلام حمده ..

لاااه حمده ..ابوه وامه هم بيختارون اسمه نحن ما لنا خص انزين بويه..

عبدالله حاول انه يمشي الموضوع عادي ...وكمل مع ابوه السوالف ..وفرحتهم بخدوي والخبر الحلو اللي يابته معاها..
وعقب ساروا وتعشوا وكلن دخل غرفته .....

عبدالله تم يطالع خدوي وهي راقده ..وحط ايده على راسها ومسح على راسها وابتسم..
ونش من مكانه وسار صوب البلكونه وفتح الباب وقفله من وراه .ويلس على الكراسي اللي حاطينها على بلوكونه غرفته ..
تذكر كلام اخته ..اذا كانت بنت بنسميها حمده ...كان وده يقول انه نسميها ساره..لكن يود لسانه في اخر لحظه .. واذا كان ولد بنسميه خليفه...خليفه..اااااه يا حمده ..شو خلاااج اتذكريني ...

وغمض عبدالله عيونه...وسرح بتفكيره لهذاك اليوم ..لليوم اللي قرر فيه انه يواجه ربيعه خليفه ..لليوم اللي حاول انه يتطمن على ربيعه ..لليوم اللي حاول انه يرد كل شي مثل ما كان لكن كل شي تغير..
************************************************** ******

عبدالله كان يمشي في الممر وكل اللي يسمعه كان دقات قلبه ..وصوت العكازات اللي يستند عليها ..كان واااايد خايف ..خايف من اشيااء واايد ..خايف ان خليفه اول ما يشوفه يطرده..وخايف انه ينسى كل الكلام اللي حضره ..وخايف انه اييب طاري ساره مره ثانيه ويعصب خليفه عليه...وهو مب عارف شو حاله خليفة ..وقف شويه وسند ظهره على الطوفه ...وحس ببرودة الطوفه ..وما قدر يخفف من الضغط اللي حاسس به ..وتم يقرى شويه اياات عسب يحس بشويه قوه ..ووصل عند الغرفه اللي فيها خليفه..ووقف جدامها ..وحس ان ضربات قلبه زادت...حس انه الكل بيسمع دقات قلبه ..وجمع قوته ورفع ايده و..ودق الباب..

وتريا شويه عند الباب ..وما سمع صوت ..وبطل الباب..ودخل ..وشم ريحه الورود والباقات اللي تارسه الغرفه..ولمح بعينه الباقه اللي خلا ابوه يطرشها باسمهم وابتسم يوم لقاها موجوده في الغرفه..
ولف صوب شبريه خليفه ...ولقاه راقد والاضاءه منخفضه ..والغرفه هاديه ..وزادت دقات قلب عبدالله..وحس انه وده يطير لربيعه ..ويلوي عليه..ويقول له سامحني ..ولمح بطرف عينه الكرس المتحرك اللي مخصصينه لخليفه..وعوره قلبه على ربيعه ..وفجأه تحرك خليفه فوق شبريته ..وتجمد عبدالله وحبس نفسه ...وحس انه خلاص مب رايم يوقف ويبا يقعد..
خليفه تحرك وحس انه في حد في الغرفه وهو على باله الممرض دخل او حد من المستشفى ..لانه مب وقت زيارات ..وبطل عيونه ...وشاف ريال واقف..جدامه بعكازات ..بطل عيونه اكثر ..
عبدالله من شاف خليفه بطل عيونه قال في خاطره خلاااص ما شي فايده ..وتذكر كلام طارق ..المواجهه اهم واول خطوة لحل المشاكل...
خليفه مو مستوعب اللي يشوفه ..حتى انه ابتسم في البدايه يوم شاف عبدالله ..وفي جزء من اللحظه رد له عبدالله الابتسامه ..لكنها بسرعه اختفت ..يوم انتبه خليفه للوضع ..وتذكر كل شي..
وحاول انه يقعد ويعدل يلسته على سريره ..وتم الاثنين ساكتين ...محد فيهم تنطق ...وعيونهم في عيون بعض ..
عبدالله تنفس بعمق وحاول انه يبدا الكلام :

الس..السلااام عليكم ..
خليفه لف راسه وما قدر حتى يرد السلام ..
رد عبدالله وقال :
السلام عليك خليفه ..وحمد لله على سلامتك ..اجر وعافيه وماتشـ..
قاطعه خليفه بصوت حاد :
نعم خير شو عندك ..بعد لك ويه اتيي ..وتسوي عمرك ما مسوي شي...مب كفايه اللي سويته ..مب كفايه اللي صار لي من ورااك ...ليش يااي ...وشو تبا..
عبدالله انصدم من كلام ربيعه ...وتفاجأ من رده فعله العنيفه..وقال له :
خليفه دخيلك لا تعصب ..ولا تنرفز نفسك يا خوي انا والله ياي اشرح لك الموضوع وابري ذمتي وذمت سـ....
وسكت عبدالله وبلع لسانه يوم بغى يقول اسم ساره...
وعصب خليفه وقال له :
اسم حرمتي لا تييبه على لسانك ..تسمع او لا...انت تفهم او لاااا
عبدالله قال :
لا يا خليفه انا ياي هني ولازم تسمعني ..لازم اوضح لك ..الله يخليك لازم تسمع وتفهم ..ان اللي صار من بيني وبين سـ.. وبينها ..كان قبل لا تعرفك ..وقبل لا تملج عليها ..والله العظيم انها ما لها ذنب ..في الي صار ..والله العظيم انها بريئه...وما يخصها في كل شي صار...صدقني والله واحلف لك وعساني ما انش على ريولي مره ثانيه اذا انا كنت اجذب عليك..

خليفه قاطعه وقال له :
شو تحلف وشو تبرر ...انت خنتي يا عبدالله..وانت تعرف اني اقدر اسامح كل شي الا الخيانه ..وتعرف زين مستحيل اسامح اللي يخوني ...ولو كان اخوي..

وسكتوا الاثنين مره ثانيه..كان الموقف متوتر بينهم ...ولف خليفه ويهه الصوب الثاني وما قدر يطالع عبدالله ..حس انه قلبه يعوره على ربعيه ...وهو شايفه انه مب رايم يوقف ..وحس بتعبه وهو يحاول انه يوقف ويوازن نفسه ..لكن عقله كان يقول له لا ...لا تضعف ..لا تنسى اللي سواه فيك..

تنهد عبدالله وغمض عيونه وتنفس بعمق ..وقال وبدون ما يهتم لكلام ربيعه:
اسمعني زين يا خليفه..انا صح عرفت ساره .وصح كنت ارمسها بالتيلفون ..لكن والله والله العظيم انها عقب ما ملجت عليك ما طارعت حتى ترد علي..بالعكس ..صانتك وحافظت على اسم الانسان اللي بترتبط فيه حتي قبل ما تعرف انك ربيعي ..ساره بنت ناس وعرب ...ساره جوهره ولازم تحافظ عليها ..
وقاطعه خليفه وقال:
والصوره ...والمسج اللي قريته ..شو كاان..هااا خبرني ..
عبدالله صدق كان تعبان ومب رايم يوقف ..وكان يهتز وهو واقف ويحاول يوازن نفسه...وقال:
هذه الصوره كانت مطرشتنها قبل لا تخطبها ....مطرشتنها وهي كانت واثقه اني بتقدم لها ...مطرشتنها بعد الحاااح كبير مني..والا هي ما كانت بطرشها ابدن..لكن انا الحيت عليها وزنيت الين ما ضعفت ..وصدقني المسج اللي شفته ...كان عباره عن اعتذار حقها ..لاني جرحت مشاعرها ...وهنتها ..وهي ما تستاهل ...وانا حبيت ابين لها اني خلاااص بشوف حياتي وبخليها في حالها ..واني بخذ بنت خالي ..صدقني صدقني يا خليفه ..ساره عمرها ما غلطت معاي ..ولا عمرها ظهرت معاي ..والاكيد انها اكيد ما كانت تخونك..ولا بتخونك ...خليفه ..لا تخلي العصبيه والغضب يعمون عيونك عن الحقيقه ..لا تخسر ساره في لحظه غضب ..

وسكت عبدالله ..وما قدر يوقف على ريوله ويلس على الارض ..وحس بالدموع تحرق عيونه..وخليفه يطالعه وقلبه يعوره على ربيعه ..لكنه بعد في شي يحز في خاطره ..هو متأكد من ربيعه ...والي اكد كلام عبدالله ..انه نفس كلام ساره ..وحس بشويه راحه..لكنه بعد في شي في خاطره ..
عبدالله استجمع قوته ووقف مره ثانيه..وطالع خليفه وقال له:
خليفه ..انت ربيعي ..وانا عمري ما افكر اخونك ..عمري..وانت تعرفني زيين...وانا لو مو مهتم انك تعرف الحقيقه ...صدقني ما كنت تعبت عمري وييتك ....ولا كلفت على نفسي اني ابين لك اي شي..

خليفه كانت عينه تدمع وقال له بصوت مبحوح :
عبدالله اللي صار شي مب هين ترى ..اللي صار شي اكبر عني وعنك ..واذا انا قلت اني اقدر اسامحك انت وساره ...اكون اجذب على نفسي قبل لا اجذب عليك..
وسكت شويه ..وخذ نفس وكمل كلامه:
ولا تظن اني اقدر انسى اللي صار ..ونرد نفس قبل ..يمكن مع الوقت اسامح ..لكن مستحيل اني انسى ..و اعتقد انك قلت كل اللي تبا تقوله وما في شي تقدر اتزيده ..

ولف خليفه ويهه صوب الدريشه وما قدر ايود دموعه ..وعبدالله حس انه خلاااص خسر ربيعه ...خسره للابد ...وما في شي يقدر يخليه يرد يسامحه ...نزل عبدالله راسه وحس بالغصه في قلبه .ليش قلبك جاسي يا خليفه ...ما احيدك جييه ..وشل بعمره وظهر من الغرفه وقبل ما يوصل للباب..لف صوب ربيعه وقال له وبكل الم وحسره :
سامحني يا خليفه..سامحني يا خوي..
وظهر عبدالله من عند خليفه وقلبه يعوره ..وما صدق متى يوصل لغرفته ..وكانت يدعي في قلبه انه ما يلاقي حد هناك ما له خلق لاي حد ..والحمد لله ما لقى اي حد ..وبسرعه عق بعمره فوق شبريته ..وحس بالم كبير..الالم ما كان جسماني ..كان الم نفسي ..حس بويع في قلبه ..وحس بغصه..
************************************************** ************
فتح عبدالله عيونه وهو يتذكر كل هذه الاحداث اللي استوت حس بغصه وهو يتذكر كلام ربيعه وصديقه خليفه..
كيف ان الاحوال بعدها تغيرت ..كيف حاول طارق انه يعرف شو صار من بينهم وما قدر ..وفشلت محاولات ابوه انه يعرف ليش الاثنين ما قاموا يرمسون بعض ..وكيف انه بعد فتره سمعوا انه خليفه فج ملجته عن ساره ..طلق ساره..وكيف ها الخبر كان مثل الصدمه للكل ..وما شي فتره بسيطه الا سمع بسفر خليفه للخارج للعلاج.. وصار له كمن شهر في الخارج .ويعرف اخباره عن طريق اخوه طارق ...
ورد عبدالله ودش غرفته ..وكانت حرمته راقده ..ابتسم عبدالله يوم شافها ...رحمها عبدالله ..وتذكر كيف كان عرسه..وكيف انه عرس عقب سفر خليفه بشهرين ..تنهد عبدالله بدون ما يحس بصوت مسموع ..خلا حرمته خدوي تحس فيه..ونشت وبطلت ليت الابجوره الي عدال الشبريه وقالت له :
عبدالله حبيبي شو فيك ..حياتي تحس بشي..تبني اييبلك شي..؟
عبدالله رد وانسدح عدالها وابتسم لها وقال لها:
لا حياتي ...ابا سلامتج ..حياتي رقدي ..ولا تحاتيني ..ارتاحي انتي ..انا الحين برقد..
ورقدت خدوي ..وكان في سؤال يلح في خاطره من زمان ...كيف كان انفصل خليفه عن ساره ..ها اللي كان يبي يعرفه عبدالله ..

[هنوف الروح]

في العين ..

ساره ردت من دوامها الظهر وهي تعبانه وميهوده..وشافت سياره اخوها حمحد واقفه عدال البيت .وعدالها سياره نيسان اول مره تشوفها ..وما اهتمت لان راسها كان يعورها ..ووقف الدريول السياره عند باب الفيلا ..وظهرت ساره واول ما تحرك الدريول رفعت ساره غشوتها وصعدت الدرج اللي جدام الباب ..واول ما حاولت ادش باب البيت شافت حمد وامها ومعاهم ريال ثاني واول ما شافت الريال عدلت شيلتها اللي كانت طايحه على جتوفها ومن شافها الريال نزل عيونه وتكهرب الموقف ..وعدلت ساره شيلتها واكتشفت ان الريال كان ولد عمها سلطان الظاهري..وقالت ساره وهي منحرجه:
السلام عليكم ..
الكل ::
وعليكم السلام..
حمد :
هلا ساره شخبارج ..
ساره:
الحمد لله..
سلطان وهو يطالع ساره:
هلا ساره شخبارج ..ان شاء الله بخير ..شو الدوام وياج ...
ساره وهي منحرجه :
الحمد لله سلطان.. انت شخبارك ..
سلطان :
الحمدلله ..شو تبينه الدوام يا ساره والله ما له داعي ..ما اعتقد انه في شي ناقصنج..
ساره:
مب شرط اكون محتايه عسب اشتغل ..الموحه منكم انا تعبانه ..سمحولي...

صعدت ساره فوق وبدون ما تنتظر رد من احد ..هي عارفه ليش سلطان ياي اليوم ...زياراته زادت هاالايام ..وتعرف زين شو يبا..
حمد انحرج من اخته وقال لولد عمه :
ما عليه سطان..ما عليك منها ...مدلعه ترها..تعال بوصلك الين سيارتك..
سلطان:
لا ماعليه حصل خير..فداعه الله خالوه ..اشوفج على خير ان شاء الله..
ام ساره:
فداعه الله يا ولدي ..الله يحفظك..
وصعدت ام ساره بسرعه وسارت جناح بناتها ..ولقت عليا يالسه ترمس في التيلفون واول ما شافت امها بندت عن ربيعتها وسارت صوب امها ..
عليا :
هلا امايه..شو سار سلطان ..
ام ساره:
هيه يا بنتي سار ..وين ساره في حجرتها؟؟
عليا هيه توها داشه ..جنها الا تسبح ..
ام ساره :
هااي وبعدين وياها ..لين متى بتم جييه..الريال ثالث مره ايي ..واليوم ردت عليه رد الصراحه يفشل ..
وشويه ظهرت ساره ..كانت سابحه وغاسله شعرها وفالتنه عسب ينشف ...
ام ساره:
ساره يا بنتي عيب اللي سويتيه ..
ساره مستغربه رد امها وقالت :
عيب ؟؟شو سويت ماما ؟؟
ام ساره :
ردج على ولد عمج سلطان ..انتي تعرفين انه يبي مصلحتج ..
ساره :
ما يخصه ..انتي وابوي موافقين على شغلي شو له يدخل ..
ساره قالت كلمتها وحمد واقف عند الباب..وسمعها ورد عليها :
شو يعني شو يخصه ؟؟مب ولد عمج ويخاف عليج ..والا شووو؟؟
ساره ارتبكت من حمد ..وطالعت امها ..وقالت:
يا حمد يا خوي ..انا الشغل يسلي وقتي ..شو تباني اسوي يعني ..اقعد في البيت شو اسوي ..
حمد :
ساره الريال يا يخطبج ثلاث مرات ..واليوم بعد يا ..وانتي تردينه بدون سبب..
تنهد حمد يوم شاف ويهه اخته انعفس وحمر وحس انها بتصيح ومسك ايديها ودخل وياها الغرفه وبند وراهم الباب ويلس حذالها على الشبريه وقال لها :
ساره يا اختي يا حبيبتي ..اللي صار صار وانتهى لين متى بتمين جييه ..انتي ما شاء الله عليج ..بنت ناس وعرب والكل يتمناج له عروس..سلطان رفضتيه وهاي ثالث مره ايي وصدقيني لو هو ما يباج صدقيني كان من اول مره قلتي لا ..ما كان قبل مره ثانيه..
سااره عيونها دمعت وهي تذكر خليفه حبيبها ..وما قدرت اترد على اخوها ...
حمد:
ساره يا حبيبتي.. يا اختي انا ابا مصلحتج ..صدقيني ..مب سهله لقب مطلقه في مجتمعنا ..والله انا يحز عليه انه اتمين جييه ..وانتي ما شاء الله عليج ..بعدج صغيره والف من يتمناج..
واللي ياب خليفه اييب غيره..
وهني حست ساره بغصه ..هم مب عارفين شو صار ..محد يعرف شو صار بين خليفه وساره ..
وردها صوت حمد مره ثانية للواقع:
ساره دخيلج وعديني انج تفكرين مره ثانيه ..فكري بجديه ..لا تخلين مشاعرج اتدخل في قرارج..
ترى سلطان ريال وما ينرد ..فكري ..فكري زين وانا خووج..

ووعدته ساره انها تفكر ..وظهر حمد من غرفتها ..ودشت عليا ويلست عدالها وقالت لها :
نفس الموضوع صح..

طالعتها ساره وهزت راسها وقالت :
هييه صح..ااااه راااسي يعورني يا علياااا..انا تعبت خلااااص..ما ادري شو اسوي ..
تمت عليااا ساكته وما ردت عليها ..وعقب قالت :
تبين راايي يا ساره ..
وطالعتها ساره وقالت :
اكيد ابا رااايج ..انتي اختي وانا اعزج...واحب اسمع راييج..
قالت عليا وهي طالع اختها :
وافقي ساره ..وافقي ..
وتمت ساره مبهته في اختها وطالعتها وقالت :
شووه؟؟؟؟؟
عليا قالت :
الصراحه يا ساره سلطان ولد عمنا ريال ما ينرد ..وانتي بتكوني اغبي انسانه لو رفضتيه ..
ساره مصدومه من كلام اختها وقالت :
عليا انتي شو يالسه اتقولين ..انتي تعرفين انه من بعد خليفه انا مستحيل اقبل اي حد ..
عليا قامت من مكانها:
سمعيني يا ساره ..خليفه خلاص سار لحاله ...وهو يتعالج والله يشفيه ..وخلاص انتهى..فكري في حياتج وفكير في مستقبلج انتي ولا تسوين بعمرج جييه سمعتي ..
ساره بعدها مستغربه من رد اختها ..:
عليا اانتي تعرفين اني احب خليفه ..ومستحيل اني اخذ غيره حد ثاني ..مستحيل اني اكون حق واحد ثاني..
وتمت ساره اتصيح ..وعليا عورها قلبها على اختها ..وقامت وحضنتها بقوه وقالت لها :
ساره فديت عمرج لا تعذبين عمرج ..انت ما تستاهلين ها اللي يصير لج كله..
ساره وهي تصيح :
مستحيل انسى خليفه يا عليا مستحيل ..
وتمت عليا مع اختها الين ما رقدت ..وظهرت عليا من عند اختها وخلتها ترتاح..

في الليل وعقب ما رقد الكل ..وفي غرفه ساره ..الساعه كانت 2 في الليل ..ساره ما قدرت ترقد وهي تفكر في كل شي يصير لها ..ليش انا يا ربي ليش ..استغفر الله العظيم ..
ليش يا سلطان ..شو تبا مني ..شو تبا من وحده مطلقه ..وعورها قلبها يوم اتذكرت حالها ..
تذكرت كيف انتهت علاقتها بخليفه ..وغمضت عيونها وهي اتذكر كل شي صار
************************************************** ***************

عقب ما نزلت عليا عند امها وخبرتها شو رد ساره على زيارتها لخليفه,,اتستغربت امها لكن قالت خليها على راحتها اكيد المغرب تبا تسير حق ريلها ..
ساره كانت في الغرفه تفكر وتفكر في اللي صار بينها وبين خليفه..ما تعرف شو تسوي ولا كيف تواجه خليفه عقب اللي عرفته..
الحين سبب الحادث كان انا ..سبب الحادث واللي صار بين عبدالله وخليفه كان انا ..آآآآآآآآآآه يا راسي ..شو اسوي ..وتمت تفكر وتفكر ..واخير عرفت شو اتسوي وقررت انها تنهي كل شي ..

في المستشفي في غرفه خليفه ..خليفه رااسه يعوره ومب خلق اي حد ومب قادر انه يركز مع اي حد الشباب من الدوام يايين ايزورونه ..ومن غير الاهل اللي يالسين في ميلس المقابل ..وطارق يالس يطالع اخوه ..هو متاكد انه عبدالله زاره اليوم لكن شلكهم ما اتصالحوا ...طارق خاطره يعرف شو صار من بينهم ها الاثنين ..لكن خليفه مب طايع يرمس ..
وبعد ما سار الكل كانت ساعات الزياره انتهت ..وقربت الساعه تسع العشاء ..دق الباب ودشوا ساره وسيف ..وكان طارق موجود ..سلموا على طارق وخليفه وقد سيف شويه يسولف مع خليفه وينكت وخليفه بالغصب مركزوياه وعيونه على ساره اللي منزله راسها وطالع اصابع ايديها ..وشويه ظهر سيف وطارق عسب يخلون الريال وحرمته براحتهم ..

تمت ساره صاخه ما ترمس ..وخليفه يطالعها ..وهو يفكر في كلام عبدالله ..
(((ساره بنت ناس وعرب ...ساره جوهره ولازم تحافظ عليها .))

وبنفس الوقت قلبه يصارع عقله اللي ما قدر يغفر الخيانه اللي تعرض لها ..واللي حاسس فيها وتحركت ساره صوب خليفه ويلست عداله على طرف الشبريه وقالت بصوت هادي :
خليفه ..انت تحبني ..؟؟
خليفه اتفاجأ من سؤالها ..ولحظه ما عرف شو يقول لها ..لكنه رد عليها وقال:
شو قصدج ؟
ساره :
خليفه هذا مب جواب سؤالي ..انت تحبني ؟؟
خليفه :
انتي تعرفين اني احبج يا ساره ..لكن ..لكن اللي صار اقوى مني ..لكن صدقيني اني احبج وامووت فيج ساره صدقيــ..
وقاطعته ساره وقالت بكل حزم:
خليفه ..طلقني ..
حس خليفه انه حد صب عليه ما ي بااارد ..شو تقول هاااي ..شو اطلقها ..
خليفه :
انتي شو تقولين ..تخبلتي شوو...شو اطلقج..انت قاعده تسمعين اللي تقولينه ..

ساره وعيونها غرقانه بالدموع ..وتحس انها بتنفجر ..:

خليفه دخيلك ..اذا تحبني طلقني ..اذا صدق تخاف علي طلقني ..الله يخليك ريحيني وريح نفسك ..وطلقني ...

خليفه وهو مستغرب ومعصب وصوته رتفع وهو يرد على ساره:
انتي شو يالسه تخربطين ..شو اطلقج ..شو ياااج ساره ..ومنو قالج انه اذا طلقتج بتراح ..منوه قالج هااا..بالعكس بيزيد عذابي ..دخيلج ساره اللي فيني كافيني ..لا تزيدين عذابي الله يخليج..
مب كافي عبدالله وخسرته والحين تبيني اخسرج بعد ,,حرااام والله حراام..

ساره وهي تصيح وصوتها يتقطع وعذابها يزيد من كلام خليفه .:
خليفه حبيبي والله اني احبك والله العظيم اني احبك ..لكن صدقني انا مو مرتاحه من اللي صار ...احس انه في شي اكسر من بينا ..انا اعرف انك تحبيني واعرف اني احبك ..لكن الحب وحده مب كفايه ..اذا كان الشك موجود..
خليفه انصدم من كلامها وقال :
ومنوه قال لج اني اشك فيج ..منوه قال لج اني اقدر اتخلى عنج ..
ساره وقلبها يعورها مع كل كلمه تقولها :
خليفه بدونمحد يقول ..انت ريلي وانا اعرفك زين..اعرف شو تحب وشو ما تحب ..اعرف شو احساسك ..واعرف مشاعرك زين ...صدقني ...حتى لو خذنا بعض عقب ..ما بنعيش السعاده اللي تمنيتها انا ..
خليفه وهو مو مصدق الله يسمعه من ساره:
ليش يا ساره ..ليش اتسوين فيني جذيه..ليش متوقعه اني جاسي لها الدرجه..الانسان مع الوقت ينسى اشياء واايده..وانا متاكد انه مع الوقت بننسى اللي صار وبنعيش حياتنا مثل كل اثنين حبوا بعض..
سار بغصه والم:
وانا تباني اعيش على امل انك تنسى ..لا اا يا خليفه ..انا اعرفك زين صدقني ..انا اعرف انك مستحيل تنسى اللي صار ..وعسب جييه اقولك طلقني ..طلقني خلااااص ما اقدر اعيش في ه العذاب ..
سكت خليفه وما عرف شو يرد..عمره ما توقع انه ساره تطلب الطلاق منه ..عمره ما توقع ها للحظه اتيي..
ورددت ساره كلامها مره ثانية :
خليفه دخييلك اذا تحبني وتعزني طلقني ..دخيلك ..طلقني ..
خليفه وهو يطالعها وقال:
لا يا ساره انا مستحيل اطلقج...انا وعدتج اني احميج واتم ينبج مهما صار ..تحدين ساره ..تحيدين الوعد الي خليتيني اوعدج اياه ..ما قلتي لي اوعدني انك تحميني وتم معاي مهما صار ..ليش تبين تخلفين انتي الوعد ليش ..
ساره وهي تصيح ..:
خليفه ..انا ما اقدر اعيش معاك عقب الي عرفته عني ..انا ما استاهلك صدقني ..الله يخليك خليفه طلقني..
طلقني ..
وركضت ساره وخلت خليفه بروحه وهو يزقرها وظهر سيف وطارق على صوته ..وسيف ربع ورا اخته ..وهي اتصيح وحاول يعرف منها اللي صار لكن ما قدر وتم خايف عليها .ز
ومن صوبه خليفه كان يصيح مثل الياهل ..وطارق يهدي فيه ..كان الجو متكهرب ..وعقب يا الممرض وعطا خليفه مهدي ومنعوا عنه الزياره لانه حالته النفسيه جدا تعبت ..
وبعدها باسبوع عرفت ساره ان خليفه طلقها ....بغت اتمووت ..يوم درت بالخبر..ما توقعت ان ها اليوم بيي ..تحسرت على خليفه وعلى الايام الحلوة اللي قضتها معاه..ومرضت ساره وتعبت وضعفت وتغير حالها ..ويت ام خليفه الين البيت تعتذر من ام ساره وتستسمحها وتقولها انها ما تعرف شو صاربينهم ومحد طايع يرمس..وانها تبا ساره حق ولدها لكن ما قدرت تغير راايه..
ومن صوبه طارق واخوانه واعمامه حاولوا اكثر من مره ..لكن ما شي فايده ..لا خليفه طايع يرمس ولا ساره ..وطارق الوحيد اللي حاس انه في شي مشترك بين طلاق خليفه وساره وبين فراق عبدالله وخليفه..لكن ما عرف يربط بين الامور..
وما شي فتره شهر الا سافر خليفه للعلاج في الخارج..
وتمت ساره في بيت ابوها طول فتره علاجه وما قامت تظهر ..وصارت حزينه ..وتغيرت .لكن اللي تعرفه زين انه حب خليفه يسري بدمها ..ومستحيل تاخذ غيره مهما كان..
ومرت شهور وعرفت ساره انه عبدالله عرس من سيف لانه طارق خبره وكان يباه يحضر لكن سيف اعتذر لانه عنده شغل مهم مع ابوه ..وحست ساره بااحساس غريب ..احساس ..الخساره..طعم الخساره مر..مر ..علقم...لكن اللي تعرفه انه مهما صار بيظل حب خليفه في دمها ..مستحيل تحب غيره ..مستحيل تاخذ غيره..
************************************************** ***************
بطلت ساره عيونها ..وتمت اطالع سقف غرفتها ..وفكرت في كلام اختها ..صدقها سلطان ما ينرد ..لكن ساره قلبها خلاص مو ملكها ..قلبها ملك ..خليفه..رغم ان خليفه..سافر وما سأل عنها الا انها بتظل تحبه ..
وابتسمت ساره بينها وبين نفسها ..سبحان الله ..كل شي صار بلمح البصر ..تعرفها بعبدالله ..زواجها من خليفه..الحادث..طلاقها من خليفه..آآآآآآه ..يا حسااافه ..نشت ساره من مكانها وتمت واقفه جدام الكمبيوتر اللي بدت منه قصتها ..وقالت في خاطرها ..كل شي ابتدا من هني ...
وتذكرت خليفه ..ودمعت عيونها..وتحسرت على الايام الحلوة اللي قضتها معاه..
حب خليفه يسري في دم ساره.ومستحيل تنساه..لانه الحب الحقيقي ..لانه الحب الطاهر..
ولو خليفه نسى ساره ..مستحيل ساره تنسى خليفه...

من صوبه خليفه في رحله علاجه ..ما كان يمر يوم الا ويفكر في ساره..ما تمر ساعه الا وتمر ساره على باله..من لحظه سفره الين اليوم ..وهو يفكر فيها .ويفكر في عبدالله ربيعه اللي خسر صداقته..
كان يسمع اخبار ساره من طارق ..اللي بدوره يسمعها من اخوها سيف..خليفه حب ساره بطريقه جنونيه ..لكن دام هي طلبت الطلاق انا ما بغصبها على شي ،، خليفه من حبه لسارة ينفذ لها كل شي..
وبعد سمع اخبار عبدالله ..وارتاح اكثر يوم عرف انه عرس وخذ بنت خاله..وحس بغصه وتذكر الوعد اللي قطعوه لبعض انه كل واحد يكون الشاهد في عقد الثاني..

خليفه عمره ما راح ينسى ساره..لانه حب ساره يجري بدمه..والمحبه الحقيقة عمرها ما تنتهي بالطلاق..


ما نسينا .. لو تناسينا ... يالغلا .. في يوم حبينا
يوم كنا بسمة حلوه ... قلب واحد .. من يساوينا ...؟

تذكرين حروف كلماتي ... يوم كنتي اروع ابياتي
يوم قلتي قول وحياتي ... غير موتي .. يفرق ايدينا

تذكرين .. وكم وعدتيني ... كم حلفتي ما اتناسيني
بس اللي صار .. هنتيني ... واستمعتي لعذلهم فينا

ويا حسافة ما مضى والله ... يا حسافة هالغلا كله
ليت قلبي .. ليت ما اتوله ... وليتنا في يوم ما اغلينا

ويالغلا .. وان كان لي خاطر ... عند وعدي لك انا حاضر
لو يضيق بك الفضا .. تامر ... قلبي الوافي لك رهينا

ما ابيعك ذا عهد مني ... لو يخيب احساسي وظني
هب شرا غيري ترا فنى ... يوم اجفي عنك .. تجفينا

وما نسينا .. لو تناسينا ... يالغلا .. في يوم حبينا
يوم كنا بسمة حلوه ... قلب واحد .. من يساوينا ...



************************************************** ********
الـــــــــــنــــــــــــــهـــــــــــــــــايــ ـــــــــة

[jonoon]

يعطيك العافيه

[هنوف الروح]

jonoon..
يعآفيج ربي حبيبتي
تسمين ع ـالمـتآبعـة
يعطيج ـالع ـأإفيـة
لا هنتي..
.
.

[*مهاوي*]

يسلموو على النقل
قصه روووووووعه
يعطيك العافيه

[بحر الندى]

شـكــ وباركـ الله فيكـ ـــرا لكـ...
وجزيتي كلـ الخير
ودمتيـ مبدعهـ و متالقهـ
ووفقكـ الله الى كلـ ما فيهـ خير و صلاحـ
لك مني أجمل تحية .

[هنوف الروح]

*مهآوي*..
الآروع توآجدج و متابعتج يالغلآ
تسلمـين ع ـالمـرور
يعطيج الع’ـأإفية
لا هنتي
:

[هنوف الروح]

بحر الندى..
يسلـموو يالغ’ـلآ ع ـالمـرور الذوق
يعطيج ـألف ع’ـأإفيـة
و لآهآن غآليج
: